ཉིན་ཤས་གོང་། 2024ལོའི་ཀྲུང་གོའི་དྲ་སྦྲེལ་གྱི་རྨང་གཞིའི་ཐོན་ཁུངས་ཚོགས་ཆེན་ཐོག་ཀྲུང་གོའི་དྲ་སྦྲེལ་ཆ་འཕྲིན་ལྟེ་གནས(CNNIC)ཀྱིས《རང་གྲུབ་རྣམ་པའི་མི་ཐབས་རིག་ནུས་བཀོལ་སྤྱོད་འཕེལ་རྒྱས་ཀྱི་སྙན་ཞུ(2024)》(གཤམ་དུ《སྙན་ཞུ》ཞེས་བསྡུ་རྒྱུ)ཁྱབ་བསྒྲགས་བྱས་པ་རེད། 《སྙན་ཞུའི》ནང་2024ལོའི་ཟླ་6པའི་བར་རང་རྒྱལ་གྱི་རང་གྲུབ་རྣམ་པའི་མི་ཐབས་རིག་ནུས་ཀྱི་ཐོན་རྫས་སྤྱོད་མཁན་མི་དུང་ཕྱུར་2.3ཟིན་པ་དེས་མི་འབོར་ཡོངས་ཀྱི་16.4%བཟུང་ཡོད་ཅེས་མངོན་ཡོད་པ་རེད།

《སྙན་ཞུ》ལས་མངོན་གསལ། རང་རྒྱལ་གྱི་རང་གྲུབ་རྣམ་པའི་མི་ཐབས་རིག་ནུས་ཀྱི་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་ཐོན་ལས་ཀྱི་གཞི་ཁྱོན་དང་ཐོན་རྫས་ཀྱི་གྲངས་འབོར་མགྱོགས་མྱུར་འཕར་བ་མ་ཟད། མི་རྣམས་ཀྱི་རྒྱུན་གཏན་འཚོ་བའི་ཁྲོད་རིམ་བཞིན་ཁྱབ་པ་སྟེ། རང་རྒྱལ་གྱིས་ཅུང་ཆ་ཚང་བའི་མི་ཐབས་རིག་ནུས་ཐོན་ལས་མ་ལག་ཅིག་རགས་ཙམ་བསྐྲུན་པ་དང་། འབྲེལ་ཡོད་ཁེ་ལས་4500ལྷག་ཙམ་ཟིན་པ། ཐོན་ལས་འཁོར་འབྲེལ་ནང་ཉིང་ལྷེབ་དང་། རྩིས་ཐབས། གྲངས་གཞི། ལས་སྟེགས། བཀོལ་སྤྱོད་སོགས་གོང་འོག་གི་འགག་རྩའི་ལྷུ་ཚིགས་ཚུད་པ་དང་། རང་གྲུབ་རྣམ་པའི་མི་ཐབས་རིག་ནུས་ཀྱི་ཐོན་རྫས་རང་རྒྱལ་དུ་མེ་ཏོག་མཉམ་བཞད་ལྟ་བུ་བྱུང་ནས་2024ལོའི་ཟླ་7པའི་བར་རང་རྒྱལ་གྱིས་ཐོ་འགོད་བྱས་པ་དང་འབྲེལ་དྲ་ཐོག་ཏུ་བཏོན་པ་དང་སྤྱི་དམངས་ལ་ཞབས་འདེགས་ཞུ་ཐུབ་པའི་རང་གྲུབ་རྣམ་པའི་མི་ཐབས་རིག་ནུས་ཞབས་ཞུའི་དཔེ་དབྱིབས་ཆེན་པོ་190ལྷག་ཙམ་ཟིན་ཏེ་སྤྱོད་མཁན་ལ་གདམ་ག་ཕུན་སུམ་ཚོགས་པོ་དང་ཁྱད་པར་ཅན་གྱི་ཉམས་ལེན་མཁོ་འདོན་བྱས་པ། རང་གྲུབ་རྣམ་པའི་མི་ཐབས་རིག་ནུས་དང་ལས་རིགས་ཁག་མཉམ་འདྲེས་བྱེད་པ་དེ་རང་རྒྱལ་དུ་གང་མགྱོགས་དོན་འཁྱོལ་བྱེད་བཞིན་ཡོད་པ་བཅས་རེད།