གསར་འགོད་པར་ཉེ་ཆར་འཚོགས་པའི་རྒྱལ་ཡོངས་ཀྱི་གྲངས་གཞིའི་ལས་དོན་ཚོགས་འདུ་ནས་ཤེས་རྟོགས་བྱུང་བར། 2024ལོར་གྲངས་འཛིན་ཀྲུང་གོ་འཛུགས་སྐྲུན་བྱེད་པར་གོམ་སྟབས་བརྟན་པོ་སྤོས་ཤིང་། གྲངས་གཞི་འཕེལ་རྒྱས་ཀྱི་རྨང་གཞི་སྔར་བས་བརྟན་དུ་ཕྱིན་པ་དང་། གྲངས་གཞིའི་ཐོན་ཁུངས་མཁོ་སྤྲོད་དང་རྒྱུ་རྐྱེན་གཙོ་བོའི་རིན་ཐང་མཁོ་སྤྲོད་བྱེད་ཚུལ་རྒྱུན་ཆད་མེད་པར་མགྱོགས་སུ་ཕྱིན་པ། གྲངས་འཛིན་དཔལ་འབྱོར་དང་གྲངས་འཛིན་སྤྱི་ཚོགས་གསར་གཏོད་དང་འཕེལ་རྒྱས་ཀྱི་འཕེལ་རིམ་མངོན་གསལ་དོད་པོ་བྱུང་བ། གྲངས་གཞིའི་ཁྱབ་ཁོངས་ཀྱི་རྒྱལ་སྤྱིའི་མཉམ་ལས་ཕྱོགས་ཡོངས་ནས་སྤེལ་འགོ་ཚུགས་ཡོད།

ལོ་གསར་པའི་གྲངས་གཞིའི་ལས་དོན་ཡག་པོ་སྒྲུབ་པའི་གཙོ་གནད་དེ་འགག་རྩའི་ལས་འགན་དང་། ལས་ཀའི་ལམ་སྲོལ། ལྟ་ཞིབ་ཚད་ལེན་དང་ཚོད་སྐོར། ཚོད་ལྟ་སོགས་ཀྱི་ཐད་འབད་བརྩོན་ཆེན་པོ་བྱས་ཏེ་སྒྱུར་བཅོས་གསར་གཏོད་ཀྱི་སྙིང་སྟོབས་ལ་བརྟེན་ནས་ཚད་བརྒལ་ནུས་ལྡན་ཡོང་བ་བྱ་རྒྱུ་རེད། 2025ལོར“ཤར་གྲངས་ནུབ་རྩིས”ཀྱི་འདུ་འགོད་ལག་ལེན་ཤུགས་ཆེན་བསྟར་ཏེ་རྒྱལ་ཡོངས་གཞི་གཅིག་ཅན་གྱི་རྩིས་ཤུགས་དྲ་བ་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་རྒྱུ་རེད། 2025ལོའི་ལོ་མཇུག་ཏུ། རྒྱལ་ཁབ་ཀྱི་ལྟེ་བའི་མཚམས་ཚིགས་ས་ཁུལ་གྱི་གསར་འཕར་རྩིས་རྒྱག་ཤུགས་སྣ་ཚོགས་ཀྱིས་རྒྱལ་ཡོངས་ཀྱི་གསར་འཕར་རྩིས་རྒྱག་ཤུགས་ཀྱི་60%ཡན་བཟུང་རྒྱུ་དང་། རྒྱལ་ཁབ་ཀྱི་ལྟེ་བའི་མཚམས་ཚིགས་ཀྱི་གསར་དུ་བསྐྲུན་པའི་གཞི་གྲངས་ལྟེ་གནས་ཀྱིས་སྤྱོད་པའི་ལྗང་མདོག་གློག་ཤུགས་བཟུང་ཚད་80%ལས་བརྒལ་རྒྱུ་རེད།

ཚོགས་འདུའི་ཐོག 2025ལོར་གྲངས་འཛིན་ཅན་གྱི་ཕྱོགས་སྒྱུར་འདུ་འགོད་ལག་ལེན་གཏིང་ཟབ་བསྟར་ཏེ། གྲངས་འཛིན་ཐོན་ལས་ཁྱུ་ཚོགས་ཀྱི་སྐས་རིམ་བཀོད་སྒྲིག་མ་ལག་འཛུགས་པར་སྐུལ་འདེད་གཏོང་རྒྱུ་དང་། གྲངས་འཛིན་དང་དངོས་ཚན་དཔལ་འབྱོར་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་རྒྱུ། ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་རྒྱུ། གྲངས་འཛིན་སྤྱི་ཚོགས་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་རྒྱུ། དེ་བཞིན་སྤྱི་སྤྱོད་བྱ་གཞག་དང་སྤྱི་པའི་ཞབས་ཞུ་སོགས་གཙོ་གནད་དུ་བཟུང་སྟེ་གྲོང་ཁྱེར་གྱི་ས་ཁོངས་ཡོངས་ཀྱི་གྲངས་འཛིན་ཅན་གྱི་ཕྱོགས་སྒྱུར་ལ་སྐུལ་འདེད་མགྱོགས་པོ་གཏོང་དགོས་ཞེས་བཏོན་ཡོད།