ཟླ་12ཚེས་24ཉིན། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ནས་2025ལོའི་ཀྲུང་དབྱང་བརྙན་འཕྲིན་ལས་ཁུངས་ཀྱི་དཔྱིད་གསར་དུས་ཆེན་གྱི་མཚན་ཚོགས་ཀྱིས་ལྷ་སར་ཡན་ལག་ཚོགས་ར་འཛུགས་རྒྱུ་ཡིན་པའི་གཏམ་བཟང་འབྱོར་ཞིང་། དེ་ནི་བོད་དུ་ཀྲུང་དབྱང་བརྙན་འཕྲིན་ལས་ཁུངས་ཀྱི་དཔྱིད་གསར་དུས་ཆེན་གྱི་མཚན་ཚོགས་ཀྱི་ཡན་ལག་ཚོཌ་ར་འཛུགས་ཐེངས་དང་པོ་ཡིན་པ་དང་། ས་མཐོའི་མི་རིཌ་ཁག་གི་ལས་བྱེད་པ་དང་མང་ཚོགས་ཚོས་དགའ་སྤྲོ་དང་རེ་སྒུག་ཆེན་པོ་བྱེད་ཀྱི་ཡོད་པ་རེད།

དཔྱིད་གསར་དུས་ཆེན་དེ་མངོན་མིན་རིག་གནས་ཤུལ་བཞག་ནང་རེ་ཞུ་ལེགས་གྲུབ་བྱུང་རྗེས་ཀྱི་སྤྱི་ཁྱབ་ལས་ཁུངས་ཀྱི་དཔྱིད་གསར་དུས་ཆེན་གྱི་མཚན་ཚོགས་སྐབས་དང་པོ་ཡིན་པའི་ངོས་ནས། 2025ལོའི་དཔྱིད་གསར་དུས་ཆེན་གྱི་གནམ་གང་གི་དགོང་མོར་བོད་ཀྱི་ལྷ་ས་དང་། ཁྲུང་ཆིང་། ཧུའུ་པེ་ཝུའུ་ཧན། ཅང་སུའུ་ཝུའུ་ཤིས་བཅས་ཀྱི་ཡན་ལག་ཚོགས་ར་བཞི་ཡིས་པེ་ཅིང་གི་ཚོགས་ར་གཙོ་བོ་དང་མཉམ་དུ་རྒྱལ་ཡོངས་ཀྱི་ལྟད་མོ་བ་ཚོར་སྣ་མང་ཕུན་སུམ་ཚོགས་པའི་རིག་གནས་ཀྱི་སྟོན་མོ་གཟབ་རྒྱས་ཤིག་བཤམ་རྒྱུ་རེད།

དཔྱིད་གསར་དུས་ཆེན་ནི་ཀྲུང་ཧྭའི་བུ་ཕྲུག་ཡོངས་ཀྱི་སྙིང་དབུས་སུ་སིམ་པའི་དུས་ཆེན་ཞིག་ཡིན་ཞིང་། མི་ཚང་མས་ཕ་ཡུལ་ལ་ཕྱོགས་པའི་དྲན་གདུང་དང་རྒྱང་རིང་གི་གཉེན་ཉེ་ཡིད་ལ་འཆང་ལུགས་མཚོན་ཡོད།

ཅང་སུའུ་ནས་ཡིན་པའི་མཁྱེན་ལྡན་མ་ཀྲོའུ་ལགས་བོད་དུ་ལས་ཀ་བྱས་ནས་ལོ་བཅུ་ཙམ་སོང་ཞིང་། ཁོང་གིས། གཏམ་བཟང་གོ་སྐབས་ཕ་ཡུལ་ཅང་སུའུ་དང་དེ་བཞིན་ལས་ཀ་བྱེད་ས་དང་འཚོ་བ་སྐྱེལ་སའི་བོད་ལྗོངས་གཉིས་ཀྱིས་དུས་མཉམ་དུ་དཔྱིད་གསར་དུས་ཆེན་གྱི་མཚན་ཚོགས་ཀྱི་ཡན་ལག་ཚོགས་ར་བསུ་རྒྱུ་ཡིན་ལུགས་ཤེས་པས། ང་རང་དགའ་ཚོར་ཆེན་པོ་བྱུང་ལ་སྤོབས་པ་ཆེན་པོ་ཡང་སྐྱེས་བྱུང་། ངས་བོད་ཀྱི་ཉིན་བཞིན་འཕོ་འགྱུར་འགྲོ་བའི་རྣམ་པ་གསར་པར་དཔང་པོ་བྱས་པ་མ་ཟད། བོད་ཀྱི་ལས་དོན་མང་པོའི་ནང་དུའང་ཞུགས་མྱོང་ཡོད་ཅེས་གསར་འགོད་པར་བཤད།

“ལྐོག་གྱུར་དང་ཡངས་ཤིང་རྒྱ་ཆེ་བའི་བོད་ཀྱི་ཡུལ་གྲུ་འདི་རུ། བོད་རིགས་སྤུན་ཟླ་དང་མཉམ་དུ་སྤྲོ་སྣང་གིས་ཁེངས་པའི་དུས་ཆེན་མང་པོ་བཏང་མྱོང་། དཔྱིད་གསར་དུས་ཆེན་གྱི་མཚན་ཚོགས་ཀྱི་གར་སྟེགས་ལ་བརྟེན་ནས་ལྟད་མོ་བ་སྔར་བས་མང་པོར་བོད་ཀྱི་ཐུན་མོང་མ་ཡིན་པའི་ཉམས་བཟང་ཚོར་ཐུབ་རྒྱུའི་རེ་བ་ཡོད་ལ། བོད་ཀྱིས་དེ་བས་ཉམས་དགའ་བའི་གཟི་འོད་འཕྲོས་ནས་འཚོ་བར་དགའ་ཞེན་དང་མཛེས་སྡུག་ལ་ཡིད་སྨོན་བྱེད་མཁན་ཀུན་གྱི་ཡིད་དབང་འཕྲོག་ཐུབ་རྒྱུའི་རེ་བའང་ཡོད”ཅེས་མཁྱེན་ལྡན་མ་ཀྲོའུ་ལགས་ཀྱིས་བཤད།

ཧྲེན་ཀྲེན་ནས་ཡོང་བའི་སྐུ་ཞབས་ལི་ལགས་ཀྱིས“བོད་དུ་ས་མཐོའི་ཡུལ་ལུང་གི་ལྐོག་གྱུར་དང་བརྗིད་ཆགས་ཡིད་འོང་གི་མཛེས་པ་ཞིབ་ཏུ་མྱོང་ཐུབ་ལ། དགུན་དུས་ཀྱི་མཛེས་ཉམས་དང་ལྷིང་འཇགས་ཀྱི་སྐྱིད་སྣང་ཡང་ཚོར་ཐུབ། དཔྱིད་གསར་དུས་ཆེན་གྱི་མཚན་ཚོགས་གར་སྟེགས་ཐོག་ངས་བོད་ཀྱི་རས་པ་དང་ལྷ་མོའི་ཟློས་གར་སོགས་ཀྱི་ལེ་ཚན་ལ་ལྟ་ཐུབ་པའི་རེ་བ་བྱེད་ཀྱི་ཡོད་ལ། བོད་ཀྱི་གཞས་མ་ཧན་ཧུང་དེ་བས་ཀྱང་མཐོང་འདོད་ཡོད། ཁོང་གི་གླུ་སྐད་ཧ་ཅང་སྙན་ཞིང་དེ་བས་ཀྱང་ཁོང་ནི་སེམས་བཟང་ཅན་ཞིག་རེད”ཅེས་བཤད།

ཀྲུང་དབྱང་བརྙན་འཕྲིན་ལས་ཁུངས་ཀྱི་དཔྱིད་གསར་དུས་ཆེན་མཚན་ཚོགས་བོད་ལྗོངས་ཡན་ལག་ཚོགས་ར་བཙུགས་པ་ནི་བོད་ཀྱི་ཕུན་སུམ་ཚོགས་པའི་རིག་གནས་ཀྱི་ཉིང་བཅུད་མཚོན་པ་ཞིག་ཡིན་ལ། བོད་ཀྱི་འཕེལ་རྒྱས་ལ་སྐད་གྲགས་མེད་པར་ལེགས་སྐྱེས་འབུལ་མཁན་རྣམས་ལ་སྐུལ་ལྕག་གཏོང་བ་ཞིག་ཀྱང་རེད།