འདི་ནི་ལོ་སིའི་བྱང་རྒྱུད་དུ་སྐྱོད་པའི་ཀྲུང་གོ་དང་ལོ་སིའི་ཤུགས་འགྲེམས་མེ་འཁོར“རྫ་ཆུ་རྟགས་ཅན”ཡིན་པ།

ཟླ་12ཚེས་3ཉིན། ཀྲུང་གོའི་ཁུན་མིང་ནས་ལོ་སིའི་རྒྱལ་ས་ཝན་ཐེན་བར་གྱི་ཀྲུང་ལོའི་མེ་འཁོར་ལས་གཉེར་བྱས་ནས་ལོ་གསུམ་འཁོར་གྱི་ཡོད། ལོ་གསུམ་རིང་། ཀྲུང་གོ་དང་ལོ་སིའི་ལྕགས་ལམ་སྐྱེལ་འདྲེན་ནུས་པ་ཟམ་མི་ཆད་པར་ཆེ་རུ་ཕྱིན་ནས་ཐེ་ལན་དང་། ཁན་ཕུ་ཁྲེ། མ་ལེ་ཞི་ཡ་སོགས་ཨེ་ཤེ་ཡ་ཤར་ལྷོའི་རྒྱལ་ཁབ་མང་པོར་ཁྱབ་འགྱེད་ཐུབ་སྟེ། ས་ཁོངས་ཕན་ཚུན་སྦྲེལ་མཐུད་ཀྱི་ཆུ་ཚད་རྒྱུན་ཆད་མེད་པར་ཆེ་རུ་ཕྱིན་ནས་ཕྱི་ནང་འབྲེལ་བ་དང་། མཐའ་འཁོར་ཁྱབ་འགྱེད། ཕན་ཚུན་གསབ་རེས། བདེ་འཇགས་ནུས་ཆེ་བཅས་ལྡན་པའི“རྫོགས་ལྡན་བགྲོད་ལམ་ཆེན་པོ”ཞིག་ཆགས་ཡོད།

ལོ་སིའི་དེང་རབས་ཅན་གྱི་ལྕགས་ལམ་དང་པོ་སྟེ། ཀྲུང་ལོའི་མེ་འཁོར་གཏོང་འགོ་ཚུགས་པ་དེས་ལོ་སི་བའི་འགྲིམ་འགྲུལ་ལ་འགྱུར་ལྡོག་བྱུང་བ་མ་ཟད། རྒྱལ་སྤྱིའི་འགྲུལ་པ་ཕྱིར་སྐྱོད་པའི་གདམ་ག་གསར་པ་ཞིག་ཏུའང་གྱུར་ཡོད། མེ་འཁོར་ཤར་གཏོང་ཐུབ་ནས་ལོ་3སོང་རིང་། ཀྲུང་ལོའི་ལྕགས་ལམ་གྱི་ལོ་སིའི་དུས་བུས་དེ་སྔ་ཉིན་རེར་ཆ་སྙོམས་འགྲུལ་སྐྱེལ་མེ་འཁོར་4གཏོང་བ་ནས་ད་ཆ་14བར་མང་དུ་བཏང་བས། ཉིན་རེར་འགྲུལ་པ་དབོར་ཚད་མི་ཐེངས་1000ལྷག་ཙམ་ནས་མི་ཐེངས་ཁྲི་1.5བར་འཕར་ཡོད། ལོ་སི་གསར་འགྱུར་རིག་གནས་དང་ཡུལ་སྐོར་སྡེ་ཚན་གྱིས་ཁྱབ་བསྒྲགས་བྱས་པའི་གྲངས་གཞི་ལས་མངོན་པ་ལྟར་ན། ཝན་ཐེན་ནས་ལང་པོ་ལ་མངའ་སྡེར་སྐྱོད་མཁན་འགྲུལ་པ་85%མེ་འཁོར་ལ་སྡོད་ཀྱི་ཡོད།

གྲངས་གཞི་ལས་མངོན་པར། འདི་ལོའི་ཟླ་11ཚེས་30ཉིན་བར། རིམ་རྩིས་བརྒྱབ་ན་ཀྲུང་ལོའི་མེ་འཁོར་ནས་འགྲུལ་པ་མི་ཐེངས་ཁྲི་4292དབོར་བ་དང་། ལོ་སིའི་དུམ་བུར་རིམ་རྩིས་བརྒྱབ་ན་འགྲུལ་པ་མི་ཐེངས་ཁྲི་741.76དང་དངོས་ཟོག་ཏུན་ཁྲི་1074.41དབོར་བ་དང་། ས་ཁོངས་སྒྲོལ་བའི་དངོས་ཟོག་ཀྱང་དེ་སྔ་འགྱིག་དང་། རྫས་ལུད། བརྒྱ་ཟོག་སོགས་སྣེ་ཁ་10ལྷག་ཙམ་ལས་མེད་པ་ནས་ད་ཆ་གློག་ཆས་དང་། འོད་ཤུགས། འཕྲིན་གཏོང་། རླངས་འཁོར་སོགས་སྣེ་ཁ་2700ལྷག་ཙམ་བར་འཕར་ནས་ལྕགས་ལམ་རྒྱུད་ཀྱི་ཐོན་ལས་སྣ་ཚོགས་ནུས་སྐྱེད་རིམ་སྤོར་དང་རྒྱལ་སྤྱིའི་དཔལ་འབྱོར་ཚོང་དོན་འགྲོ་འོང་བྱ་བར་སྐུལ་མ་ནུས་ལྡན་ཐེབས་པ་མངོན་ཡོད།

ལོ་ཀྲུང་ལྕགས་ལམ་ཚད་ཡོད་ཀུང་སིའི་གྲངས་གཞི་ལས། 2026ལོའི་ལོ་མཇུག་ཏུ་སླེབས་སྐབས། ཀྲུང་ལོའི་ལྕགས་ལམ་གྱི་ཝན་ཐེན་སྐྱེལ་འདྲེན་དོ་དམ་ལྟེ་གནས་སུ་རྒྱལ་ཁོངས་ལོ་སིའི་ལས་མིའི་བསྡུར་ཚད་80%ཟིན་པ་བྱ་རྒྱུ་དང་། ལང་པོ་ལ་མངའ་སྡེའི་ཉམས་བཟོ་ལྟེ་གནས་སུ་རྒྱལ་ཁོངས་ལོ་སིའི་ལས་མིའི་བསྡུར་ཚད་45%ནས་65%བར་འཕར་ནས་ཀྲུང་ལོའི་ལྕགས་ལམ་གྱིས་མི་ཁྲི་10ལྷག་ཙམ་ལ་ལས་ཞུགས་ཀྱི་གོ་སྐབས་གཏོད་རྒྱུ་ཡིན་པ་མངོན་ཡོད།

ལོ་གསུམ་རིང་། ཀྲུང་ལོའི་རྒྱལ་སྤྱིའི་དངོས་ཟོག་སྐྱེལ་འདྲེན་མེ་འཁོར་གཏོང་ཐེངས་ཁྲི་1.5ལྷག་ཙམ་དང་། ས་ཁོངས་བསྒྲལ་ནས་དངོས་ཟོག་དབོར་འབོར་ཏུན་ཁྲི་1060 དངོས་ཟོག་གི་རིན་ཐང་མི་དམངས་ཤོག་སྒོར་དུང་ཕྱུར་440ལྷག་ཙམ་བཅས་ཟིན་ཡོད།

ལོ་ཀྲུང་མེ་འཁོར་ཚད་ཡོད་ཀུང་སིའི་དངོས་ཟོག་སྐྱེལ་འདྲེན་གྱི་འགན་འཁུར་མཁན་ཏེང་ཡུས་ཀྱིས། ལྕགས་ལམ་འདི་བརྒྱུད་ནས་དབོར་བའི་ཀྲུང་གོའི་དངོས་ཟོག་ལོ་སི་ནས་ཐེ་ལན་དང་། ཝེ་ཐེ་ནམ། འབར་མ་སོགས་ཤར་ལྷོ་མནའ་འབྲེལ་རྒྱལ་ཁབ་ལ་དབོར་བ་དང་། ལོ་སི་ནས་ཀྲུང་གོར་དབོར་བའི་དངོས་ཟོག་ཀྲུང་གོའི་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་25ལ་འབྱོར་གྱི་ཡོད་ཅེས་ངོ་སྤྲོད་བྱས།