ནོར་སྲིད་པུས་རྒྱལ་ཡོངས་ཁྱབ་ཁོངས་ཀྱི་སྡེ་ཚན་དང་། རིམ་པ། ས་ཁུལ་བཅས་བརྒལ་བའི་ལས་སྟེགས་བཙུགས་ནས།
སྲིད་འཛིན་དང་བྱ་གཞག་ཚན་པའི་གཞུང་ཁོངས་རྒྱུ་ནོར་སྙོམས་སྒྲིག་མཉམ་སྤྱོད་ལ་སྐུལ་འདེད་བཏང་བ།
སྲིད་འཛིན་དང་བྱ་གཞག་ཚན་པའི་གཞུང་ཁོངས་རྒྱུ་ནོར་བཀོད་སྒྲིག་དང་བེད་སྤྱོད་ཀྱི་ཕན་འབྲས་སྔར་བས་ཆེ་རུ་གཏོང་ཆེད། ཉེ་ཆར་ནོར་སྲིད་པུས《སྔོན་རྩིས་དོ་དམ་གཞི་གཅིག་ཅན་གྱི་མ་ལག་ལ་བརྟེན་ནས་རྒྱལ་ཡོངས་ཀྱི་སྲིད་འཛིན་དང་བྱ་གཞག་ཚན་པའི་གཞུང་ཁོངས་རྒྱུ་ནོར་སྙོམས་སྒྲིག་མཉམ་སྤྱོད་ལས་སྟེགས་འཛུགས་རྒྱུའི་སྐོར་གྱི་ནོར་སྲིད་པུའི་བརྡ་ཐོ》བཀྲམ་ནས། སྔོན་རྩིས་དོ་དམ་གཞི་གཅིག་ཅན་མ་ལག་གི་ནུས་པ་སྔར་བས་རྒྱ་སྐྱེད་བཏང་བ་དང་རྒྱལ་ཡོངས་ཀྱི་སྲིད་འཛིན་དང་བྱ་གཞག་ཚན་པའི་གཞུང་ཁོངས་རྒྱུ་ནོར་སྙོམས་སྒྲིག་མཉམ་སྤྱོད་ལས་སྟེགས་བཙུགས་ཏེ། རྒྱལ་ཡོངས་ཁྱབ་ཁོངས་ཀྱི་སྡེ་ཚན་དང་། རིམ་པ། ས་ཁུལ་བཅས་བརྒལ་བའི་རྒྱུ་ནོར་སྙོམས་སྒྲིག་མཉམ་སྤྱོད་ལ་སྐུལ་འདེད་གཏོང་བར་རྨང་གཞི་བརྟན་པོ་བཏིང་ཡོད།
མིག་སྔར། ཀྲུང་དབྱང་དང་ས་གནས་ཀྱི་སྲིད་འཛིན་དང་བྱ་གཞག་ཚན་པས་གཞི་གཅིག་ཅན་མ་ལག་གི་རྒྱུ་ནོར་དོ་དམ་དཔེ་དུམ་ཕྱོགས་ཡོངས་ནས་སྤྱད་དེ་རྒྱུ་ནོར་དོ་དམ་ལས་སྒོ་གཉེར་བ་དང་། རྒྱུ་ནོར་དོ་དམ་དཔེ་དུམ་ཁྲོད་ཀྱི་སྙོམ་སྒྲིག་མཉམ་སྤྱོད་དང་འགུལ་རྣམ་ལ་ལྟ་སྐུལ་དོ་དམ་བྱེད་པ་སོགས་ཀྱི་ནུས་པས་སྙོམ་སྒྲིག་མཉམ་སྤྱོད་ཆོག་པའི་རྒྱུ་ནོར་ཆ་འཕྲིན་ཕྱོགས་ཡོངས་ནས་སྟོན་ཐུབ་ཀྱི་ཡོད། དེར་བརྟེན་ནོར་སྲིད་པུས་གཞི་གཅིག་ཅན་མ་ལག་གི་སྙོམ་སྒྲིག་མཉམ་སྤྱོད་བྱེད་ནུས་བེད་སྤྱོད་གང་ལེགས་བྱས་ཏེ་རྒྱལ་ཡོངས་ཁྱབ་ཁོངས་ཀྱི་སྡེ་ཚན་དང་། རིམ་པ། ས་ཁུལ་བཅས་བརྒལ་བའི་རྒྱུ་ནོར་སྙོམ་སྒྲིག་མཉམ་སྤྱོད་ལས་སྟེགས་བཙུགས་པ་རེད། ལས་སྟེགས་བརྒྱུད་སྙོམ་སྒྲིག་ཆོག་པའི་རྒྱུ་ནོར་ཆ་འཕྲིན་དང་། མཉམ་སྤྱོད་ཆོག་པའི་རྒྱུ་ནོར་ཆ་འཕྲིན། ཚན་པས་བཏོན་པའི་རྒྱུ་ནོར་སྙོམ་སྒྲིག་མཉམ་སྤྱོད་ཀྱི་དགོས་མཁོ་བཅས་འདྲི་རྩད་ཐུབ་པས་མཁོ་སྤྲོད་ཕྱོགས་གཉིས་ཀྱི་ཆ་འཕྲིན་ནུས་ལྡན་ངང་མཚམས་སྦྱོར་བྱེད་ཐུབ། སྙོམ་སྒྲིག་མཉམ་སྤྱོད་བྱེད་པའི་རྒྱུ་ནོར་གཏན་འཁེལ་བྱེད་དགོས་ན་མཁོ་སྤྲོད་ཕྱོགས་གཉིས་ཀྱིས་འབྲེལ་གཏུག་གཅིག་མཐུན་བྱས་རྗེས། ནོར་སྲིད་སྡེ་ཚན་གྱིས་གཏན་འབེབས་བྱེད་པའི་རྒྱུ་ནོར་བེད་སྤྱོད་དམ་ཐག་གཅོད་བྱས་པའི་འབྲེལ་ཡོད་གཏན་འབེབས་ལྟར་ཐག་གཅོད་བྱེད་དགོས།