གཞིས་རྩེ་གྲོང་ཁྱེར་རྣམ་གླིང་རྫོང་གི“ཨེ་མའི་ཞོག་ཁོག”ནི་ཐོན་འབབ་མཐོ་བ་དང་། སྤུས་ཀ་དག་པ། པགས་པ་སྲབ་པ། སིང་ཕྱེ་འདུས་ཚད་མཐོ་བ། བྲོ་བ་ཞིམ་པ་སོགས་ཀྱི་ཁྱད་ཆོས་ལྡན་པས་འཛད་སྤྱོད་པས་ཧ་ཅང་དགའ་པོ་བྱེད་ཀྱི་ཡོད། འོན་ཀྱང་ཚན་རྩལ་གྱི་འདེགས་སྐྱོར་ཞན་པ་དང་སྤུས་རྟགས་གཏོད་དཀའ་བ་སོགས་ཀྱི་རྐྱེན་པས“ཨེ་མའི་ཞོག་ཁོག”ལ་དེ་གོང་སྣ་ཁ་ཉུང་བ་དང་། སྤུས་རྟགས་མེད་པ། འཕེལ་རྒྱས་འགྲོ་དཀའ་བ་བཅས་ཀྱི་དཀའ་གནད་འཕྲད་ཡོད།

ཞོག་ཁོག་གི“གསེར་གྱི་མིང་བྱང”དེ་ཁྱབ་གདལ་གཏོང་ཆེད། ཉེ་བའི་ལོ་ཤས་རིང་། རྣམ་གླིང་རྫོང་གིས“ཨེ་མའི་ཞོག་ཁོག”གི་སྤུས་རྟགས་དང་། སྣ་ཁ། སྤུས་ཚད་བཅས་ཀྱི་ཐད་ཤུགས་སྣོན་རྒྱག་པ་དང་ཞོག་ཁོག་ཐོན་ལས་འཕེལ་རྒྱས་གཏོང་བར་གཞོལ་ཏེ། ཞོག་ཁོག་འདེབས་འཛུགས་དང་ལས་སྣོན་ཐོན་ལས་འཕེལ་རྒྱས་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་བཏང་ཡོད། མིག་སྔར་རྣམ་གླིང་རྫོང་གི“ཨེ་མའི་ཞོག་ཁོག”གི་འདེབས་ཁྱོན་མུའུ་ཁྲི་4.8ཟིན་ནས་ལོར་ཐོན་འབབ་ཏུན་ཁྲི་12.24ཟིན་པ་དང་། འདེབས་འཛུགས་མི་གྲངས་ཀྱིས་རྫོང་ཡོངས་ཀྱི་ཞིང་འབྲོག་པའི་མི་འབོར་ཡོངས་ཀྱི་50%བཟུང་བ། 2023ལོར་མང་ཚོགས་ལ་འབབ་འཕར་སྒོར་དུང་ཕྱུར་1.3བྱུང་ཡོད་པ་བཅས་རེད།

2020ལོ་ནས་བཟུང་། རྣམ་གླིང་རྫོང་གིས“ཨེ་མའི་ཞོག་ཁོག”གི་སྤུས་རྟགས་སྐྱེད་སྲིང་དང་། སོན་བཟང་གསོ་སྤེལ། ཞིང་ཁ་ཆེན་པོར་འདེབས་འཛུགས་གཡོག་བྱེད་སོགས་ཀྱི་ལས་དོན་ལ་སྐུལ་འདེད་གཏིང་ཟབ་བཏང་ཡོད། ཞོག་ཁོག་འདེབས་ཁྱོན་ཆེ་རུ་གཏོང་བའི་མ་ལག་བཙུགས་པ་བརྒྱུད་སྣ་ཁ་ཉུང་བ་དང་ཐོན་སྐྱེད་ནུས་པ་ཞན་པའི་གནད་དོན་ཐག་གཅོད་ཐུབ་ནས། ཕན་འབྲས་མངོན་གསལ་དོད་པོ་ཐོན་པ་དང་འབྲེལ་མང་ཚོགས་ལ་འབབ་འཕར་ཡོང་བར་སྐུལ་ཁྲིད་ཀྱང་ཐུབ་ཡོད།

ཞོག་ཁོག་གི་སྣ་ཁ་ལེགས་སུ་ཕྱིན་པས་མང་ཚོགས་ཀྱི་ཞོག་ཁོག་འདེབས་སེམས་ཀྱང་ཆེ་རུ་ཕྱིན་ཡོད། “ངའི་ཁྱིམ་གྱིས་ཞོག་ཁོག་མུའུ་10བཏབ་པ་ཚང་མར་ཁྱིམ་ལུད་བརྒྱབ་པ་ཡིན། འདི་ལོ་ཤང་གིས་གཉེར་བའི‘ཞོག་ཁོག་རྒྱལ་པོའི’འགྲན་བསྡུར་ནང་ཞོག་ཁོག་གཅིག་ལ་རྒྱ་མ་4.7ཟིན་པར་བྱ་དགའ་རིམ་པ་དང་པོ་ཐོབ་བྱུང”ཞེས་རྣམ་གླིང་རྫོང་ཨེ་མ་ཤང་སྲམ་པ་གྲོང་ཚོའི་ཡུལ་མི་བུ་ཆུང་གིས་དགའ་སྤྲོའི་ངང་བཤད།

དེ་དང་ཆབས་ཅིག རྣམ་གླིང་རྫོང་གིས་ཞོག་ཁོག་ཕྱིར་ཚོང་ཐབས་ལམ་རྒྱ་ཆེར་གཏོང་བ་དང་། ཞོག་ཁོག་ལས་སྣོན་གྱི་ཐོན་ལས་འཁོར་འབྲེལ་སྣུར་སྲིང་བྱེད་པ།  དུས་ཚིགས་ལྡོག་པའི་གསོག་ཉར་ཕྱིར་ཚོང་བཅས་བྱས་པས་ཕྱིར་ཚོང་གི་དུས་བཀག་ཐུང་བ་དང་རིན་གོང་ཅུང་དམའ་བའི་སྣང་ཚུལ་ལེགས་སུ་ནུས་ལྡན་ཕྱིན་པས་མང་ཚོགས་དེ་བས་མང་བས་ཞོག་ཁོག་བཏབ་ནས་འབབ་འཕར་ཕྱུག་འགྱུར་ལམ་བུར་བསྐྱོད་ཡོད།

ཨེ་མ་ཤང་ལྷབ་གྲོང་ཚོའི་ཡུལ་མི་ཚེ་ནོར་གྱིས་གསར་འགོད་པར“ངས་ཞོག་ཁོག་མུའུ་20ལྷག་ཙམ་བཏབ་པ་ཡིན། ད་ལོ་ཞོག་ཁོག་གི་ཡོང་འབབ་སྒོར་ཁྲི་8ལྷག་ཙམ་འདུག ཞོག་ཁོག་བཏབ་རྗེས་འཚོ་བ་ཇེ་ལེགས་སུ་ཕྱིན་སོང”ཞེས་བཤད།

རྣམ་གླིང་རྫོང་ཞིང་ལས་དང་གྲོང་གསེབ་ཅུས་ཀྱི་ཅུས་ཀྲང་ཉི་མ་བུ་ཁྲིད་ཀྱིས“ཨེ་མའི་ཞོག་ཁོག”ཐོན་ལས་རྒྱུན་ཆད་མེད་པར་འཕེལ་རྒྱས་དང་སྟོབས་ཆེར་ཕྱིན་པ་དེས་ཞིང་པར་འབབ་ཁུངས་བརྟན་པོ་ཞིག་མཁོ་འདོན་བྱས་པ་མ་ཟད། འབྲེལ་ཡོད་ཐོན་ལས་འཁོར་འབྲེལ་སྣུར་སྲིང་ཐུབ་ནས་གྲོང་གསེབ་དར་རྒྱས་ལའང་སྒུལ་ཤུགས་ཆེན་པོ་བསྣན་ཡོད་ཅེས་བཤད།