ཨར་ཅི་རི་ཡའི་རྒྱལ་ས་ཨར་ཅིར་སིའི་པཱ་པཱ་ཙུའུ་ཝ་ཚོང་དོན་ཁུལ་དུ་དེང་རབས་ཅན་གྱི་སྐྲུན་དངོས་ནང་མི་ཚོགས་ཀྱིས་ཁེངས་ནས་ཧ་ཅང་འཁྲུག་ཆ་དོད། དེའི་ནང་ཤར་ཕྱོགས་ཚོང་ལས་ཐང་ཆེན་དུ་མི་མང་ཤོས་ཡོད་པ་རེད།

ཤར་ཕྱོགས་ཚོང་ལས་ཐང་ཆེན་ནི་ཀྲུང་གོ་ཨར་སྐྲུན་ཚོགས་པ་ཚད་ཡོད་ཀུང་སི་ཨར་ཅི་རི་ཡའི་ཀུང་སིས་མ་འཇོག་བྱས་ནས་བསྐྲུན་པ་དང་སྦྲགས་གཉེར་སྐྱོང་བྱས་པ་ཞིག་ཡིན་པ་དང་། 2023ལོའི་ཟླ་2པར་དངོས་སུ་སྤྱོད་འགོ་ཚུགས་ཤིང་། གཞུང་ལས་ཐོག་ཁང་དང་། ལས་ཤག ལུས་རྩལ་སྤྲོ་གསེང་བཅས་གཞི་གཅིག་ཏུ་འདུས་པའི་སྤུས་ཚད་མཐོ་བའི་ཚོང་ལས་ཕྱོགས་བསྡུས་ཁང་ཞིག་རེད། རྣམ་གྲངས་དེའི་འཆར་འགོད་འཛུགས་སྐྲུན་ལ་རྒྱ་ཁྱོན་སྨི་ངོས་གྲུ་ཁྲི་9ཙམ་ཟིན་པ་དང་ཁྱོན་མ་དངུལ་ཨ་སྒོར་དུང་ཕྱུར་1ཙམ་བཏང་ཡོད། མིག་སྔའི་བར་ཧྭ་ཝུའེ་དང་། ཧུའེ་ཧྥུང་། ཨན་ཡུང་། པའེ་ཨེར། ཨར་ཅི་རི་ཡའི་རྡོ་སྣུམ་རང་བྱུང་སོལ་རླངས་ཀུང་སི་སོགས་རྒྱལ་སྤྱིའི་གྲགས་ཅན་ཁེ་ལས་དེའི་ནང་ཞུགས་རྒྱུའི་ཡིད་དབང་བཀུག་ཡོད།

ཁེ་ལས་དེ་བས་མང་བ་བཅའ་སྡོད་བྱས་པ་དང་ཆབས་ཅིག ཤར་ཕྱོགས་ཚོང་ལས་ཐང་ཆེན་དེ་ས་གནས་དེ་གའི་སྐད་གྲགས་ཆེ་བའི་ཁུལ་ཞིག་ཏུ་རིམ་བཞིན་གྱུར་ཡོད། ཀྲུང་གོ་ཨར་སྐྲུན་ཚོགས་པ་ཚད་ཡོད་ཀུང་སི་ཨར་ཅི་རི་ཡའི་ཀུང་སིའི་མ་འཇོག་ལས་དོན་པུའུ་ཡི་འགན་འཁུར་བ་ལིའུ་ཐིང་གིས་འདི་ག་ཚགས་པར་གྱི་གསར་འགོད་པར་ངོ་སྤྲོད་བྱས་དོན། ཉེ་བའི་ལོ་ཤས་རིང་། ཨར་ཅི་རི་ཡའི་མ་འཇོག་ཁོར་ཡུག་མུ་མཐུད་ལེགས་སུ་ཕྱིན་ནས་ཀུང་སིས་ཁྲོམ་རའི་དགོས་མཁོ་སྔོག་འདོན་གཏིང་ཟབ་བྱས་པ་དང་། རྒྱལ་སྤྱི་ཅན་གྱི་གཉེར་སྐྱོང་བྱེད་སྟངས་སྤྱད་པ། ཁོངས་གཏོགས་ཅན་གྱི་སྡེ་ལས་ཚོགས་པ་བཙུགས་པ་སོགས་བརྒྱུད་ཤར་ཕྱོགས་ཚོང་ལས་ཐང་ཆེན་རྣམ་གྲངས་གྲུབ་འབྲས་ཐོབ་པའི་ངང་ལག་བསྟར་དང་སྤུས་ཚད་མཐོ་བའི་གཉེར་སྐྱོང་འགན་ལེན་བྱས་པས། མཁོ་མཁན་གྱི་བློ་ཡིད་ཚིམ་ཚད་རྒྱུན་ཆད་མེད་པར་མཐོ་རུ་ཕྱིན་ཡོད།

ཀྲུང་གོ་ནི་ཨར་ཅི་རི་ཡའི་ཕྱི་རྒྱལ་གྱི་མ་དངུལ་ཡོང་ཁུངས་རྒྱལ་ཁབ་གལ་ཆེན་ཞིག་ཡིན། གྲངས་གཞི་ལས་མངོན་པར། ཀྲུང་གོས་ཨར་ཅི་རི་ཡར་མ་དངུལ་གཏོང་ཚད་རིམ་རྩིས་བརྒྱབ་ན་ཨ་སྒོར་དུང་ཕྱུར་20ལས་བརྒལ་བ་དེ་གཙོ་བོ་སྣུམ་རླངས་དང་། ཨར་ལས་རྒྱུ་ཆ། ཡང་བའི་བཟོ་ལས་བཟོ་སྐྲུན་སོགས་ཁྱབ་ཁོངས་སུ་གཅིག་སྡུད་བྱས་ཡོད། ཀྲུང་གོའི་རླངས་འཁོར་ཁེ་ལས་དང་ཁྱིམ་སྤྱོད་གློག་ཆས་ཁེ་ལས་དེ་བས་མང་བས་ཨར་ཅི་རི་ཡར་མ་འཇོག་བྱེད་པའི་འགྲོ་ལུགས་ཧུར་ཐག་གཉེར་བ་དང་། ཨར་ཅི་རི་ཡའི་ས་གནས་དེ་གའི་མཉམ་ལས་རོགས་ཟླ་འཚོལ་བ། ཨར་ཅི་རི་ཡར་སྔོན་ཐོན་ལག་རྩལ་ནང་འདྲེན་བྱེད་པ་དང་ལྷག་པར་དུ་ས་གནས་ཅན་གྱི་ཐོན་སྐྱེད་བྱེད་བཞིན་ཡོད་པ་རེད།

ཨར་ཅི་རི་ཡའི《མ་འཇོག་བཅའ་ཁྲིམས》གསར་པ་བཏོན་པ་དང་དེ་བཞིན་ཨར་ཅི་རི་ཡའི་ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་ཕྱིན་པ་དེས་ཀྲུང་གོ་ཚུད་པའི་རྒྱལ་ཁབ་ཁག་གི་མ་འཇོག་མཁན་ལ་སྟབས་བདེ་དེ་བས་མང་བ་དང་མཉམ་ལས་ཀྱི་བར་མཐོངས་དེ་བས་ཆེ་བ་མཁོ་འདོན་བྱས་ཡོད།