ལྷོ་ཁ་གྲོང་ཁྱེར་གྱིས།
“དུད་ཚང་ཁྲིར་སྤྱི་ཚོགས་འགན་སྲུང་གི་ཞབས་འདེགས་ཞུ་བའི”བྱེད་སྒོ་སྤེལ་འགོ་ཚུགས་པ།
ཉིན་ཤས་གོང་། ལྷོ་ཁ་གྲོང་ཁྱེར་གྱིས“སྲིད་ཇུས་ངོ་ཐུག་གདོང་འཕྲད་དང་ཞབས་འདེགས་ཐག་ཉེ་སར་ཞུ་བ་སྟེ། 2024ལོའི་སྤྱི་ཚོགས་འགན་སྲུང་ཞབས་འདེགས་དུད་ཚང་ཁྲིར་ཞུ་བའི”བྱེད་སྒོ་སྤེལ་འགོ་ཚུགས་པའི་མཛད་སྒོ་འཚོགས་པ་རེད།
ཤེས་རྟོགས་བྱུང་བར་གཞིགས་ན། བྱེད་སྒོར“མི་དམངས་གོང་དུ་བཀུར་བའི”འདུ་ཤེས་མཐའ་འཁྱོངས་ཀྱིས་མང་ཚོགས་ཀྱི་དགོས་མཁོ་ཤེས་རྟོགས་གཏིང་ཟབ་དང་། སྤྲོ་སེམས་ཀྱིས་ཁེངས་པ་དང་། སྤྱོད་ཚུལ་ཏན་ཏིག ཞབས་ཞུའི་རྣམ་འགྱུར་ལེགས་པ་བཅས་ལ་བརྟེན་ནས་སྤྱི་ཚོགས་འགན་སྲུང་སྲིད་ཇུས་སྒྲོག་འགྲེལ་ཡག་པོ་བྱས་ཏེ། དུད་ཚང་ཁྲི་སྟོང་མང་པོར་ཏང་དང་སྲིད་གཞུང་གི་དྲོ་སྐྱིད་བརྒྱུད་སྤྲོད་བྱས་པ་རེད། ལག་བསྟར་ཞིབ་ཕྲ་བྱེད་རིང་རྣམ་པ་སྣ་ཚོགས་དང་ནང་དོན་ཕུན་སུམ་ཚོགས་པའི་བྱེད་སྒོ་རབ་དང་རིམ་པ་སྤེལ་བ་བརྒྱུད། གྲོང་ཁྱེར་དང་། རྫོང་། ཤང་བཅས་རིམ་པ་གསུམ་གྱི་སྤྱི་ཚོགས་འགན་སྲུང་ལས་དོན་མི་སྣ་སྒྲིག་འཛུགས་ཀྱིས་གཞི་རིམ་གྱི་འཐབ་ས་དང་པོར་བསྐྱོད་དེ་མང་ཚོགས་ལ་སྤྱི་ཚོགས་འགན་སྲུང་སྲིད་ཇུས་ཀྱི་དོགས་གནད་ལ་གསལ་འགྲེལ་བྱས་པ་དང་འབྲེལ། སྤྱི་ཚོགས་འགན་སྲུང་གི་འབྲེལ་ཡོད་ལས་སྒོ་གཉེར་བར་མཛུབ་ཁྲིད་ཀྱང་བྱས་ནས། རྒྱ་ཆེའི་མང་ཚོགས་ཚོས་སྤྱི་ཚོགས་འགན་སྲུང་ཤེས་རྟོགས་གཏིང་ཟབ་དང་། སྤྱི་ཚོགས་འགན་སྲུང་ལ་ཧུར་ཐག་ཞུགས་པ། སྤྱི་ཚོགས་འགན་སྲུང་ལོངས་སྤྱོད་གང་ལེགས་ཐུབ་པ་བཅས་བྱས་ཏེ་ལྷོ་ཁ་གྲོང་ཁྱེར་གྱི་སྤྱི་ཚོགས་འགན་སྲུང་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་མཉམ་དུ་སྐུལ་འདེད་བཏང་བ་རེད།