ཤིན་ཧྭ་གསར་འགྱུར་ཁང་གྲོང་ཁྱེར་ཁམ་ཕ་ལ་ནས་གློག་འཕྲིན་འབྱོར་པ་གཞིར་བཟུང་། ཉེ་ཆར། ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་ཝུ་ཀན་ཏའི་འཕྲིན་གཏོང་རྐང་འཛིན་དྲ་བ་དང་གློག་རྡུལ་སྲིད་དོན་དྲ་བའི་དུས་ཐེངས་ལྔ་པའི་རྣམ་གྲངས་དངོས་སུ་སྐྲུན་འགོ་ཚུགས་པ་རེད། ཝུ་ཀན་ཏའི་བྱང་ཤར་རྒྱུད་ཀྱི་མོ་ལུའོ་ཐོ་ས་ཁུལ་དུ་འཚོགས་པའི་འགོ་ཚུགས་མཛད་སྒོར་ཝུ་ཀན་ཏའི་ཙུང་ཐུང་མུའུ་སའེ་ཝུའེ་ཉི་ཡིས་ཀྲུང་གོས་ཝུ་ཀན་ཏའི་དྲ་རྒྱའི་སྦྲེལ་མཐུད་མངོན་འགྱུར་ཡོང་བར་རྒྱབ་སྐྱོར་རྒྱུན་མཐུད་གནང་བར་ཐུགས་རྗེ་ཆེ་ཞུས་པ་རེད།

མུའུ་སའེ་ཝུའེ་ཉི་ཡིས། དུས་ཐེངས་ལྔ་པའི་རྣམ་གྲངས་ཀྱིས་ཝུ་ཀན་ཏའི་ད་ཡོད་དྲ་སྦྲེལ་གྱི་རྨང་གཞིའི་སྒྲིག་བཀོད་དེ་རྒྱལ་ཡོངས་ཀྱི་ས་ཁུལ་སྔར་བས་མང་བར་སྣུར་སྲིང་ཐུབ་ནས་ཝུ་ཀན་ཏའི་གྲངས་འཛིན་ཅན་གྱི་ཕྱོགས་སྒྱུར་ལ་སྐུལ་འདེད་ཐེབས་རྒྱུ་རེད་ཅེས་བརྗོད་ཡོད།

ཝུ་ཀན་ཏའི་འཕྲིན་གཏོང་ལག་རྩལ་དང་རྒྱལ་ཁབ་མཛུབ་ཁྲིད་པུའི་པུའུ་ཀྲང་ཁེ་ལི་སི·པ་ལི་ཨའོ་མོང་ཞི་ཡིས་ཤིན་ཧྭ་གསར་འགྱུར་ཁང་གི་བཅར་འདྲི་དང་ལེན་བྱེད་སྐབས“གྲངས་འཛིན་ཅན་གྱི་ཕྱོགས་སྒྱུར་ཐད་ཀྲུང་གོར་གྲུབ་འབྲས་མངོན་གསལ་དོད་པོ་ཐོབ་ཡོད་ཅིང་། ང་ཚོས་དེའི་ཁྲོད་ནས་སློབ་སྦྱོང་མང་པོ་བྱེད་ཐུབ”ཅེས་བཤད།

ཧྭ་ཝུའེ་ཀུང་སིས་མཁོ་འདོན་བྱས་པའི་གྲངས་གཞི་ལས་མངོན་པ་ལྟར་ན། ཝུ་ཀན་ཏའི་འཕྲིན་གཏོང་རྐང་འཛིན་དྲ་བ་དང་གློག་རྡུལ་སྲིད་དོན་དྲ་བའི་སྔོན་མའི་དུས་ཐེངས་བཞིའི་རྣམ་གྲངས་ཀྱིས་ཝུ་ཀན་ཏའི་ས་ཁུལ་63དུ་ས་ཚིགས་1408སྐྲུན་པ་དང་། འོད་སྐུད་གློག་སྐུད་སྤྱི་ལེ་4172འཁྲིད་པ། སྤྱི་པའི་Wi-Fiས་ཚིགས་526སྐྲུན་པ་བཅས་བྱས་པས་ཝུ་ཀན་ཏ་དྲ་སྦྲེལ་གྱི་འགྲོ་གྲོན་ཚད་གཞི་དམའ་རུ་ཤུགས་ཆེན་སོང་ཡོད།