ཉེ་ཆར། མཉམ་འབྲེལ་རྒྱལ་ཚོགས་བྱིས་པའི་ཐེབས་རྩ་ལྷན་ཚོགས་ཀྱིས《2024ལོའི་འཛམ་གླིང་བྱིས་པའི་གནས་ཚུལ། འཛམ་གླིང་རྒྱུན་ཆད་མེད་པར་འགྱུར་ལྡོག་འགྲོ་བཞིན་པའི་ཁྲོད་ཀྱི་བྱིས་པའི་འབྱུང་འགྱུར》ཞེས་པའི་ལོ་འཁོར་སྙན་ཞུ་གསར་ཤོས་ཁྱབ་བསྒྲགས་བྱས་པ་རེད། སྙན་ཞུའི་ནང་མི་འབོར་གྱི་འགྱུར་ལྡོག་དང་། གནམ་གཤིས་དང་ཁོར་ཡུག་གི་ཉམས་ཉེན། དེ་བཞིན་ལག་རྩལ་ཚད་བརྒལ་སོགས་གོ་ལ་ཧྲིལ་པོའི་རང་བཞིན་གྱི་འཕེལ་ཕྱོགས་ཀྱིས་བྱིས་པའི་འཚོ་བར་ཐེབས་པའི་ཤུགས་རྐྱེན་ལ་དབྱེ་ཞིབ་བྱས་པ་མ་ཟད། འབྱུང་འགྱུར་གྱི་འགྲན་སློང་དང་གོ་སྐབས་ལ་ཇི་ལྟར་བྱས་ཏེ་ཁ་གཏད་དེ་བས་ལེགས་པར་གཅོག་ཆེད་གྲོས་འགོའང་བཏོན་ཡོད།

སྙན་ཞུའི་ནང་། འདས་ཟིན་པའི་ལོ་30ཡི་རིང་ལོ་5མན་གྱི་བྱིས་པ་ཤི་ཚད་60%ཆག་པ་དང་། འཚོ་བཅུད་མི་འདང་ཚད་45%ཆག་པ། རིམས་འགོག་སྨན་ཁབ་རྒྱག་ཚད་མུ་མཐུད་མཐོ་རུ་ཕྱིན་པ་དེས་བྱིས་པ་མང་པོའི་ཚེ་སྲོག་སྐྱབས་ཐུབ་ཡོད་ཅེས་འཁོད་ཡོད། སྙན་ཞུའི་ནང་སྔོན་དཔག་བྱས་པར། དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་བ་དང་བསྟུན་ནས་སྔོན་དཔག་བྱས་ན་2050ལོར་སླེབས་སྐབས་ཕྲུ་གུ་དམར་འབྱར་གསོན་ཚད་96%ཡན་བར་མཐོ་རུ་འགྲོ་རྒྱུ་དང་། བྱིས་པར་སློབ་གསོ་ཐོབ་ཚད་མངོན་གསལ་དོད་པོས་མཐོ་རུ་འགྲོ་རྒྱུ། སློབ་གསོའི་ཐད་ཀྱི་ཕོ་མོ་འདྲ་མཉམ་མིན་པའི་གནད་དོན་ལེགས་སུ་འགྲོ་རྒྱུ་བཅས་རེད།

དེ་ལྟར་ཡིན་ནའང་འབྱུང་འགྱུར་གོ་ལ་ཧྲིལ་པོའི་བྱིས་པའི་འཚོ་གནས་ལ་སྔར་བཞིན་གཏན་འཁེལ་མེད་པའི་རང་བཞིན་དང་འགྲན་སློང་གིས་ཁེངས་རྒྱུ་རེད། སྙན་ཞུའི་ནང་བསྟན་དོན། གཅིག་ནས་དུས་རབས་འདིའི་དུས་དཀྱིལ་དུ་སླེབས་སྐབས་གོ་ལ་ཧྲིལ་པོའི་ལོ་18མན་གྱི་མི་འབོར་གྱིས་འཛམ་གླིང་མི་འབོར་བསྡོམས་འབོར་གྱི་བསྡུར་གྲངས་བཟུང་ཚད་ཆེས་ཆེར་ཆག་རྒྱུ་ཡིན་པ་དང་། དར་རྒྱས་ཆེ་བའི་རྒྱལ་ཁབ་དང་ས་ཁུལ་ཁག་གཅིག་ཏུ་བསྡུར་ཚད་ཐ་ན་1/10ཡང་ཟིན་མི་སྲིད་པར་མི་འབོར་གྱི་གྲུབ་ཆའི་གནད་དོན་ལས་མི་རྣམས་ཀྱིས་བྱིས་པའི་དགོས་མཁོར་དོ་ཁུར་བྱེད་ཚད་མི་འདང་བའི་གནས་ཚུལ་ཐོན་སྲིད་པ་དང་། གཉིས་ནས་གནམ་གཤིས་འགྱུར་ལྡོག་དང་ཁོར་ཡུག་ཉམས་ཉེན་ཇེ་ཆེར་འགྲོ་བ་དེས་བྱིས་པར་སྐྱེ་ཁམས་དང་སེམས་ཁམས་ཀྱི་ནད་རིགས་སྣ་ཚོགས་ཕོག་པའི་ཉེན་ཁ་ཆེ་རུ་འགྲོ་བ་དང་། བྱིས་པས་སློབ་གསོ་དང་ལེན་བྱེད་པའི་སྤུས་ཚད་དང་བརྟན་པོའི་རང་བཞིན་དམའ་རུ་འགྲོ་བ་མ་ཟད། ད་དུང་བྱིས་པ་དེ་བས་མང་བ་བུད་སྟོངས་ཡུལ་གྱར་དུ་འགྱུར་སྲིད་པ། གསུམ་ནས་གྲངས་འཛིན་ལག་རྩལ་དང་། མིས་བཟོས་རིག་ནུས། དབང་རྩའི་ལག་རྩལ་སོགས་ཚན་རྩལ་གསར་ཤོས་འཕེལ་རྒྱས་བྱུང་བ་དེས་མི་རྣམས་ཀྱི་འཚོ་བ་དང་། སློབ་སྦྱོང་། ལས་ཀ་བྱེད་སྟངས་བཅས་ལེགས་སུ་འགྲོ་བ་དང་ཆབས་ཅིག གྲངས་འཛིན་གྱི་ཧེ་བག་ཧ་ཅང་ཆེ་རུ་འགྲོ་སྲིད། དར་རྒྱས་འགྲོ་འགོར་བའི་རྒྱལ་ཁབ་དང་ས་ཁུལ་གྱི་བྱིས་པར་དགོས་ངེས་ཀྱི་མཁོ་ཆས་དང་སྒྲིག་ཆས་དང་དེ་མཚུངས་ཀྱི་ལག་རྩལ་ནུས་རྩལ་མེད་པའི་དབང་གིས་འཕེལ་རྒྱས་འགྲོ་མགྱོགས་པའི་ཆ་འཕྲིན་སྤྱི་ཚོགས་དང་འཚམ་མཐུན་ཡོང་དཀའ་བ་དང་ལག་རྩལ་གསར་པ་བེད་སྤྱོད་བྱེད་པའམ་ཡང་ན་གང་བྱུང་དུ་སྤྱོད་པ་ལས་བྱུང་བའི་ཁྲིམས་འགལ་གྱི་བྱེད་སྤྱོད་གསར་པ་དང་ཚུལ་མིན་ནང་དོན་གྱིས་བྱིས་པར་གནོད་འཚེ་བཟོ་སྲིད།