རྒྱལ་ཁབ་ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱིས་ཉིན་ཤས་གོང་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། 2024ལོ་ཚུན་དུ་འཛད་སྤྱོད་པའི་ཞུ་གཏུག་ཐེར་འདོན་མང་དུ་འགྲོ་ཚད་2023ལོ་ལས་བརྒྱ་ཆའི་གྲངས་18.6ཆག་པ་དང་། ལོ་5ཚུན་གྱི་འཕར་ཚད་ཚད་གཞི་ཆེན་པོས་ཆག་ཐེངས་དང་པོ་ཡིན་པ་དང་། ཞུ་གཏུག་ཐེར་འདོན་ཐག་གཅོད་བྱས་ནས་འཛད་སྤྱོད་པར་དཔལ་འབྱོར་གྱོང་གུན་སྒོར་དུང་ཕྱུར་47.2མི་ཕོག་པ་བྱས་པ་དེ་དུས་མཚུངས་ལས་17.1%འཕར་ཡོད།

ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱི་འབྲེལ་ཡོད་འགན་འཁུར་བས་འཛད་སྤྱོད་ཁོར་ཡུག་བཟང་མིན་སྐོར་ལ་འཛད་སྤྱོད་པར་ཐད་ཀར་མྱོང་ཚོར་བྱུང་ཡོད་ལ་ཁོང་ཚོར་སྐད་ཆ་ཤོད་དབང་ཡང་ཆེ་ཤོས་ཡོད། གོམ་སྟབས་རྗེས་མར་སྤྱོད་གོ་ཆོད་པའི་བྱ་ཐབས་དང་བྱ་ཐབས་ནུས་ལྡན་སྤྱད་དེ་འཛད་སྤྱོད་ཡར་སྐུལ་དང་ནང་མཁོ་རྒྱ་ཆེར་གཏོང་བར་འདེགས་སྐྱོར་ནུས་ལྡན་བྱ་རྒྱུ་རེད། འཛད་སྤྱོད་ཀྱི་དཀའ་གནད་ཐག་གཅོད་ནུས་ལྡན་བྱས་ཏེ“འཛད་སྤྱོད་སྲུང་སྐྱོང”གི་ཁྲིམས་སྒྱུར་བྱ་སྤྱོད་སྤེལ་ནས་རྫུན་ལྷད་ཞན་གསུམ་དང་། རྒྱུ་འཕྲི་སླ་བཅོས། བྲིན་ཚོང་རྫུན་མ་སོགས་ཀྱི་གནད་དོན་ལ་རྡུང་རྡེག་ཚ་ནན་གཏོང་བ་དང་། ཁྱིམ་སྤྱོད་གློག་ཆས་དང་དྲ་ཐོག་ནས་བཙོངས་པའི་འཛད་རྫས་སོགས་སྤུས་ཞན་ཐོན་རྫས་ཚུར་བསྡུ་བྱེད་པའི་བྱ་སྤྱོད་སྤེལ་རྒྱུ་རེད། འཛད་སྤྱོད་མཁོ་སྤྲོད་ཀྱི་སྤུས་ཚད་མཐོ་རུ་གཏོང་བར་སྐུལ་འདེད་གཏིང་ཟབ་བཏང་ནས་འཛད་སྤྱོད་པ་བློ་བདེ་པོ་ཡོང་བ་བྱས་ཏེ། སྡེ་ཚན་མང་པོ་དང་མཉམ་དུ་འཛད་སྤྱོད་ཁོར་ཡུག་ལེགས་སུ་གཏོང་བའི་ལོ་གསུམ་གྱི་བྱ་སྤྱོད་སྤེལ་ནས་རྒྱུགས་འབོར་གྱི་རོགས་སྐྱོར་དང་། ཡིད་རྟོན་གྱི་ལྕག་སྐུལ། དངུལ་རྩའི་ནུས་སྤྲོད་བཅས་ཀྱི་བྱ་ཐབས་འཚོལ་ཞིབ་བྱས་ཏེ་གཞུང་དྲང་ཚོང་པ་རྣམས་བློ་བདེ་པོའི་ངང་ཚོང་གཉེར་དང་རྒྱ་སྟོབས་ཆེ་རུ་གཏོང་རྒྱུ་རེད། ནུས་ཤུགས་ཡོད་རྒུས་འཛད་སྤྱོད་ཀྱི་ཁེ་དབང་སྲུང་སྐྱོང་ནུས་པ་ཆེ་རུ་བཏང་ནས་འཛད་སྤྱོད་པ་བློ་བདེ་པོ་ཡོང་བར་བྱས་ཏེ། ལས་སྟེགས་12315ཕྱོགས་ཡོངས་ནས་རིམ་སྤོར་དང་། གཞི་རིམ་འཛད་སྤྱོད་ཁེ་དབང་སྲུང་སྐྱོང་ཞབས་ཞུའི་དྲ་རྒྱ་ཆེར་གཏོང་། འཛད་སྤྱོད་རྩོད་གཞི་དྲ་ཐོག་ནས་འདུམ་འགྲིག་བྱེད་པའི་ལམ་སྲོལ་ཁྱབ་གདལ་གཏོང་བ། གྲངས་གཞི་ཆེན་པོའི་ནུས་སྤྲོད་ལ་ཤུགས་སྣོན་རྒྱག་པ། ཞུ་གཏུག་འབྱོར་རྗེས་ཐག་གཅོད་བྱེད་པ་ནས་ཞུ་གཏུག་མ་འབྱོར་གོང་ནས་ཐག་གཅོད་བྱེད་པའི་ཕྱོགས་སུ་སྒྱུར་བ་བཅས་བྱས་ཏེ་འཛད་སྤྱོད་དྲང་གཞག་སྔར་བས་ཚོར་ཐུབ་པ་དང་ཁྱབ་ཐུབ་པ་བྱ་རྒྱུ་རེད་ཅེས་བཤད།

དཔྱིད་གསར་དུས་ཆེན་འཆར་ཉེའི་མཚམས་སུ། ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱིས་རྒྱལ་ཡོངས་ཁྱབ་ཁོངས་སུ་དམངས་འཚོའི་ཚོང་ཟོག་གལ་ཆེན་གྱི་ཞབས་ཞུའི་རིན་གོང་བརྟན་པོ་དང་སྤུས་ཚད་འགན་ལེན་གྱི་ལས་དོན་བཀོད་སྒྲིག་བྱས་ཏེ། འཚོ་བའི་མཁོ་ཆས་དང་། ཞག་སྡོད། འགྲིམ་འགྲུལ་སོགས་ཚོང་ཟོག་དང་ཞབས་ཞུའི་རིན་གོང་འགྱུར་ལྡོག་གི་གནས་ཚུལ་ལ་དམིགས་ཏེ་རིན་གོང་ལྟ་འདོམས་ཁྲིམས་སྒྱུར་ལ་ཤུགས་སྣོན་བརྒྱབ་པ་དང་། འབྲས་དང་། གྲོ་ཞིབ། བཟའ་སྣུམ། ཤ སྒོ་ང་། འོ་མ་སོགས་འཛད་སྤྱོད་བཟའ་བཅའ་འབོར་ཆེན་དང་ཁྲོམ་ར་དང་སྒོ་རྩིས་ཚོང་ཁང་སོགས་གཙོ་གནད་ཁུལ་ལ་དམིགས་ཏེ་བཟའ་བཅའི་བདེ་འཇགས་ལ་ལྟ་འདོམས་བྱེད་ཤུགས་ཆེ་རུ་བཏང་བ། གྱོན་ཆས་རྩེད་ཆས་དང་། ཤོག་སྦག སོལ་རླངས་ཡོ་བྱད་སོགས་དུས་ཆེན་རིང་བྲིན་ཁ་རྒྱུག་པའི་ཚོང་ཟོག་དང་དེ་བཞིན་བདེ་འཇགས་དང་འབྲེལ་བ་ཡོད་པའི་གཙོ་གནད་ཚོང་ཟོག་ལ་དམིགས་ཏེ་སྤུས་ཚད་བདེ་འཇགས་ཀྱི་མཐའ་ཚད་བརྟན་པོར་བསྲུངས་ཡོད།