གསར་འགོད་པར་སྐྱེ་ཁམས་ཁོར་ཡུག་པུས་འཚོགས་པའི་འཆར་ཅན་གྱི་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། 《མཛེས་སྡུག་ལྡན་པའི་ཀྲུང་གོའི་སྔོན་སྤེལ་ཁུལ་འཛུགས་སྐྲུན་བྱ་རྒྱུའི་སྐོར་གྱི་ལག་བསྟར་བསམ་འཆར》དང་། 《མཛེས་སྡུག་ལྡན་པའི་གྲོང་ཁྱེར་འཛུགས་སྐྲུན་གྱི་ལག་བསྟར་ཇུས་གཞི》 《མཛེས་སྡུག་ལྡན་པའི་གྲོང་གསེབ་འཛུགས་སྐྲུན་གྱི་ལག་བསྟར་ཇུས་གཞི》བཅས་ཡིག་ཆ་གསུམ་སྔ་རྗེས་སུ་བཀྲམ་ནས་ལག་བསྟར་བྱས་ཏེ། མཛེས་སྡུག་ལྡན་པའི་ཀྲུང་གོ་འཛུགས་སྐྲུན་གྱི“1+1+N”ལག་བསྟར་མ་ལག་རྒྱུན་ཆད་མེད་པར་འཐུས་སྒོ་ཚང་དུ་བཏང་བ་རེད།

སྐྱེ་ཁམས་ཁོར་ཡུག་པུའི་གསར་འགྱུར་མགྲིན་ཚབ་པས་ངོ་སྤྲོད་བྱས་པར་གཞིགས་ན། “1”དང་པོ་ནི《མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་རྒྱུའི་སྐོར་གྱི་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བསམ་འཆར》ཡིན་ཞིང་དེ་ནི་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་གྱི་བྱེད་ཐབས་ཁག་གཅིག་འདོམས་བྱེད་པའི་རྩ་འཛིན་རང་བཞིན་གྱི་ཡིག་ཆ་རེད། “1”གཉིས་པ་ནི་མཛེས་སྡུག་ལྡན་པའི་ཀྲུང་གོའི་སྔོན་སྤེལ་ཁུལ་འཛུགས་སྐྲུན་ལས་དོན་ཡིན་ཞིང་དེ་ནི་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལས་དོན་ལ་སྐུལ་འདེད་གཏོང་བའི་དམ་འཛིན་བྱ་གཞི་གལ་ཆེན་དང་འགག་རྩའི་འདེགས་སྐྱོར་རེད། “N”ནི་ཁྱབ་ཁོངས་ཁག་བགོས་ཀྱི་བྱ་སྤྱོད་དེ། དེའི་ནང་གྲོང་ཁྱེར་དང་གྲོང་གསེབ་འཛུགས་སྐྲུན་ཁྱབ་ཁོངས་ཀྱི་མཛེས་སྡུག་ལྡན་པའི་གྲོང་ཁྱེར་དང་མཛེས་སྡུག་ལྡན་པའི་གྲོང་གསེབ་ཚུད་ཡོད་ལ། ནུས་རྒྱུ་གཙང་མ་དང་། ཁོར་ཡུག་བཅོས་སྐྱོང་། ལྗང་མདོག་བཟོ་སྐྲུན། ལྗང་མདོག་འགྲིམ་འགྲུལ། ལྗང་མདོག་དངུལ་རྩ། ཚན་རྩལ་གསར་གཏོད་སོགས་གཙོ་གནད་ཁྱབ་ཁོངས་གཞན་དག་ཀྱང་ཚུད་ཡོད།

《མཛེས་སྡུག་ལྡན་པའི་ཀྲུང་གོའི་སྔོན་སྤེལ་ཁུལ་འཛུགས་སྐྲུན་བྱ་རྒྱུའི་སྐོར་གྱི་ལག་བསྟར་བསམ་འཆར》ནང་། མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་བའི་ལྟེ་བའི་ལས་འགན་ལ་དམིགས་ཏེ་སྦགས་བཙོག་འགོག་བཅོས་འགག་སྒྲོལ་ཟབ་ཏུ་གཏོང་བ་དང་། སྐྱེ་ཁམས་ཁོར་ཡུག་གི་སྤུས་ཚད་ལེགས་སུ་གཏོང་བ། དམངས་འཚོའི་བདེ་རྩ་ཆེ་རུ་གཏོང་བ་བཅས་ཤུགས་རྒྱག་སར་བྱས་ནས། ས་ཁོངས་དང་། ཞིང་ཆེན་ཁྱབ་ཁོངས། གྲོང་ཁྱེར། རྫོང་ཁོངས་བཅས་རིམ་ངོས་ཁག་ཏུ་རིམ་པ་དང་རིགས་དབྱེ་ནས་མཛེས་སྡུག་ལྡན་པའི་ཀྲུང་གོའི་སྔོན་སྤེལ་ཁུལ་འཛུགས་སྐྲུན་བྱས་ཏེ། 2027ལོའི་ལོ་མཇུག་གོང་ལག་ལེན་གསར་གཏོད་དང་ལམ་ལུགས་གསར་གཏོད་ཀྱི་གྲུབ་འབྲས་ཁག་གཅིག་ཐོབ་རྒྱུའི་བརྩོན་ལེན་བྱེད་པ་དང་ཆབས་ཅིག སྙིང་རུས་གཏན་འཁྱོངས་ཀྱིས་རང་རང་གི་མཛེས་ཆོས་དོད་པ་དང་མང་ཚོགས་བློ་ཡིད་ཚིམ་པའི་དཔེ་མཚོན་དཔེ་སྟོན་ཁ་ཤས་བསྐྲུན་ཏེ། མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་བར་ཉམས་མྱོང་གསོག་འཇོག་དང་ཚད་ཤིང་འཛུགས་དགོས་ཞེས་བཏོན་ཡོད་པ་རེད།

《མཛེས་སྡུག་ལྡན་པའི་གྲོང་ཁྱེར་འཛུགས་སྐྲུན་གྱི་ལག་བསྟར་ཇུས་གཞིའི》ནང་། 2027ལོར་སླེབས་སྐབས། གྲོང་ཁྱེར་གྱི་ཐོན་སྐྱེད་དང་འཚོ་བ་སྐྱེལ་སྟངས་ལྗང་མདོག་ཐཱན་ཉུང་ལ་ཕྱོགས་སྒྱུར་བྱས་པར་ཕན་འབྲས་མངོན་གསལ་དོད་པོ་ཐོན་རྒྱུ་དང་མཛེས་སྡུག་ལྡན་པའི་གྲོང་ཁྱེར་50ཡས་མས་འཛུགས་སྐྲུན་ལ་སྐུལ་འདེད་བཏང་བར་དཔེ་མཚོན་རང་བཞིན་གྱི་གྲུབ་འབྲས་ཐོབ་པའི་བརྩོན་ལེན་བྱ་རྒྱུ་དང་། 2035ལོར་སླེབས་སྐབས། གྲོང་ཁྱེར་དུ་ལྗང་མདོག་གི་ཐོན་སྐྱེད་དང་འཚོ་བ་སྐྱེལ་སྟངས་རྒྱ་ཁྱབ་ཆགས་པ་དང་། སྐྱེ་ཁམས་ཁོར་ཡུག་རྩ་བ་ནས་ལེགས་སུ་ཕྱིན་པ། སྐྱེ་ཁམས་མ་ལག་གི་སྣ་མང་རང་བཞིན་དང་། བརྟན་པོ་རང་བཞིན། རྒྱུན་མཐུད་རང་བཞིན་བཅས་མངོན་གསལ་དོད་པོས་ཆེ་རུ་ཕྱིན་པ། རིག་ལྡན་ནུས་ཆེ་དང་སྣ་མང་མཉམ་བཅོས་ཀྱི་གྲོང་ཁྱེར་གྱི་སྐྱེ་ཁམས་ཁོར་ཡུག་བཅོས་སྐྱོང་མ་ལག་ཆགས་པ་བཅས་བྱུང་ནས། མཛེས་སྡུག་ལྡན་པའི་གྲོང་ཁྱེར་འཛུགས་སྐྲུན་ལས་དོན་ཁྱོན་ཡོངས་ལ་ཁྱབ་པར་བྱ་རྒྱུ་བཏོན་ཡོད་པ་རེད།

《མཛེས་སྡུག་ལྡན་པའི་གྲོང་གསེབ་འཛུགས་སྐྲུན་གྱི་ལག་བསྟར་ཇུས་གཞིའི》ནང་། 2027ལོར་སླེབས་སྐབས། མཛེས་སྡུག་ལྡན་པའི་གྲོང་གསེབ་འཛུགས་སྐྲུན་རྫོང་ཧྲིལ་པོར་བསྐྲུན་ཚད་40%ཟིན་པར་བྱ་རྒྱུ་དང་། གཙོ་གནད་ས་ཁོངས་ཁག་གི་ཞིང་ལས་ཀྱི་སྦགས་བཙོག་འགོག་བཅོས་ནུས་ལྡན་ཐུབ་རྒྱུ། སྲིད་འཛིན་གྲོང་ཚོ་ཁྲི་6གི་ཁོར་ཡུག་བཅོས་སྐྱོང་ལས་དོན་གསར་དུ་བསྒྲུབ་རྒྱུ། ཆུས་བཙུགས་པའི་ཆ་རྐྱེན་འཛོམས་པའི་གྲོང་ཁྱེར་རམ་ཡང་ན་རྫོང(གྲོང་ཁྱེར་དང་ཆུས)ཁག་གིས་ཀུན་གྱི་སྔོན་ལ་ས་ཁོངས་ཧྲིལ་པོའི་རྒྱ་ཁྱོན་ཅུང་ཆེ་བའི་གྲོང་གསེབ་ཀྱི་Vརིགས་ཀྱི་ཆུ་ངན་གཞི་རྩའི་ཆ་ནས་མེད་པར་བཟོ་རྒྱུ། 2035ལོར་སླེབས་སྐབས། མཛེས་སྡུག་ལྡན་པའི་གྲོང་གསེབ་གཞི་རྩའི་ཆ་ནས་བསྐྲུན་ཐུབ་རྒྱུ་ཡིན་པ་ཁ་གསལ་བཏོན་ཡོད་པ་རེད།