དབུ་ཤོག>གསར་འགྱུར།>རྒྱལ་ནང་།རྒྱལ་སྤྱི།>རྒྱལ་སྤྱི།
  • ཀྲུང་གོ་དང་ཝེ་ཐེ་ནམ་གྱི་འབྲེལ་བའི“གཟི་བརྗིད་དུས་ སྐབས”གཉིས་པ་མུ་མཐུད་གཏོད་པ།

  • ཡོང་ཁུངས།  མི་དམངས་ཉིན་རེའི་ཚགས་པར།    |     རྩོམ་པ་པོ།  ཧོ་ཝེ།   |     སྤེལ་དུས།  2025-01-22

    འདི་ལོའི་ཟླ་1ཚེས་18ཉིན་ནི་ཀྲུང་ཝེའི་དབར་ཕྱི་འབྲེལ་བཙུགས་ནས་ལོ་75འཁོར་བའི་དྲན་གསོའི་ཉིན་མོ་ཡིན་ཞིང་། ལོ་75ཡི་རིང་། ཀྲུང་ཝེའི་འབྲེལ་བས“གཟི་བརྗིད་དུས་སྐབས”ཁག་གཉིས་བརྒྱུད་པ་སྟེ། “གཟི་བརྗིད་དུས་སྐབས”དང་པོ་ནི་ཀྲུའུ་ཞི་མའོ་ཙེ་ཏུང་དང་ཀྲུའུ་ཞི་ཧུའུ་ཀྲེ་མིང་སྐུ་ངོ་མས་བཏོད་གནང་བའི་ཀྲུང་ཝེའི“བློ་མཐུན་ཡིན་ལ་སྤུན་ཟླ་ཡང་ཡིན་པའི”སྲོལ་རྒྱུན་མཛའ་གྲོགས་ཡིན་པ་དང་། དེས་ཀྲུང་ཝེའི་སྲོལ་རྒྱུན་མཛའ་གྲོགས་ལ་རྨང་གཞི་བརྟན་པོ་བཏིང་ཡོད། དེ་རྗེས་ཝེ་ཐེ་ནམ་གྱིས་མི་རིགས་རང་བཙན་དང་། རྒྱལ་ཁབ་བཅིངས་འགྲོལ། སྤྱི་ཚོགས་རིང་ལུགས་འཛུགས་སྐྲུན་བཅས་བརྩོན་ལེན་བྱེད་པའི་བྱ་གཞག་ཁྲོད་རྒྱུན་ཆད་མེད་པར་འཚར་ལོངས་བྱུང་ཡོད།

    “གཟི་བརྗིད་དུས་སྐབས”གཉིས་པ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་། སྤྱི་ཁྱབ་ཧྲུའུ་ཅི་རོན་ཧྥུའུ་ཀྲུང་། ད་ལྟ་འགན་བཞེས་བཞིན་པའི་སྤྱི་ཁྱབ་ཧྲུའུ་ཅི་སུའུ་ལིན་བཅས་ཀྱིས་ཐུན་མོང་ཐོག་གཏན་འཁེལ་གནང་བའི་ཀྲུང་ཝེའི“ལས་དབང་གཅིག་མཐུན་ཚོགས་པ”ཡིན་པ་དང་། དེས་ཀྲུང་ཝེའི་མི་རབས་ནས་མི་རབས་བར་གྱི་མཛའ་གྲོགས་ལ“བླ་སྲོག”བཏོད་པ་དང་རྒྱལ་ཁབ་གཉིས་པོ“མཉམ་གྲོས་དང་། མཉམ་སྐྲུན། མཉམ་སྤྱོད”བཅས་ཀྱི་འཕེལ་རྒྱས་དང་དར་རྒྱས་ཀྱི་ལམ་བུའི་ཕྱོགས་སུ་ཁྲིད་སྟོན་བྱས་ཡོད།

    ཐུན་མོང་གི་ཕུགས་བསམ་དང་དད་སེམས་ནི་ཕྱོགས་གཉིས་པོའི་འབྲེལ་བ་ཡུན་རིང་འཕེལ་རྒྱས་འགྲོ་བའི་རྩ་བའི་འགན་ལེན་ཡིན། དེང་སྐབས་འཛམ་གླིང་ཐོག་གུང་ཁྲན་ཏང་གཉིས་ཀྱིས་ཡུན་རིང་སྲིད་སྐྱོང་བ་དང་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་བྱས་ནས་མིག་ལྡན་ཀུན་གྱིས་དོ་སྣང་བྱེད་པའི་གྲུབ་འབྲས་ཐོབ་པའི་སྤྱི་ཚོགས་རིང་ལུགས་ཀྱི་རྒྱལ་ཁབ་ཡིན་པའི་ངོས་ནས། ཀྲུང་ཝེའི་འབྲེལ་བ་བཙུགས་པའི་ཉིན་ནས་བཟུང་སྤྱིར་བཏང་དོན་སྙིང་ཐོག་གི་ཕྱོགས་གཉིས་པོའི་འབྲེལ་བ་ལས་བརྒལ་བ་དང་ཆབ་སྲིད་ཀྱི་རྨང་གཞི་བརྟན་པོ་ལྡན་པས་ཕྱོགས་གཉིས་པོས་ཏང་འཛུགས་པ་དང་། དམག་དཔུང་འཛུགས་པ། རྒྱལ་ཁབ་འཛུགས་པ་བཅས་ཀྱི་རླབས་ཆེན་བྱ་གཞག་ཁྲོད་ཁྱབ་ཡོད།

    ཐུན་མོང་གི་འཕེལ་རྒྱས་འདུན་པ་ནི་ཕྱོགས་གཉིས་པོའི་མཉམ་ལས་མུ་མཐུད་གཏིང་ཟབ་ཏུ་གཏོང་བའི་རྫོགས་མཐའ་མེད་པའི་སྒུལ་ཤུགས་ཤིག་ཡིན། དེང་སྐབས་འཛམ་གླིང་ཐོག་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་འདུ་ཤེས་ལག་ལེན་བསྟར་བ་དང་རང་ངོས་ཀྱི་རྒྱལ་བབ་དང་མཐུན་པའི་འཕེལ་རྒྱས་འགྲོ་ལམ་ཐོག་བསྐྱོད་རྒྱུ་མཐའ་འཁྱོངས་བྱེད་པའི་གསར་དར་ཁྲོམ་རའི་རྒྱལ་ཁབ་གཉིས་ཡིན་པའི་ཀྲུང་ཝེ་གཉིས་ཀྱིས། ཐོག་མཐའ་བར་གསུམ་དུ་ཕ་རོལ་པོའི་འཕེལ་རྒྱས་དེ་རང་ངོས་ཀྱི་གོ་སྐབས་ལ་བརྩིས་ནས་སྐམ་ས་དང་རྒྱ་མཚོ་འབྲེལ་མཐུད་ཀྱི་གནས་ཡུལ་གྱི་ལེགས་ཆར་བརྟེན་ནས་ཐོན་ལས་གསབ་རེས་ཀྱི་མི་མངོན་པའི་ནུས་པ་སྔོག་འདོན་བྱས་ཏེ། གཉིས་ཁེ་གཉིས་ཕན་གྱི་མཉམ་ལས་ཀྱི་རྣམ་པ་བཏོད་ནས་དཔལ་འབྱོར་ཚོང་དོན་དང་མ་འཇོག་གཉིས་ཀར་སྐུལ་མ་ཐེབས་ཡོད། ཀྲུང་གོས་ལོ་ངོ་20ལྷག་ཙམ་བསྟུད་མར་ཝེ་ཐེ་ནམ་གྱི་ཚོང་དོན་རོགས་ཟླའི་གནས་བབ་ཆེ་ཤོས་རྒྱུན་འཁྱོངས་བྱས་པ་དང་། 2024ལོར་ཕྱོགས་གཉིས་པོའི་ཚོང་དོན་དངུལ་འབོར་ཨ་སྒོར་དུང་ཕྱུར་2600ཡི་འགག་སྒོ་ཆེན་པོ་ལས་བརྒལ་བ། ཀྲུང་གོས་ཝེ་ཐེ་ནམ་ལ་མ་འཇོག་བྱེད་པའི་དངུལ་འབོར་དང་རྣམ་གྲངས་ཀྱི་གྲངས་འབོར་མདུན་གྲལ་དུ་སླེབས་ཡོད།

    ཐུན་མོང་གི་རིག་གནས་རྒྱུན་འཛིན་ནི་རྒྱལ་ཁབ་གཉིས་ཡུན་རིང་འཆམ་མཐུན་དང་ཡིད་ཆེས་ཀྱི་འབྱུང་ཁུངས་ཡིན། དེང་སྐབས་འཛམ་གླིང་ཐོག་འགྲོ་འོང་གི་ལོ་རྒྱུས་ཡུན་རིང་ལྡན་པའི་མཛའ་མཐུན་ཁྱིམ་མཚེས་རྒྱལ་ཁབ་གཉིས་ཡིན་པའི་ཀྲུང་ཝེས། “འཆམ་མཐུན་རྩ་བའི་རྩེ་མོར་འཛིན་པ་དང་འཕྱར་བ་གྲུ་འདེགས”ཀྱི་བབ་ཆགས་པའི་བསམ་བློ་དང་རིག་གནས་སྲོལ་རྒྱུན་རྒྱུན་འཛིན་བྱས་ཏེ། སྐམ་སའི་མཐའ་མཚམས་དབྱེ་འབྱེད་དང་བྱང་རྒྱུད་མཚོ་ཁུག་མཚོ་ཁོངས་དབྱེ་འབྱེད་བྱེད་པའི་ལོ་རྒྱུས་ཀྱི་དཀའ་གནད་ཆེན་པོ་གཉིས་བདེ་བླག་ངང་ཐག་གཅོད་བྱས་པ་དང་། མཚོ་ཐོག་གི་མི་མཐུན་པའི་ཕྱོགས་ལ་དོ་དམ་ཚོད་འཛིན་བྱེད་པའི་སྐད་ཆ་ཤོད་རེས་ཀྱི་ཐབས་ལམ་བཏོད་པ་དང་ཏེ་ཐེན(པན་གཡོད)རྦབ་ཆུ་རྒྱལ་མཚམས་སྒྲོལ་བའི་ཡུལ་སྐོར་མཉམ་ལས་ཁུལ་སོགས་དཔེ་མཚོན་ལས་གྲྭ་རབ་དང་རིམ་པ་བཏོད་དེ་ཞི་བདེ་དང་། བརྟན་ལྷིང་། མཉམ་ལས། འཕེལ་རྒྱས་བཅས་ཀྱི་མཚམས་ཐིག་ཅིག་བཏོད་ཡོད།

    ཐུན་མོང་གི་རིན་ཐང་དོན་གཉེར་བྱེད་པ་ནི་རྒྱལ་ཁབ་གཉིས་ཀྱིས་དྲང་གཞག་དྲང་བདེན་སྲུང་སྐྱོང་བྱེད་པའི་གདིང་ཤུགས་ཆེ་ཤོས་ཡིན། དེང་སྐབས་འཛམ་གླིང་ཐོག་ཕྱོགས་མང་རིང་ལུགས་དར་སྤེལ་དང་ཞི་བདེ་མཉམ་གནས་ཀྱི་རྩ་དོན་ལྔ་རྒྱུན་འཁྱོངས་བྱེད་པའི་འཕེལ་རྒྱས་འགྲོ་བཞིན་པའི་རྒྱལ་ཁབ་གཉིས་ཡིན་པའི་ཀྲུང་ཝེ་རྒྱལ་ཁབ་གཉིས་ཀྱིས་རང་བཙན་རང་བདག་གི་ཕྱི་འབྲེལ་བྱེད་ཕྱོགས་མཐའ་འཁྱོངས་དང་། མཉམ་འབྲེལ་རྒྱལ་ཚོགས་སྲོག་ཤིང་དུ་བྱས་པའི་རྒྱལ་སྤྱིའི་མ་ལག་དང་རྒྱལ་སྤྱིའི་བཅའ་ཁྲིམས་རྨང་གཞིར་བྱས་པའི་རྒྱལ་སྤྱིའི་སྒྲིག་ལམ་སྲུང་སྐྱོང་བརྟན་པོ་བྱས་ཏེ། འདྲ་མཉམ་དང་གོ་རིམ་ལྡན་པའི་འཛམ་གླིང་སྣེ་མང་ཅན་དང་ཀུན་ཕན་བསྟུན་མཁས་ཀྱི་དཔལ་འབྱོར་གོ་ལ་ཧྲིལ་པོ་ཅན་དུ་འགྱུར་བར་སྐུལ་འདེད་གཏོང་བ་དང་། བཙན་དབང་དང་དྲག་ཐབས་བཙན་བརྙས་དང་། བཙན་དབང་ཆབ་སྲིད། རྣམ་པ་སྣ་ཚོགས་ཀྱི་ཕྱོགས་རྐྱང་རིང་ལུགས་བཅས་ལ་ངོ་རྒོལ་བྱས་ཏེ་ཕན་ཚུན་བརྩི་འཇོག་དང་། དྲང་སྙོམས་དྲང་བདེན། མཉམ་ལས་གཉིས་ཕན་བཅས་ཀྱི་རྒྱལ་སྤྱིའི་འབྲེལ་བ་གསར་པ་འཛུགས་པ་དང་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་འགན་འཁུར་བའི་བྱས་རྗེས་བཞག་ཡོད།

    (རྩོམ་པ་པོ་ནི་ཝེ་ཐེ་ནམ་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན)

    འགན་འཁུར་རྩོམ་སྒྲིག་པ། ནོར་བུ་གཡུ་སྒྲོན།

མཉམ་སྤྱོད།

འབྲེལ་ཡོད་གསར་འགྱུར།