ས་སྲོས་ཀྱི་མཚམས་སུ། ཨ་ཧྥེ་རི་ཁ་ནུབ་མའི་རྒྱལ་ཁབ་མ་ལིའི་ཁ་ལང་གྲོང་ཚོའི་ཁྲོམ་གཞུང་འགྲམ་གྱི་ལམ་སྒྲོན་དག་ཁྲ་ལྷམ་མེར་འཕྲོ་ཞིང་། ཉིན་རེའི་ལས་མཇུག་འགྲིལ་བའི་གྲོང་མི་གཉིས་རེ་གསུམ་རེ་ཁྱིམ་ནས་ཐོན་ཏེ་ལམ་འགྲམ་དུ་འཛོམས་ནས་ཇ་འཐུང་བ་དང་ཅི་འཕྲོས་མོལ་འཕྲོས་བྱེད་པ་དང་ཕྲུ་གུ་ཚོ་ལམ་སྒྲོན་འོག་ཏུ་རྩེད་མོ་རྩེ་བཞིན་མཆིས།

“དེ་སྔ་ས་རུབ་མ་ཐག་གྲོང་ཚོ་ཡོངས་མུན་ནག་ཏུ་གྱུར་པས་ངའི་ཁྱིམ་གྱི་ཚོང་ཁང་ཡང་སྒོ་རྒྱག་དགོས་འཁེལ་གྱི་འདུག”ཅེས་གྲོང་མི་ཁཱ་མཱ་ལཱ·ཤིས་ཏི་ཅིས་གསར་འགོད་པར་བཤད། དེ་གོང་ས་གནས་དེ་གའི་སྒེར་གྱི་གློག་གཏོང་ཀུང་སི་ཞིག་གིས་གྲོང་མིར་ཁྲའེ་ཡིའུ་སྣུམ་གྱི་གློག་བཏང་ཡོད་ནའང་གློག་རིན་མཐོ་པོ་ཡོད་སྟབས་གྲོང་མི་མང་ཆེ་བས་གློག་རིན་སྤྲོད་ཐུབ་ཀྱི་མེད། “ཀྲུང་གོས་རོགས་སྐྱོར་བྱས་པའི་ཉི་ནུས་སྒྲིག་ཆས་སྒྲིག་སྦྱོར་བྱས་རྗེས་ཚང་མར་གློག་སྤྱོད་རྒྱུ་བྱུང་བ་མ་ཟད། གྲོང་ཚོ་སྤྱི་ཡོངས་ལ་འགྱུར་ལྡོག་ཆེན་པོ་བྱུང་ཡོད། འགྲོ་ལམ་ཐོག་འཁྲུག་ཆ་དོད་ལ་ཚོང་ཁང་གི་ཚོང་ཡང་ཇེ་ཡག་ཏུ་ཕྱིན་ནས་རྟག་ཏུ་མཚན་མོའི་ཆུ་ཚོད་10པ་ལྷག་ཙམ་བར་སྒོ་ཕྱེ་གི་ཡོད”ཅེས་ཤིས་ཏི་ཅིས་བཤད།

ཀྲུང་གོ་ས་གཤིས་ལས་གྲྭ་ཚོགས་པ་ཚད་ཡོད་ཀུང་སིས་སྐྲུན་འགན་འཁུར་བའི་ཀྲུང་གོས་མ་ལིར་རོགས་སྐྲུན་བྱས་པའི་ཉི་ནུས་དཔེ་སྟོན་གྲོང་ཚོའི་རྣམ་གྲངས་2021ལོའི་ཟླ་11པར་མ་ལིའི་ཁོ་ཉིའུ་པུའུ་ལཱ་གྲོང་ཚོ་དང་ཁ་ལང་གྲོང་ཚོར་སྐྲུན་འགོ་ཚུགས་པ་དང་འབྲེལ་2023ལོའི་ཟླ་5པར་ལས་མཇུག་འགྲིལ་ནས་ཞིབ་བཤེར་རྩིས་ལེན་བྱུང་བ་རེད།

“ཀྲུང་གོའི་ཁེ་ལས་ཀྱིས་ད་དུང་གྲོང་ཚོར་ཉི་ནུས་ཆུ་འཐེན་འཕྲུལ་འཁོར་སྒྲིག་སྦྱོར་བྱས་པས་ང་ཚོའི་རྒྱུན་གཏན་གྱི་ཆུ་དཀོན་པའི་གནད་དོན་ཐག་གཅོད་ཐུབ་སོང” གྲོང་མི་པ་ཅ་ལི·ཀའེ་ཐ་ཡི་ཁྱིམ་དུ་མི་མང་བས་ཉིན་ལྟར་གོས་འཁྲུ་བ་དང་ལྟོ་བཟོ་བར་ཆུ་མང་པོ་དགོས་ཀྱི་ཡོད། དེ་སྔ་གྲོང་ཚོར་ཁྲོན་པའི་ནང་ནས་ཆུ་ལེན་པའི་དུས་ཚོད་ཐུང་བའི་ཁར་ཆུ་ཉུང་བར་བརྟེན་རྟག་ཏུ་ཆུ་མི་འདང་བའི་སེམས་ཁྲལ་བྱེད་དགོས་ཀྱི་ཡོད། “སྐབས་རེ་མིས་བཟོས་ཆུ་ཡུར་ནས་ཆུ་མི་ལེན་ཀ་མེད་ཡིན་པ་དང་ཆུའང་གཙང་མ་མེད། ད་ཆ་ང་ཚོར་དུས་དང་རྣམ་པ་ཀུན་ཏུ་ཆུ་གཙང་མ་སྤྱོད་རྒྱུ་ཡོད་པས་འཚོ་བ་སྟབས་བདེ་རུ་ཕྱིན་སོང”ཞེས་ཀའེ་ཐ་ཡིས་བཤད།

གྲོང་མི་སུའུ་ལའེ་མན·ཁོ་ཡཱ་ཐེས་རྣམ་གྲངས་བསྐྲུན་ཟིན་ནས་བེད་སྤྱད་པ་ལས་ད་ཆ་སློབ་གྲྭ་དང་འཕྲོད་བསྟེན་ཁང་སོགས་སྤྱི་པའི་འདུ་གནས་སུ་ཆུ་གློག་བརྟན་པོ་གཏོང་ཐུབ་ཀྱི་ཡོད། “ཆུ་དང་གློག་ཡོད་པས་གྲོང་ཚོའི་ནང་དེ་བས་འཁྲུག་ཆ་དོད་པར་གྱུར་སོང”ཞེས་གསར་འགོད་པར་བཤད། ཁོ་ཡཱ་ཐེས་རྟག་ཏུ་གྲོང་ཚོའི་ནང་གཉེན་སྒྲིག་དང་། དུས་ཆེན། ལོ་ལེགས་དུས་ཚིགས་བཅས་ཀྱི་རྟེན་འབྲེལ་བྱེད་སྒོ་གཙོ་སྐྱོང་བྱེད་ཀྱི་ཡོད། ཁོང་གིས“ཉི་ནུས་གློག་ཤུགས་བེད་སྤྱོད་བཏང་རྗེས་ངས་ནུས་ཚད་དེ་བས་ཆེ་བ་དང་ནུས་པ་དེ་བས་ལེགས་པའི་སྒྲ་སྐྱེད་སྒྲིག་ཆས་ཤིག་བརྗེས་པ་ཡིན། ཉེ་འཁོར་གྱི་གྲོང་མི་ཚོས་རྟེན་འབྲེལ་གྱི་སྐད་སྒྲ་ཐོས་མ་ཐག་བྱེད་སྒོའི་ནང་ཞུགས་པ་དང་ཆབས་ཅིག་གླུ་ལེན་གར་འཁྲབ་བྱེད་པས་རྣམ་པ་ཧ་ཅང་འཁྲུག་པོ་ཡོད”ཅེས་བཤད།