རྒྱལ་ལམ་349བརྒྱུད་དེ་ཆབ་མདོ་གྲོང་ཁུལ་ནས་དཔལ་འབར་རྫོང་གི་ཕྱོགས་སུ་བསྐྱོད་པ་ཡིན། དཔལ་འབར་རྫོང་ཁོངས་སུ་སླེབས་མ་ཐག“དཔལ་འབར་འཕེལ་རྒྱས་གཏོང་བར་སློབ་གསོ་སྔོན་ལ་འཇོག་དགོས”ཞེས་པའི་ཡིག་འབྲུ་ཆེན་པོ་དག་བག་ལྷས་ལའི་རི་ལྡེབས་ཀྱི་མངོན་གསལ་དོད་སར་བརྐོས་ཡོད་པ་ལས་དཔལ་འབར་རྫོང་འཕེལ་རྒྱས་གཏོང་རིང་སློབ་གསོའི་གནས་བབ་གལ་ཆེན་མངོན་ཡོད།

2021ལོ་ནས་བཟུང་། དཔལ་འབར་རྫོང་མཐོ་རིམ་སློབ་འབྲིང་དུ་སློབ་མ་བསྡུ་ཚད་ལོ་རེ་བཞིན་མང་དུ་འགྲོ་གི་ཡོད། 2021ལོའི་43.21%ནས་2024ལོའི་68.82%བར་འཕར་ཏེ་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད། དུས་ཐུང་ལོ་བཞི་ཡི་ནང་། དཔལ་འབར་རྫོང་ཨུད་དང་རྫོང་སྲིད་གཞུང་གིས་ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་དགུ་པ་དང་བཅུ་པའི་དཔལ་འབར་ལས་དོན་ཚོགས་ཆུང་དང་མཉམ་དུ་འབད་བརྩོན་བྱས་པ་བརྒྱུད་དཔལ་འབར་རྫོང་མཐོ་རིམ་སློབ་འབྲིང་གི་སློབ་རིམ་འཕར་ཚད་མཐོ་རུ་ཤུགས་ཆེན་ཕྱིན་ཡོད།

“དཔལ་འབར་འཕེལ་རྒྱས་གཏོང་བར་སློབ་གསོ་སྔོན་ལ་འཇོག་དགོས”ཞེས་པའི་བག་ལྷས་ལའི་རི་ལྡེབས་སུ་བརྐོས་པའི་འབོད་ཚིག་དེ་དཔལ་འབར་རྫོང་ཨུད་དང་། རྫོང་སྲིད་གཞུང་། དེ་བཞིན་ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་དགུ་པ་དང་བཅུ་པའི་དཔལ་འབར་ལས་དོན་ཚོགས་ཆུང་གིས་དཔལ་འབར་རྫོང་གི་མང་ཚོགས་ལ་བཞག་པའི་འགྱུར་མེད་ཀྱི་དམ་བཅའ་ཞིག་རེད།

དཔལ་འབར་རྫོང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་། རྒྱུན་ལས་རྫོང་དཔོན་གཞོན་པ། ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་དཔལ་འབར་ལས་དོན་ཚུགས་ཆུང་གི་ཙུའུ་ཀྲང་བཅས་ཡིན་པའི་ལིན་ཧྥུའུ་ཆོན་གྱི་སྣེ་ཁྲིད་འོག གསར་འགོད་པ་རྫོང་བུ་བཅོལ་ཁང་དང་། རྫོང་སློབ་འབྲིང་། སློབ་ཆུང་བཅས་ལ་ལྟ་སྐོར་དུ་བསྐྱོད་པ་ཡིན།

2022ལོའི་ཟླ་བདུན་པར། བོད་སྐྱོར་ལས་དོན་གྱི་རྒྱུན་མཐུད་དེ་ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་དཔལ་འབར་ལས་དོན་ཚོགས་ཆུང་དཔལ་འབར་རྫོང་ལ་བཅའ་སྡོད་བྱས་མ་ཐག སློབ་གསོའི་བོད་སྐྱོར་དེ་བོད་སྐྱོར་ལས་དོན་གྱི་གལ་ཆེན་ནང་གི་འགངས་ཆེར་བརྩིས་ཤིང་། ལོ་གཉིས་རིང་རིམ་རྩིས་བརྒྱབ་ན་མ་དངུལ་སྒོར་ཁྲི་5000ལྷག་ཙམ་བཏང་ནས་རྫོང་ཡོངས་ཀྱི་སློབ་གཉེར་མཐུན་རྐྱེན་ལེགས་སུ་བཏང་བ་སྟེ། སློབ་གྲྭའི་ཉལ་ཁང་རྒྱ་སྐྱེད་དང་། འཁྲུད་ཁང་གི་སྒྲིག་ཆས་འཐུས་སྒོ་ཚང་དུ་གཏོང་བ། སློབ་གྲྭའི་རིག་གནས་འཛུགས་སྐྲུན་སོགས་ཚུད་པའི་འཛུགས་སྐྲུན་རྣམ་གྲངས་17ལག་ལེན་བསྟར་བ་མ་ཟད། དཔལ་འབར་རྫོང་ལྟེ་བའི་སློབ་ཆུང་གི་བསྐྱར་སྐྲུན་རྒྱས་སྐྲུན་ལས་གྲྭར་སྐུལ་འདེད་བཏང་བ་དང་། རྫོང་ཡོངས་ཀྱི་སྒྲོག་ཙེ་རྐུབ་སྟེགས་རྙིང་པ་8000ལྷག་ཙམ་ཐག་གཅོད་བྱས་ཡོད།

ད་དུང་ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་དཔལ་འབར་ལས་དོན་ཚོགས་ཆུང་གིས་ལྗོངས་ཕྱིའི་གཅེས་སྐྱོང་ཁེ་ལས་དང་མི་སྒེར་ལ་འབྲེལ་བ་བྱས་ནས་སློབ་སྐྱོར་དང་ཞལ་འདེབས་འབུལ་བའི་བྱེད་སྒོ་ཧུར་ཐག་སྤེལ་ཞིང་། རིམ་རྩིས་བརྒྱབ་ན་དཔལ་འབར་གྱི་སློབ་གསོའི་ཁོངས་གཏོགས་ལ་སྒོར་ཁྲི་140རི་བའི་དངོས་ཟོག་དང་དཔེ་དེབ་18940ཞལ་འདེབས་བརྒྱབ་ནས་སློབ་མ་ཚོར་དཔེ་ཀློག་གི་གོམས་གཤིས་བཟང་པོ་ཞིག་འཇགས་ཐབས་བྱས་ཡོད།

“བོད་སྐྱོར་གྱི་བསམ་པའི་རིག་གནས་འདུ་འགོད་ཁག་བཅུར”སྐུལ་འདེད་གཏོང་རིང་། ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་དཔལ་འབར་ལས་དོན་ཚོགས་ཆུང་དང་སློབ་གསོ་རིག་གནས་ཚོགས་ཆུང་གིས་ཧྥུའུ་ཅན་ཞིང་ཆེན་གྱི་གཅེས་སྐྱོང་སྤྱི་ཕན་རྩ་འཛུགས་དང་སྤྱི་ཚོགས་ཀྱི་སྤྱི་ཕན་ཁེ་ལས་དང་མཉམ་དུ“དཔེ་ཀློག་ལམ་ནས་བོད་དུ་གཅེས་སེམས་འཆང་བ་སྟེ། ཆབ་མདོའི་བྱིས་པའི་དཔེ་ཀློག་སློབ་གསོའི་འཆར་གཞི”སྤེལ་རྒྱུའི་གྲོས་འགོ་བཏོན་ཞིང་། རིམ་རྩིས་བརྒྱབ་ན། མ་དངུལ་སྒོར་ཁྲི་45བཏང་ནས་དཔལ་འབར་རྫོང་གི་ཤང་དང་གྲོང་རྡལ་11གི་སློབ་གྲྭ་36གི་འཛིན་གྲྭ་199ལ“སློབ་ཁང་ཚང་མར་དཔེ་ཁྲི”བཙུགས་པ་མ་ཟད། འབྲེལ་ཡོད་ཀྱི་རིགས་གཅིག་མཁས་ཅན་དང་དང་བླངས་པ་དཔལ་འབར་ལ་གདན་དྲངས་ནས་དཔེ་ཀློག་གི་བྱེད་སྒོ་རབ་དང་རིམ་པ་སྤེལ་ཏེ་སློབ་རྭ་དང་ཕྲུ་གུ་ཚོའི་སེམས་སུ་དཔེ་ཀློག་གི་གོམས་གཤིས་བཟང་པོའི་ས་བོན་བཏབ་ཡོད།

ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་དཔལ་འབར་ལས་དོན་ཚོགས་ཆུང་གིས“མཉམ་འདྲེས་རྣམ་པའི”སློབ་མ་མཉམ་འགུལ་སྤེལ་རེས་བྱས་ནས་དཔལ་འབར་རྫོང་གི་སློབ་གྲྭ་འབྲིང་ཆུང་གི་ཕུལ་བྱུང་སློབ་མ་28དང་། དུས་རབས་ཀྱི་གཞོན་ནུ་ལོ་ཆུང་བཟང་པོ་5 ལས་ཞུགས་མ་ཐུབ་པའི་སློབ་ཆེན་སློབ་མ་10བཅས་ཁག་བཞི་ལ་བགོས་ཏེ་ཧྥུའུ་ཅན་དང་དཔལ་འབར་གྱི་རིག་གནས་སྤེལ་རེས་ཀྱི་དབྱར་སྒར་བྱེད་སྒོར་ཞུཌ་རྒྱུ་སྒྲིག་འཛུཌ་བྱས་ཡོད། བྱ་ཐབས་དེས་མི་རིགས་རིག་གནས་སྤེལ་རེས་ལ་སྐུལ་མ་ཐེབས་པ་མ་ཟད། དཔལ་འབར་གྱི་སློབ་མའི་དབྱར་གསེང་འཚོ་བ་སྔར་བས་ཕུན་སུམ་ཚོགས་སུ་དང་མཐོང་རྒྱ་ཆེ་རུ་ཕྱིན་པ་དང་། ཁོང་ཚོའི་འཚར་ལོངས་ཀྱི་འགག་རྩའི་དུས་སྐབས་སུ་ཡང་དག་པའི་རིན་ཐང་ལྟ་བ་བཙུགས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་དང་། ཏང་དང་། རྒྱལ་ཁབ། སྤྱི་ཚོགས་རིང་ལུགས་བཅས་ལ་དགའ་ཞེན་བྱེད་པའི་བརྩེ་བ་ཟབ་མོ་སྐྱེད་སྲིང་བྱས་ཡོད།

ཧྥུའུ་ཅན་དང་དཔལ་འབར་ས་གནས་གཉིས་ཀྱི་སློབ་གསོ་སྤེལ་རེས་དང་ཕན་ཚུན་དཔྱད་གཞིར་འཛིན་པར་སྐུལ་འདེད་གཏོང་བའི་ཐད། ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་དཔལ་འབར་ལས་དོན་ཚོགས་ཆུང་གཞི་རིམ་གྱི་སློབ་གྲྭར་བསྐྱོད་དེ་དཔལ་འབར་གྱི་སློབ་གསོའི་དོན་དངོས་དང་ཟུང་འབྲེལ་བྱས་ནས་གནད་དོན་གྱི་ཞན་ཆར་དམིགས་ཏེ། “གདན་འདྲེན་པ་དང་ཕྱིར་སྐྱོད་པའི”ཐོག་ནས་ཧྥུའུ་ཅན་ཞིང་ལས་ནགས་ལས་སློབ་ཆེན་གྱི་སློབ་ཁྲིད་བྱེད་ཐབས་ཀྱི་ལས་དོན་ཁང་དང“ཧྥུའུ་ཅན་དང་ཆབ་མདོའི་དགེ་རྒན་གྲགས་ཅན་གྱི་ལས་དོན་ཁང”སོགས་ཀྱི་ཚོགས་པ་དཔལ་འབར་དུ་གདན་དྲངས་ནས། དབྱར་གསེང་རིང་གི་སྤྱི་ཚོགས་ལག་ལེན་གྱི་དང་བླངས་ཞབས་ཞུ་དང་སློབ་ཁྲིད་བྱེད་ཐབས་གསོ་སྦྱོང་དང་མཛུབ་ཁྲིད་བྱས་ཤིང་། རིམ་རྩིས་བརྒྱབ་ན་རྫོང་གི་རྐང་འཛིན་དགེ་རྒན་ཁྱོན་167ཧྥུའུ་ཅན་དུ་སློབ་སྦྱོང་ལ་བཏང་ནས་དཔལ་འབར་གྱི་སློབ་གསོའི་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད།