དྲ་ཐོག་ཚོང་དོན་འཕེལ་རྒྱས་ལ་སྐུལ་འདེད་མགྱོགས་པོ་གཏོང་བ་དང་། གྲོང་ཁྱེར་ཡོངས་ཀྱི་དྲ་ཐོག་ཚོང་དོན་གྱི་ཤེས་ལྡན་པའི་མཛོད་རྒྱ་ཆེར་གཏོང་བ། ལས་རིགས་ཀྱི་བྱང་ཚད་མཐོ་བའི་དྲ་ཐོག་ཚོང་དོན་གྱི་ལས་གཉེར་བ་ཁག་གཅིག་གསོ་སྐྱོང་བཅས་བྱ་ཆེད། ཉེ་ཆར་ཉིང་ཁྲི་དྲ་ཐོག་ཚོང་དོན་མཐུན་ཚོགས་ཀྱིས་2024ལོའི་ལོ་འཁོར་གྱི་ཚོགས་མིའི་ཁེ་ལས་ཀྱི་ལས་བཟོའི་རྩལ་ནུས་མཐོར་གཏོང་གི་གསོ་སྦྱོང་འཛིན་གྲྭ་གཉེར་བ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་གསོ་སྦྱོང་འཛིན་གྲྭར་རང་སྐྱོང་ལྗོངས་ཀྱི་དྲ་ཐོག་ཚོང་དོན་གྱི་བསླབ་པ་རྒན་གྲས་གཉིས་གདན་དྲངས་ཤིང་། དྲ་ཐོག་ཚོང་དོན་ཐོག་མར་གཉེར་མཁན་གྱིས་ཚོང་ཁང་འཛུགས་པའི་བརྒྱུད་རིམ་དང་། དྲ་ཐོག་ཚོང་དོན་གྱི་གཉེར་སྐྱོང་གཏན་ཚིགས་དང་རྨང་གཞིའི་གཏན་ཚིགས། གཉེར་སྐྱོང་ཐབས་རྩལ། བྱེད་ཐབས་སོགས་ལ་དམིགས་ནས་སློབ་ཁྲིད་བྱས་ཏེ། སློབ་མ་ཚོར་དྲ་ཐོག་ཚོང་དོན་གྱི་ཤེས་བྱ་དང་རྩལ་ནུས་བརྒྱུད་ཁྲིད་ཀྱིས་ཁོང་ཚོས་གཉེར་སྐྱོང་ཆོས་ཉིད་ཁོང་དུ་ཆུད་རོགས་བྱས་ནས་དྲ་ཐོག་ཚོང་དོན་ལས་སྒོའི་འགྲན་རྩོད་ནུས་པ་དང་ཁེ་འབབ་ནུས་པ་སྔར་བས་ཆེ་རུ་བཏང་ཡོད།

ཉིང་ཁྲིའི་དྲ་ཐོག་ཚོང་དོན་མཐུན་ཚོགས་ཀྱི་འབྲེལ་ཡོད་འགན་འཁུར་བས། ད་ཐེངས་ཀྱི་གསོ་སྦྱོང་འཛིན་གྲྭའི་དུས་ཡུན་ཉིན་7ཡིན་པ་དང་ཉིང་ཁྲི་གྲོང་ཁྱེར་གྱི་ཁེ་ལས་ཆེ་གྲས་དང་ཚན་པ་ཁག་གི་དྲ་ཐོག་ཚོང་དོན་གྱི་ལས་གཉེར་བ་དང་། དྲ་ཐོག་སྙན་སྒྲོན་པ་གཙོ་བོ། བརྙན་ཐུང་བརྡར་པ། སློབ་གྲྭ་ཆེ་མོ་བའི་ལས་གཏོད་པ། གྲོང་གསེབ་མཉམ་ལས་ཁང་གི་གཉེར་སྐྱོང་བ་སོགས་སློབ་མ་100ཙམ་ཞུགས་ཡོད་ཅེས་བཤད། གསོ་སྦྱོང་བྱས་པ་བརྒྱུད། ཉིང་ཁྲི་གྲོང་ཁྱེར་གྱི་དྲ་ཐོག་ཚོང་དོན་ལས་གཉེར་བའི་ཆེད་ལས་རྩལ་ནུས་དང་ལས་སྒོའི་ཆུ་ཚད་སྔར་བས་མཐོ་རུ་ཕྱིན་པ་མ་ཟད། ས་གནས་དེ་གའི་དྲ་ཐོག་ཚོང་དོན་གྱི་འཕེལ་རྒྱས་གསོན་ཤུགས་ཀྱང་འཕེལ་ཡོད།