གསར་འགོད་པར་བཟོ་ལས་དང་ཆ་འཕྲིན་ཅན་པུའུ་ནས་ཤེས་རྟོགས་བྱུང་བར། བཟོ་ལས་དང་ཆ་འཕྲིན་ཅན་པུའུ་སོགས་སྡེ་ཚན་ལྔ་ཡིས་སྒྲིག་འཛུགས་བྱས་ཏེ་བཟོ་བཅོས་བརྒྱབ་པའི་བཙན་ཤེད་རང་བཞིན་གྱི་རྒྱལ་ཁབ་ཀྱི་ཚད་གཞི་སྟེ། 《གློག་སྒུལ་སྦག་སྦག་གི་བདེ་འཇགས་ལག་རྩལ་ཚད་གཞི》དེ་2024ལོའི་ཟླ་12ཚེས་31ཉིན་དངོས་སུ་ཁྱབ་བསྒྲགས་བྱས་ཤིང་། 2025ལོའི་ཟླ་9ཚེས་1ཉིན་ནས་ལག་ལེན་བསྟར་རྒྱུ་ཡིན་པ་རེད།

མེ་སྐྱོན་དོན་རྐྱེན་གྱི་མངོན་མེད་རྐྱེན་ངན་དང་གནོད་འཚེ་ཉུང་དུ་གཏོང་བ་དང་འགྲིམ་འགྲུལ་དོན་རྐྱེན་གྱི་ཉེན་ཁ་ཆུང་དུ་གཏོང་བར་དམིགས་ཏེ། ཚད་གཞི་གསར་པའི་ནང་ལྕགས་རིགས་མིན་པའི་རིགས་ཀྱི་མེ་འགོག་དང་འབར་འགོག་ནུས་པའི་བླང་བྱ་ནན་ཏུ་བཏང་བ་དང་། གློག་སྒུལ་སྦག་སྦག་གི་རྒྱུ་ཆར་འགྱིག་བེད་སྤྱོད་བྱེད་ཚད་སྦག་སྦག་སྤྱིའི་ལྗིད་ཚད་ཀྱི་5.5%ལས་བརྒལ་མི་རུང་བ་གསལ་པོ་བསྟན་ཡོད།

ཁྲིམས་མིན་བཟོ་བཅོས་ལ་འགོག་ཟོན་བྱེད་པའི་ཐད། ཚད་གཞི་གསར་པའི་ནང་གློག་རྫས་དང་། ཚོད་འཛིན་ཡོ་ཆས། མྱུར་ཚད་ཚོད་འཛིན་ཡོ་ཆས་བཅས་བཟོ་བཅོས་རྒྱག་པར་འགོག་ཟོན་བྱེད་པའི་བླང་བྱ་འཐུས་སྒོ་ཚང་དུ་བཏང་ཡོད།

འཛད་སྤྱོད་པའི་རྒྱུན་གཏན་གྱི་འགྲོ་སྐྱོད་དགོས་མཁོ་དེ་བས་ལེགས་པའི་སྒོ་ནས་སྐོང་ཆེད། ཚད་གཞི་གསར་པའི་ནང་བདེ་འཇགས་རང་བཞིན་ལ་ཤུགས་རྐྱེན་དེ་ཙམ་ཆེན་པོ་མེད་པའི་དམིགས་ཚད་ཁག་གཅིག་འོས་འཚམ་གྱིས་ལྷུག་ཏུ་བཏང་ཡོད། དཔེར་ན། ཞ་སྐྱུར་གློག་རྫས་བེད་སྤྱོད་བྱས་པའི་གློག་སྒུལ་སྦག་སྦག་གི་སྤྱིའི་ལྗིད་ཚད་མཐོ་ཤོས་སྟོང་ཁེ་55ནས་སྟོང་ཁེ་63བར་མཐོ་རུ་བཏང་བ་དང་། འཁོར་རིགས་ཚང་མར་རྐང་སྟེགས་སྒྲིག་ཆས་སྒྲིག་སྦྱོར་བྱེད་དགོས་པའི་བཙན་ཤེད་མི་བྱེད་པ་སོགས་རེད།

ཚད་གཞི་གསར་པ་ཁྱབ་བསྒྲགས་བྱས་རྗེས། རྒྱ་ཆེའི་གློག་སྒུལ་སྦག་སྦག་ཐོན་སྐྱེད་ཁེ་ལས་ཀྱིས་ཚད་གཞིའི་བླང་བྱ་གཞིར་བཟུང་། གང་མགྱོགས་ཐོན་རྫས་གསར་པ་འཆར་འགོད་དང་བཟོ་རྩལ་དང་སྒྲིག་ཆས་རིམ་སྤོར་བྱས་ནས། ཚད་གཞི་གསར་པ་དང་མཐུན་པའི་འཁོར་རིགས་མགྱོགས་མྱུར་ཁྲོམ་རར་འདོན་དགོས་ཀྱི་ཡོད།