ཟླ་12ཚེས་2ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“རྒྱུད་གཅིག་ལམ་གཅིག”འཛུགས་སྐྲུན་ལས་དོན་གྱི་བཞུགས་མོལ་ཚོགས་འདུ་ཐེངས་བཞི་པའི་ཐོག་གསུང་བཤད་གལ་ཆེན་གནང་རྗེས། གངས་ལྗོངས་ས་མཐོར་མགྱོགས་མྱུར་ཚུར་སྣང་ལན་ཆ་ཆེན་པོ་བྱུང་བ་དང་སློབ་སྦྱོང་གི་ཚ་རླབས་འཕྱུར་ཡོད། རང་ལྗོངས་ཀྱི་རྒྱ་ཆེའི་ལས་བྱེད་པ་དང་མང་ཚོགས་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ནང་བོད་ཀྱིས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་དང་མཉམ་འདྲེས་བྱེད་པར་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད་ཅེས་བཤད།

བོད་ནི་རང་རྒྱལ་གྱིས་ཨེ་ཤེ་ཡ་ལྷོ་མ་ཕྱོགས་ནས་སྒོ་མོ་འབྱེད་པའི་བགྲོད་ལམ་གལ་ཆེན་ཞིག་ཡིན་ལ། “རྒྱུད་གཅིག་ལམ་གཅིག”འཛུགས་སྐྲུན་དེ་ནེ་པ་ལ་སོགས་མཐའ་འཁོར་རྒྱལ་ཁབ་ལ་ཕྱོགས་པའི་འགག་གནད་གལ་ཆེན་ཞིག་ཀྱང་རེད། ཉེ་བའི་ལོ་ཤས་རིང་། རང་ལྗོངས་ཀྱིས་ཕན་ཚུན་སྦྲེལ་མཐུད་ཀྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་སྟེ་ལྷ་ས་གོང་དཀར་རྒྱལ་སྤྱིའི་གནམ་ཐང་གི་གནམ་ཐང་འབབ་ཚུགས་གསར་པ་སྤྱོད་འགོ་ཚུགས་པ་དང་། ལྷ་ས་ནས་ཀ་ཏ་མན་རྡུ་བར་གྱི་མཁའ་ལམ་སླར་གསོ་ཤར་གཏོང་ཐུབ་པ། ཧི་མ་ལ་ཡ་བརྒལ་བའི“མཁའ་ལམ་བར་ཁྱམས”འཛུགས་སྐྲུན་ཟམ་མི་ཆད་པར་འཐུས་སྒོ་ཚང་དུ་ཕྱིན་ཡོད། འགྲམ་དང་། སྐྱིད་གྲོང་། སྤུ་ཧྲེང་། ལེགས་རྩེ་བཅས་འགག་སྒོར་འགྲུལ་སྐྱེལ་དང་ཟོག་འདྲེན་གཉིས་ཀ་ཤར་གཏོང་ཐུབ་ནས་འགག་སྒོའི་འཕེལ་རྒྱས་བཀོད་པ་སྔར་བས་ལེགས་སུ་ཕྱིན་ཡོད།

གཞིས་རྩེ་གྲོང་ཁྱེར་རྒྱལ་རྩེའི་སྣམ་བུ་2024ལོའི་ཧྥ་རན་སེ་ཕ་རི་སི་དར་སྲོལ་ཁྱིམ་མཁོའི་ཇུས་འགོད་འགྲེམས་སྟོན་ཐོག་སྟོན་པ་དང་། 2024ACEཨེ་ཤེ་ཡའི་བཟའ་བཏུང་འགྲེམས་སྟོན་དང་ཨེ་ཤེ་ཡའི་གཡོས་སྦྱོར་འགྲན་བསྡུར་ཆེ་མོར“བང་ཕིག”ལ“ཨེ་ཤེ་ཡའི་གསེར་གྱི་རྟགས་མ”ཐོབ་ཡོད། བོད་ཀྱི་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་མུ་མཐུད་གཏིང་ཟབ་ཏུ་ཕྱིན་པར་བརྟེན་གཞིས་རྩེའི་ཞིང་ལས་ཀྱི་དམིགས་བསལ་ཐོན་རྫས་དེ་བས་མང་བ་རྒྱལ་སྤྱིའི་གར་སྟེགས་སུ་སྐྱོད་བཞིན་ཡོད། གཞིས་རྩེ་གྲོང་ཁྱེར་ཞིང་ལས་དང་གྲོང་གསེབ་ཅུས་ཀྱི་ཏང་ཙུའི་ཁོངས་མི་དང་ཅུས་ཀྲང་གཞོན་པ་ཡུས་ཀྲི་ཀང་གིས། གོམ་སྟབས་རྗེས་མར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“རྒྱུད་གཅིག་ལམ་གཅིག”འཛུགས་སྐྲུན་ལས་དོན་གྱི་བཞུགས་མོལ་ཚོགས་འདུ་ཐེངས་བཞི་པའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ་ས་གནས་དེ་གའི་ཞིང་འབྲོག་ལས་ཀྱི་ཐོན་ཁུངས་ལེགས་ཆར་གཞི་ཚུགས་ནས་ཞིང་ལས་དང་གྲོང་གསེབ་ལས་དོན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་གི་ཡིན་ལ། གམ་པའི་ལུག་དང་ནས་སོགས་ཞིང་ལས་ཁྱད་ལྡན་ཐོན་རྫས“ཕྱིར་གཏོང”ལ་རམ་འདེགས་ཧུར་ཐག་བྱ་རྒྱུ་དང་ཆབས་ཅིག་ནེ་པ་ལ་དང་མཉམ་ལས་སྤེལ་རེས་ལ་ཤུགས་སྣོན་བརྒྱབ་ནས“ནེ་པ་ལའི་གཟན་རྩྭ་བོད་དུ་དབོར་འདྲེན”གྱི་བྱ་སྤྱོད་དང་ནེ་པ་ལའི་ཁྱད་ལྡན་ཐོན་རྫས་འགྲེམས་ཚོང་སོགས་ལ་སྐུལ་འདེད་བཏང་སྟེ“རྒྱུད་གཅིག་ལམ་གཅིག”མཉམ་སྐྲུན་བྱེད་རིང་གཞིས་རྩེའི་ཁྱད་ལྡན་ཐོན་ལས་ཀྱི་ལེགས་ཆ་མངོན་པར་བྱེད་ཀྱི་ཡིན་ཞེས་བཤད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས‘རྒྱུད་གཅིག་ལམ་གཅིག’འཛུགས་སྐྲུན་ལས་དོན་གྱི་བཞུགས་མོལ་ཚོགས་འདུ་ཐེངས་བཞི་པའི་ཐོག་གནང་བའི་གསུང་བཤད་ལ་འཐབ་ཇུས་ཀྱི་སྣེ་ཁྲིད་རང་བཞིན་ཆེན་པོ་ལྡན་པས་ང་ཚོར་རྗེས་མཐུད་ཀྱི་འབྲེལ་ཡོད་ལས་དོན་སྤེལ་རྒྱུར་ཁ་ཕྱོགས་གསལ་པོ་བཏོན་ཡོད”ཅེས་སྤུ་ཧྲེང་རྒྱལ་མཚམས་འཛུལ་སྒྲོལ་མཐའ་མཚམས་ཞིབ་བཤེར་ས་ཚིགས་མཐའ་མཚམས་ཞིབ་བཤེར་ཁྲུའུ་ཡི་ཁྲུའུ་ཀྲང་གཞོན་པ་ཐང་ཡུང་ལེང་གིས་བཤད།

བོད་ལྗོངས་ཁྲེང་ཧྥ་ལན་ཧྭ་ཀྲེ་པའོ་རིག་གནས་འཕེལ་རྒྱས་ཚད་ཡོད་ཀུང་སི་ནི་རང་ལྗོངས་ཀྱི་དཀར་ཡོལ་བསམ་བཀོད་དང་ཚན་རྩལ་རྣམ་པའི་ཐོན་སྐྱེད་ཁེ་ལས་ཤིག་ཡིན་པ་དེས་འཛམ་གླིང་ཐོག་གི་ཆེས་དཔེ་གསར་དང་ཆེས་སྤུས་ལེགས་ཀྱི་དཀར་ཡོལ་ཏེ། འབྲི་གཡག་གི་རུས་པའི་དཀར་ཡོལ་ཞིབ་བཟོ་བྱས་ཏེ་གཙོ་བོ་ཐུར་ཁེ་དང་། ཨེ་ཅིབ། ཧན་གོ་སོགས་རྒྱལ་ཁབ་ལ་ཕྱིར་གཏོང་བྱེད་ཀྱི་ཡོད། འདི་ལོའི་ཟླ་དང་པོ་ནས་བཅུ་གཅིག་པའི་བར་ཀོང་ཀྲོའུ་ཚོང་འདུས་དང་ཕྱིར་གཏོང་ནང་འདྲེན་གྱི་དངོས་མང་སྟོན་ཚོགས་སོགས་ནས་ཕྱིར་ཚོང་བྱས་པར་བརྟེན་ཕྱིར་གཏོང་ཡོང་འབབ་ཨ་སྒོར་ཁྲི་237བྱུང་ཡོད།

ལྷ་སའི་དཔལ་འབྱོར་གསར་སྤེལ་ཁུལ་དུ་ཡོད་པའི་ལྷ་སའི་ཕྱོགས་བསྡུས་སྒོ་ཁྲལ་མེད་ཁུལ་ནི“རྒྱུད་གཅིག་ལམ་གཅིག”“བྷང་ག་ལ་དང་། ཀྲུང་གོ རྒྱ་གར། འབར་མ་བཅས་ཀྱི་དཔལ་འབྱོར་བར་ཁྱམས”དང་སྦྲེལ་མཐུད་བྱེད་པའི་བོད་ཀྱི་གཞི་རྟེན་གལ་ཆེན་ཞིག་རེད། དུས་ཚིགས་དང་པོ་ནས་གསུམ་པའི་བར་ལྷ་སའི་དཔལ་འབྱོར་གསར་སྤེལ་ཁུལ་དང་དེ་བཞིན་ཕྱོགས་བསྡུས་སྒོ་ཁྲལ་མེད་ཁུལ་དུ་རིམ་རྩིས་བྱས་ན་ཕྱིར་གཏོང་ནང་འདྲེན་གྱི་དངུལ་འབོར་སྒོར་དུང་ཕྱུར་33.21བྱུང་བ་དེས་རང་ལྗོངས་ཀྱི་ཕྱི་ཕྱོགས་ཚོང་དོན་རིན་ཐང་བསྡོམས་འབོར་གྱི་40%བཟུང་ནས་བོད་ཀྱི་ཕྱི་ཕྱོགས་ཚོང་དོན་འཕེལ་རྒྱས་ལ་འདེགས་སྐྱོར་ནུས་ལྡན་བྱས་ཡོད། 2024ལོའི་ཟླ་1ཚེས་10ཉིན་ནས་བཟུང་། བོད་ལྗོངས་ཤུས་ཏ་ཐུང་ཚོང་དོན་ཚད་ཡོད་ཀུང་སིས་ནེ་པ་ལར་ཕྱིར་གཏོང་བྱས་པའི་ནུས་རྒྱུ་གསར་པའི་རླངས་འཁོར་ལྷ་སའི་ཕྱོགས་བསྡུས་སྒོ་ཁྲལ་མེད་ཁུལ་གྱི་མཛོད་ཁང་དུ་གཅིག་རྗེས་གཉིས་མཐུད་ངང་མཛོད་བཅུག་བྱས་ཡོད། “ནུས་རྒྱུ་གསར་པའི་འཇིབ་ཆུང་300ཡོད་པ་དང‘སྤ་སེ་གཅིག་ལ་རླངས་འཁོར་མང་བའི’སྒོ་ཁྲལ་སྙན་ཞུའི་རྣམ་པར་བརྟེན་ནས་རིམ་གྱིས་སྒོ་ཁྲལ་མེད་ཁུལ་དུ་བཞག་ཡོད། ཕྱིས་སུ་འདྲུད་འཁོར་ལ་བརྟེན་ནས་འགྲམ་འགག་སྒོར་དབོར་རྒྱུ་དང་དེ་ནས་ཐད་ཀར་ནེ་པ་ལར་དབོར་རྒྱུ་ཡིན་པས་འགག་སྒོ་སྒྲོལ་བའི་ལྷུ་ཚིགས་ཉུང་དུ་འགྲོ་རྒྱུ་རེད”ཅེས་ལྷ་སའི་དཔལ་འབྱོར་གསར་སྤེལ་ཁུལ་ཏང་ལས་དོན་ཨུ་ལྷན་གྱི་ཨུ་ཡོན་དང་ལྷ་ས་ཕྱོགས་བསྡུས་སྒོ་ཁྲལ་མེད་ཁུལ་དོ་དམ་ཨུ་ལྷན་གྱི་ཀྲུའུ་རེན་ཏའེ་ཧྥུང་ཞ་ཡིས་བཤད།