བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་དུ་ས་ཡོམ་རིམ་པ་6.8བརྒྱབ་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་འོག རྒྱལ་ཡོངས་ཀྱི་གོང་འོག་ཚང་མས་དམངས་སེམས་གཅིག་མཐུན་དང་། གོམ་སྟབས་གཅིག་གྱུར། དམག་དཔུང་དང་ས་གནས་དབར་སེམས་མཐུན་གཞོགས་འདེགས་བཅས་བྱས་ཏེ་དུས་ཚོད་སྐར་ཆ་ཙམ་ཡང་བརྩོན་ལེན་གྱིས་མི་སྣ་འཚོལ་སྐྱོབ་དང་། ཐབས་ཤེས་ཡོད་རྒུ་རྩལ་སྤྲུགས་ཀྱིས་མི་སྣ་ཤི་རྨས་ཉུང་དུ་གཏོང་བ། གནོད་འཚེའི་གནས་ཚུལ་ཕྱོགས་ཡོངས་ནས་མཐིལ་རྟོགས། རྨས་སྐྱོན་ཕོག་པའི་མི་སྣ་དུས་ཐོག་ཏུ་སྐྱོབ་བཅོས། གནོད་འཚེ་ཕོག་པའི་མང་ཚོགས་བཀོད་སྒྲིག་ཡག་པོ་བཅས་བྱས་པས། ཡོམ་འགོག་གེགས་སེལ་གྱི་ལས་དོན་སྤྱི་ཡོངས་བདེ་བླག་བྱུང་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁ་སྒྱུར་ཕྱོགས་སྟོན་གནང་བ་ནི་དཀའ་ངལ་དང་འགལ་རྐྱེན་ཐམས་ཅད་ལས་རྣམ་པར་རྒྱལ་བ་དང་གཏན་འཁེལ་མིན་པ་ཐམས་ཅད་ལ་ཁ་གཏད་གཅོག་པའི་གཏན་འཁེལ་རང་བཞིན་ཆེ་ཤོས་དང་། གཏིང་ཤུགས་ཆེ་ཤོས། འགན་ལེན་ཆེ་ཤོས་བཅས་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་དིང་རི་རྫོང་གི་ས་ཡོམ་གྱི་གནོད་འཚེའི་གནས་ཚུལ་ལ་ཚད་མཐོའི་དོ་ཁུར་དང་དུས་དང་རྣམ་པ་ཀུན་ཏུ་ཐུགས་ཁྲལ་གནང་སྟེ། འཕྲལ་དུ་མཛུབ་སྟོན་གལ་ཆེན་དང་བླང་བྱ་ཁ་གསལ་བཏོན་གནང་བ་དང། ཟླ་1ཚེས་9ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གུང་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་གཙོ་སྐྱོང་གནང་ནས། བོད་ལྗོངས་དིང་རིའི་ཡོམ་འགོག་གེགས་སེལ་གྱི་ལས་དོན་ལ་ཞིབ་འཇུག་དང་བཀོད་སྒྲིག་གནང་བ་དེ་ཐོག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་དང་།  མཐའ་མཚམས་ཀྱི་མི་རིགས་ཁག་གི་མི་དམངས་ལ་ཐུགས་ཁྲལ་ཆེན་པོ། གེགས་ཁུལ་གྱི་མི་དམངས་ལ་ཐུགས་ཁུར་དང་གཟིགས་སྐྱོང་བཅས་གནང་ལུགས་གང་ལེགས་མཚོན་པ་མ་ཟད། ང་ཚོར་སྐུལ་མ་དང་སྐུལ་ལྕག་ཧ་ཅང་ཆེན་པོ་གནང་ནས་ཡོམ་འགོག་གེགས་སེལ་ལས་དོན་ཡག་པོ་སྒྲུབ་པར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད།

འདི་ནི་དུས་ཚོད་བརྩོན་ལེན་དང་འཆི་གསོན་འགྲན་པའི་ཚེ་སྲོག་འཚོལ་སྐྱོབ་ཀྱི་ལས་དོན་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་མཐའ་གཅིག་ཏུ་བྱས་ཏེ། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཡོམ་འགོག་གེགས་སེལ་ལས་དོན་མགྱོགས་མྱུར་སྒྲིག་འཛུགས་བྱས་ནས་སྤེལ་བ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་འཕྲལ་དུ་བཀོད་གཏོང་བཀོད་སྒྲིག་གནང་བ་དང་འབྲེལ་གེགས་ཁུལ་དུ་ཕེབས་ནས་བཀོད་འདོམས་གནང་བ། ལྗོངས་ཡོངས་ཀྱི་ཏང་སྲིད་དམག་ཉེན་དམངས་བཅས་ཀྱིས་ཕྱར་བ་གྲུ་འདེགས་བྱས་པ། ས་གནས་ཁག་གི་རོགས་སྐྱོབ་སྟོབས་ཤུགས་དང་། མི་རིགས་ཁག་གི་ལས་བྱེད་པ་དང་མང་ཚོགས། གེགས་ཁུལ་གྱི་མི་དམངས་བཅས་ཀྱིས་དཀའ་ངལ་གཉམ་སེལ་དང་ཕན་ཚུན་ལྟ་སྐྱོང་བཅས་བྱས་ཏེ་མཉམ་དུ་འབད་འཐབ་ལྷོད་མེད་བྱས་ཡོད། ས་ཡོམ་བརྒྱབ་ནས་སྐར་མ་10ཡང་མ་སོང་བར་རོགས་སྐྱོབ་གནམ་གྲུ་མཁའ་དབྱིངས་སུ་ཐོན་པ་དང་། ས་ཡོམ་བརྒྱབ་རྗེས་ཆུ་ཚོད་ཕྱེད་ཀ་ཙམ་ཡང་མ་སོང་བར་ཡོམ་ལྟེའི་ས་ཁོངས་སུ་རོགས་སྐྱོབ་བྱ་སྤྱོད་སྤེལ་བ། དཔུང་སྡེ་དང་། འཕྲལ་སྡོམ། མེ་ཟོན། སྤྱི་བདེ། དེ་བཞིན་སྤྱི་ཚོགས་ཕྱོགས་ཁག་བཅས་ཀྱི་མི་ཁྲི་1.5ལྷག་ཙམ་གྱི་རོགས་སྐྱོབ་སྟོབས་ཤུགས་འཕྲལ་དུ་གེགས་ཁུལ་དུ་རུབ་འཛོམས་བྱས་པ། ས་ཡོམ་བརྒྱབ་རྗེས་ཀྱི་ཆུ་ཚོད་9ཡི་ནང་ས་ཡོམ་གྱི་དབང་གིས་གཏོར་སྐྱོན་ཕོག་པའི་ལམ་དུམ་ཚང་མ་ཤར་གཏོང་དང་སྒུལ་བདེའི་འཕྲིན་གཏོང་བརྡ་རྟགས་རྒྱུན་གཏན་ལྟར་ཤར་གཏོང་ཐུབ་པ། ས་ཡོམ་བརྒྱབ་རྗེས་ཀྱི་ཆུ་ཚོད་13གྱི་ནང་དིང་རི་རྫོང་གྲོང་དང་། ཤང་དང་གྲོང་རྡལ་7ལ་གློག་མཁོ་འདོན་སླར་གསོ་ཐུབ་པ། ས་ཡོམ་བརྒྱབ་རྗེས་ཀྱི་མཚན་མོ་དང་པོར་གནོད་འཚེ་ཕོག་པའི་མང་ཚོགས་གུར་ནང་སྡོད་རྒྱུ་བྱུང་བ་དང་ཁ་ལག་ཚ་པོ་ཟ་རྒྱུ་བྱུང་བ་སོགས་ཉེན་སེལ་གྱི་མྱུར་ཚད་དང་རོགས་སྐྱོབ་ཀྱི་ཕན་འབྲས་དེ་ལྟ་བུས་ས་མཐོའི་འཕྲལ་སྡོམ་རོགས་སྐྱོབ་ཀྱི་དཔེ་མཚོན་བཏོད་དེ། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་འགན་ལེན་གང་ལེགས་བྱས་ཡོད།

དེ་ནི་ཕྱོགས་གཅིག་ལ་དཀའ་ངལ་འཕྲད་དུས་ཕྱོགས་བཞི་མཚམས་བརྒྱད་ནས་རོགས་སྐྱོར་བྱེད་པའི་མཐུན་སྒྲིལ་གྱི་སྟོབས་ཤུགས་ཤིག་རེད། ཀྲུང་དབྱང་པུའུ་ཨུད་ཀྱིས་ཆེད་དོན་མ་དངུལ་འཕྲལ་དུ་བཏང་བ་དང་། གེགས་སེལ་དངོས་ཟོག་མགྱོགས་མྱུར་གཏོང་སྤྲོད་བྱས་པ། སྨན་བཅོས་རོགས་སྐྱོབ་རུ་ཁག་འཕྲལ་དུ་མངགས་གཏོང་བྱས་པ་བཅས་བརྒྱུད། ཀྲུང་དབྱང་གི་གེགས་སེལ་དངོས་ཟོག་ཁག་དང་པོ་ས་ཡོམ་བརྒྱབ་པའི་ཉིན་དེའི་དགོང་མོར་གེགས་ཁུལ་དུ་འབྱོར་པ་དང་། མི་དམངས་བུ་ཕྲུག་དམག་གིས་བཀའ་ལྟར་འཕྲལ་མར་གེགས་ཁུལ་དུ་ནུས་ཤུགས་ཡོད་རྒུས་ཉེན་སེལ་རྒུད་སྐྱོབ་བྱེད་པར་ཡོང་སྟེ་ཕྱོགས་བསྡུས་དང་རིམ་པ་མང་པོའི་ཐོག་ནས་རོགས་སྐྱོབ་བྱས་པ། སྤྱི་ཚོགས་ལས་རིགས་ཁག་གིས་གཅིག་རྗེས་གཉིས་མཐུད་ངང་དངུལ་དང་དངོས་པོ་ཞལ་འདེབས་བརྒྱབ་ནས་ཉེན་སྐྱོར་དཀའ་སེལ་སོགས་བྱས་པ། ལྗོངས་ཕྱི་ནང་གི་རོགས་སྐྱོར་དངོས་ཟོག་རྒྱུན་ཆད་མེད་པར་གེགས་ཁུལ་དུ་འབྱོར་བ་དང་གཅེས་སེམས་ཀྱང་ཕྱོགས་བཞི་མཚམས་བརྒྱད་ནས་གེགས་ཁུལ་དུ་འབྱོར་ཏེ་ཀུན་སེམས་གཅིག་སྒྲིལ་གྱི་མཉམ་ཤུགས་ཆེན་པོ་ཞིག་ཆགས་ཡོད་པ་རེད།

ཡོམ་འགོག་གེགས་སེལ་གྱི་ལས་དོན་སྤྱིའི་ཆ་ནས་བདེ་བླག་བྱུང་མོད། འོན་ཀྱང་སྔར་བཞིན་འགག་རྩའི་དུས་མཚམས་སུ་གནས་ཡོད་པས་ལྷོད་གཡེང་སྤུ་ཙམ་ཡང་གཏོང་མི་རུང་། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་སྔར་བས་མཐོ་རུ་བཏང་སྟེ། “གཏན་འཁེལ་གཉིས”ལ་བརྩི་སྲུང་མཐའ་གཅིག་ཏུ་ཞུ་བ་དང“སྲུང་སྐྱོང་གཉིས”མཐའ་གཅིག་ཏུ་ཐུབ་པ་བྱེད་པའི་ཆབ་སྲིད་ཀྱི་མཐོ་ཚད་ནས་བསམ་བློ་དང་བྱ་སྤྱོད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་དང་གཅིག་གྱུར་ཏན་ཏིག་ཡོང་བ་དང་། ལས་དོན་ཁག་དེ་བས་ཞིབ་ཚགས་ངང་སྒྲུབ་པ། མང་ཚོགས་དྲོ་སོབ་སོབ་ངང་དགུན་སྒྲོལ་ཐུབ་པའི་འགན་ལེན། སྤུས་ཚད་མཐོ་ཞིང་ཚད་གཞི་མཐོ་བའི་རྗེས་མཐུད་བཀོད་སྒྲིག་རོགས་སྐྱོབ་དང་སླར་གསོ་བསྐྱར་སྐྲུན་གྱི་ལས་དོན་ཁག་ལེགས་སྒྲུབ། གེགས་ཁུལ་གྱི་མང་ཚོགས་ཀྱི་རྒྱུན་གཏན་འཚོ་བ་དང་ཐོན་སྐྱེད་སྒྲིག་ལམ་སྔ་ཙམ་སླར་གསོ་བཅས་བྱས་ཏེ་དེ་བས་མཛེས་སྡུག་ལྡན་པའི་ཁྱིམ་གཞིས་འཛུགས་སྐྲུན་བྱེད་དགོས།