ཉལ་ཆས་དང་ཀམ་པ་ལི་ཁྲི་25.97ལྷག་ཙམ་དང་སྲིང་བལ་གྱོན་གོས་ཁྲི་18ལྷག་ཙམ་སྤྲད་པ་དང་དཔྱིད་གསར་དུས་ཆེན་གོང་དགོས་མཁོ་ཡོད་པའི་སྟབས་བདེའི་ཁང་པ་བརྒྱབ་ནས་གནོད་འཚེ་ཕོག་པའི་མང་ཚོགས་བདེ་འཇགས་དང་དྲོ་སོབ་སོབ་ངང་དགུན་ཁ་སྐྱེལ་ཐུབ་པའི་འགན་ལེན་བྱེད་གང་ཐུབ་བྱ་རྒྱུ་ཡིན་པ།

ཚེས་16ཉིན་གྱི་ཕྱི་དྲོ་འཚོགས་པའི་བོད་རང་སྐྱོང་ལྗོངས་གཞིས་རྩེའི་དིང་རིའི་ས་ཡོམ་རིམ་པ་6.8ཀྱི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་གསར་འགོད་པས་ཤེས་རྟོགས་བྱས་པར། ས་ཡོམ་བརྒྱབ་ཚུན། ལྗོངས་ཡོངས་ཀྱི་གོང་འོག་ཚང་མས་མང་ཚོགས་བཀོད་སྒྲིག་འགན་ལེན་དང་། བདེ་འཇགས་ཀྱི་ཉེན་ཁའི་མངོན་མེད་རྐྱེན་ངན་གྲལ་བཤེར། གནོད་འཚེའི་གྱོང་གུན་ཚོད་སྐོར་སོགས་ཀྱི་ལས་དོན་ཁག་ལ་ནུས་ཤུགས་ཡོད་རྒུ་དང་ཀུན་སེམས་གཅིག་སྒྲིལ་དང་། ཚན་རིག་དང་མཐུན་པ། གོ་རིམ་ལྡན་པ། ནུས་ཆེ་བཅས་ཀྱི་སྒོ་ནས་སྐུལ་འདེད་བཏང་སྟེ་མིག་སྔར་ཡོམ་འགོག་གེགས་སེལ་ལས་དོན་གནས་སྐབས་བཀོད་སྒྲིག་ནས་ཕྱོགས་ཡོངས་ཀྱི་བར་བརྒལ་བཀོད་སྒྲིག་ཏུ་བསྒྱུར་ཡོད།

ས་ཡོམ་བརྒྱབ་ཚུན། རང་སྐྱོང་ལྗོངས་ཡོམ་འགོག་གེགས་སེལ་བཀོད་འདོམས་པུའི་གཞུང་དོན་ཁང་གིས་གནོད་འཚེ་ཕོག་པའི་མང་ཚོགས་ལ་གུར་དང་། ཉལ་ཆས། གདན་སོགས་གེགས་སེལ་དངོས་ཟོག་སྣ་ཚོགས་མགྱོགས་མྱུར་སྤྲད་པ་དང་། མེ་ཐབ(གློག་ཐབ)9525སྒྲིག་སྦྱོར་བྱས་པ། གློག་གདན་ཁྲི་4ལྷག་ཙམ་སྤྲད་པ། འབུད་ཤིང་ཏུན་759སྤྲད་པ། ཉལ་ཆས་དང་ཀམ་པ་ལི་ཁྲི་25.97ལྷག་ཙམ་དང་སྲིང་བལ་གྱོན་ཆས་ཁྲི་18ལྷག་ཙམ་སྤྲད་པ། གྲབས་གསོག་འབྲུ་རིགས་དང་སྣུམ་ཏུན་560སྤྲད་པ་བཅས་བྱས་ཡོད། སྟབས་བདེའི་ཁང་པ་གྲབས་གསོག་དང་། སྐྱེལ་འདྲེན། སྒྲིག་སྦྱོར་བཅས་ཀྱི་ལས་དོན་མགྱོགས་མྱུར་སྤེལ་བས་མིག་སྔར་སྟབས་བདེའི་ཁང་པ་13000གྲབས་གསོག་ཐུབ་པ་དང་། གེགས་ཁུལ་དུ་སྟབས་བདེའི་ཁང་པ་6135དབོར་བ། ཁང་པ་5152བརྒྱབ་པ་བཅས་དང་སྟབས་བདེའི་ཁང་པ་གཞན་དག་རིམ་བཞིན་གེགས་ཁུལ་དུ་དབོར་བཞིན་ཡོད། ཕྱོགས་ཁག་གི་སྟོབས་ཤུགས་ཀྱིས་དཔྱིད་གསར་དུས་ཆེན་གོང་དགོས་མཁོ་ཡོད་པའི་སྟབས་བདེའི་ཁང་པ་བརྒྱབ་ནས་གནོད་འཚེ་ཕོག་པའི་མང་ཚོགས་བདེ་འཇགས་དང་དྲོ་སོབ་སོབ་ངང་དགུན་ཁ་སྐྱེལ་ཐུབ་པའི་འགན་ལེན་བྱེད་གང་ཐུབ་བྱེད་བཞིན་ཡོད་པ་རེད།

ནུས་ཤུགས་ཡོད་རྒུས་གེགས་ཁུལ་མང་ཚོགས་ཀྱི་རྒྱུ་ནོར་མྱུར་སྐྱོབ་བྱ་ཆེད། ཞིབ་དཔྱད་རགས་ཙམ་བྱས་པ་བརྒྱུད། བཅིངས་འགྲོལ་དམག་དང་དྲག་ཆས་ཉེན་རྟོག་དཔུང་སྡེའི་རོགས་སྐྱོབ་སྟོབས་ཤུགས་ཀྱིས་སྤྱིར་ན་དངུལ་སྨར་སྒོར་ཁྲི་46.41ལྷག་ཙམ་དང་། རྩ་ཆེའི་དངོས་པོ་1640 རྒྱུ་ནོར་གཞན་དག་29466བཅས་བཙལ་རོགས་བྱས་པ་དང་། སྤྱི་བདེ་སྡེ་ཚན་གྱིས་རྒྱུ་ནོར་ཁྲི་3.46ལྷག་ཙམ་དང་དངུལ་སྨར་སྒོར་ཁྲི་225ལྷག་ཙམ་བཙལ་རོགས་བྱས་པ། མེ་ཟོན་སྡེ་ཚན་གྱིས་གནོད་འཚེ་ཕོག་པའི་མང་ཚོགས་ལ་ས་ཡོམ་བརྒྱབ་རྗེས་ཀྱི་ཞིག་རོ་750གཙང་སེལ་བྱེད་རོགས་བྱས་པ་དང་ཁྲི་6ལྷག་ཙམ་རི་བའི་རྒྱུ་ནོར་དང་དངུལ་སྨར་སྒོར་ཁྲི་324.1ལྷག་ཙམ་བཙལ་རོགས་བྱས་པ། ནགས་ཚལ་མེ་ཟོན་སྡེ་ཚན་གྱིས་མཚོ་སྒང་ཤང་ཞིང་ལས་དངུལ་ཁང་ལ་དངུལ་སྨར་སྒོར་ཁྲི་100ལྷག་ཙམ་དང་གཞུང་ལས་སྒྲིག་ཆས་དང་དཔྱད་གཞིའི་ཡིག་ཆ་གལ་ཆེན་300ལྷག་ཙམ་བཙལ་རོགས་དང་རྩ་ཆེའི་རིག་དངོས་13སྤོ་སྒྱུར་བྱེད་རོགས་བྱས་པ་རེད།