དབུ་ཤོག>གསར་འགྱུར།>རྒྱལ་ནང་།རྒྱལ་སྤྱི།>རྒྱལ་ནང་།
  • 2021ལོའི་བར་བརྒལ་གྱི་དུས་རིམ་ཚུན་དུ་ལས་བྱེད་པ་ཁྲི་50ལྷག་ཙམ་གྱིས་གྲོང་སྡོད་ཀྱི་འཐབ་ས་དང་པོར་རྒྱུན་མཐུད་འབད་འཐབ་བྱས་པ།

    འགག་རྩའི་དུས་སུ་རོགས་རམ་བྱས། སེམས་ལ་ཟུག་པའི་ཕན་བདེ་བསྐྲུན།

  • ཡོང་ཁུངས།  མི་དམངས་ཉིན་རེའི་ཚགས་པར།    |     རྩོམ་པ་པོ།  ཡུས་ཅིང་ཞན།   |     སྤེལ་དུས།  2025-01-15

    “གྲོང་སྡོད་ལས་དོན་རུ་ཁག་གིས་དུས་ཐོག་ལ་རོགས་རམ་གནང་བས་ངེད་ཁྱིམ་གྱི་འཚོ་བ་སླར་ཡང་ཡག་ཏུ་ཕྱིན་སོང”ཞེས་ཀན་སུའུ་ཞིང་ཆེན་ལིན་ཐའོ་རྫོང་པཱ་ལི་ཕུའུ་གྲོང་རྡལ་ཡན་ཁྲོན་ཙེ་གྲོང་ཚོའི་གྲོང་མི་མོའུ་ཡུང་ཧྲེང་གིས་སེམས་གཏིང་གི་སྐད་ཆ་དེ་བཤད། ལའོ་མོའུ་ཁྱིམ་གྱི་ཡོང་འབབ་གཙོ་བོ་ཞིང་ལས་ལ་བརྟེན་པ་དང་གཞེས་ནིང་ལོར་ནང་མི་ན་བས་མ་གཞི་དབུལ་སྒྲོལ་བྱུང་ཟིན་པའི་འཚོ་བ་དེ་སླར་ཡང“ཡམ་ཡོམ”དུ་གྱུར།

    “ཁྱིམ་ལ་ག་རེ་དགོས་ཀྱི་འདུག” “ཕྱི་ལ་ལས་ཀར་ཕྱིན་ན་གཟུགས་པོས་འཇོན་པ་འདུག་གམ”ཞེས་པ་སོགས་གྲོང་སྡོད་ཧྲུའུ་ཅི་དང་པོ་པན་ཧྲི་མིང་གིས་འཕྲལ་དུ་དུད་ཚང་ལ་བསྐྱོད་ནས་མཐིལ་རྟོགས་གྲལ་བཤེར་བྱས་པ་དང་། གྲོང་སྡོད་ལས་དོན་རུ་ཁག་གིས་ལམ་སེང་བྱ་སྤྱོད་སྤེལ་ཏེ་ནད་ཆེན་རོགས་སྐྱོབ་ལ་འབྲེལ་མཐུད་རོགས་རམ་གནང་རེ་ཞུས་པ་དང་ལའོ་མོའུ་ཡི་བུ་ལ་ཨར་པོ་རྒྱག་ས་ནས་ལས་ཀ་འཚོལ་རོགས་བྱས་ཡོད། གྲོང་ཚོས་ད་དུང་ཞིང་སྤྱོད་འཁོར་གསུམ་རླངས་འཁོར་ཞིག་ཉོས་ནས་ལའོ་མོའུ་ལ་ཀྲུང་ལུགས་སྨན་རྒྱུ་དབོར་དུ་བཅུག་པ་བཅས་ཐབས་ཤེས་སྣ་ཚོགས་བཏང་བས་ལའོ་མོའུ་ཁྱིམ་གྱི་ཡོང་འབབ་མངོན་གསལ་དོད་པོས་མང་དུ་ཕྱིན་ཡོད།

    གྲོང་སྡོད་ལས་དོན་རུ་ཁག་གི་ཧྲུའུ་ཅི་དང་པོ་དང་ལས་དོན་རུ་ཁག་འདེམས་གཏོང་བྱ་རྒྱུ་ནི་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་རྒྱ་སྐྱེད་དང་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བའི་ལམ་ལུགས་ཀྱི་བཀོད་སྒྲིག་གལ་ཆེན་ཞིག་རེད། 2021ལོའི་བར་བརྒལ་གྱི་དུས་རིམ་ཚུན་དུ། ཞིང་ཆེན་31དང་ཤིན་ཅང་ཐོན་སྐྱེད་འཛུགས་སྐྲུན་པིང་ཐོན་གྱིས་རེས་སྐོར་རེར་ལས་བྱེད་པ་ཁྲི་50ལྷག་ཙམ་གྲོང་སྡོད་ཧྲུའུ་ཅི་དང་པོ་དང་གྲོང་སྡོད་ལས་དོན་རུ་ཁག་ལ་རྒྱུན་མཐུད་སྒྲིག་འཛུགས་ཀྱིས་འདེམས་གཏོང་བྱས་པ་དང་ཁོང་ཚོས་སྔོན་ཐོན་གྱི་འདུ་ཤེས་དང་། མ་དངུལ་རྣམ་གྲངས། ལག་རྩལ་ཞབས་ཞུ་བཅས་ལ་བརྟེན་ནས་གྲོང་སྡོད་འཐབ་ས་དང་པོར་འབད་འཐབ་བྱས་ཏེ་ཡུལ་མི་ཚོ་དང་མཉམ་དུ་ཕྱུག་འགྱུར་ལམ་བུའི་ཕྱོགས་སུ་བསྐྱོད་ཡོད།

    གླ་པར་འགྲོ་རྒྱུ་ནི་དབུལ་སྒྲོལ་དུད་ཚང་གི་ཡོང་འབབ་ཀྱི་ཡོང་ཁུངས་གལ་ཆེན་ཞིག་རེད། ཀན་སུའུ་ཞིང་ཆེན་ཁང་རྫོང་ཀྲང་ཅ་ཧོ་གྲོང་ཚོར་ཀྲུང་གོ་འཛུགས་སྐྲུན་ཚོགས་པས་སྔ་རྗེས་སུ་གྲོང་སྡོད་ཧྲུའུ་ཅི་དང་པོ་ཐེངས་གསུམ་འདེམས་གཏོང་བྱས་པ་རེད། གྲོང་སྡོད་ཧྲུའུ་ཅི་དང་པོ་ཀྲང་ཅན་ཧྥེང་གིས“ན་ནིང་གྲོང་ཚོ་ཡོངས་ནས་ཁྱོན་མི་143ཕྱི་ལ་གླ་པར་བསྐྱོད་ཡོད”ལས་ཞུགས་འབབ་འཕར་ཞེས་པའི་གལ་པོ་ཆེ་འདིར་དམིགས་ཏེ། གྲོང་ཚོ་དང་རྫོང་གི་མི་སྤྱི་ལས་ཁུངས་དང་ཞིང་ལས་གྲོང་གསེབ་སོགས་སྡེ་ཚན་དང་འབྲེལ་མཐུད་བྱས་ནས་གྲོང་མི་རེ་རེ་བྱས་ཏེ་ཀྲུང་གོ་འཛུགས་སྐྲུན་ཚོགས་པའི་ལས་ཀའི་རྣམ་གྲངས་ནང་བཀོད་སྒྲིག་བྱས་ཡོད་ཅེས་ངོ་སྤྲོད་བྱས།

    སྔོན་ཆད་དང་བསྡུར་ན་དབུལ་སྒྲོལ་གྲོང་ཚོ་མང་པོ་ཞིག་གི་འཕེལ་རྒྱས་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་ཡོད་པས། གྲོང་སྡོད་ལས་བྱེད་པས་གྲོང་ཚོའི་འཕེལ་རྒྱས་ལ་གསོན་ཤུགས་གསར་པ་ཇི་ལྟར་བསྣན་དགོས་སམ།

    ཀུའེ་ཀྲོའུ་ཞིང་ཆེན་རུང་ཅང་རྫོང་དུ་རྫོང་རིག་རྩལ་རླུང་འཕྲིན་བརྙན་འཕྲིན་ཡུལ་སྐོར་ཅུས་ནས་ཡིན་པའི་ལུའོ་ལི་ཕིང་གིས་ཤིན་ཧྭ་ཤང་པའེ་པེ་གྲོང་ཚོར“གྲོང་ཚོའི་རིམ་འདས”འགྲན་བསྡུར་གྱི་ཚ་རླབས་ལ་དམ་འཛིན་ཡག་པོ་ཐུབ་པས་མེའོ་རིགས་ཀྱི་ཡུལ་མི་ཚོར་ཡུལ་སྐོར་གྱི་ཡོང་འབབ་རག་པ་དང་། 2023ལོ་ནས་བཟུང་། གྲོང་ཚོ་ཡོངས་ཀྱི་མི་ཐེངས་500ལྷག་ཙམ་སྒོ་འགྲམ་དུ་ལས་ཞུགས་ཐུབ་ནས་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་ལྡབ་གཉིས་འགྱུར་འཕར་ཡོད། ཞིང་ཆེན་བུད་མེད་མཉམ་འབྲེལ་ལྷན་ཚོགས་ནས་ཡིན་པའི་ཀྲོའུ་ཆན་གྱིས་ཙའེ་མཱ་གྲོང་རྡལ་ཧྥུང་ཏེང་གྲོང་ཚོར“བུད་མེད་དང་བྱིས་པའི་བྱེད་སྒོའི་ས་ཚིགས”བསྐྲུན་རོགས་བྱས་པ་དང་། ཁྱིམ་སྲོལ་རྒྱུན་འཛིན་དང་སྐར་མ་རིམ་པའི་ཡ་རབས་ཁྱིམ་ཚང་དཔྱད་འདེམས་བྱེད་སྒོ་སྒྲིག་འཛུགས་བྱས་ཏེ་གྲོང་གསེབ་བཅོས་སྐྱོང་ལ་རིམ་གྱིས་འགྱུར་ལྡོག་བཏང་ཡོད། “གྲོང་ཚོའི་འཕེལ་རྒྱས་ཀྱི་དགོས་མཁོར་གཞིགས་ནས་ང་ཚོས་དེ་མཚུངས་ཀྱི་ཆེད་ལས་ཅན་གྱི་ཤེས་ལྡན་པ་མངགས་གཏོང་བྱེད་ཀྱི་ཡོད”ཅེས་རུང་ཅང་རྫོང་ཨུད་རྩ་འཛུགས་པུའུ་ལས་བྱེད་པའི་ཆ་འཕྲིན་ལྟེ་གནས་ཀྱི་ཀྲུའུ་རེན་གཞོན་པ་ལིའུ་དབྱང་གིས་བཤད།

    ཀུའེ་ཀྲོའུ་ཞིང་ཆེན་ཨན་ཧྲུན་དཔལ་འབྱོར་གསར་སྤེལ་ཁུལ་དུ་ཧོ་ཞའོ་ཡིའུ་སྔ་རྗེས་སུ་ལེ་ཆི་གྲོང་ཚོ་དང་ཏ་ཀྲི་གྲོང་ཚོ། ཧོ་ཤིན་གྲོང་ཚོ་བཅས་སུ་གྲོང་སྡོད་རོགས་སྐྱོར་བྱེད་པར་བཏང་བ་དང་ཁོང་གིས་ལོ་བཅུའི་རིང་ཉིན་གཅིག་ལ་དཔེ་བལྟས་པ་ལྟར་ལས་དོན་བསྒྲུབས་པས་གྲོང་མི་ཚོས་ཁོང་ལ་གཞི་རིམ་དུ་ཟབ་འཇུག་བྱེད་མཁན་ལས་བྱེད་པ་ཞེས་འབོད་ཀྱི་ཡོད།

    “ཞའོ་ཡིའུ་ཡིས་རྟག་ཏུ་དོན་དག་ཡོད་ན་ཁོང་འཚོལ་བར་ཤོག་ཟེར་གྱི་ཡོད”གྲོང་ཚོར་འཕྲུལ་རྨོའི་ལམ་བཟོ་བ་དང་། ཡུར་བུ་བཟོ་བ། རྫིང་བུ་ཉམས་བཟོ་བྱེད་པ། རྣམ་གྲངས་འདུན་ཞུ་བཅས་ལས་ཀ་མ་བསྒྲུབ་གོང་ཧོ་ཞའོ་ཡིའུ་ཡིས་ལས་དོན་རུ་ཁག་དང་མཉམ་དུ་སྒོ་རའི་ནང་གྲོང་མིའི་བསམ་འཆར་ཉན་པའི་ཚོགས་འདུ་ཞིག་འཚོགས་ཀྱི་ཡོད་པས་ཚང་མ་གྲོང་གསེབ་འཛུགས་སྐྲུན་ནང་ཞུགས་པའི་ཧུར་སེམས་ཆེས་ཆེར་འཕེལ་ཡོད།

    “ད་ཆ་གྲོང་ཚོར་འགྱུར་ལྡོག་ཆེན་པོ་བྱུང་བས། ལས་ཀ་ཧུར་ཐག་བྱས་ན་འཚོ་བ་སྐྱིད་པོ་ཡོང་ངེས་རེད”ཅེས་གྲོང་སྡོད་ལས་དོན་རུ་ཁག་དང་གྲོང་ཚོའི་ཨུ་ལྷན་གཉིས་ཀྱི་སྐུལ་ཁྲིད་འོག ཧོ་ཤིན་གྲོང་ཚོའི་གྲོང་མི་དབྱང་ཡུང་ཞང་གིས་སྔོ་ཚལ་བཏབ་པས། ཐོག་སོ་གཉིས་ཀྱི་ཐོག་ཁང་ཆུང་ངུ་ཞིག་མགྱོགས་པོ་རྒྱག་ཐུབ་ཡོད།

    གྲོང་སྡོད་ལས་བྱེད་པའི་རོགས་སྐྱོར་ཕན་འབྲས་ལ་ཞིབ་དཔྱད་ཇི་ལྟར་བྱེད་དགོས་སམ་ཞེ་ན། ཨན་ཧུའེ་ཞིང་ཆེན་ཁྲང་ཧྥུང་རྫོང་གིས་དུས་ཚིགས་རེར་འགྲེམས་སྟོན་སྤེལ་རེས་བྱེད་སྒོ་སྤེལ་ཏེ། གྲོང་སྡོད་ཧྲུའུ་ཅི་དང་པོ་སྒྲིག་འཛུགས་བྱས་ནས་འཆད་སྟེགས་ཐོག་དངོས་ཡོད་གྲུབ་འབྲས་ཤོད་པ་དང། མི་འདང་བའི་ཆ་འཚོལ་བ། བྱ་ཐབས་གསལ་པོ་བཟོ་བ་བཅས་བྱས་པ་དང་། གྲུབ་འབྲས་འདི་ཉིད་ལས་བྱེད་པའི་ལོ་འཁོར་དཔྱད་ཞིབ་དང་སྔོན་ཐོན་དང་ཕུལ་བྱུང་དཔྱད་འདེམས་ཀྱི་གཞི་འཛིན་སར་བྱེད་ཀྱི་ཡོད“དེས་གྲོང་ཚོའི་དབར་གྱི་ཐོན་ཁུངས་མཉམ་སྤྱོད་དང་གསབ་རེས་ལ་ཤུགས་སྣོན་ཐེབས་པ་མ་ཟད། གྲོང་སྡོད་ལས་བྱེད་པ་ཕན་ཚུན་སློབ་སྦྱོང་དང་དཔྱད་གཞིར་འཛིན་རྒྱུར་ཡང་ཕན་ཐོགས་བྱུང་ཡོད”“ངེད་གྲོང་ཚོས་དུས་བཀག་ལྟར་གཉེར་བའི་ཚོང་འདུས་དང་གྲོང་གསེབ་ཀྱི་གཞོན་ནུའི་ཁྲང་ཞིའི་དུས་ཆེན་སོགས་ཀྱི་བྱེད་སྒོ་ཚང་མ་མི་མང་པོས་བསམ་བློ་སྤེལ་རེས་བྱས་ནས་ཐོན་པའི་ཐབས་ཤེས་རེད”ཅེས་དབྱང་སྨེའོ་གྲོང་རྡལ་མཱ་ཡིང་གྲོང་ཚོའི་གྲོང་སྡོད་ཧྲུའུ་ཅི་དང་པོ་ཀྲུང་ཡུས་ཀྱིས་བཤད།

    2024ལོར། ཞིང་ལས་གྲོང་གསེབ་པུའུ་ལས་བྱེད་པའི་དོ་དམ་སློབ་གླིང་གིས་གྲོང་སྡོད་ཧྲུའུ་ཅི་དང་པོ་དང་ལས་དོན་རུ་མིའི་དྲ་ཐོག་སློབ་སྦྱོང་ལས་སྟེགས་བཏོད་ནས། ཁག་དང་པོའི་གྲོང་སྡོད་ལས་བྱེད་པ་ཁྲི་1ལ་སློབ་སྦྱོང་ཞབས་ཞུ་མཁོ་འདོན་བྱས་ཡོད“ད་ལོ་ནི་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་རྒྱ་སྐྱེད་དང་གྲོང་གསེབ་དར་རྒྱས་སྦྲེལ་མཐུད་ནུས་ལྡན་གྱི་ལོ་ལྔའི་བར་བརྒལ་གྱི་དུས་རིམ་གྱི་ལོ་མཇུག་ཤོས་དེ་ཡིན་པས། ས་གནས་ཁག་གིས་མཛུབ་ཁྲིད་དང་ལྟ་སྐུལ་ལ་ཤུགས་སྣོན་རྒྱག་པ་དང་། དཔྱད་ཞིབ་གདེང་འཇོག་ལམ་སྲོལ་ལེགས་སུ་གཏོང་རྒྱུར་མུ་མཐུད་ཁྲིད་སྟོན་བྱས་ནས། གྲོང་སྡོད་ལས་བྱེད་པའི་ཤེས་ལྡན་མི་སྣའི་འདེགས་སྐྱོར་ནུས་པ་སྔར་བས་འདོན་སྤེལ་བྱ་རྒྱུ་ཡིན”ཞེས་ཞིང་ལས་གྲོང་གསེབ་པུའུ་ས་ཁོངས་མཉམ་ལས་སྐུལ་འདེད་སིའི་འབྲེལ་ཡོད་འགན་འཁུར་བས་དེ་ལྟར་བཤད།

    འགན་འཁུར་རྩོམ་སྒྲིག་པ། ནོར་བུ་གཡུ་སྒྲོན།

མཉམ་སྤྱོད།

འབྲེལ་ཡོད་གསར་འགྱུར།