ཉེ་དུས། སྤོ་མེས་རྫོང་གཡུ་ཕུག་ཤང་མདའ་པ་གྲོང་ཚོར་འཁྲུག་ཆ་ཧ་ཅང་དོད། གང་ལགས་ཤེ་ན། ཉིན་དེར་གྲོང་ཚོའི་ཡུལ་མི་ཚང་མ་མདའ་པ་གྲོང་ཚོའི་གནས་སྐབས་གཞུང་ལས་ཁང་དུ་འཛོམས་ནས་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་བགོ་འགྲེམས་ཚོགས་ཆེན་འཚོགས་པས་རེད།

“ཚང་མས་བང་ཡག་པོ་སྒྲིག་ཨང་། མི་རེ་རེ་མ་གཏོགས་མ་ཡོང་རོགས”ཞེས་གཡུ་ཕུག་ཤང་མདའ་པ་གྲོང་ཚོའི་གྲོང་སྡོད་ལས་དོན་རུ་ཁག་གི་ཧྲུའུ་ཅི་དང་པོ་ཅང་ཁྲང་ཁྲུན་གྱིས་དེ་ལྟར་འབོད་ཞོར་ལས་དོན་པ་སྒྲིག་འཛུགས་བྱས་ནས་སྔོན་གཏན་འཁེལ་བའི་ལས་ཀའི་བརྒྱུད་རིམ་ལྟར། གྲོང་ཚོ་ཡོངས་ཀྱི་དུད་ཚང་57གྱི་མང་ཚོགས་ལ་བགོ་འགྲེམས་རྒྱག་འགོ་བཙུགས།

ཤེས་རྟོགས་བྱུང་བར་གཞིགས་ན། ད་ཐེངས་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་ཁྱོན་སྒོར་ཁྲི་22.6བགོ་བཤའ་བརྒྱབ་པ་རེད།

2023ལོར་མདའ་པ་གྲོང་ཚོ་ནི་གཡུ་ཕུག་ཤང་ཁོངས་ཀྱི་གྲོང་ཚོའི་མཉམ་སྡེབ་དཔལ་འབྱོར་གྱི“ཡོང་འབབ་ཡང་མེད་པའི”གྲོང་ཚོ་ཞིག་རེད། སྔོན་མར་རྒྱུ་རྐྱེན་མང་པོའི་དབང་གིས་གྲོང་ཚོའི་མཉམ་སྡེབ་ཐོན་ལས་བེད་མེད་དུ་ལུས་པ་ནས་ཡུལ་མིར་ཞིང་འབྲོག་ལས་དང་ནགས་གསེབ་དཔལ་འབྱོར་སོགས་སྲོལ་རྒྱུན་གྱི་ཡོང་འབབ་ཁོ་ན་ལས་མེད། ཤང་ཁོངས་ཀྱི་མཉམ་སྡེབ་དཔལ་འབྱོར་གྱི་ཡོང་འབབ་ཉུང་བའི་གནད་དོན་སྔར་བས་ཐག་གཅོད་བྱ་ཆེད། གཡུ་ཕུག་ཤང་གིས་རྫོང་ཁོངས་ཀྱི“ཞན་ཆ་སེལ་བའི”བྱ་སྤྱོད་ལག་བསྟར་དོན་འཁྱོལ་ཧུར་ཐག་བྱས་ནས་གནས་སྟོད་མཛེས་ལྗོངས་ཁུལ་གྱི་རི་ཁུལ་སྦག་སྦག་རྣམ་གྲངས་དང་། ཡར་ཀླུང་གངས་ལྗོངས་བ་གླང་གསོ་ཚགས་རྣམ་གྲངས་ལག་ལེན་བསྟར་ནས་གནས་སྟོད་གྲོང་ཚོ་ཕུད་པའི་གྲོང་ཚོ་གཞན་དག་5ལ་བགོ་འགྲེམས་སྒོར་ཁྲི་15རེ་བགོས་པའི་ནང་མདའ་པ་གྲོང་ཚོ་ཚུད་ཡོད།

འདི་ལོའི་ཟླ་བཞི་པར། མདའ་པ་གྲོང་ཚོས་འདེམས་བསྐོ་བྱས་པ་བརྒྱུད། ཕྱུག་འགྱུར་སྣེ་ཁྲིད་པ་ཉི་མ་བཀྲ་ཤིས་གྲོང་ཚོའི་ཏང་ཀྲི་པུའི་ཧྲུའུ་ཅིར་མིང་བཏོན་བྱས་ནས་བདམས་པ་དང་། བདམ་ཐོན་བྱུང་རྗེས་ཉི་མ་བཀྲ་ཤིས་ཀྱིས་གྲོང་ཚོའི་ཨུ་ལྷན་གཉིས་ཀྱི་ཚན་ཁག་གི་སྣེ་ཁྲིད་དེ་ལྗོངས་ཕྱི་ནང་གི་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ཀྱི་སྔོན་ཐོན་དཔེ་མཚོན་གྱི་ཉམས་མྱོང་དང་བྱེད་སྟངས་སློབ་སྦྱོང་བྱས་པ་མ་ཟད། སྤོ་མེས་རྫོང་གི་དམངས་ཕན་དང་གྲོང་ཚོ་དར་རྒྱས་འཛུགས་སྐྲུན་ཚད་ཡོད་འགན་འཁྲི་ཀུང་སི་བཙུགས་ནས་རྣམ་གྲངས་འཛུགས་སྐྲུན་ནང་མཉམ་དུ་ཞུགས་པ་དང་ས་སྒྲོལ་དཔུང་སྒྲིལ་མཉམ་དུ་འཕེལ་རྒྱས་གཏོང་བ་སོགས་ཀྱི་བྱེད་སྟངས་བརྒྱུད། མང་ཚོགས་དང་གྲོང་ཚོའི་མཉམ་སྡེབ་ཀྱི་ཡོང་འབབ་མང་དུ་བཏང་བས། གྲོང་ཚོའི་མཉམ་སྡེབ་ཀྱི་དཔལ་འབྱོར་ཡོང་འབབ་ན་ནིང་གང་ཡང་མེད་པ་ནས་མིག་སྔའི་གྲོང་ཚོའི་མཉམ་སྡེབ་དཔལ་འབྱོར་གྱི་རྩིས་ཁྲར་སྒོར་ཁྲི་75ཟིན་པའི་བར་མང་དུ་ཕྱིན་ཞིང་་སྔོན་དཔག་བྱས་ན་ལོ་མཇུག་ཏུ་སྒོར་ཁྲི་100ལས་བརྒལ་བཟོ་ཡོད་པ་རེད།

མདའ་པ་གྲོང་ཚོའི་འབྲེལ་ཡོད་འགན་འཁུར་བས། གོམ་སྟབས་རྗེས་མར། མ་དངུལ་ཁྱོན་སྒོར་ཁྲི་1000ལྷག་ཙམ་བཏང་ནས་མདའ་པ་གྲོང་ཚོའི་སྦག་སྦག་ཡུལ་སྐོར་རྟེན་གཞིའི་རྣམ་གྲངས་བསྐྲུན་ནས་ཡུལ་སྐོར་གྱི་ཞབས་ཞུ་ལྟེ་གནས་རྩེ་གྲ་གཏོད་རྩིས་ཡོད། རྣམ་གྲངས་དེ་བསྐྲུན་རྗེས་སྔོན་དཔག་བྱས་ན་ལོ་ལྟར་ཡུལ་སྐོར་བ་མི་ཐེངས་ཁྲི་100ལྷག་ཙམ་ལ་ཞབས་འདེགས་ཞུས་ནས་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་སྒོར་ཁྲི་20ལྷག་ཙམ་བྱུང་སྟེ། ས་གནས་དེ་གའི་དཀའ་ངལ་ཡོད་པའི་མང་ཚོགས་20ལས་ཞུགས་བྱ་རྒྱུར་སྐུལ་ཁྲིད་ཐུབ་རྒྱུ་ཡིན་ཞེས་བརྗོད།