བོད་ཁྱིམ་སྒོ་རའི་ནང་གི་མཐུན་སྒྲིལ་ལོ་གསར།
“བོད་རིགས་གྲོགས་པོ་དག་སེམས་རྩ་ཧ་ཅང་འཁོལ་ཞིང་། དུས་ཆེན་གྱི་གོམས་སྲོལ་ཕུན་སུམ་ཚོགས་ལ་དམིགས་བསལ་གྱི་ཁྱད་ཆོས་ལྡན་པ་ཞིག་འདུག ཉིང་ཁྲིར་ཀྲུང་གོའི་ལོ་གསར་སྔ་ཤོས་གཏོང་རྒྱུ་བྱུང་བ་ནི་དངོས་གནས་བརྗེད་པར་དཀའ་བ་ཞིག་རེད། ཀྲུང་ཧྭ་མི་རིགས་ནི་ཁྱིམ་ཚང་གཅིག་ཡིན་པས་ལྷན་རྒྱས་ཀོང་པོའི་ལོ་གསར་ལ་སྤྲོ་པོ་ཡོང་བའི་བཀྲ་ཤིས་བདེ་ལེགས་ཞུ། སང་ལོར་ལོ་ཕྱུགས་ལེགས་པ་དང་ཐམས་ཅད་བདེ་ཞིང་སྐྱིད་པ་ཡོང་བར་ཤོག”ཅེས་ཀོང་ཤིས་ཀྲོང་རིགས་རང་སྐྱོང་ལྗོངས་ཧོ་ཁྲེ་གྲོང་ཁྱེར་ཏུང་ལན་རྫོང་གི་མཱ་ཧྥང་ཁང་གིས་བོད་རིགས་གྲོགས་པོ་ཚོར་ལོ་གསར་གྱི་སྨོན་འདུན་ཞུས་པ་རེད།
ད་ལོའི་བོད་ཀྱི་ཀོང་པོའི་ལོ་གསར་སྐབས། ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱིས་ཐག་རིང་ནས་ཡོང་བའི་མགྲོན་པོ་ཁག་གཅིག་བསུས་ཡོད།
ཁོང་ཚོ་ནི“ཀྲུང་གོའི་སྲོལ་རྒྱུན་གྲོང་ཚོ”སྟེ། ཀུའེ་ཀྲོའུ་ཞིང་ཆེན་ཨན་ཧྲུན་གྲོང་ཁྱེར་ཨ་ཝུའེ་ཀྲའེ་ཡི་པུའུ་དབྱི་རིགས་ཀྱི་གྲོགས་པོ་དང་རྒྱལ་ཁབ་རིམ་པའི་ཟངས་རྔའི་རིག་གནས་སྐྱེ་ཁམས་སྲུང་སྐྱོང་ཁུལ་ཀོང་ཤིས་ཧོ་ཁྲེ་གྲོང་ཁྱེར་ཏུང་ལན་རྫོང་གི་ཀྲོང་རིགས་གྲོགས་པོ་རེད། ཁོང་ཚོ་གདན་ཞུས་ལྟར་ཉིང་ཁྲི་གྲོང་ཁྱེར་བྲག་ཡིབ་ཆུས་བུ་ཆུ་ཤང་དུ་ཀོང་པོའི་ལོ་གསར་གྱི“འཆམ་མཐུན་ལྡན་པའི་གྲོང་གསེབ·བདེ་སྐྱིད་ལྡན་པའི་བུ་ཆུ”ཞེས་པའི་སྔོན་སྐྱོད་དཔེ་སྟོན་ལམ་སྟོན་ཁྲབ་སྟོན་བྱེད་སྒོར་ཞུགས་ནས་བོད་རིགས་གྲོགས་པོ་དང་མཉམ་དུ་འཁྲབ་སྟོན་བྱས་པ་མ་ཟད། ད་དུང་བོད་རིགས་གྲོགས་པོའི་ཁྱིམ་དུ་མགྲོན་པོར་ཕྱིན་ནས་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་དམིགས་བསལ་གྱི་ལོ་གསར་ཞིག་བཏང་བ་རེད།
བུ་ཆུ་ཤང་གྲོང་གསར་པ་གྲོང་ཚོའི་ཏང་ཀྲི་པུའི་ཧྲུའུ་ཅི་གཞོན་པ་པད་མ་བཀྲ་ཤིས་ཀྱི་ཁྱིམ་དུ་སྐྱོད་སྐབས་རླངས་འཁོར་ལས་བབ་མ་ཐག་ལོ་གསར་གྱི་བསུ་ཆང་དྲངས། ཀུའེ་ཀྲོའུ་དང་ཀོང་ཤིས་ས་ཁུལ་གཉིས་ཀྱི་གྲོགས་པོ་ཚོས་གཅིག་རྗེས་གཉིས་མཐུད་ངང་ཆང་རག་གི་བྲོ་བ་མྱངས་ནས་བསྔགས་བརྗོད་ཡང་ཡང་བྱས།
“སྒོ་རའི་ནང་གི་སྡོང་པོའི་སྟེང་མང་པོར་བཏགས་པའི་ཀུ་ཤུ་ནི་རང་བྱུང་ལྷད་མེད་ཡིན་ལ། བྲོ་བ་ཞིམ་པོ་ཡོད། ལྷན་རྒྱས་ནས་གང་འདོད་དུ་བཏོགས་ནས་མཆོད་དང”ཞེས་སྒོ་འཛུལ་མ་ཐག་ཚང་མར་ཀུ་ཤུའི་བྲོ་བ་མྱོང་དུ་བཅུག་རྗེས་པད་མ་བཀྲ་ཤིས་ཀྱིས་སླར་ཡང་ཚང་མ་ཁྱིམ་དུ་བསུས་ནས་ལོ་གསར་གྱི་ཁ་ཟས་དང་། ཤ་སྐམ། དེ་བཞིན་བོད་ཕག་གི་ཤ་དང་ཁྲག་རྒྱུ་ཚ་པོ། ནས་ཀྱི་བག་ལེབ་སོགས་ཁྱེར་ཡོང་ནས་ཚང་མ་ཞིམ་ཟས་ལ་རོལ་དུ་བཅུག
ཀུའེ་ཀྲོའུ་དང་ཀོང་ཤིས་ཀྱི་གྲོགས་པོ་རྣམས་ཀྱིས་བོད་ཟས་ལ་རོལ་ཞོར་བོད་ཁྱིམ་ལ་ལྟ་སྐོར་བྱེད་པ་དང་། པད་མ་བཀྲ་ཤིས་ཀྱི་ནང་མི་དང་ཅི་འཕྲོས་མོལ་འཕྲོས་ཀྱང་བྱས་ཡོད། པད་མ་བཀྲ་ཤིས་ཁྱིམ་གྱི་ལོ་རེའི་ཡོང་འབབ་སྒོར་ཁྲི་10ལྷག་ཙམ་ཟིན་པ་དང་ཁྱིམ་དུ་ད་དུང་འབྲི་གཡག་བཅུ་གྲངས་ཁ་ཤས་དང་། ཁྱིམ་གྱི་མི་རྒན་པར་སྐྱེ་ཁམས་ལས་གནས། ཕྲུ་གུ་སློབ་གྲྭར་འགྲོ་བར“འགན་ལེན་གསུམ”གྱི་སྲིད་ཇུས་བཅས་ཡོད་པ་ཤེས་རྗེས། ཚང་མས་མཐེ་བོང་བསྒྲེངས་ནས་རྒྱལ་ཁབ་ཀྱི་སྲིད་ཇུས་ཡག་པ་དང་། བོད་ཀྱི་འཕེལ་རྒྱས་ཡག་པ། མི་སེར་གྱི་འཚོ་བ་སྐྱིད་པ་བཅས་ལ་བསྔགས་བརྗོད་བྱས་པ་རེད།