ཟླ་1ཚེས་18ཉིན། རང་སྐྱོང་ལྗོངས་སྲིད་གྲོས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པ་ལྷ་སར་འགོ་ཚུགས་པ་རེད། རང་ལྗོངས་ཀྱི་མི་རིགས་ཁག་དང་ལས་རིགས་ཁག་དེ་བཞིན་འཐབ་ཕྱོགས་ཁག་ནས་ཕེབས་པའི་སྲིད་གྲོས་ཀྱི་ཨུ་ཡོན་300ལྷག་ཙམ་ལྷན་དུ་འཛོམས་ནས། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་འཕགས་པ་ལྷ་དགེ་ལེགས་རྣམ་རྒྱལ་གྱི་མངགས་བཅོལ་ལྟར་རང་སྐྱོང་ལྗོངས་སྲིད་གྲོས་ཀྱི་ཏང་ཙུའི་ཧྲུའུ་ཅི་གཞོན་པ་དང་ཀྲུའུ་ཞི་གཞོན་པ་མོང་ཞའོ་ལིན་གྱིས་སྲིད་གྲོས་སྐབས་བཅུ་གཉིས་པའི་བོད་རང་སྐྱོང་ལྗོངས་ཨུ་ཡོན་ལྷན་ཁང་རྒྱུན་ལས་ཨུ་ཡོན་ལྷན་ཁང་གི་ཚབ་ཞུས་ནས་གནང་བའི་ལས་དོན་སྙན་སྒྲོན་གསན་པ་རེད།

ཨུ་ཡོན་ཚོས་སྙན་སྒྲོན་དེ་ཉིད་ཆབ་སྲིད་ཀྱི་ཚུགས་གནས་མཐོ་བ་དང་། གཙོ་གནད་འབུར་ཐོན། དམ་པ་དོན་གཉེར་བཅས་ཀྱི་སྙན་སྒྲོན་ཞིག་ཡིན་པ་མ་ཟད། 2024ལོའི་ལས་དོན་ལ་ཕྱོགས་སྡོམ་བྱས་པ་ཕྱོགས་ཡོངས་ནས་གནད་ལ་འཁེལ་བ་དང་། དངོས་ཐོག་བདེན་འཚོལ་ཞིག་ཡིན། 2025ལོའི་ལས་དོན་བཀོད་སྒྲིག་སྐོར་ལ་བསམ་ཕྱོགས་ཁ་གསལ་ཞིང་གཙོ་གནད་འབུར་དུ་ཐོན་ཡོད་ལ། གདེང་ཚོད་ལྡབ་འཕེལ་དང་། མཐུན་སྒྲིལ་དང་དཔའ་མཛངས་མདུན་སྐྱོད་ཀྱི་སྙན་སྒྲོན་ཞིག་ཀྱང་ཡིན་པས། ཀྲུང་གོའི་ལུགས་ཀྱི་དེང་རབས་ཅན་གྱི་བོད་ལྗོངས་ཀྱི་ལེའུ་གསར་པ་ཧུར་ཐག་རྩོམ་པའི་སྟོབས་ཤུགས་ཆེན་པོ་སྔར་བས་གཅིག་ཏུ་བསྒྲིལ་ཐུབ་ངེས་ཡིན་པའི་ངོས་འཛིན་གནང་ཞིང་། ཚང་མས། ད་རེས་ཀྱི་ཚོགས་འདུ་གོ་སྐབས་སུ་བྱས་ནས་རང་རང་གི་ཁྱབ་ཁོངས་སུ་ལས་འགན་གཙང་སྒྲུབ་ཀྱིས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱ་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་ལུགས་གཅིག་མཇུག་གཉིས་མཐུད་ངང་གསུངས།

བསམ་བློས་ཁ་ཕྱོགས་ལ་ཁྲིད་སྟོན་དང་སྙིང་སྟོབས་ཀྱིས་སྟོབས་ཤུགས་གཅིག་ཏུ་བསྒྲིལ་བ།

“ན་ནིང་ང་བོད་རང་སྐྱོང་ལྗོངས་སྲིད་གྲོས་ཀྱིས་སྒྲིག་འཛུགས་བྱས་པའི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་ནང་ཐེངས་གཉིས་ཞུགས་པ་ཡིན། དགོངས་པ་གསར་པ་ལས་བློ་གྲོས་དང་སྟོབས་ཤུགས་འཕེལ་བྱུང”ཞེས་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དང་། བོད་ལྗོངས་ཉིང་སོན་ཚན་རྩལ་ཚོགས་པ་ཚད་ཡོད་ཀུང་སིའི་ཏུང་ཧྲི་ཀྲང་ཅང་ཉིང་གིས་གསུངས་པ་དང་། ཁོང་གིས“ལྷག་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་དབུ་བརྙེས་ནས་ལོ་75འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་བྱས་པས་འཕེལ་རྒྱས་གཏོང་བའི་ང་ཚོའི་གདེང་ཚོད་ཆེ་རུ་སོང་ལ། ཁེ་ལས་འཕེལ་རྒྱས་ཀྱི་ཁ་ཕྱོགས་ཀྱང་མི་འཕྱུགས་པ་བྱུང་སོང”ཞེས་གསུངས།

“2025ལོར། ང་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་ལག་བསྟར་གཏིང་ཟབ་བྱས་ཏེ། བློ་བརྟན་འགྱུར་མེད་ངང‘གཏན་འཁེལ་གཉིས’སྲུང་སྐྱོང་དང་། ‘སྲུང་སྐྱོང་གཉིས’མཐའ་གཅིག་ཏུ་ཐུབ་པ་བྱ་རྒྱུ་ཞིབ་ཕྲའི་བྱ་སྤྱོད་ཐོག་དོན་འཁྱོལ་དང་། ལས་ཀའི་ཕན་འབྲས་ཐོག་མངོན་པར་བྱས་ནས་གཟེངས་སུ་ཐོན་པའི་གྲུབ་འབྲས་ཐོག་ནས་བོད་རང་སྐྱོང་ལྗོངས་དབུ་བརྙེས་ནས་ལོ་60འཁོར་བར་བསུ་བ་ཞུ་རྒྱུ་ཡིན”ཞེས་ཅང་ཉིང་གིས་གསུངས།

ལྟེ་བར་དམིགས་པ་ནི་སྲིད་གྲོས་ལས་དོན་གྱི་གཙོ་གནད་ཡིན།

སྙན་སྒྲོན་ནང་། ལོ་གཅིག་རིང་རང་སྐྱོང་ལྗོངས་སྲིད་གྲོས་ཀྱིས་གྲོས་དོན་ཁག་34ལ་དམིགས་ཏེ་ཨུ་ཡོན་སྒྲིག་འཛུགས་བྱས་ནས་བརྟག་ཞིབ་ཐེངས་49དང་། ལྟ་ཞིབ་དང་རྟོག་ཞིབ་ཐེངས་16 བཞུགས་མོལ་སྤེལ་ཐེངས་42བཅས་བྱས་ནས་བརྟག་ཞིབ་སྙན་ཞུ་38བྲིས་པ་དང་། བསམ་འཆར་དང་གྲོས་འགོ་1200ལྷག་ཙམ་བཏོན་པར་སྤྱི་ཚོགས་ལས་རིགས་ཁག་གི་ཁས་ལེན་གང་ལེགས་ཐོབ་ཚུལ་བསྟན་ཡོད།

རང་སྐྱོང་ལྗོངས་ཀྱི་སྲིད་གྲོས་ཨུ་ཡོན་དང་བོད་ལྗོངས་ཇོ་མོ་གླང་མའི་འཁྱགས་རོམ་དང་ཆུའི་ཐོན་ཁུངས་གསར་སྤེལ་ཚད་ཡོད་ཀུང་སིའི་སྤྱི་ཁྱབ་ཙུང་ཚའེ་ལི་ལིང་གིས། “ན་ནིང་། ངས་དམངས་གཉེར་ཁེ་ལས་ལ་མ་དངུལ་གྱི་དཀའ་ངལ་འཕྲད་པར་ཐག་གཅོད་བྱ་རྒྱུའི་སྐོར་གྱི་གྲོས་གཞི་བཏོན་པར་ཚུར་ལན་བསམ་འཆར་ཡག་པོ་བྱུང་། འདི་ལོ་ངས་ཚོང་གཉེར་ཁོར་ཡུག་སྔར་བས་ལེགས་སུ་གཏོང་རྒྱུའི་སྐོར་གྱི་གྲོས་གཞི་འདོན་རྒྱུ་ཡིན་པས། ཏང་དང་སྲིད་གཞུང་གི་སྣེ་ཁྲིད་དང་། རྒྱབ་སྐྱོར། རོགས་རམ་བཅས་ཀྱི་འོག་དམངས་གཉེར་ཁེ་ལས་སྤུས་ཚད་མཐོ་བའི་འཕེལ་རྒྱས་ཀྱི་འགྲོ་ལམ་ཡངས་པོར་སྐྱོད་ཐུབ་རྒྱུ་ཡིན་པ་ངར་ཡིད་ཆེས་བརྟན་པོ་ཡོད”ཅེས་གསུངས།