རང་ལྗོངས་ཀྱིས་ཐད་གཏོང་དྲ་ཐོག་ཚོང་དོན་འགྲན་བསྡུར་ཆེན་པོ་སྐབས་དང་པོ་གཉེར་བ།
ཉེ་ཆར། བོད་རང་སྐྱོང་ལྗོངས་ཀྱི་ཐད་གཏོང་དྲ་ཐོག་ཚོང་དོན་གྱི་འགྲན་བསྡུར་ཆེན་པོ་སྐབས་དང་པོའི་ལྷ་ས་གྲོང་ཁྱེར་གྱི་ཐོག་མའི་འགྲན་བསྡུར་གྱི་འགོ་ཚུགས་མཛད་སྒོ་སྟོད་ལུང་དྲ་ཐོག་ཚོང་དོན་ཐད་གཏོང་རྟེན་གཞིར་འཚོགས་པ་རེད།
འགོ་ཚུགས་མཛད་སྒོར་རང་སྐྱོང་ལྗོངས་ཚོང་དོན་ཐིང་གི་འབྲེལ་ཡོད་འགན་འཁུར་བས། ད་ཐེངས་ཀྱི་འགྲན་བསྡུར་ཆེན་པོ་ནི་ལྗོངས་ཏང་ཨུད་དང་སྲིད་གཞུང་གིས་འཛད་སྤྱོད་ལ་སྐུལ་འདེད་གཏོང་བའི་འབྲེལ་ཡོད་ལས་དོན་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱེད་པའི་བྱ་ཐབས་གལ་ཆེན་ཞིག་རེད། དེའི་དམིགས་ཡུལ་ནི། བོད་ཀྱི་དྲ་ཐོག་ཚོང་དོན་ལས་རིགས་འཕེལ་རྒྱས་ལ་སྔར་བས་སྐུལ་འདེད་གཏོང་བ་དང་། འཛད་སྤྱོད་ཁྲོམ་ར་དར་རྒྱས་ལ་སྐུལ་འདེད་གཏོང་བ། བོད་ཀྱི་ཡུལ་སྲོལ་གོམས་གཤིས་དང་། མི་ཆོས་རིག་གནས་ཡུལ་སྐོར། སྤུས་ལེགས་ཞིང་ཞོར་ཐོན་རྫས་བཅས་དྲིལ་བསྒྲགས་དང་འོས་སྦྱོར་བཅས་བྱས་ཏེ། བོད་ཀྱི་ཐོན་རྫས་ཕྱིར་གཏོང་དང་གྲོང་གསེབ་དར་རྒྱས་ལ་རམ་འདེགས་བྱེད་རྒྱུ་དེ་རེད། དེ་དང་ཆབས་ཅིག དེ་ཡང་ཐད་གཏོང་པའི་བྱང་ཚད་དང་རྩལ་ནུས་ངོམ་པ་དང་སྦྱོང་བརྡར་སྤྲོས་པའི་གོ་སྐབས་བཟང་པོ་ཞིག་ཀྱང་རེད། ད་ཐེངས་ཀྱི་འགྲན་བསྡུར་བརྒྱུད། ལྗོངས་ཡོངས་ཀྱི་མཁོ་འདོན་ཚོང་པ་དང་། སྤུས་རྟགས། ཐད་གཏོང་པ་བཅས་ལ་ཐོན་ཁུངས་སྦྲེལ་མཐུད་ཀྱི་སྟེགས་བུ་བསྐྲུན་ནས་བོད་ཀྱི་ཐད་གཏོང་དྲ་ཐོག་ཚོང་དོན་གྱི་ཕུལ་བྱུང་ཤེས་ལྡན་པ་ཁག་གཅིག་འདེམས་སྒྲུག་དང་སྐྱེད་སྲིང་བྱས་ཏེ། བོད་ཀྱི་ཁྱད་ལྡན་ཐོན་རྫས་དྲ་ཐོག་ནས་ཕྱིར་ཚོང་བྱེད་པའི་ཐབས་ལམ་རྒྱ་ཆེར་གཏོང་བ་དང་འཛད་སྤྱོད་ཁྲོམ་ར་འཁྲུག་ཏུ་གཏོང་བར་གསོན་ཤུགས་གསར་པ་སྣོན་ཐུབ་པའི་རེ་བ་ཡོད་ཅེས་བཤད།
འགོ་ཚུགས་མཛད་སྒོར། ཐད་གཏོང་བདམས་ཐོན་པའི་འཐུས་མི་ནོར་སྒྲོན་དང་ཕུར་བུ་དོན་གྲུབ་དང་དེ་བཞིན་དངོས་ཟོག་མཁོ་འདོན་ཚོང་པའི་འཐུས་མི་ལྷ་ས་ས་གཙང་ཀུང་སི་བཅས་ཀྱིས་ཀྱང་རང་སོ་སོའི་ལས་སྒོ་དང་ཟུང་འབྲེལ་བྱས་ནས་གཏམ་བཤད་སྤེལ་བ་རེད། ཁོང་ཚོས་ད་ཐེངས་ཀྱི་འགྲན་བསྡུར་ཆེན་པོར་རེ་སྒུག་ཆེན་པོ་བྱེད་ཀྱི་ཡོད་ལ། དེ་ཉིད་དྲ་ཐོག་ཚོང་དོན་ཁྱབ་ཁོངས་ཀྱི་སྤེལ་རེས་དང་འབྲེལ་གཏུག་གི་འདུ་ཚོགས་གཟབ་རྒྱས་ཤིག་ཏུ་འགྱུར་བའི་ཡིད་ཆེས་ཀྱང་ཡོད་ཅེས་གཅིག་རྗེས་གཉིས་མཐུད་ངང་བཤད།