“‘འདུ་ཤེས་གསུམ’གྱི་སློབ་གསོའི་བྱེད་སྒོའི་ནང་། ང་ཚོས་བྱ་སྤྱོད་ཧུར་ཐག་སྤེལ་ནས་བྱེད་ཐབས་རབ་དང་རིམ་པ་སྤྱད་པར་ཕན་འབྲས་མངོན་གསལ་དོད་པོ་ཐོབ་ཡོད”ཅེས་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དང་མངའ་རིས་ས་ཁུལ་དགེ་རྒྱས་རྫོང་བཀྲ་ཤིས་ཆོས་གླིང་དགོན་སྡེ་དོ་དམ་ཨུ་ལྷན་གྱི་ཀྲུའུ་རེན་གཞོན་པ་ཀརྨ་རབ་བརྟན་གྱིས་གསུངས་པ་རེད།

ཀརྨ་རབ་བརྟན་གྱིས། བཀྲ་ཤིས་ཆོས་གླིང་དགོན་སྡེ་དོ་དམ་ཨུ་ལྷན་གྱིས“འདུ་ཤེས་གསུམ”གྱི་སློབ་གསོ་དང་བྱེད་སྒོ་སྣ་ཚོགས་ཟུང་འབྲེལ་དམ་ཟབ་བྱས་ཐོག་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བའི་འགྲེམས་པང་བཙུགས་ནས། དགེ་འདུན་པ་ཚོར་ནམ་རྒྱུན་གྱི་སློབ་སྦྱོང་དང་འཚོ་བའི་ཁྲོད་རིམ་གྱིས་སློབ་གསོ་ཐེབས་པར་བྱས་ཡོད། དགེ་འདུན་པ་སྒྲིག་འཛུགས་བྱས་ནས་རྒྱལ་གཅེས་རིང་ལུགས་ཀྱི་སློབ་གསོའི་གློག་བརྙན་དང་ལོ་རྒྱུས་རིག་གནས་ཀྱི་འགྲེམས་སྟོན་ལ་ཐེངས་མང་བལྟས་ཏེ། ཚང་མའི་རྒྱལ་ཁབ་ཀྱི་འདུ་ཤེས་ཟབ་ཏུ་དང་མི་རིགས་ཀྱི་སྤོབས་སེམས་ཆེ་རུ་བཏང་ཡོད་ཅེས་ངོ་སྤྲོད་གནང་བ་རེད།

ཀརྨ་རབ་བརྟན་གྱིས་གསར་འགོད་པར། ཉེ་བའི་ལོ་ཤས་རིང་། ཏང་དང་སྲིད་གཞུང་གིས་བཏོན་པའི་དགོན་ཕན་གྲྭ་ཕན་གྱི་སྲིད་ཇུས་སྣ་ཚོགས་ལ་བརྟེན་ནས། བཀྲ་ཤིས་ཆོས་གླིང་དགོན་ལ་ཆུ་གློག་ལམ་འཕྲིན་བཅས་ཁྱོན་ཡོངས་ནས་ཤར་གཏོང་ཐུབ་སྟེ་འཚོ་བའི་སྤུས་ཚད་མངོན་གསལ་དོད་པོས་ལེགས་སུ་ཕྱིན་པས། དགེ་འདུན་པ་ཚོའི་རྒྱལ་གཅེས་ཁྲིམས་སྲུང་གི་རང་རྟོགས་རང་བཞིན་དང་རང་འགུལ་རང་བཞིན་སྔར་བས་ཆེ་རུ་ཕྱིན་པ་མ་ཟད། ད་དུང་རྒྱལ་གཅེས་སྙིང་སྟོབས་དར་སྤེལ་བཏང་ནས་སྤྱི་དམངས་ཚད་ལོན་པ་ཞིག་བྱ་རྒྱུ་བརྩོན་ལེན་བྱས་ཏེ་སྤྱི་ཚོགས་རིང་ལུགས་ཀྱི་ཁྱིམ་ཚང་ཆེ་མོའི་གཏོགས་སེམས་ཉིན་བཞིན་ཟབ་ཏུ་འགྲོ་གི་ཡོད་ཅེས་གསུངས་པ་རེད།

ཁྲིམས་སྐྱོང་འདུ་ཤེས་ཟབ་ཏུ་གཏོང་བའི་སྐོར་ལ། བཀྲ་ཤིས་ཆོས་གླིང་དགོན་སྡེ་དོ་དམ་ཨུ་ལྷན་གྱིས་སྒྲོག་འགྲེལ་དང་། བཞུགས་མོལ། “གྱོད་དཔེས་ཁྲིམས་འགྲེལ”སོགས་བྱེད་ཐབས་མང་པོ་བརྒྱུད་དགོན་སྡེར་བཅའ་ཁྲིམས་དང་ཁྲིམས་སྲོལ་སློབ་གསོ་སྤེལ་རྒྱུར་སྐུལ་འདེད་བཏང་སྟེ། རྒྱ་ཆེའི་དགེ་འདུན་པའི་ཁྲིམས་སྐྱོང་འདུ་ཤེས་ཀྱི་རྨང་གཞི་བརྟན་དུ་བཏང་ཡོད། ཀརྨ་རབ་བརྟན་གྱིས། དུས་རབས་གསར་པའི་དགེ་འདུན་པས་ཆོས་ལུགས་ཀྱི་ཡོན་ཚད་མཐོ་རུ་གཏོང་བ་དང་ཆབས་ཅིག་ཁྲིམས་བཀུར་ཁྲིམས་སྦྱོང་ཁྲིམས་སྲུང་ཁྲིམས་སྤྱོད་བཅས་བྱས་ནས་ཁྲིམས་སྐྱོང་འདུ་ཤེས་ཟབ་ཏུ་བཏང་ཐོག་རང་ཉིད་ལ་བླང་བྱ་ནན་པོ་བཏོན་ནས། རྒྱལ་གཅེས་ཆོས་གཅེས་དང་སྒྲིག་བཀུར་ཁྲིམས་སྲུང་གི་དགེ་འདུན་པ་ཡག་པོ་ཞིག་བྱེད་དགོས་པའི་ངོས་འཛིན་གནང་གི་ཡོད་པ་རེད།