ཉིན་ཤས་གོང་། ལྷ་སར་ལོ་ངོ་སུམ་བརྒྱ་ལྷག་ཙམ་གྱི་ལོ་རྒྱུས་ལྡན་པའི་ཀྲུང་ལུགས་གསོ་རིག་གི་ཚོང་རྟགས་རྙིང་པ་སྟེ། པེ་ཅིང་ཐུང་རེན་ཐང་སྨན་རྫས་ཚོང་ཁང་ཐོག་མ་བཙུགས་པས་ལྷ་སའི་གྲོང་མིའི་ཁྲོད་ཚ་རླབས་ཤིག་འཕྱུར་ཏེ་མི་མང་པོའི་ཡིད་དབང་བཀུག་ཡོད།

ངོ་སྤྲོད་བྱས་པར་གཞིགས་ན། ཚོང་ཁང་ཐོག་མ་ཞེས་པ་ནི་ལས་རིགས་ནང་ཁུལ་དུ་སྣེ་ཁྲིད་རང་བཞིན་དང་མཚོན་བྱེད་རང་བཞིན་ལྡན་པའི་གྲགས་ཅན་སྤུས་རྟགས་ཤིག་ས་ཁོངས་གཅིག་ནང་ཐོག་མར་བཙུགས་པའམ་ཡང་ན་སྔར་ཡོད་ཀྱི་སྤུས་རྟགས་རྒྱལ་སྒྲོལ་དང་གསར་གཏོད་བྱས་པ་བརྒྱུད། ས་ཁོངས་གཞན་ཞིག་ཏུ་ཐོག་མར་བཙུགས་པ་ཞིག་རེད། ཚོང་ཁང་ཐོག་མ་ཡང་ཡང་བཙུགས་པ་ལས་བྱུང་བའི་ཚོང་ཁང་ཐོག་མའི་དཔལ་འབྱོར་དེ་གྲོང་ཁྱེར་དེའི་ཚོང་དོན་གྱི་གསོན་ཤུགས་ཆེ་ཆུང་དཔྱད་ཆས་ལ་བརྩི་ཡི་ཡོད་པ་རེད།

ལྷ་ས་གྲོང་ཁྱེར་ཁྲེང་ཀོན་ཆུས་ཀྱི་ཚོང་འགུགས་མ་འདྲེན་གྱི་གཙོ་གནད་རྣམ་གྲངས་ཤིག་ཡིན་པའི་པེ་ཅིང་ཐུང་རེན་ཐང་སྤུས་རྟགས་དེ་པེ་ཅིང་གྲོང་ཁྱེར་གྱིས་ཏང་ཀྲུང་དབྱང་གི་ཁ་གཏད་བོད་སྐྱོར་ལས་དོན་དོན་འཁྱོལ་བྱས་པའི་དགའ་འོས་པའི་གྲུབ་འབྲས་གཞན་ཞིག་རེད། པེ་ཅིང་ཐུང་རེན་ཐང་ལྷ་ས་སྨན་རྫས་ཚོང་ཁང་ཚད་ཡོད་ཀུང་སི་དེ་པེ་ཅིང་ཐུང་རེན་ཐང་ཚོང་ལས་མ་འཇོག་ཚོགས་པ་དང་བོད་རང་སྐྱོང་ལྗོངས་སྨན་དང་སྨན་རྫས་ཀུང་སིས་མཉམ་དུ་མ་རྩ་བཏང་ནས་བཙུགས་པ་ཞིག་ཡིན་པས། པེ་ཅིང་ཐུང་རེན་ཐང་གིས་བོད་དུ་བཙུགས་པའི་ཚོང་ཁང་ཐོག་མ་དེ་ཡིན་པ་མ་ཟད། རྒྱལ་ཡོངས་ཀྱི་ཞིང་ཆེན་རིམ་པའི་སྲིད་འཛིན་ཁུལ་ཁག་གི་སིལ་འཚོང་མཐའ་སྣེའི་བཀོད་སྒྲིག་གི་ལམ་ཚད་རྡོ་རིང་གལ་ཆེན་ཞིག་ཀྱང་རེད།

གསར་འགོད་པར་པེ་ཅིང་ཐུང་རེན་ཐང་ལྷ་ས་སྨན་རྫས་ཚོང་ཁང་ཚད་ཡོད་ཀུང་སིའི་སྤྱི་ཁྱབ་ཅིང་ལི་ཀྲང་ཀོན་ལུང་གི་ས་ནས་ཤེས་རྟོགས་བྱུང་བར། ད་ཐེངས་ཀྱི་ལྷ་སའི་སྨན་རྫས་ཚོང་ཁང་རྣམ་གྲངས་ལ་ཁྱོན་མ་དངུལ་སྒོར་ཁྲི་300བཏང་བ་དང་ཚོང་ཁང་གི་རྒྱ་ཁྱོན་ལ་སྨི་ངོས་གྲུ་400ལྷག་ཙམ་ཟིན་པར་ནད་བརྟག་སྨན་བཅོས་ཁུལ་དང་། ཀྲུང་ལུགས་སྨན་ཐང་ཁུལ། ལུས་ཁམས་བདེ་སྲུང་བཟའ་བཅའ་ཁུལ། ཀྲུང་ལུགས་སྨན་བཟོ་ཁུལ་སོགས་ཁུལ་མང་པོ་བཙུགས་ཡོད་པ་དང་། ད་དུང་སྨན་སྣ་ཁ་2000ལྷག་ཙམ་འཚོང་གི་ཡོད་པ་རེད། དེ་དང་ཆབས་ཅིག་སྨན་རྫས་ཚོང་ཁང་གིས་ད་དུང་ཀྲུང་ལུགས་སྨན་སྐོལ་རོགས་དང་། སྨན་དབུར་རོགས། སྨན་བཏུབ་རོགས་སོགས་ཚུད་པའི་རིན་ཐང་འཕར་མའི་ཞབས་ཞུ་མང་པོ་མཁོ་འདོན་བྱས་ནས། རྒྱ་ཆེའི་ནད་པ་ཚོར་ཕྱོགས་ཡོངས་དང་རང་གཤིས་ཅན་གྱི་བདེ་ཐང་དོ་དམ་གྱི་ཐག་གཅོད་ཇུས་གཞི་མཁོ་འདོན་ཐུབ་རེ་བྱེད་ཀྱི་ཡོད་པ་རེད།

དེ་དང་ཆབས་ཅིག་རྒྱལ་སའི་ཡུལ་སྐོར་ཚོགས་པ་དང་ལྷ་སའི་མཐོ་གསར་མ་རྐང་ཚོད་འཛིན་དབར་མཉམ་ལས་བྱེད་ཤུགས་ཆེ་རུ་གཏོང་བར་མཐུན་སྦྱོར་སྐུལ་འདེད་བཏང་ནས་ལྷ་སའི་ཝང་ཧྥུ་ཅིང་ཉོ་སྒྲུབ་ལྟེ་གནས་ད་ལོ་ལས་གཉེར་ཐུབ་པར་སྐུལ་འདེད་གཏོང་བ་དང་། ཆོན་ཅུས་ཏེ་སོགས་སྤུས་རྟགས་རྙིང་པ་ལྷ་སར་འཛུགས་པར་རྒྱབ་སྐྱོར་བྱེད་པ། པེ་ཅིང་གི་དར་སྲོལ་མ་རྐང་ཚོད་འཛིན་དང་ལྷ་སའི་གྲངས་འཛིན་ཚོགས་པས“ཤར་གྲངས་ནུབ་གྲབས”སོགས་གྲངས་འཛིན་དཔལ་འབྱོར་ཁྱབ་ཁོངས་ཀྱི་མཉམ་ལས་ལ་མཐུན་སྦྱོར་སྐུལ་འདེད་གཏོང་བ། པེ་ཅིང་རྒྱལ་སའི་ཡུལ་སྐོར་ཚོགས་པ་དང་ལྷ་ས་པོ་ཏ་ལ་ཚོགས་པས་ཡུལ་སྐོར་ཁྱབ་ཁོངས་སུ་མཉམ་ལས་གཏིང་ཟབ་བྱེད་པ་སོགས་ལག་བསྟར་བྱེད་ཉེར་ཡོད་པའམ་ཡང་ན་ལག་བསྟར་བྱེད་བཞིན་པའི་སྤུས་རྟགས་རྣམ་གྲངས་རེ་རེ་ལས་ལྷ་སར་ཚོང་ཁང་ཐོག་མ་སྣ་ཚོགས་ཆར་རྗེས་ཀྱི་མྱུ་གུ་བཞིན་ཐོན་བཞིན་ཡོད།

ཚོང་ཁང་ཐོག་མའི་དཔལ་འབྱོར་ལ་གྲུབ་འབྲས་ཐོབ་པ་དེ་སྲིད་གཞུང་དང་། ལས་རིགས། ཁེ་ལས་བཅས་ཀྱིས་མཉམ་དུ་ནུས་ཤུགས་བཏོན་པ་དང་ཁ་འབྲལ་ཐབས་མེད། ཉེ་ཆར་ལྷ་སའི་ཝང་ཧྥུ་ཅིང་ཉོ་སྒྲུབ་ལྟེ་གནས་ཀྱིས“སྐར་འོད་ཆིམ་ཆིམ་ལྷ་སར་འཕྲོ”ཞེས་བརྗོད་དོན་གཙོ་བོར་བྱས་པའི་གློག་བཞུའི་མཛད་སྒོ་འཚོགས་པར་མང་ཚོགས་མང་པོའི་ཡིད་དབང་བཀུག་ཡོད།

ཤེས་རྟོགས་བྱུང་བར་གཞིགས་ན། ལྷ་ས་ཝང་ཧྥུ་ཅིང་ཉོ་སྒྲུབ་ལྟེ་གནས་ཀྱི་སྤྱིའི་འཛུགས་སྐྲུན་རྒྱ་ཁྱོན་ལ་སྨི་ངོས་གྲུ་ཁྲི་30.2ཟིན་པའི་ནང་ཚོང་ལས་ཀྱི་འཛུགས་སྐྲུན་རྒྱ་ཁྱོན་ལ་སྨི་ངོས་གྲུ་ཁྲི་18.2ཟིན་པ་དང་རླངས་འཁོར་འཇོག་ས་1300ཡན་ཡོད། “མིག་སྔར་ལྷ་སའི་ཝང་ཧྥུ་ཅིང་གི་ཚོང་འགུགས་མྱུར་ཚད་90%ཡན་ལེགས་གྲུབ་ཟིན་པ་དང་སྤུས་ལེགས་སྤུས་རྟགས་300ཡན་ཞུགས་པ་དེར་ཧེང་ཏེན་གློག་བརྙན་ཁང་དང་། ས་གཙང་ལེགས་འདེམས་སྒོ་རྩིས་ཚོང་ཁང་། ཅིང་ཏུང་ཁྱིམ་སྤྱོད་གློག་ཆས། ཧྭ་ཝུའེ་རིག་ནུས་འཚོ་བའི་ཚོང་ཁང་། ཧའེ་ཀང་རབ་དགའི་གློག་རྩེད་གྲོང་། ཅ་ཤིང་འདུ་གནས་སོགས་ཡོད་པས་ལྷ་སར་བཙུགས་པའི་སྤུས་རྟགས་ཐོག་མའི་བསྡུར་ཚད་ཀྱི་30%ཟིན་ཡོད། ལྷ་ས་ཝང་ཧྥུ་ཅིང་ཟོག་ཉོ་ལྟེ་གནས་ཟླ་12ཚེས་28ཉིན་སྒོ་ཕྱེ་ཡི་རེད”ཅེས་ལྷ་ས་ཝང་ཧྥུ་ཅིང་ཟོག་ཉོ་ལྟེ་གནས་ཀྱི་སྤྱི་ཁྱབ་ཅིང་ལི་ཀྲུའུ་ལི་ཀུའེ་ཡིས་བཤད།