འདི་ནི་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་སྐལ་ཕུན་ཡིན་པ།

ཉིན་ཤས་བསྟུད་མར། རང་སྐྱོང་ལྗོངས་ཀྱི་ཚོགས་འདུ་གཉིས་ལ་ཞུགས་མཁན་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་ཚོས་གྲོས་གཞི་ཁག་ལ་དམིགས་ནས་སྤྲོ་སེམས་འཁོལ་པོས་གྲོས་བསྡུར་གཏིང་ཟབ་གནང་བ་མ་ཟད། དུས་རབས་གསར་པའི་ཏང་འཛུགས་སྐྱོང་ལས་དོན་ལ་ཤུགས་སྣོན་རྒྱག་པའི་ཐད་དེ་བས་མཐོ་བའི་རེ་བ་གསར་པ་གཅིག་རྗེས་གཉིས་མཐུད་ངང་བཏོན་གནང་བ་རེད།

“ཁེ་ལས་འཕེལ་རྒྱས་ཀྱི་བླ་སྲོག་ལྟ་བུ་ཡིན་པའི་ཏང་འཛུགས་སྐྱོང་གིས་ཁེ་ལས་ལ་ཡང་དག་པའི་འཕེལ་རྒྱས་ཀྱི་ཁ་ཕྱོགས་རྒྱུན་འཁྱོངས་བྱེད་པར་ཁྲིད་སྟོན་བྱས་ཡོད་ལ། འཕེལ་རྒྱས་ལ་སྐུལ་འདེད་གཏོང་བ་དང་། ལས་མིར་ཞབས་འདེགས་ཞུ་བ། མི་སེམས་གཅིག་སྒྲིལ། ཞི་མཐུན་ལ་སྐུལ་འདེད་གཏོང་བ་སོགས་ཀྱི་ཐད་ལའང་འགག་རྩའི་ནུས་པ་བཏོན་ཡོད”ཅེས་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་གཞིས་རྩེའི་ཁྱིམ་བྱ་སྐྱེ་ཁམས་ཞིང་ལས་ཚན་རྩལ་ཚད་ཡོད་ཀུང་སིའི་སྤྱི་ཁྱབ་ཅིང་ལི་སྐལ་ཕུན་གྱིས་གསུངས།

སྐལ་ཕུན་གྱིས། ཏང་འཛུགས་སྐྱོང་དེ་སྤྱི་ཡོངས་ལ་གཅིག་འདོམས་བྱེད་པའི་གཞི་འཛིན་སར་བརྩིས་ནས་ཏང་འཛུགས་སྐྱོང་དང་ལས་སྒོ་མཉམ་འདྲེས་ལ་མུ་མཐུད་སྐུལ་འདེད་བཏང་ཡོད། ཏང་འཛུགས་སྐྱོང་གི་ལས་དོན་དང་ལས་སྒོའི་ལས་དོན་མཉམ་དུ་འཆར་འགོད་དང་། བཀོད་སྒྲིག དོན་འཁྱོལ་བཅས་མཐའ་འཁྱོངས་བྱས་ཏེ་ཏང་འཛུགས་སྐྱོང་གི་རིག་གནས་ཁེ་ལས་ཀྱི་ལམ་ལུགས་ནང་མཉམ་འདྲེས་བྱས་ཏེ་ཏང་འཛུགས་སྐྱོང་གི་ལས་དོན་དང་བོད་བྱ་གསོ་ཚགས་ཐོན་སྐྱེད་གཉེར་སྐྱོང་ལས་དོན་གྱི་མཉམ་འདྲེས་ཀྱི་གནས་འཚོལ་ཞིབ་ཧུར་ཐག་བྱས་པ་མ་ཟད། ཏང་འཛུགས་སྐྱོང་ལ་བརྟེན་ནས་ཁེ་ལས་འཕེལ་རྒྱས་བཏང་ཡོད། “ཁེ་ལས་དང་། རྟེན་གཞི། མཉམ་ལས་ཁང་། ཞིང་དུད”བཅས་ཟུང་དུ་འབྲེལ་བའི་འཕེལ་རྒྱས་ཀྱི་ལམ་བུར་མུ་མཐུད་ཡག་པོ་བསྐྱོད་པ་དང་འབྲེལ། ཀུང་སིའི་སྣེ་ཁྲིད་དེ་ཐོན་སྐྱེད་གཉེར་སྐྱོང་དང་ཞབས་ཞུའི་ལས་དོན་ལེགས་པར་བསྒྲུབས་པ་དང་། ས་གནས་དེ་གའི་གྲོང་ཚོའི་མཉམ་སྡེབ་མཉམ་ལས་ཁང་ལ་སྤུས་ལེགས་ཀྱི་བྱ་ལྟོ་དང་བྱ་ཕྲུག་མཁོ་འདོན་ཧུར་ཐག་བྱས་ཏེ། ས་གནས་དེ་གའི་དཔལ་འབྱོར་འཕེལ་རྒྱས་དང་གྲོང་གསེབ་དར་རྒྱས་ལ་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་ཕུལ་ཡོད་ཅེས་གསུངས་པ་རེད།