དཔྱིད་གསར་དུས་ཆེན་འཆར་ལ་ཉེ་བའི་མཚམས་སུ། རྒྱལ་ཡོངས་གཉིས་བཀུར་ལས་དོན་འགོ་ཁྲིད་ཚོགས་ཆུང་དང་། དམག་ཞབས་ཐིམ་པའི་དམག་མིའི་ལས་དོན་པུའུ། ཀྲུང་དབྱང་དམག་ཨུད་ཆབ་སྲིད་ལས་དོན་པུའུ་བཅས་ཀྱིས་རྒྱལ་ཡོངས་ཀྱི་གཉིས་བཀུར་དཔེ་བཟང་གྲོང(རྫོང)གི་ཏང་ཨུད་དང་སྲིད་གཞུང་དང་། དམག་དོན་ལས་ཁུངས། རྒྱ་ཆེའི་དམག་དམངས་བཅས་ལ་དུས་ཆེན་གྱི་འཚམས་འདྲི་དང་སྨོན་འདུན་བཟང་པོ་ཞུས་པ་མ་ཟད། དམག་བཀུར་ཁྱིམ་སྐྱོང་དང་སྲིད་བཀུར་དམངས་གཅེས་ཀྱི་ལས་དོན་ཁྲོད་ལེགས་སྐྱེས་མངོན་གསལ་དོད་པོ་འབུལ་མཁན་རྒྱལ་ཡོངས་ཀྱི་གཉིས་བཀུར་ཚན་པ་དང་མི་སྒེར་ལ་སྙིང་ཐག་པ་ནས་ཐུགས་རྗེ་ཆེ་དང་བླ་ན་མེད་པའི་གུས་འདུད་ཀྱང་ཞུས་པ་རེད།

འཚམས་འདྲིའི་ཡི་གེའི་ནང་བསྟན་དོན། འདས་མ་ཐག་པའི་2024ལོ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་75འཁོར་བའི་ལོ་ཞིག་དང་། “ལོ་ལྔ་ཚན་བཅུ་བཞི་པའི”འཆར་འགོད་ཀྱི་དམིགས་ཚད་ལས་འགན་མངོན་འགྱུར་བྱེད་པའི་འགག་རྩའི་ལོ་ཞིག་ཀྱང་རེད། ལོ་གཅིག་རིང་། རྒྱལ་ཁབ་ཕྱི་ནང་གི་དུས་བབ་ལས་བྱུང་བའི་འགྲན་སློང་གི་མདུན་དུ་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་ཡོངས་དང་། དམག་ཡོངས། དེ་བཞིན་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ། བབ་བརླིང་ངང་འགྱུར་ལྡོག་ལ་ཁ་གཏད་གཅོག་པ་དང་། ཕྱོགས་བསྡུས་ངང་ཐབས་འདོན་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་གཏོང་བ་བཅས་བྱས་པས་ཚན་རྩལ་གསར་གཏོད་ལ་འཕེལ་རྒྱས་གལ་ཆེན་དང་། ཐོན་སྐྱེད་ནུས་ཤུགས་གསར་མ་བརྟན་པོའི་ངང་འཕེལ་རྒྱས། སྒྱུར་བཅོས་སྒོ་དབྱེ་རྒྱུན་མཐུད་གཏིང་ཟབ། དམངས་འཚོ་འགན་སྲུང་ཏན་ཏིག་ནུས་ལྡན་བཅས་བྱུང་སྟེ་ཀྲུང་གོའི་ལུགས་ཀྱི་དེང་རབས་ཅན་མངོན་འགྱུར་ཡོང་བར་གོམ་སྟབས་གསར་པ་བརྟན་པོ་ཞིག་སྤོས་ཡོད།

འཚམས་འདྲིའི་ཡི་གེའི་ནང་བསྟན་དོན། དྲག་ཆར་རླུང་འཚུབ་ཁྲོད་ཞུམ་མེད་མདུན་སྐྱོད་བྱེད་རིང་། དམག་དམངས་ཁྲི་སྟོང་དུ་མས“དམག་སྲིད་དང་དམག་དམངས་མཐུན་སྒྲིལ་བྱེད་པ་ནི་རང་རེའི་དམག་དཔུང་ལ་རྒྱལ་ཁ་ཐོབ་པའི་མཆོག་ནོར་ཞིག་ཡིན་པའི”གོ་དོན་ཟབ་མོར་གོ་བ་གཏིང་ཟབ་བླངས་ཏེ། ལག་གདང་སྦྲེལ་ནས་འབད་འཐབ་དང་། མཐུན་སྒྲིལ་དང་འབད་འབུངས་མདུན་སྐྱོད་ཀྱིས“གཉིས་བཀུར་ལས་དོན་གྱི་ལམ་སྲོལ”ལག་བསྟར་དོན་འཁྱོལ་བྱེད་པའི་སྒྱུར་བཅོས་ཀྱི་བཀོད་སྒྲིག་གལ་ཆེན་རིམ་པས་ལག་ལེན་བསྟར་བ་དང་། གཉིས་བཀུར་དཔེ་བཟང་གྲོང(རྫོང)འཛུགས་གཏོད་ཀྱི་བྱེད་སྒོ་ལེགས་སྒྲིག་དང་བཟང་སྒྲིག དུས་རབས་གསར་པའི་གཉིས་བཀུར་མཚོན་རྟགས་དང་བརྗོད་དོན་གཙོ་བོའི་གླུ་གཞས་གསར་རྩོམ་ཁྱབ་བསྒྲགས་བཅས་བྱས་ནས་བྲག་ལྟར་བརྟན་པའི་དམག་སྲིད་དང་དམག་དམངས་འབྲེལ་བ་ཟམ་མི་ཆད་པར་བརྟན་དུ་བཏང་ཡོད། གཉིས་བཀུར་དཔེ་བཟང་གྲོང(རྫོང)འཛུགས་གཏོད་ལ་དམ་འཛིན་དང་འཕེལ་རྒྱས་བཏང་སྟེ་བློ་གཅིག་སེམས་གཅིག་དང་བརྩེ་བ་ཆེན་པོས་སྒྱུར་བཅོས་ལ་བརྟེན་ནས་དམག་དཔུང་སྟོབས་ཆེར་གཏོང་བར་ཞབས་འདེགས་ཞུ་བ་དང་། དམག་གྲབས་སྦྱོང་བརྡར་ལ་རྒྱབ་སྐྱོར། “རྗེས་ཀྱི་བཀོད་སྒྲིག་གསུམ”གྱི་དཀའ་གནད་སེལ་བ་བཅས་ཀྱི་སྒོ་ནས་དཔུང་སྡེའི་འཐབ་ནུས་མཐོ་རུ་འགྲོ་བར་འགན་ལེན་ནུས་ལྡན་བྱས་ཡོད། གཉིས་བཀུར་དཔེ་བཟང་ཚན་པ་དང་མི་སྒེར་གྱིས་སྲོལ་རྒྱུན་དར་སྤེལ་དང་ལེགས་ཆ་བཏོན་ནས་དཔེ་སྟོན་སྣེ་ཁྲིད་ཀྱིས་མང་ཚོགས་རང་བཞིན་གྱི་དམག་བཀུར་བྱེད་སྒོ་སྤེལ་ཏེ་དམག་མི་དང་། དམག་མིའི་ནང་མི། དམིགས་བསལ་གཟིགས་སྐྱོང་བྱ་ཡུལ་བཅས་ཀྱི་དོན་དངོས་དཀའ་ངལ་བསལ་ནས་དམག་བཀུར་དམག་གཅེས་དེ་སྤྱི་ཚོགས་ཀྱི་དར་སྲོལ་ཞིག་ཏུ་འགྱུར་བར་བྱས་ཡོད།

འཚམས་འདྲིའི་ཡི་གེའི་ནང་བསྟན་དོན། དུས་ཚོད་དམ་འཛིན་བྱས་ན་འབྲས་བཟང་སྨིན། དོན་གཉེར་བ་ཡི་ཕུགས་འདུན་མངོན་འགྱུར་ཡོང་། 2025ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བསྡུའི་ལོ་ཞིག་རེད་ལ། དམག་འཛུགས་ལོ་བརྒྱའི་འབད་འཐབ་དམིགས་ཚད་མངོན་འགྱུར་བྱེད་པའི་འགག་སྒྲོལ་དམག་འཐབ་ཡག་པོ་རྒྱག་པའི་འགག་རྩའི་ལོ་ཞིག་ཀྱང་ཡིན་པས། གཉིས་བཀུར་དཔེ་བཟང་གྲོང(རྫོང)དང་། གཉིས་བཀུར་དཔེ་བཟང་ཚན་པ། མི་སྒེར་བཅས་ཀྱིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་བཅས་བྱས་ཏེ། དམག་འཛུགས་ལོ་བརྒྱའི་འབད་འཐབ་དམིགས་ཚད་མངོན་འགྱུར་བྱེད་པའི་འགག་སྒྲོལ་དམག་འཐབ་ཡག་པོ་རྒྱག་པར་ཞབས་འདེགས་ཞུ་བ་དང་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱེད་པར་དམིགས་ནས་ཀུན་སེམས་གཅིག་སྒྲིལ་དང་། རང་འགུལ་ངང་བྱས་རྗེས་འཇོག་པ། འགན་འཁྲི་འཁུར་བ། མུ་མཐུད་འབད་འཐབ་བཅས་བྱས་ཏེ་དུས་རབས་གསར་པའི་གཉིས་བཀུར་ལས་དོན་སྔར་བས་གཏིང་ཟབ་དང་ཏན་ཏིག་སྒྲུབ་པ་དང་། བྲག་ལྟར་བརྟན་པའི་དམག་སྲིད་དང་དམག་དམངས་མཐུན་སྒྲིལ་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་སྐུལ་འདེད་གཏོང་བར་ལེགས་སྐྱེས་འབུལ་དགོས།