ཚེས་11ཉིན་གྱི་སྔ་དྲོར། རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་མཛད་སྒོ་འཚོགས་ནས། ཁོངས་གཏོགས་དེ་རང་དང་འཛུགས་སྐྲུན་ཁྱབ་ཁོངས་ཁག་གི་ཁེ་ལས་ཁྲོད་ནས་ཉམས་མྱོང་ཕུན་སུམ་ཚོགས་ཤིང་། ལག་རྩལ་ཕུལ་དུ་བྱུང་བའི་འཛུགས་སྐྲུན་བདེ་འཇགས་རང་བཞིན་གྱི་འཕྲལ་སྡོམ་དཔྱད་དཔོག་ལས་དོན་གྱི་ཆེད་ལས་ལག་རྩལ་པ་བདམས་ཏེ། གེགས་ཁུལ་དུ་ཡོམ་རྗེས་ཀྱི་སྡོད་ཁང་དཔྱད་དཔོག་ལས་དོན་སྤེལ་བར་བསྐྱོད་པ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཀྲང་ལི་རྡོག་ཐོན་མཛད་སྒོར་ཞུགས་པ་རེད།

ཀྲང་ལིས་ནན་བཤད་གནང་དོན། ཆེད་ལས་ལག་རྩལ་པས་ཐོག་མཐའ་བར་གསུམ་དུ“མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་རྒྱུ”མཐའ་འཁྱོངས་ཀྱིས་ལས་རིགས་ཀྱི་ལེགས་ཆ་དང་ཆེད་ལས་ཀྱི་ནུས་པ་བཏོན་ནས། གཏོར་སྐྱོན་ཕོག་པའི་ཁང་པ་ཞིབ་དཔྱད་ཚད་ལེན་དང་དཔྱད་དཔོག་གི་ལས་དོན་ཡག་ཐོག་ཡག་བརྩེགས་དང་། ཏན་ཏིག ཞིབ་ཕྲ་བཅས་སྤེལ་བ་དང་། དུད་ཚང་རེར་ཡིག་ཚགས་རེ་བཟོས་ཏེ་སླར་གསོ་བསྐྱར་སྐྲུན་ལས་དོན་ལ་ཚན་རིག་དང་མཐུན་པའི་གཞི་འཛིན་ས་མཁོ་འདོན་བྱེད་དགོས། ལས་ཀའི་ལམ་སྲོལ་བཟོས་ནས་མཐུན་སྦྱོར་གཞོགས་འདེགས་ལ་ཤུགས་སྣོན་དང་། ཆུང་ཙག་གཅིག་ཀྱང་མ་ལུས་པར་བྱས་ཏེ་དཔྱད་དཔོག་ལས་དོན་གོ་རིམ་ལྡན་ལ་ནུས་ཆེའི་ངང་སྤེལ་དགོས། ཆེད་ལས་ལག་རྩལ་པས་རང་ངོས་ཀྱི་བདེ་འཇགས་ལ་འགན་ལེན་ཡག་པོ་བྱས་ཏེ། དཔྱད་དཔོག་ལས་དོན་བདེ་བླག་ངང་ལེགས་གྲུབ་ཐུབ་པར་བྱེད་དགོས།