ཚའེ་ཉེའོ་སི་ཕེན་གྱི་བགོ་འགྲེམས་ལྟེ་གནས་ཀྱི་ལས་མིས་མཛོད་ཁང་དུ་ལས་ཀ་བྱེད་བཞིན་པ། ཧྲེ་ཁྲེན་ཤིས་ཀྱིས་པར་བརྒྱབ།

ཁེན་ནི་ཡའི་མུའུ་ལུའོ་ལུང་ཀོར་Kilimallཡི་ལས་མིས་མཛོད་ཁང་དུ་ལས་ཀ་བྱེད་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ལི་ཡཱ་ཧུའེ་ཡིས་པར་བརྒྱབ།

ཚའེ་ཉེའོ་སི་ཕེན་གྱི་བགོ་འགྲེམས་ལྟེ་གནས་ཀྱི་ལས་དོན་པས་བསྐུར་མར་ཞིབ་བཤེར་བྱེད་བཞིན་པ། ཧྲེ་ཁྲེན་ཤིས་ཀྱིས་པར་བརྒྱབ།

“ཨེ་ཤེ་ཡ་ཤར་ལྷོའི་མནའ་འབྲེལ་གྱི་དྲ་གྲགས་ནན་ཉིང་དུ་སྐྱོད་པ”དང་ནན་ཉིང་གི་ཁྱད་ལྡན་ཐོན་རྫས་ཕྱི་རྒྱལ་དུ་འཚོང་བའི་རིམ་སྤེལ་བྱེད་སྒོའི་རིང་སྙན་སྒྲོན་པ་གཙོ་བོས་ནན་ཉིང་གི་ཚ་ལུ་མ་འོས་སྦྱོར་བྱེད་བཞིན་པ། ནན་ཉིང་གྲོང་ཁྱེར་ཚོང་དོན་ཅུས་ཀྱིས་པར་མཁོ་འདོན་བྱས།

ཀོང་ཤིས་ཀྱི་གློག་ཤུགས་མཐོ་ལྕོག་ཀྲུང་གོ་དང་ཝེ་ཐེ་ནམ་གྱི་དུས་གཏན་མེ་འཁོར་དང་པོ་ནན་ནིང་རྒྱལ་སྤྱིའི་ལྕགས་ལམ་གྲུ་ཁ་ནས་ཐོན་བཞིན་པ། ཀྲུའུ་ཅ་ཆི་དང་ཨན་ཀྲི་ཞང་གིས་པར་ལེན་འཕྲིན་སྤེལ་བྱས།

Kilimallཁེན་ནི་ཡའི་ལས་མིས་མཛོད་ཁང་དུ་དངོས་ཟོག་དབྱེ་གསེད་བྱེད་བཞིན་པ། Kilimallཡིས་པར་མཁོ་འདོན་བྱས།

2024ལོའི་དུས་ཚིགས་དང་པོ་ནས་གསུམ་པའི་བར་ཀྲུང་གོའི་རྒྱལ་སྒྲོལ་དྲ་ཐོག་ཚོང་དོན་གྱི་ཕྱིར་གཏོང་ནང་འདྲེན་སྒོར་དུང་ཕྱུར་ཁྲི་1.88ཟིན་ཏེ་དུས་མཚུངས་ལས་11.5%འཕར་ཡོད། ཀྲུང་གོའི་རྒྱལ་སྒྲོལ་དྲ་ཐོག་ཚོང་དོན་གྱི་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ཏེ་ཚད་ལྡན་རང་བཞིན་གྱི་ཁེ་ལས་དང་སྤུས་རྟགས་ཟམ་མི་ཆད་པར་ཐོན་ནས། ཀྲུང་གོའི་ཕྱི་ཕྱོགས་ཚོང་དོན་སྤུས་ཚད་མཐོ་བའི་ཕྱིར་གཏོང་གི་དུས་མཚམས་གསར་པའི་ཕྱོགས་སུ་བསྐྱོད་པར་རྨང་གཞི་བརྟན་པོ་དང་སྒུལ་ནུས་ཆེན་པོ་མངོན་ཡོད།

ཀྲུང་ཧྥེའི་རྒྱལ་སྒྲོལ་དྲ་ཐོག་ཚོང་དོན་ལས་སྟེགས།

འདི་ག་ཚགས་པར་གྱི་གསར་འགོད་པ། ཏའེ་ཁའེ་རེན།

ཁེན་ནི་ཡའི་ཤར་ལྷོའི་རྒྱུད་ཀྱི་ཐཱ་ན་ཧོ་ཅུན་པུའུ་ལཱ་གྲོང་རྡལ་དུ། ས་གནས་དེ་གའི་གྲོང་མི་པའོ་ལོ·པ་ཧོ་ལ·པ་པ་དབྱང་གིས་ཚོང་ཁང་ཞིག་བཙུགས་ཡོད།

པ་པ་དབྱང་གི་ཚོང་ཁང་ནི་Kilimallཡིས་ཨ་ཧྥེ་རི་ཁར་བཙུགས་པའི་སྡེ་ཁུལ་གྱི་རང་ལེན་ས་ཚིགས་1600ལྷག་ཙམ་གྱི་གྲས་ཤིག་རེད། Kilimallནི་2014ལོར་བཙུགས་པ་དང་སྤྱི་ཁྱབ་པུའུ་ཀྲུང་གོའི་ཧུའུ་ནན་ཁྲང་ཧྲ་རུ་གནས་ཤིང་། ལས་སྒོ་ནི་ཁེན་ནི་ཡ་དང་། ཐན་ཙན་ནི་ཡ། ཝུ་ཀན་ཏ་སོགས་ཨ་ཧྥེ་རི་ཁའི་རྒྱལ་ཁབ་མང་པོར་ཁྱབ་ཡོད། “ལོ་10ཡི་རིང་འཕེལ་རྒྱས་བཏང་བ་བརྒྱུད། Kilimallལ་ཅ་ལག་འཚོང་མཁན་8000ལྷག་ཙམ་དང་ཚོང་ཁང་ཁྲི་1.2ལྷག་ཙམ་ཡོད་པ་དང་། ལོ་འཁོར་མོར་ཅ་ལག་ཉོ་མཁན་ཁྲི་720ལྷག་ཙམ་ཟིན་ཞིང་། ཨ་ཧྥེ་རི་ཁའི་འཛད་སྤྱོད་པར་ཚོང་ཟོག་རིགས་ཁྲི་བརྒྱ་ལྷག་ཙམ་མཁོ་འདོན་བྱེད་ཀྱི་ཡོད”ཅེས་Kilimallསྤུས་རྟགས་ཀྱི་སྤྱི་ཁྱབ་ལྟ་ཞིབ་པ་ལེའོ་ཀྲེང་རུང་གིས་གསར་འགོད་པར་ངོ་སྤྲོད་བྱས་པ་དང་། ཁོང་གིས་Kilimallཡིས་ཨ་ཧྥེ་རི་ཁའི་ཁྲོམ་རའི་བཟུང་ཚད་དུས་ཡུན་རིང་པོ་སྔོན་ཐོན་གྱི་གནས་བབ་ཐོག་གནས་པ་དང་། ལྷག་པར་དུ་ཨ་ཧྥེ་རི་ཁ་ཤར་མའི་ཁྲོམ་རའི་ཐོབ་སྐལ་ཐོག་མཐའ་བར་གསུམ་དུ་50%ཡན་རྒྱུན་འཁྱོངས་བྱས་ཡོད་ཅེས་བཤད།

མིག་སྔར་Kilimallལ་ཁེན་ནི་ཡ་རུ་ཁྱོན་ལས་བཟོ་300ལྷག་ཡོད་པ་དང་ཕྱི་རྒྱལ་ལས་བཟོས་བསྡུར་གྲངས་ཀྱི་70%ལྷག་བཟུང་ཡོད། ཞེ་མི·མ་ནཱ་2022ལོར་Kilimallརུ་ལས་ཀར་ཞུགས་ཡོད། མ་ནཱ་ཡིས“ཀྲུང་གོར་དྲ་ཐོག་ཚོང་དོན་ཁྱབ་ཁོངས་སུ་འཕེལ་རྒྱས་ཀྱི་ཉམས་མྱོང་ཕུན་སུམ་ཚོགས་པོ་ཡོད་པས་ཨ་ཧྥེ་རི་ཁའི་རྒྱལ་ཁབ་ལ་དགེ་མཚན་ལྡན་པའི་དཔྱད་གཞི་མཁོ་འདོན་བྱས་ཡོད། Kilimallལྟ་བུའི་དྲ་ཐོག་ཚོང་དོན་རྣམ་པ་དེ་རྒྱལ་ཁབ་སྔར་ལས་མང་བར་ཁྱབ་གདལ་གཏོང་རྒྱུའི་ཡིད་ཆེས་ཡོད”ཅེས་བཤད།

ཀྲུང་གོ་དང་ཝེ་ཐེ་ནམ་གྱི་དུས་གཏན་མེ་འཁོར་གྱི་རྒྱལ་སྒྲོལ་ཟོག་འདྲེན།

འདི་ག་ཚགས་པར་གྱི་གསར་འགོད་པ། ཀྲུའུ་ཅ་ཆི།

ཀོང་ཤིས་ཀྱི་ལྕགས་ལམ་ཟོག་འགྲེམས་ལྟེ་གནས་ཆེ་ཤོས་ཡིན་པའི་ནན་ཉིང་རྒྱལ་སྤྱིའི་ལྕགས་ལམ་གྲུ་ཁར་ངར་ལྕགས་དང་། ཁྱིམ་ཆས། ཁྱིམ་སྤྱོད་གློག་ཆས། རྫ་ལེབ། ཉི་ནུས་གློག་རྫས་སོགས་དངོས་ཟོག་མཉམ་བསྲེས་བླུགས་པའི་ཀྲུང་གོ་དང་ཝེ་ཐེ་ནམ་གྱི་དུས་གཏན་མེ་འཁོར་ཐོན་ཆོག་བྱས་ནས་བསྡད་ཡོད་པ་རེད། རྒྱལ་ཁབ་ལྕགས་ལམ་ནན་ཉིང་ཅུས་ཀྱིས་བསྡོམས་རྩིས་བརྒྱབ་པར་གཞིགས་ན། 2024ལོའི་ཟླ་དང་པོ་ནས་བཅུ་པའི་བར་ཀོང་ཤིས་ནས་ཐོག་མར་བཏང་བའི་ཀྲུང་གོ་དང་ཝེ་ཐེ་ནམ་གྱི་དུས་གཏན་མེ་འཁོར་གྱིས་རིམ་རྩིས་བརྒྱབ་ན་དངོས་ཟོག་ཚད་ལྡན་དོས་སྒམ་12998སྐྱེལ་འདྲེན་བྱས་པ་དེ་དུས་མཚུངས་ལས་1274%འཕར་ནས་ཟླ་བ་གཅིག་གི་སྐྱེལ་འདྲེན་བྱེད་ཚད་ཀྱི་ལོ་རྒྱུས་ཀྱི་ཟིན་ཐོ་མཐོ་ཤོས་ཐེངས་མང་གསར་དུ་བཏོད་ཡོད་པ་རེད།

2023ལོའི་ཟླ་དྲུག་པ་ནས་བཟུང་། ཀོང་ཤིས་ཀྱིས་གཟའ་འཁོར་རེའི་རེས་གཟའ་མིག་དམར་དང་། ཕུར་བུ། སྤེན་པ་བཅས་ལ་ཀྲུང་གོ་དང་ཝེ་ཐེ་ནམ་གྱི་དུས་གཏན་མེ་འཁོར་ཐེངས་3རྒྱུན་དུ་གཏོང་གི་ཡོད་པ་མ་ཟད། སྐབས་ཐོག་གི་དགོས་མཁོ་ལྟར་མང་དུ་གཏོང་གི་ཡོད་པ་རེད།

2024ལོའི་ཟླ་དང་པོར། ཝེ་ཐེ་ནམ་ལྕགས་ལམ་སྤྱི་ཁྱབ་ཀུང་སི་དང་གྲོས་མོལ་བྱས་པ་བརྒྱུད། ཀྲུང་གོ་དང་ཝེ་ཐེ་ནམ་གྱི་དུས་གཏན་མེ་འཁོར་གྱི་བརྒྱུད་རིམ་ཧྲིལ་པོའི་དུས་ཚོད་རེའུ་མིག་གཏན་འཁེལ་བྱས་པས་སྐྱེལ་འདྲེན་དུས་ཡུན་ཆེས་ཆེར་ཐུང་དུ་ཕྱིན་ཏེ། ཀོང་ཤིས་ནན་ཉིང་བབས་ཚུགས་ལྷོ་མ་ནས་ཝེ་ཐེ་ནམ་གྱི་ཨན་ཡོན་བབས་ཚུགས་བར་སྐྱེལ་འདྲེན་དུས་ཡུན་ཁྱོན་ཆུ་ཚོད་40ལྷག་ཙམ་ནས་ད་ཆ་མགྱོགས་ཤོས་ལ་ཆུ་ཚོད་14ལས་འགོར་གྱི་མེད་པ་རེད།

ཚའེ་ཉེའོ་སི་ཕེན་གྱི་བགོ་འགྲེམས་ལྟེ་གནས།

འདི་ག་ཚགས་པར་གྱི་གསར་འགོད་པ། ཡན་ཧོན།

སི་ཕེན་གྱི་རྒྱལ་ས་མ་ཏེ་རི་གྲོང་ཁྱེར་ཉེ་འདབས་ཀྱི་སྨི་ངོས་གྲུ་ཁྲི་2.25ཡོད་པའི་ཚའེ་ཉེའོ་བགོ་འགྲེམས་ལྟེ་གནས་ཀྱི་དབྱེ་གསེད་བྱ་ཡུལ་གཉིས་སུ་བྲེལ་འཚུབ་ཀྱི་རྣམ་པས་ཁེངས་ཡོད་པ་རེད།

2021ལོར་ཚའེ་ཉེའོ་སི་ཕེན་གྱི་ཁྲོམ་རར་དངོས་སུ་ཞུགས་ནས་མ་ཏེ་རིར་བགོ་འགྲེམས་ལྟེ་གནས་བཙུགས་པ་རེད། ལོ་གསུམ་རིང་ཁེ་ལས་ཀྱིས་ཀྲུང་གོའི་རྒྱལ་སྒྲོལ་དྲ་ཐོག་ཚོང་དོན་ལ་བརྟེན་ཏེ་ཁྱད་པར་ཅན་གྱི་ཞབས་འདེགས་ཞུས་ནས་ས་གནས་དེ་གའི་ཁྲོམ་རར་རྐང་པ་བརྟན་པོ་བཙུགས་པ་མ་ཟད། ཚོགས་པའི་གཞི་ཁྱོན་ཡང་དེ་སྔའི་མི་བཅུ་ལྷག་ཙམ་ནས་ད་ལྟའི་མི་བརྒྱ་ལྷག་ཙམ་བར་མང་དུ་ཕྱིན་ཡོད་པ་རེད། མིག་སྔར་ཚའེ་ཉེའོ་ཟོག་འགྲེམས་ཞབས་ཞུ་སི་ཕེན་གྱི་ཞིང་ཆེན་40ལྷག་ཙམ་ལ་ཁྱབ་པ་མ་ཟད། གྲོང་ཁྱེར་ཆེ་གྲས་ཁག་ཏུ་རང་ཉིད་ཀྱི་དྲ་ཚིགས་དང་སྡེབ་སྐྱེལ་ས་ཚིགས་ཀྱང་བཙུགས་ཡོད། མྱུར་སྐྱེལ་བསྐུར་མ་དག་སྐམ་སའི་སྐྱེལ་འདྲེན་དང་། མཚོ་ཐོག་སྐྱེལ་འདྲེན། མཁའ་ཐོག་སྐྱེལ་འདྲེན་སོགས་བརྒྱུད་མ་ཏེ་རི་ནས་ས་གནས་ཁག་ཏུ་སྐྱེལ་ཞིང་། ལྟེ་བའི་གྲོང་ཁྱེར་25ལ་ཉིན་གཉིས་པ་རང་ལ་འབྱོར་གྱི་ཡོད་པ་རེད། གཞན་ཡང་ཚའེ་ཉེའོ་ཡིས་གཟའ་མཇུག་ལ་བསྐུར་མ་སྐྱེལ་བ་དེའང་སི་ཕེན་དུ་ཁྱད་ཆོས་ལྡན་པའི་ལས་རིགས་གྲས་སུ་གྱུར་ཡོད།

“སི་ཕེན་དུ་ཟོག་འགྲེམས་ཀྱི་ཚ་རླབས་འཕྱུར་བའི་སྐབས་སུ་གཉེར་སྐྱོང་གི་གནོན་ཤུགས་ཆེ་བ་དང་མ་གནས་མཐོ་བས། ང་ཚོས་བཏོན་པའི་ཁྱད་ལྡན་ཞབས་ཞུ་ཚང་མར་ཁྲོམ་རར་གདེང་འཇོག་བཟང་པོ་ཐོབ་ཡོད། ཀྲུང་གོའི་ཟོག་འགྲེམས་ཁེ་ལས་ཀྱིས་ས་གནས་དེ་གའི་ཉིན་བཞིན་ཆེ་རུ་འགྲོ་བའི་དྲ་ཐོག་ཚོང་དོན་གྱི་ཟོག་འགྲེམས་དགོས་མཁོར་དེ་བས་སྤུས་ལེགས་ཀྱི་ཐག་གཅོད་ཇུས་གཞི་མཁོ་འདོན་བྱས་ཡོད”ཅེས་ཚའེ་ཉེའོ་སི་ཕེན་མྱུར་སྐྱེལ་གྱི་སྤྱི་ཁྱབ་ཅིང་ལི་ཚའེ་ཝུན་མིང་གིས་བཤད་པ་རེད།