ཟླ་12ཚེས་3ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་2024ལོའི“ཀྲུང་གོར་ཤེས་རྟོགས”ཀྱི་རྒྱལ་སྤྱིའི་ཚོགས་འདུར(ཀོང་ཀྲོའུ)རྟེན་འབྲེལ་འཕྲིན་ཡིག་སྤྲིངས་པ།

ཞི་ཅིན་ཕིང་གིས་གསུངས་དོན། ཀྲུང་གོར་ཤེས་རྟོགས་བྱེད་པར་ཕྱོགས་ཡོངས་ནས་སྒྱུར་བཅོས་ཟབ་གཏོང་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་སྔར་ལས་ལྷག་པ་གཏོང་ཚུལ་ཤེས་རྟོགས་བྱེད་དགོས། ད་ཆའི་ཀྲུང་གོས་ཆུ་ཚད་མཐོ་བའི་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་གྱི་སྒྲིག་སྲོལ་གང་མགྱོགས་སྐྲུན་པ་དང་། ལམ་ལུགས་རྣམ་པའི་སྒོ་མོ་འབྱེད་རྒྱ་བརྟན་པོའི་ངང་ཆེ་རུ་གཏོང་པ། རྒྱལ་སྤྱིའི་ཚད་གཞི་མཐོ་བའི་དཔལ་འབྱོར་ཚོང་དོན་སྒྲིག་སྲོལ་དང་རང་འགུལ་ངང་འབྲེལ་མཐུད་བྱེད་པ། ཕྱི་གསལ་ནང་གསལ་དང་། བརྟན་པོ། སྔོན་དཔག་ཐུབ་པ་བཅས་ཀྱི་ལམ་ལུགས་ཁོར་ཡུག་ཧུར་ཐག་གཏོད་པ་བཅས་བྱེད་བཞིན་ཡོད། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱིས་མཛེས་སྡུག་ལྡན་པའི་འཚོ་བར་བཅངས་པའི་མི་དམངས་དུང་ཕྱུར་14ཡི་རེ་འདོད་སྐོང་ཐུབ་པ་མ་ཟད། ད་དུང་འཛམ་གླིང་གི་ཞི་བདེ་དང་འཕེལ་རྒྱས་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་ཐུབ།

ཞི་ཅིན་ཕིང་གིས་ནན་བཤད་གནང་དོན། དེང་སྐབས་འཛམ་གླིང་ལ་ལོ་བརྒྱའི་འགྱུར་ལྡོག་མགྱོགས་མྱུར་འབྱུང་བཞིན་ཡོད་པ་དང་འཛམ་གླིང་རྒྱལ་ཁབ་ཁག་ལ་ཉེན་ཁ་དང་ཚོད་བགམ་གསར་པ་འཕྲད་བཞིན་ཡོད་པ་དང་དུས་མཚུངས་འཕེལ་རྒྱས་ཀྱི་གོ་སྐབས་དང་ཡར་ཐོན་གྱི་མདུན་ལམ་གསར་པའང་ལྡན་ཡོད། ཀྲུང་གོས་རྒྱལ་ཁབ་ཁག་དང་ལག་གདང་སྦྲེལ་ནས་འཕེལ་རྒྱས་ལ་ཕན་པའི་ཁོར་ཡུག་དང་ཆ་རྐྱེན་གཏོད་པ་དང་། དཀའ་ངལ་དང་འགྲན་སློང་སྣ་ཚོགས་ལ་ཁ་གཏད་ཧུར་ཐག་གཅོག་པ། ཞི་བདེ་འཕེལ་རྒྱས་དང་། གཉིས་ཕན་མཉམ་ལས། ཐུན་མོང་དར་རྒྱས་བཅས་ཀྱི་འཛམ་གླིང་རྒྱལ་ཁབ་ཁག་གི་དེང་རབས་ཅན་མངོན་འགྱུར་ཡོང་བར་སྐུལ་འདེད་གཏོང་བ་བཅས་བྱས་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པའི་ལེའུ་གསར་པ་རྩོམ་རྒྱུའི་རེ་སྒུག་བྱེད་ཀྱི་ཡོད།

“ཀྲུང་གོར་ཤེས་རྟོགས”ཀྱི་རྒྱལ་སྤྱིའི་ཚོགས་འདུ་དེ་ནི་ཀྲུང་གོ་རྒྱལ་ཁབ་གསར་གཏོད་དང་འཕེལ་རྒྱས་འཐབ་ཇུས་ཞིབ་འཇུག་ལྷན་ཚོགས་དང་། ཀྲུང་གོ་མི་དམངས་ཕྱི་འབྲེལ་སློབ་ཚོགས། ཀོང་ཏུང་ཞིང་ཆེན་མི་དམངས་སྲིད་གཞུང་བཅས་ཀྱིས་མཉམ་འབྲེལ་ཐོག་གཙོ་གཉེར་བྱས་པ་དང་ཚེས་3ཉིན་ཀོང་ཀྲོའུ་རུ་འགོ་ཚུགས་ཤིང་། དེའི་བརྗོད་དོན་གཙོ་བོ་ནི“སྒྱུར་བཅོས་མཐར་ཕྱིན་པ་བྱེད་དགོས—ཀྲུང་གོའི་ལུགས་ཀྱི་དེང་རབས་ཅན་དང་འཛམ་གླིང་འཕེལ་རྒྱས་ཀྱི་གོ་སྐབས་གསར་པ”ཞེས་པ་དེ་རེད།