ཉེ་ཆར། གསར་འགོད་པ་ཤན་རྩ་རྫོང་འཁྱག་ཤང་དེ་ལྷེམ་གྲོང་ཚོའི་ཆོས་དར་དང་འཆི་མེད་བཟའ་ཚོའི་ཤེལ་ཁང་དུ་སྐྱོད་སྐབས། ཆུ་ཀ་ལ་ནས་བབས་པའི་ཤག་ཤག་གི་ཆུ་སྒྲ་རྣ་བའི་བུ་གར་ལྷང་ལྷང་དུ་ཐོས་འོང་ཞིང་། འགྲམ་དུ་སྐྱོད་ནས་ལག་པ་རེག་སྐབས་ཆུ་ཚ་པོ་རེད་འདུག གསར་འགོད་པས་དགའ་ཚོར་ཆེན་པོས་སྐད་ཆ་དྲིས་པ་བརྒྱུད། ས་བབ་མཐོ་ཚད་སྨི་4860ཟིན་པའི་དེ་ལྷེམ་གྲོང་ཚོར་ཆུ་ཀ་ལ་ཁྲིད་ཟིན་པ་གཞི་ནས་རྟོགས། ས་མཐོའི་མཛེས་མཐུན་གྲོང་གསེབ་འཛུགས་སྐྲུན་བྱེད་རིང་། དེ་ལྷེམ་གྲོང་ཚོའི་དུད་ཚང་55ཚང་མར་ཆུ་ཀ་ལ་ཁྲིད་པས། ཡུལ་དེའི་འབྲོག་པ་མང་ཚོགས་དབྱར་དགུན་རིང་ཆུ་ཟོམ་ཁྱེར་ནས་ཆུ་ལེན་པར་འགྲོ་བའི་ལོ་རྒྱུས་མཇུག་འགྲིལ་ཡོད།

གྲོང་ཁྱེར་གྱི་མི་རྣམས་ཀྱི་ངོས་ནས་བརྗོད་ན། ཁྱིམ་དུ་ཆུ་ཀ་ལ་ཁྲིད་པར་ཧ་ལས་ཧང་སངས་བྱེད་དགོས་དོན་མེད་མོད། འོན་ཀྱང་། ས་བབ་ཆེས་མཐོ་བའི་ས་ཁུལ་དུ་རང་བྱུང་ཆ་རྐྱེན་ཧ་ཅང་ཞན་པས་བྱེ་རླུང་གང་སར་འཚུབ་པ་དང་དུས་བཞིར་སྲིང་བལ་གྱོན་ཆས་གྱོན་དགོས་པའི་ཆ་སྙོམས་ས་བབ་མཐོ་ཚད་སྨི་4700ཟིན་པའི་བྱང་རྩྭ་ཐང་གི་ངོས་ནས་བརྗོད་ན་དེ་ནི་ཧ་ཅང་སྒྲུབ་དཀའ་བའི་བྱ་བ་ཞིག་ཡིན་པ་སྨོས་ཅི་དགོས། འཁྱག་ཤང་གི་ཤང་ཀྲང་བདེ་སྐྱིད་ཆོས་འཛོམས་ཀྱིས། “ཆུ་ཀ་ལ་ཆུང་ཆུང་ཞིག་ལས་འཐུང་ཆུ་དཀོན་པའི་གནད་དོན་ཐག་གཅོད་ཐུབ་པས། ང་ཚོ་འབྲོག་པ་མང་ཚོགས་ལོ་མང་པོ་ཆུ་ཟོམ་ཁྱེར་ནས་ཆུ་ལེན་པར་འགྲོ་བའི་ལོ་རྒྱུས་མཇུག་འགྲིལ་ཡོད”ཅེས་བརྗོད།

ཆོས་དར་གྱིས་ཕྱིར་དྲན་བྱེད་བཞིན་དུ། དེ་ལྷེམ་གྲོང་ཚོའི་ཡུལ་མིའི་འཚོ་བའི་འཐུང་ཆུ་ལེན་སྟངས་ལ་འགྱུར་ལྡོག་ཆེན་པོ་ཐེངས་བཞི་བྱུང་བ་སྟེ། 2006ལོའི་གོང་དུ་གྲོང་ཚོའི་མདུན་གྱི་གཙང་པོ་ནས་ཆུ་ལེན་པར་འགྲོ་དགོས་པས། ཆུ་ཐེངས་གཅིག་ལེན་པར་རྐང་ཐང་མར་ཆུ་ཚོད་གཅིག་ཙམ་འགོར་བ་དང་། ཉིན་གཅིག་ལ་མ་མཐར་ཡང་ཆུ་ལེན་པར་ཐེངས་གཉིས་ཙམ་འགྲོ་དགོས། 2006ལོར་གྲོང་ཚོར་ཁྲོན་པ་གསུམ་དྲུས་པས་ཆུ་ཟོམ་ཁྱེར་ཏེ་ཁྲོན་པ་ནས་ཆུ་ལེན་དགོས་པ་མ་ཟད། དགུན་ཁ་ཁྲོན་པར་འཁྱགས་པ་ཐེབས་ཏེ་ཆུ་ལེན་ཁག་པོ་ཡོད། 2019ལོར་འོད་ཤུགས་གློག་གཏོང་གི་འཕྲུལ་ཁྲོན་སྤྱོད་འགོ་ཚུགས་པས་ཆུ་ལེན་བདེ་རུ་སོང་མོད། འོན་ཀྱང་། འཕྲུལ་ཁྲོན་ནས་ཁྱིམ་བར་ཉིན་གཅིག་ལ་ཐེངས་ཁ་ཤས་འགྲོ་དགོས་ཀྱི་ཡོད། 2022ལོར་མཛེས་མཐུན་གྲོང་གསེབ་བསྐྲུན་པས། ཐག་རིང་དུ་ཆུ་ལེན་པར་འགྲོ་དགོས་མེད། ཁོང་གིས། “ཆུ་ཟོམ་ཁྱེར་ཏེ་གཙང་པོ་ནས་ཆུ་ལེན་པར་འགྲོ་བའི་དཀའ་ཚེགས་ཆེ་བའི་ལོ་ཟླ་བརྒྱུད་མྱོང་སྟབས། ཆུ་ཀ་ལ་ཁྲིད་རྗེས་ཀྱི་དེང་གི་འཚོ་བ་སྐྱིད་པོ་ཡིན་པ་ཚོར་གྱི་འདུག”ཅེས་བརྗོད།

སྔར་ནས་བཟུང་། ཏང་ཀྲུང་དབྱང་གིས་བོད་ཀྱི་མི་རིགས་ཁག་གི་མི་དམངས་ལ་ཐུགས་ཁུར་ཟབ་མོ་གནང་བ་དང་དམངས་འཚོ་ལེགས་སུ་གཏོང་རྒྱུ་དེ་རིམ་ཁག་ཏང་ཨུད་དང་སྲིད་གཞུང་གི་ལས་དོན་གྱི་གལ་ཆེའི་ནང་གི་འགངས་ཆེར་བརྩི་ཡི་ཡོད། ཆུ་ཐིགས་གཅིག་ལས་ཉི་མའི་འོད་ཟེར་ལྟ་བུའི་ཏང་གི་སྲིད་བཟང་གི་བཀའ་དྲིན་ཚོར་ཐུབ་ཅིང་། བོད་ཀྱི་ཞིང་འབྲོག་མང་ཚོགས་ཀྱི་ཐོན་སྐྱེད་དང་འཚོ་བའི་ལོ་རྒྱུས་རང་བཞིན་གྱི་འགྱུར་ལྡོག་དག་ཟས་གོས་འགྲོ་སྡོད་གང་ས་ནས་མངོན་ཐུབ།

“ཁྱིམ་ཚང་གི་གཙང་སྦྲ་ལེགས་སུ་ཕྱིན་པ་དང་། འཚོ་བའི་འཐུང་ཆུ་དེ་བས་གཙང་བ། ཁྱིམ་ཚང་གི་ངལ་རྩོལ་ཁུར་པོ་ཡང་དུ་ཕྱིན་པ་ལ་སོགས”འཁྱག་ཤང་ཏང་ཨུད་ཀྱི་ཧྲུའུ་ཅི་ལི་ཀྲེན་ཁུན་གྱིས་ཁྱིམ་ཚང་དུ་ཆུ་ཀ་ལ་ཁྲིད་རྗེས་ཀྱི་འགྱུར་ལྡོག་སྐོར་གླེང་། ཆོས་དར་གྱིས་ཧྲུའུ་ཅིའི་སྐད་ཆའི་འཕྲོ་མཐུད་ནས“ངལ་རྩོལ་ནུས་ཤུགས་ལ་བཅིངས་འགྲོལ་ཐོབ་སྟབས་ང་ཚོའི་ཡོང་འབབ་ཀྱང་མང་དུ་ཕྱིན་སོང་། 2017ལོར་གྲོང་ཚོའི་མཉམ་ལས་ཁང་ནས་དུད་ཚང་སོ་སོར་ཆ་སྙོམས་སྒོར་7000ལྷག་ཙམ་བགོ་འགྲེམས་རག་ཡོད། འོན་ཀྱང་ད་ལྟ་དུད་ཚང་རེར་ཆ་སྙོམས་སྒོར་15000ལྷག་ཙམ་རག་གི་འདུག”ཅེས་བཤད། མཇུག་ཏུ་ཆོས་དར་གྱིས། “ད་ལྟའི་འཚོ་བ་སྐྱིད་པོ་འདི་འདྲ་རྨི་ལམ་དུའང་འཁོར་མ་མྱོང་། འདི་ནི་ཏང་དང་སྲིད་གཞུང་གི་ཐུགས་ཁུར་རོགས་རམ་དང་ཁ་འབྲལ་ཐབས་མེད”ཅེས་བརྗོད།

གསར་འགོད་པས་བཅར་འདྲི་བྱེད་རིང་རྒྱུས་ལོན་བྱས་པ་ལྟར་ན། མིག་སྔར་ཤན་རྩ་རྫོང་གི་གྲོང་ཚོ་7ཙམ་ལ་ཆུ་ཀ་ལ་ཁྲིད་ཟིན་པ་དང་གྲོང་ཚོ་3ལ་ཆུ་ཀ་ལ་འཁྲིད་བཞིན་པའི་སྒང་རེད།