ཆབ་མདོ་གྲོང་ཁྱེར་སྨར་ཁམས་རྫོང་འཇང་མི་རིགས་ཤང་འཇང་གྲོང་ཚོས།
“བདེ་སྐྱིད་མེ་ཏོག”མཉམ་དུ་བཞད་པར་བྱས།
རྫ་ཆུའི་རྒྱུད་དུ་འཆམ་འཆམ་ལ་འགྲོ་སྐབས་གཙང་ཆུ་སྔོན་མོ་རྦ་རླབས་ལང་ལོང་དུ་འཕྱུར་བཞིན་དྲག་ཏུ་རྒྱུག རྒྱང་རིང་ལ་ཕྱོགས་སྐབས་མིག་ལམ་དུ་མངོན་པ་ནི་ཐོག་བརྩེགས་ཁང་པ་དཀར་པོ་སྟར་པ་མང་པོ་དགུང་སྔོན་སྤྲིན་དཀར་དང་གཅིག་ལ་གཅིག་རྒྱན་དུ་གནས་པ་དེ་རེད། ཆབ་མདོ་གྲོང་ཁྱེར་སྨར་ཁམས་རྫོང་འཇང་མི་རིགས་ཤང་འཇང་གྲོང་ཚོར་སྐྱོད་སྐབས་གྲོང་གསེབ་ཀྱི་མཛེས་ལྗོངས་མང་པོ་མཐོང་རྒྱུ་ཡོད།
འཇང་གྲོང་ཚོར་སྡོད་མཁན་བོད་རིགས་དང་། འཇང་རིགས། རྒྱ་རིགས། པའེ་རིགས། ཅིང་ཕོ་རིགས་སོགས་མི་རིགས་ཁག་གི་མང་ཚོགས་རྣམས་འཆམ་མཐུན་མཉམ་གནས་ངང་འཚོ་བ་སྐྱེལ་བཞིན་ཡོད།
ཉེ་བའི་ལོ་ཤས་རིང་། འཇང་གྲོང་ཚོས་དཔེ་བཟང་གཏོད་པ་དང་། སྟོབས་ཤུགས་གཅིག་སྒྲིལ། སློབ་གསོར་མཐོང་ཆེན་སོགས་ཀྱི་བྱ་ཐབས་བརྒྱུད་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་ལ་སྐུལ་འདེད་ཧུར་ཐག་བཏང་ཡོད། འཇང་གྲོང་ཚོར་སྔ་རྗེས་སུ“རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཁོངས་གཏོགས་ཀྱི་སྔོན་ཐོན་མཉམ་སྡེབ”དང་། “ཀྲུང་གོའི་མཛེས་སྡུག་ལྡན་པའི་སྤྲོ་གསེང་གྲོང་གསེབ” “བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ”“ཆབ་མདོ་གྲོང་ཁྱེར་གྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་གྲོང་ཚོ(གྲོང་ལྷན)”སོགས་ཀྱི་གཟི་བརྗིད་མཚན་སྙན་ཐོབ་ཡོད།
འཇང་གྲོང་ཚོའི་དབང་མོའི་ཁྱིམ་ནི་མི་རིགས་མཐུན་སྒྲིལ་གྱི་ཁྱིམ་ཚང་ཞིག་ཡིན་ཞིང་། ཕ་མེས་སྐབས་ནས་ད་བར་དུ་ཁོང་ཚོའི་ཁྱིམ་གྱི་མི་རབས་བཞིའི་ནང་མི་རིགས་མི་འདྲ་བ་དྲུག་ཡོད་ལ། འཇང་གྲོང་ཚོར་དེ་ལྟ་བུའི་ཁྱིམ་ཚང་མང་པོ་ཡོད། འཇང་གྲོང་ཚོའི་ཡུལ་མི་མོ་དབྱིའི་ཁྱིམ་གྱི་ནང་མི་བདུན་པོའི་ཁྲོད་བོད་རིགས་དང་། རྒྱ་རིགས། པའེ་རིགས། འཇང་རིགས། མོན་པ་རིགས་བཅས་མི་རིགས་ལྔ་ཡོད། མི་རིགས་མཐུན་སྒྲིལ་གྱི་ཁྱིམ་ཚང་འདིའི་རིགས་ལས་མི་རིགས་ཁག་གི་མང་ཚོགས་ཀྱི་གོང་བུ་འགྲིལ་ཤུགས་ཆེ་རུ་ཕྱིན་ཡོད་ལ། མི་རིགས་མཐུན་སྒྲིལ་གྱི་འདུ་ཤེས་ཀྱང་མི་སེམས་སུ་དེ་བས་གཏིང་ཟབ་ཟུག་ཡོད།
2021ལོར། འཇང་གྲོང་ཚོས་གྲོང་ཚོའི་དོན་དངོས་དང་ཟུང་འབྲེལ་གྱིས《འཇང་མི་རིགས་ཤང་འཇང་གྲོང་ཚོའི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་གྲོང་ཚོའི་ལག་བསྟར་ཇུས་གཞི》བཟོས་ནས། མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ས་ཚིགས་འཛུགས་གཏོད་ལ་ཕྱོགས་ཡོངས་ནས་སྐུལ་འདེད་བཏང་བ་དང་། ཏང་ཀྲི་པུའི་ཧྲུའུ་ཅིས་ཙུའུ་ཀྲང་གི་འགན་ཁུར་བའི་མི་རིགས་མཐུན་སྒྲིལ་ཡར་ཐོན་འཛུགས་གཏོད་འགོ་ཁྲིད་ཚོགས་ཆུང་བཙུགས་ཏེ། ཡུལ་མི་ཚང་མ་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སློབ་གསོའི་བྱེད་སྒོར་ཧུར་ཐག་ཞུགས་རྒྱུར་སློབ་གསོ་ཁྲིད་སྟོན་བྱས་ཡོད།
འཇང་གྲོང་ཚོའི་ཏང་ཀྲི་པུའི་ཧྲུའུ་ཅི་བཀྲ་ཤིས་ཀྱིས“མི་རིགས་ཀྱི་ལས་དོན་ཡག་པོ་མ་སྒྲུབ་ན་སྤྱི་ཡོངས་ཀྱི་ཇུས་གཞི་འདིང་མི་ཐུབ”ཅེས་བརྗོད་པ་དང་། ཁོང་གིས་འཇང་གྲོང་ཚོར་མི་རིགས་མཐུན་སྒྲིལ་ནི་ནམ་ཡང་འགྱུར་མེད་ཀྱི་བརྗོད་དོན་གཙོ་བོ་ཞིག་ཡིན་པས། རྒྱལ་གཅེས་རིང་ལུགས་ཀྱི་སློབ་གསོ་དང་མི་རིགས་མཐུན་སྒྲིལ་གྱི་འདུ་ཤེས་དེ་ཡུལ་མིའི་ཐོན་སྐྱེད་དང་འཚོ་བའི་ཁྲོད་ཁྱབ་ཡོད་ཅེས་བརྗོད།
“ལག་གདང་སྦྲེལ་ནས་མི་རིགས་མཐུན་སྒྲིལ་ལ་སྲུང་སྐྱོང་བྱེད། གཅིག་སེམས་གཅིག་སྦྲེལ་གྱིས་མཉམ་དུ་ཞི་མཐུན་གྱི་འཇང་གྲོང་ཚོ་སྐྲུན”ཅེས་པ་ནི་འཇང་གྲོང་ཚོའི་ཕྱུག་འགྱུར་སྣེ་ཁྲིད་པ་ཚེ་རིང་དབང་འདུས་ཀྱིས་སྔ་ཕྱི་བར་གསུམ་དུ་སེམས་ནང་བཞག་པའི་སྐད་ཆ་ཡིན་ཞིང་། མི་རིགས་ཁག་གི་མང་ཚོགས་ཕན་ཚུན་རོགས་རེས་བྱེད་པའི་ཁོར་ཡུག་བཟང་པོའི་འོག་ཚེ་རིང་དབང་འདུས་ཀྱིས་རང་འགུལ་ངང་གྲོང་ཚོར་འགྲེམས་སྟོན་ཁང་ཞིག་བསྐྲུན་ཡོད།
“འགྲེམས་སྟོན་ཁང་དེ་བསྐྲུན་དོན་ནི་ཚང་མར་མེས་རྒྱལ་ཁྱིམ་ཚང་ཆེ་མོའི་མི་རིགས་ཚང་མ་ངོ་སྤྲོད་བྱེད་པ་དང་། ཕྲུ་གུ་ཚོར‘མི་རིགས་མཐུན་སྒྲིལ’གྱི་བརྗོད་དོན་གཙོ་བོ་འདི་ཐོག་མཐའ་བར་གསུམ་དུ་བློ་ལ་བརྟན་པོར་ངེས་པར་སློབ་གསོ་བཏང་སྟེ། ཚང་མས་མི་རིགས་56ཤེས་རྟོགས་ཐུབ་ཚད་མཐོ་རུ་གཏོང་བ་དང་མི་རིགས་མཐུན་སྒྲིལ་གྱི་འདུ་ཤེས་ཟབ་ཏུ་གཏོང་ཆེད་ཡིན། དེ་དང་ཆབས་ཅིག་ཅ་དངོས་རྙིང་པ་འགྲེམས་སྟོན་བྱས་པ་བརྒྱུད་ཚང་མས་ཀྲུང་གོ་གུང་ཁྲན་ཏང་གི་འགོ་ཁྲིད་འོག་ང་ཚོའི་འཚོ་བར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་དངོས་སུ་ཚོར་ཆེད་ཡིན”ཞེས་ཚེ་རིང་དབང་འདུས་ཀྱིས་བརྗོད།
ཉི་མ་ནུབ་ཁའི་གསེར་མདོག་གི་ཉི་འོད་འོག་ཏུ། གྲོང་ཚོ་ཡོངས་རི་མོ་ལྟར་མིག་ལ་ལྷག་པར་མཛེས་ཤིང་། མི་རྣམས་བྲལ་མི་འདོད་པར་གནས་དེར་ཡིད་སེམས་རབ་ཏུ་འཕྲེང་། འདི་གར་ཡུལ་མི་ཚང་མ་ནི་མི་རིགས་མཐུན་སྒྲིལ་གྱི་ལས་ལ་ཞུགས་མཁན་ཤ་སྟག་ཡིན་ལ། ཁོང་ཚོས་དཔུང་གཤིབ་མཉམ་སྐྱོད་ཀྱིས་བདེ་སྐྱིད་དང་མཛེས་སྡུག་ལྡན་པའི་འབྱུང་འགྱུར་ཐུན་མོང་ཐོག་གཏོད་བཞིན་མཆིས།