ཀྲན་མུའུ་སི་ཨ་རིའི་ལས་རིགས་ལན་ཆིའུ་སྤོ་ལོའི་རིམ་མཚུངས་མཉམ་འགྲན་གྱི“སྐར་མ་ཁྲི་4ཟིན་པའི་སྐུ་ཞབས”ཐོག་མར་གྱུར་པ།

2024ལོའི་ཟླ་3ཚེས་2ཉིན། ཨ་རིའི་ལས་རིགས་ལན་ཆིའུ་སྤོ་ལོའི་རིམ་མཚུངས་མཉམ་འགྲན(NBA)ལུའོ་ཧྲན་ཅི་ཧུའུ་རེན་རུ་ཁག་གི་སྤོ་ལོ་སྤྱན་སྦིར་ལེ་པུའུ་ལང·ཀྲན་མུའུ་སི་ཡིས་ཏན་ཧྥོ་ཅུའེ་ཅིན་རུ་ཁག་དང་འགྲན་བསྡུར་བྱེད་སྐབས་སྐར་མ་26ཐོབ་པ་དང་། ལས་རིགས་དེའི་རྒྱུན་གཏན་འགྲན་བསྡུར་གྱི་སྤྱིའི་སྐར་གྲངས་40017ཟིན་ནས། NBAལོ་རྒྱུས་ཐོག་སྐར་མ་ཁྲི་4ཡི་འགག་སྒོ་ཆེན་པོ་ལས་ཐོག་མར་བརྒལ་མཁན་སྤོ་ལོ་བར་གྱུར་ཡོད། འདི་ནི་2024ལོའི་ཟླ་3ཚེས་2ཉིན། ཀྲན་མུའུ་སིས་ཏན་ཧྥོ་ཅུའེ་ཅིན་རུ་ཁག་དང་འགྲན་བསྡུར་བྱས་རྗེས་ལྟད་མོ་བར་གུས་འདུད་ཞུ་བཞིན་པ། ཤིན་ཧྭ་གསར་འགྱུར་ཁང་གིས་བཀྲམ།

ཨོ་རྩལ་འགྲན་ཚོགས་ཀྱི་མུ་འབྲེལ་འགྲན་བསྡུར་ཧྲང་ཧའེ་དང་པུའུ་ཏ་ཕེ་སིར་སྔ་རྗེས་སུ་བྱས་པ། 

2024ལོའི་ཟླ་5ཚེས་16ནས་19ཉིན་བར་དང་2024ལོའི་ཟླ་6ཚེས་20ནས་23ཉིན་བར། ཕ་རི་སི་ཨོ་རྩལ་འགྲན་ཚོགས་ཀྱི་ཐོབ་ཐང་མུ་འབྲེལ་འགྲན་བསྡུར་ཧྲང་ཧའེ་དང་པུའུ་ཏ་ཕེ་སིར་སྔ་རྗེས་སུ་བྱས་པ་རེད། དེ་ནི་རྒྱལ་སྤྱིའི་ཨོ་ལིམ་ཕིག་ཨུ་ལྷན་གྱིས་བཟོས་པའི་ལུས་རྩལ་དང་གྲོང་ཁྱེར་རིག་གནས་ཟུང་འབྲེལ་གྱི་དུས་ཆེན་རིགས་ཀྱི་མུ་འབྲེལ་འགྲན་བསྡུར་གསར་རྐྱང་ཞིག་ཡིན་པ་དང་། རང་མོས་རྣམ་པའི་རྐང་འཁོར་ཆུང་ངུ་དང་། ཕི་ལི་ཞབས་བྲོ། ཤུད་པང་། བྲག་འཛེག་བཅས་རྣམ་གྲངས་བཞི་བཙུགས་ཡོད་པ་དང་། ཁྱོན་བསྡོམས་རྒྱལ་ཁབ་དང་ས་ཁུལ་120ལྷག་ཙམ་ནས་ཡོང་བའི་ལུས་རྩལ་པ་464འགྲན་བསྡུར་ནང་ཞུགས་ཡོད། ལུས་རྩལ་པ་158ཀྱིས་འགྲན་བསྡུར་དེ་བརྒྱུད་ཕ་རི་སི་ཨོ་རྩལ་འགྲན་ཚོགས་ཀྱི་ཐོབ་ཐང་འགྲན་བསྡུར་ནང་ནས་མི་8ལ་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་ཐོབ་པ་དང་མི་23ལ་བྱ་དགའ་ཐོབ་པ་རེད། འདི་ནི་2024ལོའི་ཟླ་5ཚེས་18ཉིན། ཀྲུང་གོའི་བདམས་ཐོན་པ་ཏེང་ཡ་ཝུན་གྱིས་ཕ་རི་སི་ཨོ་རྩལ་འགྲན་ཚོགས་ཀྱི་ཐོབ་ཐང་མུ་འབྲེལ་འགྲན་བསྡུར་གྱི་ཧྲང་ཧའེ་ས་ཚིགས་ཀྱི་རྐང་འཁོར་ཆུང་ངུ་རང་མོས་རྣམ་པའི་བུད་མེད་སྤྱི་གླིང་འགྲན་བསྡུར་གྱི་མཐའ་བསྡུར་ནང་ཞུགས་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ཝང་ཁའེ་ཡན་གྱིས་པར་བརྒྱབ།

མཆོང་རྒྱུག་འཕེན་གསུམ་གྱི་འཛམ་གླིང་གི་ཟིན་ཐོ་མང་པོ་བཏོད་པ།

2024ལོའི་ཟླ་7ཚེས་7ཉིན། འཛམ་གླིང་མཆོང་རྒྱུག་འཕེན་གསུམ་གྱི་རིམ་མཚུངས་མཉམ་འགྲན་ཕ་ལམ་འགྲན་བསྡུར་ཕ་རི་སི་ས་ཚིགས་ཀྱི་འགྲན་བསྡུར་ནང་ཡུག་རེན་གྱི་ལུས་རྩལ་པ་མ་ཧུའུ་ཆི་ཁེ་ཡིས་སྨི་2.10ཡི་ཐོག་ནས་ལོ་37ཙམ་རིང་གི་བུད་མེད་མཐོ་མཆོང་གི་འཛམ་གླིང་གི་ཟིན་ཐོ་ལི་སྨི་1མཐོ་རུ་བཏང་བ་དང་། ཁེན་ནི་ཡའི་བདམས་ཐོན་པ་ཅི་ཕུའུ་ཡེ་ཀྲིན་གྱིས་རང་ཉིད་ཀྱིས་རྒྱུན་འཁྱོངས་བྱས་པའི་བུད་མེད་ཀྱི་སྨི་1500ཡི་འཛམ་གླིང་ཟིན་ཐོ་གསར་པ་བཏོད་ཡོད། 2024ལོའི་ཟླ་8ཚེས་25ཉིན། ཕ་ལམ་རིམ་མཚུངས་མཉམ་འགྲན་ཕོ་ལན་ཞི་ལི་ཞི་ཡ་ས་ཚིགས་ཀྱི་འགྲན་བསྡུར་ནང་སུའེ་ཏེན་གྱི་ལུས་རྩལ་པ་ཏུའུ་ཕུའུ་ལན་ཏི་སིས་སྨི་6.26གི་ཐོག་ནས་རང་ཉིད་ཀྱིས་རྒྱུན་འཁྱོངས་བྱས་པའི་སྐྱེས་པའི་རྒྱུག་བཀན་མཐོ་མཆོང་གི་འཛམ་གླིང་གི་ཟིན་ཐོ་ཐེངས་བཅུ་བཏོད་པ་དང་། ནོར་ཝེའི་བདམས་ཐོན་པ་དབྱིན་ཀེ་པུ་ལེ་ཐེ་སེན་གྱིས་ལོ་28རིང་གི་སྐྱེས་པའི་སྨི་3000འཛམ་གླིང་གི་ཟིན་ཐོ་བཏོད་ཡོད། 2024ལོའི་ཟླ་10ཚེས་13ཉིན། ཁེན་ནི་ཡའི་ཆེ་ཕུའུ་ཨེན་ཅེ་ཏི་ཆི་ལ་ཆུ་ཚོད་2སྐར་མ་9སྐར་ཆ་56གི་གྲུབ་འབྲས་ཐོག་ནས་ཀྲི་ཅ་ཀོ་མར་སུན་རྒྱང་རྒྱུག་གི་ཨང་དང་པོ་ཐོབ་ནས་བུད་མེད་ཀྱི་མར་སུན་རྒྱང་རྒྱུག་གི་འཛམ་གླིང་ཟིན་ཐོ་སྐར་མ་གཉིས་ཙམ་མཐོ་རུ་བཏང་ཡོད། འདི་ནི་2024ལོའི་ཟླ་8ཚེས་25ཉིན། ཏུའུ་ཕུའུ་ལན་ཏི་སིས་ཕ་ལམ་རིམ་མཚུངས་མཉམ་འགྲན་ཕོ་ལན་ཞི་ལི་ཞི་ཡ་ས་ཚིགས་ཀྱི་འགྲན་བསྡུར་མཇུག་འགྲིལ་རྗེས་འཛམ་གླིང་གི་ཟིན་ཐོ་གསར་པའི་སྐར་གསོག་བྱང་བུའི་མདུན་དུ་པར་རྒྱག་བཞིན་པ། ཤིན་ཧྭ་གསར་འགྱུར་ཁང་གིས་བཀྲམ།

སི་ཕེན་རུ་ཁག་དང་ཨ་ཀེན་ཐིན་རུ་ཁག་གིས་རྒྱལ་སྤྱིའི་རྐང་རྩེད་སྤོ་ལོའི་རྩེར་སོན་འགྲན་བསྡུར་གྱི་ཨང་དང་པོ་བླངས་པ།

འདི་ནི་2024ལོའི་ཟླ་7ཚེས་14ཉིན། སི་ཕེན་རུ་ཁག་གིས་2024ལོའི་ཡོ་རོབ་རྐང་རྩེད་སྤོ་ལོའི་ལེགས་སྐྱེས་འགྲན་བསྡུར་གྱི་མཐའ་བསྡུར་གྱི་བྱ་དགའ་སྤྲོད་པའི་མཛད་སྒོར་རྟེན་འབྲེལ་ཞུ་བཞིན་པ།

འདི་ནི་2024ལོའི་ཟླ་7ཚེས་14ཉིན། ཨ་ཀེན་ཐིན་རུ་ཁག་གིས་2024ལོའི་མེ་གླིང་བུམ་པའི་རྐང་རྩེད་སྤོ་ལོའི་མཐའ་བསྡུར་རྗེས་ཀྱི་བྱ་དགའ་སྤྲོད་པའི་མཛད་སྒོར་ཨང་དང་པོ་ཐོབ་པར་རྟེན་འབྲེལ་ཞུ་བཞིན་པ།

2024ལོའི་ཟླ་7ཚེས་14ཉིན། སི་ཕེན་རུ་ཁག་གིས་ཚབ་སྐྱོད་རུ་མི་ཨའོ་ཡ་སུའོ་ཝར་གྱིས་སྤོ་ལོ་བླུགས་ནས་དབྱིང་ཀེ་ལན་རུ་ཁག་ལས་བསྡུར་གྲངས་2:1གི་ཐོག་ནས་རྣམ་པར་རྒྱལ་བ་དང་། སྤོ་ལོ་རྒྱག་ཐེངས་ཚང་མ་ཐོབ་ནས་རུ་ཁག་དེའི་ལོ་རྒྱུས་ཀྱི་ཡོ་རོབ་ལེགས་སྐྱེས་འགྲན་བསྡུར་གྱི་ཨང་དང་པོ་ཐེངས་བཞི་ཐོབ་ནས་ཡོ་རོབ་ལེགས་སྐྱེས་འགྲན་བསྡུར་གྱི་ཨང་དང་པོ་ཐོབ་མང་ཤོས་ཀྱི་སྤོ་ལོ་རུ་ཁག་ཅིག་ཏུ་གྱུར་ཡོད།

ཉིན་དེར་ཨ་ཀེན་ཐིན་རུ་ཁག་གི་དུས་བསྣར་ཡང་བསྡུར་ཐོག་ལའོ་ཐ་ལུའོ·མ་ཏིང་ནེ་སི་ཡིས་རྒྱལ་ཁ་ཐོབ་པའི་སྤོ་ལོ་གཅིག་རང་དེ་བླུགས་ཏེ་བསྡུར་གྲངས་1:0ཡི་ཐོག་ནས་ཀེ་ལུན་པི་ཡ་རུ་ཁག་ལས་རྣམ་པར་རྒྱལ་ཏེ་མེ་གླིང་བུམ་པའི་ཨང་དང་པོ་ཐེངས་16པ་བླངས་པ་མ་ཟད། ཝུའུ་ར་ཀུའེ་རུ་ཁག་ལས་བརྒལ་ཏེ་མེ་གླིང་བུམ་པའི་ཨང་དང་པོ་ཐོབ་མང་ཤོས་སུ་སླེབས་ཡོད།

ཤིན་ཧྭ་གསར་འགྱུར་ཁང་གིས་བཀྲམ།

2030ལོ་དང་2034ལོའི་དགུན་དུས་ཨོ་རྩལ་འགྲན་ཚོགས་འཚོག་ཡུལ་གཏན་འཁེལ་བྱས་པ།

འདི་ནི་རྒྱལ་སྤྱིའི་ཨོ་ལིམ་ཕིག་ཨུ་ལྷན་གྱི་ཀྲུའུ་ཞི་པ་ཧོ་ཡིས་ཧྥ་རན་སེའི་ཨར་པི་སི་ཧྲན་ས་ཁུལ་ལ་2030ལོའི་དགུན་དུས་ཨོ་རྩལ་འགྲན་ཚོགས་ཀྱི་གཉེར་དབང་ཐོབ་པའི་ཁྱབ་བསྒྲགས་བྱས་པ་རེད།

འདི་ནི་2024ལོའི་ཟླ་7ཚེས་24ཉིན། ཕ་རི་སིར་འཚོགས་པའི་རྒྱལ་སྤྱིའི་ཨོ་ལིམ་ཕིག་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་142པའི་ཐོག་ཨ་རིའི་ཡན་ཧུའུ་གྲོང་གི་འཐུས་མི་ཚོགས་པའི་ཁོངས་མིས་2034ལོའི་དགུན་དུས་ཨོ་རྩལ་འགྲན་ཚོགས་ཀྱི་གཉེར་དབང་ཐོབ་པར་རྟེན་འབྲེལ་ཞུ་བཞིན་པ།

2024ལོའི་ཟླ་7ཚེས་22ཉིན་འགོ་ཚུགས་པའི་རྒྱལ་སྤྱིའི་ཨོ་ལིམ་ཕིག་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་142པའི་ཐོག་ཧྥ་རན་སེའི་ཨར་པེ་སི་ཧྲན་ས་ཁུལ་དང་ཨ་རིའི་ཡན་ཧུའུ་གྲོང་དུ་2030ལོ་དང་2034ལོའི་དགུན་དུས་ཨོ་རྩལ་འགྲན་ཚོགས་སོ་སོར་འཚོག་རྒྱུ་དང་སོ་ཏི་ཨ་རབ་ཀྱིས་2025ལོར་ཨོ་ལིམ་ཕིག་གློག་རྡུལ་རྩལ་འགྲན་ལུས་རྩལ་འགྲན་ཚོགས་སྐབས་དང་པོ་འཚོག་རྒྱུའི་གཏན་འབེབས་བྱས་པ་རེད། ཟླ་12ཚེས་3ཉིན་རྒྱལ་སྤྱིའི་ཨོ་ལིམ་ཕིག་ཨུ་ལྷན་གྱི་ལག་བསྟར་ཨུ་ལྷན་གྱིས་2026ལོའི་ཏ་ཁར་གཞོན་ནུ་ཨོ་ལིམ་ཕིག་ལུས་རྩལ་འགྲན་ཚོགས་ཀྱི་རྣམ་གྲངས་ཆུང་གྲས་སྐབས་གོང་མའི་241ནས་151བར་ཉུང་དུ་བཏང་སྟེ་ཀྲུང་གོའི་སྲོལ་རྒྱུན་ལུས་རྩལ་རྣམ་གྲངས་དྲག་རྩལ་དེ་གཞོན་ནུ་ཨོ་ལིམ་ཕིག་ལུས་རྩལ་འགྲན་ཚོགས་ཀྱི་དངོས་གཞིའི་འགྲན་བསྡུར་རྣམ་གྲངས་སུ་ཐེངས་དང་པོ་འགྱུར་རྒྱུའི་གཏན་འབེབས་བྱས་ཡོད།

ཤིན་ཧྭ་གསར་འགྱུར་ཁང་གི་གསར་འགོད་པ་སུན་ཧྥེས་པར་བརྒྱབ།

ཕ་རི་སིའི་ཨོ་རྩལ་འགྲན་ཚོགས་ཐོག་ཀྲུང་གོའི་འཐུས་མི་ཚོགས་པར་ཕྱི་རྒྱལ་དུ་འགྲན་བསྡུར་བྱེད་པའི་ལོ་རྒྱུས་ཀྱི་གྲུབ་འབྲས་ཡག་ཤོས་ཐོབ་པ།

 2024ལོའི་ཟླ་7ཚེས་26ཉིན་ནས་ཟླ་8ཚེས་11ཉིན་བར། “ཨོ་རྩལ་དེ་བས་སྒོ་དབྱེ”ཞེས་པ་འབོད་ཚིག་ཏུ་བྱས་པའི་དབྱར་དུས་ཀྱི་ཨོ་རྩལ་འགྲན་ཚོགས་སྐབས་33པ་ཕ་རི་སིར་གཉེར་ཞིང་། འཐུས་མི་རུ་ཁག་91གི་བདམས་ཐོན་པར་བྱ་དགའི་རྟགས་མ་རག་ཡོད། ཀྲུང་གོའི་ལུས་རྩལ་འཐུས་མི་ཚོགས་པས་དཔའ་ངར་ཆེན་པོས་གསེར་གྱི་རྟགས་མ་40དང་། དངུལ་གྱི་རྟགས་མ་27 ཟངས་ཀྱི་རྟགས་མ་24བཅས་བསྡོམས་རྟགས་མ་91བླངས་ཏེ། རང་རྒྱལ་ལ་དབྱར་དུས་ཀྱི་ཨོ་རྩལ་འགྲན་ཚོགས་ཀྱི་ཕྱི་རྒྱལ་འགྲན་བསྡུར་ནས་ལོ་རྒྱུས་ཀྱི་གྲུབ་འབྲས་ཡག་ཤོས་ཐོབ་པ་རེད། ཕ་རི་སིའི་དབང་སྐྱོན་ཨོ་རྩལ་འགྲན་ཚོགས་2024ལོའི་ཟླ་8ཚེས་28ཉིན་ནས་ཟླ་9ཚེས་8ཉིན་བར་གཉེར་ཞིང་། ཀྲུང་གོའི་འཐུས་མི་ཚོགས་པས་གསེར་གྱི་རྟགས་མ་94དང་། དངུལ་གྱི་རྟགས་མ་76 ཟངས་ཀྱི་རྟགས་མ་50བཅས་བསྡོམས་རྟགས་མ་220བླངས་ཤིང་། དབྱར་དུས་ཀྱི་དབང་སྐྱོན་ཨོ་རྩལ་འགྲན་ཚོགས་ཐོག་གསེར་གྱི་རྟགས་མའི་བང་རིམ་དང་བྱ་དགའི་རྟགས་མའི་བང་རིམ་གྱི་ཨང་དང་པོ་བསྟུད་མར་ཐེངས་དྲུག་བླངས་པ་རེད། འདི་ནི་2024ལོའི་ཟླ་7ཚེས་26ཉིན། ཀྲུང་གོའི་ལུས་རྩལ་འཐུས་མི་ཚོགས་པའི་དར་ཆ་འཁྱེར་མཁན་དང་ཕིང་ཕང་སྤོ་ལོའི་བདམས་ཐོན་པ་མཱ་ལུང་གིས་འགོ་ཚུགས་མཛད་སྒོར་རྒྱལ་དར་གཡུག་གཡུག་བྱེད་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ཚའོ་ཚན་གྱིས་པར་བརྒྱབ།

ཀྲེན་ཆིན་ཝུན་ཨོ་རྩལ་འགྲན་ཚོགས་ཀྱི་དྲ་བའི་སྤོ་ལོའི་བུད་མེད་རྐྱང་རྒྱག་གི་ཨང་དང་པོ་ཐོབ་པའི་ཨེ་ཤེ་ཡའི་བདམས་ཐོན་པ་དང་པོར་གྱུར་པ། 

2024ལོའི་ཟླ་8ཚེས་3ཉིན། ཕ་རི་སིའི་ཨོ་རྩལ་འགྲན་ཚོགས་ཀྱི་དྲ་བའི་སྤོ་ལོའི་རྣམ་གྲངས་ཀྱི་བུད་མེད་རྐྱང་རྒྱག་གི་མཐའ་བསྡུར་ནང་། ཀྲུང་གོའི་བདམས་ཐོན་པ་ཀྲེན་ཆིན་ཝུན་གྱིས་6：2དང་6:3གྱི་བསྡུར་གྲངས་ཐོག་ནས་ཁ་རེ་ཤེ་ཡའི་བདམས་ཐོན་པ་ཝེ་ཅི་ཆི་ལས་རྣམ་པར་རྒྱལ་ཏེ། ཨོ་རྩལ་འགྲན་ཚོགས་ཀྱི་དྲ་བའི་སྤོ་ལོ་རྐྱང་རྒྱག་གི་གསེར་གྱི་རྟགས་མ་ཐོབ་པའི་ཨེ་ཤེ་ཡའི་བདམས་ཐོན་པ་དང་པོར་གྱུར་པ་རེད། འདི་ནི་2024ལོའི་ཟླ་8ཚེས་3ཉིན། ཀྲེན་ཆིན་ཝུན་གྱིས་ཕ་རི་སིའི་ཨོ་རྩལ་འགྲན་ཚོགས་ཀྱི་དྲ་བའི་སྤོ་ལོའི་བུད་མེད་རྐྱང་རྒྱག་གི་བྱ་དགའ་སྤྲོད་པའི་མཛད་སྒོར་གསེར་གྱི་རྟགས་མ་སྟོན་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་དབན་ཤང་གིས་པར་བརྒྱབ།

《ལུས་རྩལ་རྒྱལ་ཁབ་སྟོབས་ཆེན་གྱི་ལམ་བུར་སྐྱོད། ལུས་རྩལ་སྐོར་གྱི་ཞི་ཅིན་ཕིང་གི་རྣམ་བཤད་གལ་ཆེན་གྱི་དུས་རབས་ཀྱི་རིན་ཐང་དང་འཛམ་གླིང་གི་བློ་འབྱེད》ཅེས་པའི་རིག་མཛོད་སྙན་ཞུ་ཡོངས་བསྒྲགས་བྱས་པ།

 2024ལོའི་ཟླ་8ཚེས་27ཉིན། ཤིན་ཧྭ་གསར་འགྱུར་ཁང་རྒྱལ་ཁབ་རྩེར་སོན་རིག་མཛོད་ཀྱིས་པེ་ཅིང་དུ《ལུས་རྩལ་རྒྱལ་ཁབ་སྟོབས་ཆེན་གྱི་ལམ་བུར་སྐྱོད། ལུས་རྩལ་སྐོར་གྱི་ཞི་ཅིན་ཕིང་གི་རྣམ་བཤད་གལ་ཆེན་གྱི་དུས་རབས་ཀྱི་རིན་ཐང་དང་འཛམ་གླིང་གི་བློ་འབྱེད》རིག་མཛོད་སྙན་ཞུ་ཡོངས་བསྒྲགས་བྱས་ཤིང་། འདི་ནི་རིག་མཛོད་སྙན་ཞུ་ཡོངས་བསྒྲགས་ཀྱི་བགྲོ་གླེང་བྱ་ཡུལ་ཡིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ཅིན་ལེང་ཁོའེ་ཡིས་པར་བརྒྱབ།

“ས་དམར་རྒྱལ་པོ”ནཱ་ཏར་སོགས་ལུས་རྩལ་པ་གྲགས་ཅན་དྲ་བའི་སྤོ་ལོའི་ཁྱབ་ཁོངས་ནས་དོན་པ།

 2024ལོའི་ཟླ་11ཚེས་19ཉིན། སི་ཕེན་གྱི་ནཱ་ཏར་གྱིས་ཏའེ་ཝེ་སིའི་བུམ་པའི་དྲ་བའི་སྤོ་ལོའི་མཐའ་བསྡུར་གྱི་བཞི་ཆ་གཅིག་གི་མཐའ་བསྡུར་ཚར་རྗེས། དངོས་སུ་དྲ་བའི་སྤོ་ལོའི་ཁྱབ་ཁོངས་ནས་དོན་པ་རེད། ལོ་38ལ་སླེབས་པའི་ནཱ་ཏར་ལ་བསྡོམས་བྱ་དགའ་ཀུན་ཐོབ་ཀྱི་རྐྱང་རྒྱག་གི་ཨང་དང་པོ་22ཐོབ་ནས། སྐྱེས་པའི་བདམས་ཐོན་པའི་ཁྲོད་ནས་ཨང་དང་པོ་24ལེན་མཁན་གྱི་ཅའོ་ཁོའོ་ཝེ་ཆི་ཕུད་ཁོང་རྩེ་གྲར་སླེབས་ཀྱི་ཡོད། ཁོང་གིས་ཧྥ་རན་སེའི་དྲ་བའི་སྤོ་ལོའི་ཡོངས་བསྒྲགས་འགྲན་བསྡུར་ནང་ཨང་དང་པོ་14བླངས་པས་མིང་དོན་མཚུངས་པའི“ས་དམར་རྒྱལ་པོ”རེད། དེ་སྔ་དྲ་བའི་སྤོ་ལོའི་བྱ་དགའ་ཀུན་ཐོབ་འགྲན་བསྡུར་གྱི་ཨང་དང་པོ་གསུམ་དང་ཨོ་རྩལ་འགྲན་ཚོགས་ཀྱི་ཨང་དང་པོ་གཉིས་བླངས་པའི་དབྱིན་ཇིའི་དྲ་བའི་སྤོ་ལོ་རྒྱག་མཁན་གྲགས་ཅན་མུའུ་ལེ་དང་། ཨོ་སི་ཁྲུ་རི་ཡའི་དྲ་བའི་སྤོ་ལོ་རྒྱག་མཁན་གྲགས་ཅན་དང་། ཨ་རིའི་དྲ་བའི་སྤོ་ལོའི་ཡོངས་བསྒྲགས་འགྲན་བསྡུར་གྱི་དེ་སྔའི་ཨང་དང་པོ་ཏི་མུའུ། སི་ཕེན་གྱི་རྐང་རྩེད་སྤོ་ལོ་མཁས་པ་མིང་དུ་གྲགས་པ་དབྱི་ཉི་སི་ཐར། ཨོ་སི་ཁྲུ་ལི་ཡའི་ཆུ་རྐྱལ་མཁས་ཅན་མའེ་ཅི་ཝུང་སོགས་ཀྱང་2024ལོར་རང་རང་སོ་སོའི་ཁྱབ་ཁོངས་ནས་དོན་པ་རེད། འདི་ནི་2024ལོའི་ཟླ་11ཚེས་20ཉིན། ནཱ་ཏར་གྱིས་ཏའེ་ཝེ་སིའི་བུམ་པའི་དྲ་བའི་སྤོ་ལོའི་མཐའ་བསྡུར་གྱི་བཞི་ཆ་གཅིག་གི་མཐའ་བསྡུར་ཚར་རྗེས་མཛད་སྒོར་ཞུགས་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་མོང་དིང་པོ་ཡིས་པར་བརྒྱབ།

ཝེ་སི་ཐ་ཕན་ལ་F1གི་ལོ་འཁོར་གྱི་ཁ་ལོ་བའི་ཨང་དང་པོ་ཐེངས་བཞི་བསྟུད་མར་ཐོབ་པ།

 2024ལོའི་ཟླ་11ཚེས་24ཉིན། 2024ལོའི་འགྲན་དུས་ཀྱི་F1གི་བྱ་དགའ་ཆེན་པོའི་འགྲན་བསྡུར་ལཱ་སི་ཝེ་ཅ་སི་ས་ཚིགས་ཀྱི་འགྲན་བསྡུར་མཇུག་འགྲིལ་ཞིང་། གླང་དམར་རླངས་འཁོར་རུ་ཁག་གི་ཧོ་ལན་གྱི་ཁ་ལོ་བ་ཝུའེ་སི་ཐ་ཕན་ལ་འགྲན་བསྡུར་གྱི་ཨང་ལྔ་པ་ཐོབ་རྗེས། ས་ཚིགས་གཉིས་ཀྱི་འགྲན་བསྡུར་མ་བྱས་གོང་ལ་འགྲན་དུས་འདིའི་ལོ་འཁོར་གྱི་ཁ་ལོ་བའི་ཨང་དང་པོ་རག་པ་དེ་ནི་ཁོང་ལ་ཨང་དང་པོ་ལོ་བཞི་བསྟུད་མར་ཐོབ་པ་ཞིག་རེད། འདི་ནི་2024ལོའི་ཟླ་11ཚེས་24ཉིན། 2024ལོའི་འགྲན་དུས་ཀྱི་F1གི་བྱ་དགའ་ཆེན་པོའི་འགྲན་བསྡུར་ལཱ་སི་ཝེ་ཅ་སི་ས་ཚིགས་ཀྱི་འགྲན་བསྡུར་མཇུག་འགྲིལ་རྗེས། ཝེ་སི་ཐ་ཕན（སྟེང）གྱིས་རང་ཉིད་ལ་F1གི་འཛམ་གླིང་གི་ཨང་དང་པོ་ཐེངས་བཞི་པ་དེ་ཐོབ་པར་རྟེན་འབྲེལ་ཞུ་བཞིན་པ། ཤིན་ཧྭ་གསར་འགྱུར་ཁང་ནས། （སུང་ཧའེ་ཡོན་གྱིས་པར་བརྒྱབ）