ཉིན་ཤས་གོང་ཡོ་རོབ་མནའ་འབྲེལ་གྱིས་ཡོ་རོབ་མནའ་འབྲེལ་ཨུ་ལྷན་མཉམ་འབྲེལ་ཞིབ་འཇུག་ལྟེ་གནས་དང་ཡོ་རོབ་ཁོར་ཡུག་ཧྲུའུ་དང་མཉམ་དུ་ལེགས་གྲུབ་བྱས་པའི《2024ལོ་འཁོར་གྱི་ཡོ་རོབ་ཀྱི་ས་རྒྱུའི་གནས་ཚུལ་སྙན་ཞུ》ཁྱབ་བསྒྲགས་བྱས་པ་རེད། སྙན་ཞུའི་ནང་ཡོ་རོབ་མནའ་འབྲེལ་ལ་ས་རྒྱུ་ཉམས་ཞན་དུ་འགྲོ་བའི་དཀའ་གནད་འཕྲད་བཞིན་ཡོད་པས་ལོ་ལྟར་ས་རྒྱུ་ཤོར་བའི་བསྡོམས་འབོར་སྔོན་དཔག་ལྟར་ན་ཏུན་དུང་ཕྱུར་10ཟིན་ཡོད།

སྙན་ཞུའི་ནང་ཡོ་རོབ་མནའ་འབྲེལ་རྒྱལ་ཁབ་ཀྱིས་ས་རྒྱུའི་ཞིབ་འཇུག་ལ་མ་དངུལ་གཏོང་ཚད་མང་དུ་བཏང་ནས་སྤྱི་ཚོགས་ཡོངས་ཞུགས་ཚད་མཐོ་རུ་བཏང་སྟེ་ས་རྒྱུ་ཉམས་ཞན་དུ་འགྲོ་ཚུལ་ཐུན་མོང་ཐོག་བཅོས་སྐྱོང་བྱེད་དགོས་པའི་འབོད་སྐུལ་བྱས་ཡོད།

སྙན་ཞུ་ལས་མངོན་པར། ཡོ་རོབ་མནའ་འབྲེལ་གྱི་ས་ཆའི་བཞི་ཆ་གཅིག་ཙམ་ལ་ཆུ་ཤུགས་ཟད་སྐྱོན་གྱི་ཤུགས་རྐྱེན་ཕོག་པ་དེ་གཙོ་བོ་ཞིང་སྤྱོད་ས་ཆར་གཅིག་སྡུད་ཐོག་གནས་པ་དང་སྔོན་དཔག་ལྟར་ན་2050ལོར་སླེབས་སྐབས་བསྡུར་ཚད་དེ་13%ནས་25%བར་མཐོ་རུ་འགྲོ་རྒྱུ་རེད། གཞན་ཡང་མིག་སྔར་ཞིང་སྤྱོད་ཀྱི་ས་རྒྱུ་74%ཙམ་ལ་ས་བཅུད་ཤོར་བའི་གནད་དོན་འཕྲད་ཡོད་ཅིང་། དཔེར་ན་ཏན་ལྷག་ཚད་མང་དུ་འགྲོ་བཞིན་ཡོད་པ་དང་། ས་རྒྱུ་གཤིན་ཚད་སྲུང་འཛིན་བྱེད་པར་གལ་འགངས་ཤིན་ཏུ་ཆེ་བའི་ས་རྒྱུའི་སྐྱེ་ལྡན་ཐཱན་ཉུང་དུ་འགྲོ་བཞིན་ཡོད་པས་ཞིང་ལས་སྐྱེ་དངོས་དང་། སྐྱེ་ཁམས་མ་ལག གནམ་གཤིས་སོགས་ལ་གནོད་འཚེ་འཕྲད་ཀྱི་ཡོད་པ་རེད།

《2030ལོའི་ས་རྒྱུའི་འཐབ་ཇུས》སོགས་འཆར་འགོད་ལག་བསྟར་ལ་རྒྱབ་སྐྱོར་བྱ་ཆེད། ཡོ་རོབ་མནའ་འབྲེལ་གྱིས་ད་དུང“ཡོ་རོབ་ཀྱི་ས་རྒྱུའི་གྲོས་མཐུན”བཏོན་པ་རེད། གྲོས་མཐུན་དེ་ཡོ་རོབ་མནའ་འབྲེལ་དུ་མཐུན་སྦྱོར་གཅིག་མཐུན་གྱི་ས་རྒྱུ་གཤིན་ཚད་ཀྱི་ལྟ་ཞིབ་ཚད་ལེན་མ་ལག་འཛུགས་པར་རོགས་དངུལ་སྤྲོད་པ་དང་། རྒྱུན་མཐུད་ཆོག་པའི་ས་རྒྱུ་དོ་དམ་གྱི་ལག་ལེན་དང་ལག་རྩལ་གསར་སྤེལ་དང་ཁྱབ་གདལ་གཏོང་བ། དོ་དམ་པ་དང་སྤྱི་དམངས་ལ་འབྲེལ་ཡོད་ས་རྒྱུ་གཤིན་ཚད་ཀྱི་གྲོས་འགོ་དང་སློབ་གསོ་སོགས་མཁོ་འདོན་བྱེད་པར་གཙོ་བོ་སྤྱོད་རྒྱུ་རེད། 2024ལོའི་ཟླ་10པ་བར་གྲོས་མཐུན་དེས་ཡོ་སྒོར་དུང་ཕྱུར་4.35བཏང་ནས་ཚོད་ལྟ་ཁང་100ལྷག་ཙམ་དང་ཞིང་ཁ་དང་། ནགས་ཚལ། གྲོང་ཁྱེར་བཅས་སུ་ཁྱབ་པའི་ས་རྒྱུའི་ལྟ་ཞིབ་ཚད་ལེན་ས་ཚིགས་1000ལྷག་ཙམ་བསྐྲུན་ཡོད་པ་རེད།

ཡོ་རོབ་མནའ་འབྲེལ་ཨུ་ལྷན་གྱི་ཁོར་ཡུག་དང་། རྒྱ་མཚོ། ཉ་ལས་བཅས་ལས་དོན་གྱི་ཨུ་ཡོན་ཤིན་ཁེ་ཝུའེ་ཆིའུ་སིས། ས་རྒྱུ་གཤིན་པོས་གནོད་འཚེ་སྔོན་འགོག་བྱེད་ནུས་ཆེ་རུ་གཏོང་ཐུབ་པ་དང་། གནམ་གཤིས་དྲོ་གྲང་སྙོམས་ཐུབ་པ། སྐྱེ་དངོས་སྣ་མང་རང་བཞིན་སླར་གསོ་དང་ཐང་རྒོད་དུ་འགྱུར་ཚད་འགོག་བཅོས་བཅས་བྱེད་ཐུབ། པེར་ཀྲེམ་གྱི་པུ་རུ་སེར་རྒྱལ་སའི་ཁུལ་ཆེན་གྱི་འགན་འཁུར་བ་ཨཱ་ལན·མཱ་ལུང་གིས་ས་རྒྱུ་ནི་མིའི་རིགས་ཀྱི་བཟའ་བཅའ་དང་། ཆུ་ཁུངས་གཙང་མ། འཚོ་སྡོད་ཁུལ་བཅས་ཀྱི་ཡོང་ཁུངས་དང་གྲུབ་ཆ་གལ་ཆེན་ཞིག་ཡིན་པས་ང་ཚོས་དེ་བས་ལེགས་པའི་སྒོ་ནས་ས་རྒྱུ་སྲུང་སྐྱོང་དང་ཉམས་གསོ་བྱས་ཏེ་རྩ་ཆེའི་ཐོན་ཁུངས་འདི་སྲུང་སྐྱོང་ཡག་པོ་བྱེད་དགོས་ཞེས་བཤད། (འདི་ག་ཚགས་པར་ཁང་དུ་པེར་ལིན་ནས་འབྱོར་བའི་གློག་འཕྲིན)