ཚེས་14ཉིན། གསར་འགོད་པས་རང་བྱུང་ཐོན་ཁུངས་པུས་འཚོགས་པའི་རེས་སྐོར་གསར་པའི་གཏེར་འཚོལ་ཚད་བརྒལ་འཐབ་ཇུས་བྱ་སྤྱོད་ཀྱི་གྲུབ་འབྲས་གལ་ཆེན་གྱི་ཡོངས་བསྒྲགས་ཚོགས་འདུ་ནས་ཤེས་རྟོགས་བྱས་པར། རེས་སྐོར་གསར་པའི་གཏེར་འཚོལ་ཚད་བརྒལ་འཐབ་ཇུས་བྱ་སྤྱོད་ལག་ལེན་བསྟར་བ་བརྒྱུད། རང་རྒྱལ་གྱི་ནུས་རྒྱུའི་ཐོན་ཁུངས་འགན་ལེན་ནུས་པ་མུ་མཐུད་ཆེ་རུ་ཕྱིན་ཡོད། གཏིང་རིམ་གྱི་རྡོ་སོལ་ཆགས་རིམ་གྱི་སོལ་རླངས་རྩད་ཞིབ་གསར་སྤེལ་མགྱོགས་ལམ་དུ་བསྐྱོད་ནས་གསར་དུ་རྙེད་པའི་ས་གཤིས་བསགས་ཚད་སྨི་རྒྱ་དཔངས་གྲུ་བཞི་དུང་ཕྱུར་5000ལས་བརྒལ་ཡོད། གོ་ལ་ཧྲིལ་པོའི་ཆུ་གཏིང་ཟབ་དང་གཏིང་ཐུང་གི་རླངས་ཞིང་ཆེ་གྲས་ཐོག་མ་གསར་དུ་རྙེད་ནས་རང་བྱུང་སོལ་རླངས་ཀྱི་གསར་དུ་རྙེད་པའི་ས་གཤིས་བསགས་ཚད་སྨི་རྒྱ་དཔངས་གྲུ་བཞི་དུང་ཕྱུར་1000ལས་བརྒལ་ཡོད། ཏུན་དུང་ཕྱུར་10རིམ་པའི་སྣུམ་ཞིང་དང་ངོས་གྲུ་དུང་ཕྱུར་སྟོང་རིམ་པའི་རླངས་ཞིང་19གསར་རྙེད་བྱུང་ཡོད། སན་མོན་ཞ་གཤོང་སར་སྣུམ་རླངས་བརྟག་དཔྱད་ཀྱི་ཚད་བརྒལ་གསར་པ་བྱུང་ནས། རྒྱལ་ཡོངས་ཀྱི་གཞོང་ས་འབྲིང་ཆུང་གི་སྣུམ་རླངས་རྩད་ཞིབ་ལ་སྣེ་ཁྲིད་ཀྱི་དཔེ་སྟོན་ནུས་པ་ལྡན་ཡོད། ཡུ་གཏེར་གྱི་ཐོན་ཁུངས་མང་དུ་ཤུགས་ཆེན་ཕྱིན་ནས་ཡུ་གཏེར་ཕུང་ཆེ་གྲས་ཡན་10འཚོལ་ཞིབ་ཐུབ་པ་དང་ཀན་སུའུ་ཅིན་ཁྲོན་ནས་ཡུ་གཏེར་ཆེས་ཆེ་གྲས་ཤིག་རྙེད་ཡོད་པ་རེད།

ངོ་སྤྲོད་བྱས་པར་གཞིཌ་ན། 2024ལོར་རྒྱལ་ཡོངས་སུ་ཁྱོན་འཐབ་ཇུས་རང་བཞིན་གྱི་གཏེར་ཁ་རྩད་ཞིབ་ཁུལ་1400ལྷག་ཙམ་མཁོ་འདོན་བྱས་ནས་ལོ་10ལ་ཉེ་བའི་རིང་གི་ཟིན་ཐོ་མཐོ་ཤོས་བཏོད་ཡོད། ཀྲུང་དབྱང་དང་ས་གནས་ནོར་སྲིད་ཀྱིས་མ་དངུལ་གཏོང་ཤུགས་ཆེ་རུ་བཏང་ནས། སྤྱི་ཚོགས་མ་དངུལ་གཏོང་བར་སྐུལ་ཁྲིད་དང་སྣེ་ཁྲིད་ཀྱིས“ལོ་ལྔ་ཚན་བཅུ་བཞི་པར”རིམ་རྩིས་བརྒྱབ་ན་གཏེར་འཚོལ་མ་དངུལ་སྒོར་དུང་ཕྱུར་4000བཏང་བའི་ནང་སྤྱི་ཚོགས་མ་དངུལ་གྱིས་92%བཟུང་ཡོད།