ཏང་ཡོན་ཡིན་ལ་ཉིས་སྟོང་ནང་སྐྱེས་ཀྱི་ལས་ཀར་ཞུགས་མ་ཐག་པའི་ཉེན་རྟོག་པ་དང་མགྱོགས་མྱུར་འཚར་ལོངས་འབྱུང་བཞིན་པའི་མང་ཚོགས་ཀྱི་སྙིང་ཉེ་བ་ཞིག་ཀྱང་ཡིན་པའི་གཞོན་ནུ་གཉིས་ཡོད་པ་སྟེ། ཉིན་འགའི་རིང་། བོད་ལྗོངས་གཞིས་རྩེ་དིང་རི་རྫོང་གྲམ་མཚོ་ཤང་རྩྭ་གྲོང་ཚོར་བོད་ལྗོངས་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གི་མཱ་ལེ་ཁྲེང་དང་བློ་བཟང་རྡོ་རྗེས་མང་ཚོགས་འཚོལ་སྐྱོབ་དང་། སྐོར་གཡེང་། འགན་ལེན་ཞབས་ཞུ་བཅས་ཀྱི་ལས་ལ་བྲེལ་ནས་རང་ཉིད་ཀྱི་བྲག་ལྟར་བརྟན་པའི་དམ་བཅའ་ལག་ལེན་དུ་བསྟར་བཞིན་ཡོད།

ཟླ་1ཚེས་6ཉིན་ཏེ་བོད་ལྗོངས་དིང་རིར་ས་ཡོམ་མ་བརྒྱབ་གོང་གི་ཉིན་དང་པོར། ཇོ་མོ་གླང་མའི་འདབས་ཀྱི་སྒར་ས་ཆེན་པོའི་ཐང་ཆེན་དུ་ལས་ཀར་ཞུགས་མ་ཐག་པའི་མཱ་ལེ་ཁྲེང་དང་བློ་བཟང་རྡོ་རྗེས “ངེད་གཉིས་ཀྱིས་ཇོ་མོ་གླང་མ་སྲུང་མཁན་ཞིག་བྱས་ཏེ་མཐའ་མཚམས་ས་ཁུལ་གྱི་མང་ཚོགས་ལ་བདེ་འཇགས་ཡོང་བར་བྱེད་ཀྱི་ཡིན”ཞེས་རྒྱལ་དར་ལ་ཕྱོགས་ནས་དམ་བཅའ་བཞག་པ་དང་གུས་འདུད་ཞུས། ས་ཡོམ་བརྒྱབ་རྗེས། ཁོང་ཚོས་འཕྲལ་དུ་འཐབ་ས་དང་པོར་བསྐྱོད་ནས་དིང་རི་རྫོང་གྲམ་མཚོ་ཤང་རྩྭ་གྲོང་ཚོར་བཅའ་སྡོད་གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གི་ལས་དོན་ཚོགས་ཆུང་ནང་ཞུགས་ཏེ་གྲོང་ཚོའི་མང་ཚོགས་ཀྱི་བདེ་འཇགས་སྲུང་བའི་ལས་ལ་གཞོལ།

ཟླ་1ཚེས་12ཉིན་རྩྭ་གྲོང་ཚོར་སྐྱོད་སྐབས། ལས་དོན་རུ་ཁག་སྡོད་སའི་གུར་གྱི་ཕྱི་རོལ་ཏུ་བཙུགས་པའི་ཏང་དར་དང་རྒྱལ་དར་དེ་བས་མངོན་གསལ་དོད་པོ་ཡོད།

“དྲན་གསལ་ལ་ཚེས་7ཉིན་གནོད་འཚེ་ཕོག་ཁུལ་དུ་སྐྱོད་པའི་ལམ་ལ་ཡུལ་མི་མི་ཉུང་བ་ཞིག་གིས་ང་ཚོའི་ལམ་བཀག་ནས་རོགས་རམ་བྱེད་རོགས་བཤད་བྱུང”ཞེས་མཱ་ལེ་ཁྲེང་གིས་བཤད་པ་དང་། ཁོང་གིས་ཡུལ་མི་ཞིག་གི་ལུག་50ལྷག་ཙམ་ཞིག་རོའི་འོག་མནན་པ་ཤེས་རྗེས་ཐེ་ཚོམ་སྤུ་ཙམ་མེད་པར་ཡུལ་མིར་ལུག་འདོན་རོགས་བྱས། “དཀའ་ཉེན་གྱི་འགག་རྩའི་སྐབས། ཏང་དང་རྒྱལ་ཁབ་ཀྱིས་ང་ཚོར་ཚོད་བགམ་བྱེད་པའི་དུས་ཡིན་ལ། ལས་འགན་ལག་ལེན་བསྟར་བའི་དུས་ཀྱང་ཡིན་པ་མ་ཟད། ཏང་ཡོན་དང་ཉེན་རྟོག་པ་ཞིག་ཡིན་པའི་ངོས་ནས་ཀྱང་ང་ཚོར་མི་སེར་ལ་རོགས་རམ་བྱེད་པའི་འགན་འཁྲི་ཡོད”ཅེས་བཤད།

རྩྭ་གྲོང་ཚོའི་བཀོད་སྒྲིག་བྱ་ཡུལ་དུ། ཏང་ཡོན་ལས་བྱེད་པ་ནི་གནོད་འཚེ་ཕོག་ཁུལ་མང་ཚོགས་ཀྱི་སེམས་ཀྱི་རྟེན་ས་དང་བློ་གཏད་བཅོལ་ས་ཡིན།

ས་ཡོམ་བརྒྱབ་རྗེས་ཁང་པ་རྡིབ་པ་དང་། རྒྱུ་དངོས་ཁག་གཅིག་ས་འོག་ཏུ་ལུས་ནས་ཡུལ་མི་མང་པོ་ཞིག་ལ་སེམས་ཁྲལ་བཟོས་ཡོད། “ང་ཚོས་གང་ཐུབ་ཅི་ཐུབ་ཀྱིས་རོགས་རམ་དང་སེམས་པ་རྣལ་ལ་ཕབ་ཐབས་བྱས་པ་ཡིན། གལ་སྲིད་བརྟག་དཔྱད་མ་བྱས་པར་ཞིག་རོའི་འོག་ལུས་པའི་རྒྱུ་དངོས་འདོན་པར་ཕྱིན་ཚེ་ཉེན་ཁ་ཆེ་སྟབས། མེ་ཟོན་རོགས་སྐྱོབ་དཔུང་ཁག་གི་ཆེད་ལས་སྒྲིག་ཆས་ཀྱིས་རིམ་བཞིན་སྔོག་དགོས་ཚུལ་བཤད་པ་ཡིན”ཞེས་ལས་དོན་རུ་ཁག་གི་འགན་འཁུར་བ་ལི་ཙུའོ་ཏུང་གིས་བཤད་ཅིང་། ཁོང་གིས་འགྲེལ་བཤད་བརྒྱབ་པར་ཉན་རྗེས། ཡུལ་མི་ཟླ་བས“ཁྱེད་རྣམ་པ་ཡོད་པས། ང་ཚོ་བློ་བདེ་སོང”ཞེས་བཤད།

ངོ་སྤྲོད་བྱས་པར་གཞིགས་ན། ལས་དོན་ཚོགས་ཆུང་ལ་ཉེན་རྟོག་པ་10ཡོད་པ་དག་ཚོགས་ཆུང་5ལ་བགོས་ནས་ཚོགས་ཆུང་རེར་རྒྱ་རིགས་ཉེན་རྟོག་པ་དང་བོད་རིགས་ཉེན་རྟོག་པ་རེ་བྱས་ནས་ཡུག་ཁུལ་ལ་སྐོར་གཡེང་བྱེད་པར་བསྐྱོད་ཡོད།

སྔ་དྲོའི་ཆུ་ཚོད་11ཙམ་ལ། བློ་བཟང་རྡོ་རྗེ་དང་ལས་རོགས་ཀྱིས་སྐོར་གཡེང་ནན་ཏན་བྱས་ཤིང་། “ཨ་ཅག ཁྱེད་ཀྱི་ཕོར་པ་འདི་མེ་དང་ཐག་ཉེ་དྲགས་པས། མེ་སྐྱོན་ལ་གཟབ་གཟབ་བྱེད་དགོས”ཞེས་དྲན་སྐུལ་བྱས། ཁོང་ཚོས་ཡུལ་མིའི་ཐབ་དང་ཉལ་ཁྲི་ཡང་སེ་དབོར་རོགས་བྱས་ནས་བདེ་འཇགས་ཀྱི་མངོན་མེད་རྐྱེན་ངན་སྣ་ཚོགས་སེལ་ཐབས་བྱེད་ཀྱི་ཡོད།

ལས་དོན་སྔར་བས་ཞིབ་ཚགས་པོས་བསྒྲུབས་ཤིང་། བློ་བཟང་རྡོ་རྗེས“ཕྱི་ཚུལ་ནས་བལྟས་ན་དྲན་སྐུལ་བྱེད་པ་བསྐྱར་ཟློས་དང་སྟབས་བདེར་མཐོང་ནའང་ཧ་ཅང་དགོས་ངེས་ཡིན། དེ་དག་ཚང་མ་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་དང་འབྲེལ་བ་ཡོད། བཀོད་སྒྲིག་བྱ་ཡུལ་དུས་བདེ་འཆམ་མཐུན་བྱུང་ཚེ་གཞི་ནས་མི་སེར་རྣམས་དཀའ་ངལ་གྱི་གནས་ལས་གང་མགྱོགས་སྒྲོལ་ཐུབ”ཅེས་བཤད།

ཕྱི་དྲོར། མཱ་ལེ་ཁྲེང་གིས་བཀོད་སྒྲིག་བྱ་ཡུལ་ཐང་ཆེན་དུ་ཕྲུ་གུར་རྐང་རྩེད་སྤོ་ལོ་རྒྱག་རོགས་བྱས་ཤིང་། སྤོ་ལོ་བརྒྱབ་ཚར་རྗེས་གྲོགས་པོ་ཆུང་ཆུང་ཕུན་ཚོགས་འདོད་བློ་དེ་ཙམ་མི་ཁེངས་པར་མཱ་ལེ་ཁྲེང་གི་རྗེས་སུ་ཡོང་སྟེ་ཉེན་རྟོག་པའི་གུར་ནང་འཛུལ་ནས། མཱ་ལེ་ཁྲེང་གི་སྤང་དུ་བསྡད་དེ“གཅེན་པོ། ཁྱེད་ཀྱིས་གང་ཡང་བྱེད་ཐུབ་ཀྱི་ཡོད་དམ། ང་ཚོར་དཀའ་ངལ་མང་པོ་འཕྲད་ཀྱང་། ཁྱེད་ཚོ་བཙལ་ན་ལམ་སེང་ཐག་གཅོད་ཐུབ་ཀྱི་འདུག”ཅེས་བཤད།

“དོན་དུ་ང་ཚོ་མི་དཀྱུས་མ་ཞིག་ཡིན། ཡིན་ནའང་མི་སེར་གྱིས་ང་ཚོ་ཁོང་ཚོའི་སེམས་ཀྱི་རྟེན་ས་ཞིག་ཏུ་བརྩི་འདོད་བྱེད་ཀྱི་ཡོད” དོན་དེ་ཡིད་ལ་འཁོར་ནས་མཱ་ལེ་ཁྲེང་རང་དབང་མེད་པར་མགྲིན་པ་བརྣངས་ཤིང་། ཁོང་གིས“འདི་ཡང་ང་ཚོར་ལྕག་སྐུལ་ཞིག་རེད། ཏང་ཡོན་ཞིག་ཡིན་པའི་ངོས་ནས་མི་སེར་ལ་ཞབས་འདེགས་མང་ཙམ་ཞུ་དགོས”ཞེས་བཤད། བཀོད་སྒྲིག་བྱ་ཡུལ་བསྐྲུན་རྗེས། གྲོགས་པོ་ཆུང་ཆུང་ཁག་གཅིག་གིས་བྱེད་སྒོ་འགའ་གཉེར་རོགས་ཞེས་བཤད་པར་རུ་མི་ཚོས་གྲོས་བསྡུར་བྱས་རྗེས། ཁོམ་པ་བྱུང་དུས་རེས་མོས་ངང་ཕྲུ་གུ་ཆུང་ཆུང་ཚོ་དང་དཔེ་ཆ་ཀློག་པ་དང་། གཞས་གཏོང་བ། རྩེད་མོ་རྩེ་བ་བཅས་བྱེད་ཀྱི་ཡོད།

ཉིན་ཤས་བསྟུད་མར། རྒྱ་ཆེའི་ཏང་ཡོན་ལས་བྱེད་པ་ཚོ་ཡོམ་འགོག་གེགས་སེལ་གྱི་འཐབ་ས་དང་པོ་དང་། གནོད་འཚེ་ཚབས་ཆེན་ཕོག་ས། མང་ཚོགས་ཀྱི་དགོས་མཁོ་ཆེ་ས་བཅས་སུ་བསྐྱོད་ཡོད། ཧྲང་ཧའེ་གྲོང་ཁྱེར་གྱི་བོད་སྐྱོར་ལས་བྱེད་པ་དིང་རི་རྫོང་འཕྲོད་བསྟེན་ཞབས་ཞུ་ལྟེ་གནས་ཀྱི་ཀྲུའུ་རེན་ཞུས་ཤན་ཧྥེན་གྱིས་འཕྲལ་མར་བོད་སྐྱོར་ལས་དོན་རུ་ཁག་གི་རུ་མི་བསྐོངས་ནས་ལས་གནས་ཐོག་ཕྱིར་ལོག་གིས་རོགས་སྐྱོབ་ལས་ལ་ཞུགས་པ་དང་། དིང་རི་རྫོང་གྲམ་མཚོ་ཤང་ཟིང་དཀར་གྲོང་ཚོའི་ཏང་ཀྲི་པུའི་ཧྲུའུ་ཅི་པ་སངས་ཀྱིས་ཏང་ཡོན་ལས་བྱེད་པའི་སྣེ་ཁྲིད་དེ་དཀའ་ངལ་གནས་ལ་གྱར་བའི་མང་ཚོགས་15བསྐྱབས་པ་དང་མང་ཚོགས་632བདེ་འཇགས་ཀྱི་གནས་སུ་སྤོས་པ། གྲམ་མཚོ་ཤང་དགུ་རུམ་གྲོང་ཚོའི་ཏང་ཀྲི་པུའི་ཧྲུའུ་ཅི་ཚེ་རིང་ཕུན་ཚོགས་ཀྱིས་རང་ཉིད་ཀྱི་གཉེན་ཉེ་སྟབས་མ་ལེགས་པར་རྐྱེན་ལམ་དུ་ཤོར་ཡང་སྔར་བཞིན་ལས་གནས་བརྟན་སྲུང་གིས་གྲོང་ཚོ་ཡོངས་ཀྱི་ཏང་ཡོན་གྱི་སྣེ་ཁྲིད་དེ་ནུས་ཤུགས་ཡོད་རྒུས་རོགས་སྐྱོབ་ལས་ལ་གཞོལ་བ། དིང་རི་རྫོང་གྲམ་མཚོ་ཤང་དཀར་པོ་གྲོང་ཚོའི་གྲོང་སྡོད་ལས་དོན་རུ་ཁག་གི་ཏང་ཡོན་གྱིས་འབྲེལ་ཡོད་སྡེ་ཚན་ལ་མཐུན་སྦྱོར་ཧུར་ཐག་བྱས་ནས་ཆུ་དང་གློག་སྐུད་ཉམས་གསོ་དང་འགྲོ་ལམ་ཤར་གཏོང་སོགས་ཀྱི་ལས་དོན་ནང་ཞུགས་ཏེ། གེགས་བར་བྱུང་རྗེས་ཀྱི་ཆུ་ཚོད་1ནང་ཕྱི་རོལ་དང་འབྲེལ་གཏུག་སླར་གསོ་ཐུབ་པ་དང་། ཆུ་ཚོད་ལྔའི་ནང་གཏོར་སྐྱོན་ཕོག་པའི་ལམ་ཉམས་བཟོ་བྱས་པ་སོགས་གུང་ཁྲན་ཏང་ཡོན་མི་རེ་ངོ་རེས་རང་ཉིད་ཀྱི་བྱ་སྤྱོད་ལ་བརྟེན་ནས་ས་ཡོམ་ཁྲོད་རོགས་སྐྱོབ་ཀྱི་མཉམ་ཤུགས་ཆེན་པོ་གཅིག་ཏུ་བསྒྲིལ་ཏེ་ཡོམ་འགོག་གེགས་སེལ་གྱི་འཐབ་ས་དང་པོར་ཏང་དར་ལྷབ་ལྷོབ་ཏུ་གཡོ་བར་བྱས་ཡོད།