ཉིན་ཤས་གོང་། དངུལ་རྩ་ལྟ་འདོམས་སྤྱི་ཁྱབ་ཅུས་ཀྱིས་2025ལོའི་ལྟ་འདོམས་ལས་དོན་ཚོགས་འདུ་འཚོགས་ཤིང་། གསར་འགོད་པར་ཚོགས་འདུ་ནས་ཤེས་རྟོགས་བྱུང་བར། 2024ལོར་གཙོ་གནད་ཁྱབ་ཁོངས་ཀྱི་ཉེན་ཁ་ནུས་ལྡན་དང་གོ་རིམ་ལྡན་པའི་ངང་སྔོན་འགོག་དང་བསལ་ནས། གྲོང་ཁྱེར་ས་ཁང་བདག་ཁོངས་ཀྱི་མ་དངུལ་བསྡུ་སྒྲིལ་མཐུན་སྦྱོར་ལམ་སྲོལ་ལག་ལེན་བསྟར་ནས་ཕན་འབྲས་ཐོན་པ་དང་།“མིང་ཐོ་དཀར་པོའི”རྣམ་གྲངས་ལ་དངུལ་བུན་སྒོར་དུང་ཕྱུར་ཁྲི་5ལྷག་ཙམ་གཏོང་རྒྱུའི་ཞིབ་མཆན་བཀོད་པ་རེད། ཐབས་མང་མཉམ་སྤྱོད་ཀྱིས་དཔལ་འབྱོར་བསྐྱར་འཕར་ལེགས་འཕེལ་ལ་འདེགས་སྐྱོར་བྱས་པ་དང་། དངུལ་རྩའི་རྒྱུ་ནོར་མ་འཇོག་ཀུང་སིའི་རྐང་དབང་མ་འཇོག་ཚོད་ལྟ་གྲོང་ཁྱེར་18ལ་རྒྱ་སྐྱེད་བཏང་བ། འདོད་མཐུན་ཐེབས་རྩའི་གཞི་ཁྱོན་སྒོར་དུང་ཕྱུར་3400ལྷག་ཙམ་ཟིན་པའི་གན་རྒྱ་བཞག་ཡོད་པ་རེད།

ཚོགས་འདུའི་ཐོག་བསྟན་དོན། ནང་མཁོ་ཕྱོགས་ཡོངས་ནས་རྒྱ་ཆེར་གཏོང་བར་རྒྱབ་སྐྱོར་དང་། འཛད་སྤྱོད་སྐུལ་སྤེལ་གྱི་བྱ་སྤྱོད་ལག་ལེན་བསྟར་བར་རམ་འདེགས་བྱས་ཏེ“གཙོ་བོ་གཉིས”དང“གསར་གཉིས”ལ་ཞབས་འདེགས་ནུས་ལྡན་ཞུ་དགོས། འགན་བཅོལ་དང་དངུལ་དོན་དོ་དམ་མ་དངུལ་གྱིས་མ་རྩའི་ཁྲོམ་ར་བརྟན་པོ་དང་སྐྱོན་བྲལ་འཕེལ་རྒྱས་ལ་རྒྱབ་སྐྱོར་བྱེད་པར་ཁྲིད་སྟོན་བྱེད་དགོས། ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བར་ཞབས་འདེགས་ཧུར་ཐག་ཞུས་ནས། མ་དངུལ་སྔ་ཙམ་དང་། ཆུང་ཙམ། ཡུན་རིང་ཙམ། འགག་རྩའི་ཚན་རྩལ་བཅས་ལ་གཏོང་བའི་རྒྱབ་སྐྱོར་སྲིད་ཇུས་འཐུས་སྒོ་ཚང་དུ་གཏོང་དགོས། ཁེ་ལས་ཆུང་ཕྲན་གྱི་མ་དངུལ་བསྡུ་སྒྲིལ་མཐུན་སྦྱོར་ལས་དོན་ལམ་སྲོལ་དོན་འཁྱོལ་ཞིབ་ཚགས་ལ་རྒྱབ་སྐྱོར་བྱེད་པར་སྐུལ་འདེད་བཏང་ནས། ཁེ་ལས་ཀྱི་མ་དངུལ་བསྡུ་སྒྲིལ་གྱི་དགོས་མཁོ་ནུས་ལྡན་ངང་སྐོང་དགོས། རྒྱལ་སྒྲོལ་ཚོང་དོན་གྱི་ཕྱོགས་བསྡུས་དངུལ་རྩའི་ཞབས་ཞུའི་སྤུས་ཚད་མཐོ་རུ་་དང་ཕན་འབྲས་ཆེ་རུ་བཏང་ནས་ཕྱི་དངུལ་བརྟན་པོ་དང་ཕྱི་ཕྱོགས་ཚོང་དོན་བརྟན་པོ་ཡོང་བར་རམ་འདེགས་བྱེད་དགོས།