འདི་ལོའི་ཟླ་12ཚེས་4ཉིན་ནི་རྒྱལ་ཁབ་ཀྱི་རྩ་ཁྲིམས་ཉིན་མོ་ཐེངས་བཅུ་གཅིག་པ་རེད། ཚེས་2ཉིན“རྩ་ཁྲིམས་ཀྱི་སྙིང་སྟོབས་དར་སྤེལ་ཤུགས་ཆེན་བཏང་སྟེ། ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་རྒྱུར་སྐུལ་འདེད་གཏོང་དགོས”ཞེས་པ་བརྗོད་དོན་གཙོ་བོར་བྱས་པའི་2024ལོའི་བོད་རང་སྐྱོང་ལྗོངས་ཀྱི“རྩ་ཁྲིམས་དྲིལ་བསྒྲགས་གཟའ་འཁོར”གྱི་འགོ་ཚུགས་མཛད་སྒོ་ལྷ་སར་འཚོགས་པ་རེད།

ཉེ་བའི་ལོ་ཤས་རིང་། བོད་རང་སྐྱོང་ལྗོངས་ཏང་ཨུད་ཀྱིས“དོན་ཆེན་བཞི”དང“འཛུགས་གཏོད་བཞིར”ཞབས་ཞུ་དང་འགན་ལེན་གྱི་འཐབ་ཇུས་མཐོ་ཚད་ནས་ཁྲིམས་སྐྱོང་གི་གནས་ཐིག་གཏན་འཁེལ་བྱེད་པ་དང་། ཁྲིམས་སྐྱོང་བྱེད་སྟངས་བཀོད་སྒྲིག་བྱེད་པ། ཁྲིམས་སྐྱོང་ལ་སྐུལ་འདེད་གཏོང་བ། ཁྲིམས་སྐྱོང་ལག་ལེན་ནན་ཏན་བསྟར་བ་བཅས་ཐོག་མཐའ་བར་གསུམ་དུ་མཐའ་འཁྱོངས་བྱས་པའི་ཁར། རྩ་ཁྲིམས་ཀྱི་ལ་རྒྱ་དང་དབང་གྲགས་ལ་སྲུང་སྐྱོང་མཐའ་གཅིག་ཏུ་བྱེད་པ་དང་། ཁྲིམས་སྐྱོང་བོད་ལྗོངས་འཛུགས་སྐྲུན་ལ་ཚད་མཐོའི་མཐོང་ཆེན་བྱེད་པ། ཁྲིམས་སྐྱོང་སྲིད་གཞུང་དང་ཁྲིམས་སྐྱོང་སྤྱི་ཚོགས་འཛུགས་སྐྲུན་ལ་སྐུལ་འདེད་གཏིང་ཟབ་གཏོང་བ་བཅས་བྱས་པས། ཁྲིམས་ལྟར་བཅོས་སྐྱོང་བྱེད་པའི་ནུས་པ་ཟམ་མི་ཆད་པར་ཆེ་རུ་ཕྱིན་པ་མ་ཟད། སྤྱི་ཚོགས་ཡོངས་ཀྱི་ཁྲིམས་སྐྱོང་འདུ་ཤེས་ཀྱང་ཟམ་མི་ཆད་པར་ཟབ་ཏུ་ཕྱིན་ཡོད་པ་རེད།

གསར་འགོད་པས་ཤེས་རྟོགས་བྱས་པར་གཞིགས་ན། དུས་ཡུན་ཉིན་7གྱི་བྱེད་སྒོའི་རིང་། མིག་སྔར་སྤེལ་བཞིན་པའི“ལོ་ལྔ་ཚན་བརྒྱད་པའི”བཅའ་ཁྲིམས་ཁྱབ་གདལ་བྱེད་སྒོ་དང་ཟུང་འབྲེལ་གྱིས“དཔོན་གསུམ་དང་ལས་དོན་པ་གཉིས”དང་ལྷག་པར་དུ“ལོ་འཁོར་གྱི་ཁྲིམས་སྐྱོང་མི་སྣ”དང“བཅའ་ཁྲིམས་ཁྱབ་གདལ་གཏོང་མཁན་གྱི་སྒྲོག་འགྲེལ་པ་གྲགས་ཅན”བཅས་ཀྱི་དཔེ་སྟོན་ནུས་པ་ཡག་པོ་བཏོན་ཏེ། ཟིལ་ཤུགས་ལྡན་པ་དང་། ཁྱད་ཆོས་ཡོད་པ། གཏིང་ཟབ་པ་བཅས་ཀྱི་རྩ་ཁྲིམས་དང་བཅའ་ཁྲིམས་ཁྱབ་གདལ་དྲིལ་བསྒྲགས་རྒྱ་ཁྱབ་ངང་སྤེལ་རྒྱུ་དང་། རྒྱལ་ཡོངས་ཀྱི་དམངས་གཙོའི་ཁྲིམས་སྐྱོང་དཔེ་སྟོན་གྲོང་ཚོ་འཛུགས་གཏོད་དང་། “བཅའ་ཁྲིམས་ཤེས་མཁན”གསོ་སྐྱོང་། ཁྲིམས་སྦྱོང་ཁྲིམས་སྤྱོད་དཔེ་སྟོན་དུད་ཚང་གསོ་སྐྱོང་བཅས་ཀྱི“འདུ་འགོད་ཆེན་པོ་གསུམ”ལ་སྐུལ་འདེད་གཏིང་ཟབ་བཏང་སྟེ། ལས་རིགས་ཁག་དང་རྒྱུན་གཏན་འཚོ་བའི་ཁྲོད་རྩ་ཁྲིམས་ལག་ལེན་བསྟར་ཐུབ་པ་དང་མི་དམངས་མང་ཚོགས་རྩ་ཁྲིམས་དང་ཉེ་བཅར་ཡོང་བར་བྱེད་རྒྱུ་རེད།

ལྗོངས་ཏང་ཨུད་དྲིལ་བསྒྲགས་པུའི་པུའུ་ཀྲང་གཞོན་པ་ཀྲང་ཤན་ཆུན་གྱིས་གསུང་བཤད་གནང་སྐབས། ལྗོངས་ཡོངས་ཀྱིས་གསོན་ཉམས་དོད་པ་དང་གོ་བདེ་ཤེས་སླའི་སྐད་ཆ་དང་དཔེ་མཚོན་ལ་བརྟེན་ཏེ། མི་དམངས་མང་ཚོགས་ཀྱི་ལྟ་འདོད་ཅིང་ཉན་སྤྲོ་བའི་རྣམ་པའི་ཐོག་ནས་རྩ་ཁྲིམས་ཀྱི་ནང་དོན་གནད་ལ་འཁེལ་བ་དང་། རྩ་ཁྲིམས་ཀྱི་དགོངས་དོན་ཁ་གསལ་བ། རྩ་ཁྲིམས་ཀྱི་དོན་སྙིང་ཟབ་པ། རྩ་ཁྲིམས་ཀྱི་གཏམ་རྒྱུད་ཡག་པོ་ཤོད་པ། རྩ་ཁྲིམས་དྲིལ་བསྒྲགས་ཁྲོད་ཀྱི་བརྙན་འཕྲིན་དང་། རླུང་འཕྲིན། ཚགས་པར་སོགས་སྲོལ་རྒྱུན་སྨྱན་སྦྱོར་གྱི་ལེགས་ཆ་གང་ལེགས་སྤྱོད་པ། རྩ་ཁྲིམས་དྲིལ་བསྒྲགས་སློབ་གསོའི་ཁྲོད་སྨྱན་སྦྱོར་གསར་པ་དང་ལག་རྩལ་གསར་པ་སྤྱོད་པར་སྣང་ཆེན། ཚོགས་རིགས་དབྱེ་བ་དང་། རིག་ནུས་ཅན། མཉམ་སྤྱོད་ཐུབ་པ། མཉམ་འགུལ་ཐུབ་པ། ཉམས་ལེན་ཐུབ་པ་བཅས་ཀྱི་རྩ་ཁྲིམས་དྲིལ་བསྒྲགས་བྱེད་སྟངས་གསར་གཏོད་དང་འཚོལ་ཞིབ་བཅས་བྱས་ཏེ། རྩ་ཁྲིམས་དྲིལ་བསྒྲགས་ཀྱི་ཡིད་དབང་འགུགས་ཤུགས་དང་ཤུགས་རྐྱེན་ཐེབས་ཚད་ཟམ་མི་ཆད་པར་ཆེ་རུ་གཏོང་གི་ཡིན་ཞེས་ངོ་སྤྲོད་གནང་བ་རེད།

མཛད་སྒོར་ད་དུང་ལྷ་ས་གྲོང་ཁྱེར་གྱི་བཅའ་ཁྲིམས་ཁྱབ་གདལ་གྱི་བརྗོད་དོན་གཙོ་བོའི་འགྲེམས་སྟོན་སྐབས་དང་པོར་ལྟ་སྐོར་དང་རྩ་ཁྲིམས་ཀྱི་འཆད་ཁྲིད་ཉན་པ་སོགས་ཀྱི་བྱེད་སྒོ་སྤེལ་ཡོད།