འདི་ལོ་ཚུན། རང་ལྗོངས་ཀྱི་དངུལ་ཁང་ལས་རིགས་ཀྱི་དངུལ་རྩའི་སྒྲིག་གཞི་ཁག་གིས་རང་འགུལ་ངང་བྱ་སྤྱོད་སྤེལ་བ་དང་གནད་སྨིན་ཇུས་བསྟར་བྱས་ནས་ཡིད་རྟོན་དངུལ་བུན་གཏོང་ཤུགས་རྒྱུན་ཆད་མེད་པར་ཆེ་རུ་བཏང་བས། ཟླ་10པའི་ཟླ་མཇུག་བར། རང་ལྗོངས་སུ་མི་དམངས་ཤོག་སྒོར་གྱི་དངུལ་བུན་ལྷག་གྲངས་སྒོར་དུང་ཕྱུར་6663.93ཟིན་པ་དེ་དུས་མཚུངས་ལས་11.90%འཕར་ཏེ་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད།

ངོ་སྤྲོད་བྱས་པར་གཞིགས་ན། ལོ་གོང་མའི་དུས་མཚུངས་དང་བསྡུར་ན་རང་ལྗོངས་ཀྱི་དངུལ་རྩའི་ཡིད་རྟོན་དངུལ་བུན་ལ་རྒྱབ་སྐྱོར་བྱེད་ཤུགས་ཆུང་དུ་ཕྱིན་མེད་པ་དང་གཙོ་གནད་ཁྱབ་ཁོངས་ཀྱི་ཞབས་ཞུ་རྒྱུན་མཐུད་ལེགས་སུ་ཕྱིན་པ་མ་ཟད་ལྷག་པར་དུ་དུས་ཡུན་རིང་འབྲིང་གི་དངུལ་བུན་དང་། ཕྲན་ཚེགས་ཁེ་ལས་ཀྱི་དངུལ་བུན། མི་སྒེར་གྱི་འཛད་སྤྱོད་དངུལ་བུན་བཅས་ཕྱོགས་གསུམ་ཐད་གྲུབ་འབྲས་མངོན་གསལ་དོད་པོ་ཐོབ་ཡོད།

དུས་ཡུན་རིང་འབྲིང་གི་ཡིད་རྟོན་དངུལ་བུན་གཏོང་ཚད་མགྱོགས་མྱུར་འཕར་བ་དང་རྨང་གཞིའི་འཛུགས་སྐྲུན་ཁྱབ་ཁོངས་སུ་མ་དངུལ་གྱིས་རྒྱབ་སྐྱོར་འདང་ངེས་བྱས་ཡོད། ཟླ་10པའི་ཟླ་མཇུག་བར། རང་ལྗོངས་ཀྱི་མི་སྒེར་དང་དངུལ་རྩ་མིན་པའི་ཁེ་ལས་ཆེ་ཁག་གཉིས་ཀྱི་དངུལ་བུན་ཁྲོད་ཀྱི་དུས་ཡུན་རིང་འབྲིང་གི་དངུལ་བུན་ལྷག་གྲངས་སྒོར་དུང་ཕྱུར་5484.31ཟིན་པ་དེ་དུས་མཚུངས་ལས་11.33%འཕར་བ་དག་གཙོ་བོ་གློག་ཤུགས་དང་། ཚ་ཤུགས། སོལ་རླངས། འགྲིམ་འགྲུལ་སྐྱེལ་འདྲེན། བཀར་འཇུག་དང་སྦྲག་སྲིད་ལས་རིགས། ས་ཁང་བདག་ཁོངས་ཐོན་ལས་སོགས་ལ་བཏང་བས་གལ་ཆེའི་རྣམ་གྲངས་དང་རྨང་གཞིའི་སྒྲིག་བཀོད་འཛུགས་སྐྲུན་ཁྱབ་ཁོངས་ཐད་མ་དངུལ་གྱི་རྒྱབ་སྐྱོར་བརྟན་པོ་དང་རྒྱུན་མཐུད་ཐུབ་ནས། རང་ལྗོངས་ཀྱི་གཤམ་འོག་ཐོན་ལས་འཕེལ་རྒྱས་འགྲོ་བར་སྣེ་ཁྲིད་ནུས་ལྡན་ཐུབ་ཡོད།

དེ་དང་ཆབས་ཅིག འདི་ལོ་ཚུན་མི་དམངས་དངུལ་ཁང་བོད་རང་སྐྱོང་ལྗོངས་ཡན་ལག་དངུལ་ཁང་གིས་སྲིད་ཇུས་ཀྱི་སྟོན་ཕྱོགས་མངོན་པར་བྱས་ཏེ། ཕྲན་ཚེགས་ཁེ་ལས་ལ་ཕན་པ་ཐོབ་པ་བྱ་རྒྱུ་དེ་ཡིད་རྟོན་དངུལ་བུན་གྱི་རྒྱབ་སྐྱོར་ཁྱབ་ཁོངས་གཙོ་བོར་བརྩིས་ནས་དངུལ་རྩའི་ཞབས་ཞུའི་ཁྱབ་རྒྱ་དང་ཞབས་ཞུའི་ཆུ་ཚད་རྒྱུན་ཆད་མེད་པར་མཐོ་རུ་བཏང་བས། ཟླ་བཅུ་པའི་ཟླ་མཇུག་བར། རང་ལྗོངས་ཀྱི་ཕྲན་ཚེགས་ཁེ་ལས་ཀྱི་དངུལ་བུན་ལྷག་གྲངས་སྒོར་དུང་ཕྱུར་1498.66ཟིན་པ་དེ་དུས་མཚུངས་ལས་30.56%འཕར་ཡོད།