“ཀྲུང་གོའི་ཁྲོམ་རས་ཨོ་སི་ཁྲུ་ལི་ཡའི་ཁེ་ལས་ལ་ཡིད་དབང་འཕྲོག་ཤུགས་ཆེན་པོ་སྦྱིན་པ”
ཨོ་སི་ཁྲུ་ལི་ཡའི་བསྡོམས་རྩིས་ཅུས་ཀྱི་གྲངས་གཞི་གསར་ཤོས་ལས་མངོན་པར་གཞིགས་ན། ན་ནིང་ཟླ་བཅུ་པ་བར། འདས་པའི་ཟླ་བ་བཅུ་གཉིས་རིང་ཨོ་སི་ཁྲུ་ལི་ཡའི་ཨོ་ཀྲོའུ་ལྷོ་མ་ནས་ཀྲུང་གོར་ཕྱིར་གཏོང་བྱེད་ཚད་གྲངས་འབོར་ཨོ་སི་ཁྲུ་ལི་ཡའི་སྒོར་མོ་དུང་ཕྱུར་44.3(ཨོ་སི་ཁྲུ་ལི་ཡའི་སྒོར་མོ་1ལ་ཧ་ལམ་མི་དམངས་ཤོག་སྒོར་4.54ཡིན་པ)ཟིན་པ་དེ་དུས་མཚུངས་ལས་45%འཕར་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད། ཨོ་སི་ཁྲུ་ལི་ཡ་ཨོ་ཀྲོའུ་ལྷོ་མ་ཡི་ཚོང་དོན་པུའུ་ཀྲང་ཆའོ·ས་ཁཱ་ཁེ་སི་ཡིས། མིག་སྔར་གོ་ལ་ཧྲིལ་པོའི་དཔལ་འབྱོར་ལ་འགྲན་སློང་འཕྲད་པའི་གནས་ཚུལ་འོག་གྲུབ་འབྲས་འདི་ནི་སྐུལ་ལྕག་ཐེབས་འོས་པ་ཞིག་རེད་ཅེས་བརྗོད།
ཨོ་སི་ཁྲུ་ལི་ཡའི་ཨོ་ཀྲོའུ་ལྷོ་མ་དང་ཀྲུང་གོའི་བར་གྱི་ཉོ་ཚོང་འཕར་བ་ནི། མིག་སྔར་ཀྲུང་གོ་དང་ཨོ་སི་ཁྲུ་ལི་ཡའི་ཚོང་དོན་མཉམ་ལས་ལ་འཕེལ་རྒྱས་བཟང་པོ་བྱུང་བའི་མཚོན་ཚུལ་ཞིག་ཡིན་ཞིང་། ན་ནིང་ནས་བཟུང་། ཀྲུང་ཨོ་ཕྱོགས་གཉིས་པོས་འཛམ་གླིང་ཚོང་དོན་རྩ་འཛུགས་ཀྱི་སྒྲིག་སྲོལ་ལ་གཞིགས་ནས། དོ་ཁུར་བྱ་ཡུལ་ཚོང་དོན་གྱི་གནད་དོན་ཐད་གྲོས་མོལ་བྱས་པར་ཕན་འབྲས་ཐོན་ཡོད། ཨོ་སི་ཁྲུ་ལི་ཡའི་གྲོ་དང་། རྡོ་སོལ། སྲིང་བལ། རྒུན་འབྲུམ་ཨ་རག གླང་ཤ་སོགས་ཀྱི་ཐོན་རྫས་ཀྲུང་གོར་ཕྱིར་གཏོང་སླར་གསོ་བྱུང་ཡོད། འདི་ལོར། གཙོ་བོ་ཨོ་སི་ཁྲུ་ལི་ཡ་ཨོ་ཀྲོའུ་ལྷོ་མ་ནས་ཡོང་བའི་རྒུན་འབྲུམ་ཨ་རག་སྙོལ་མཁན་ཚོང་པ་ཁག་350ཀྲུང་གོའི་ཁྲོམ་རར་སླར་ཡང་ཞུགས་ཡོད། དེ་གོང་ཀྲུང་གོར་ཕྱིར་གཏོང་ཐོབ་ཐང་གནས་སྐབས་མེད་པར་བཟོས་པའི་ཨོ་སི་ཁྲུ་ལི་ཡའི་གླང་ཤ་ལས་སྣོན་ཁེ་ལས་10དེའི་ནང་ཚུད་པ་དག་ཀྱང་བཀག་རྒྱ་གློད་ཡོད། ཨོ་སི་ཁྲུ་ལི་ཡའི་སྲིད་གཞུང་གིས་སྔོན་དཔག་བྱས་པར། ཨོ་སི་ཁྲུ་ལི་ཡས་ཀྲུང་གོར་གླང་ཤ་ཕྱིར་གཏོང་བྱས་པ་དེ་2024ནས་2025བར་གྱི་ནོར་སྲིད་ལོ(2024ལོའི་ཟླ་བདུན་པ་ནས་2025ལོའི་ཟླ་དྲུག་པ)བར་ལོ་རྒྱུས་ཀྱི་ཟིན་ཐོ་གསར་པ་བཏོད་ཅིང་། མི་རིང་བའི་གོང་། ཀྲུང་གོ་དང་ཨོ་སི་ཁྲུ་ལི་ཡ་ཕྱོགས་གཉིས་པོའི་གཙོ་འགན་དོ་དམ་སྡེ་ཚན་གྱིས་ཤ་སྨི་འབྲུག་མ་ཀྲུང་གོར་གཏོང་བའི་དོན་གནད་ལ་ལག་རྩལ་ཐད་ནས་འབྲེལ་གཏུག་ནུས་ལྡན་བྱས་ཤིང་། ཨོ་སི་ཁྲུ་ལི་ཡ་ཕྱོགས་ཀྱིས་བཏོན་པའི་བཅོས་སྒྲིག་གི་བྱ་ཐབས་ལ་ཀྲུང་གོ་ཕྱོགས་ཀྱིས་ཚོད་སྐོར་བྱས་ནས་ཁྲིམས་སྲོལ་དང་གཏན་འབེབས་བཞིན་འབྲེལ་ཡོད་ཀྱི་ཐོན་རྫས་ལ་འགག་སྒོའི་རྒྱུན་གཏན་གྱི་ཞིབ་བཤེར་དང་ནད་ཡམས་ཞིབ་བཤེར་བྱས་ཡོད། ཨོ་སི་ཁྲུ་ལི་ཡའི་ཚོང་དོན་པུའུ་ཀྲང་ཧྥ་རེར་གྱིས་དེ་ནི“བརྟག་དཔྱད་བྱས་འབྲས་ཡག་ཤོས་ཤིག་རེད”ཅེས་བརྗོད།
ཀྲུང་གོ་ནི་ཨོ་སི་ཁྲུ་ལི་ཡའི་ཞིང་ལས་ཐོན་རྫས་དང་། གཏེར་ཁའི་ཐོན་རྫས། བཟོ་ལས་ཀྱི་བཟོས་རྫས་བཅས་ཕྱིར་གཏོང་བྱ་ཡུལ་རྒྱལ་ཁབ་གཙོ་བོ་ཞིག་ཡིན། 2023ལོར་ཀྲུང་ཨོ་ཕྱོགས་གཉིས་པོའི་དངོས་ཟོག་ཚོང་དོན་གྲངས་འབོར་ལོ་གོང་མ་ལས་4.1%འཕར་ཏེ་ཀྲུང་གོ་འདི་ཉིད་ལོ་15བསྟུད་མར་ཨོ་སི་ཁྲུ་ལི་ཡའི་ཚོང་དོན་རོགས་ཟླ་ཆེ་ཤོས་དང་པོར་གྱུར་པ་དང་། ཨོ་སི་ཁྲུ་ལི་ཡས་ཀྲུང་གོར་མ་དངུལ་གཏོང་ཚད་དུས་མཚུངས་ལས་11.7%དང་། ཀྲུང་གོར་ཨོ་སི་ཁྲུ་ལི་ཡའི་ཁེ་ལས་གསར་དུ་བཙུགས་པའི་གྲངས་འབོར་ལོ་གོང་མ་ལས་40.2%འཕར་ཡོད།
ཀྲུང་གོ་དང་ཨོ་སི་ཁྲུ་ལི་ཡས་ཚོང་དོན་མཉམ་ལས་ལ་ཤུགས་སྣོན་བརྒྱབ་པས་ཨོ་སི་ཁྲུ་ལི་ཡའི་དམངས་ཚོགས་ལ་ཁ་ཡོད་ལག་ཡོད་ཀྱི་ཕན་པ་ཐོབ་ཡོད། ཧྲང་ཧའེ་ཡི་ནང་འདྲེན་དངོས་མང་སྟོན་ཚོགས་སྐབས་བདུན་པར་ཨོ་སི་ཁྲུ་ལི་ཡའི་ཁེ་ལས་250ལྷག་ཙམ་ཞུགས་ནས་ཞུགས་མཁན་མི་གྲངས་སྐབས་རིམ་བྱུང་ནང་མང་ཤོས་ཡིན་ཞིང་། ཝེར་ཧྲི་ལྷོ་མ་གསར་པ་ཀྲོའུ་དང་། ཁུན་ཧྲི་ལན་ཀྲོའུ། ཨོ་སི་ཁྲུ་ལི་ཡ་ལྷོ་མ་ཀྲོའུ། ཝེ་ཏུའོ་ལི་ཡ་ཀྲོའུ་བཅས་ནས་ཐོན་པའི་ཤ་རིགས་དང་། མཚོ་ཟས། རྒུན་འབྲུམ་ཨ་རག དཀར་ཆུའི་ཐོན་རྫས། འཕྲོད་སྦྱོར་ཐོན་རྫས། ཞིང་ལས་ཐོན་རྫས། འཛད་རྫས་སོགས་ལ་་ཀྲུང་གོའི་ཁྲོམ་རར་དགའ་བསུ་ཐོབ་ཡོད།