ཤིན་ཧྭ་གསར་འགྱུར་ཁང་ཟི་ལིང་ནས་གློག་འཕྲིན་འབྱོར་གསལ། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་གཅིག་སྡུད་བཅོས་སྒྲིག་བྱེད་པར་སྐུལ་འདེད་གཏིང་ཟབ་བཏང་ནས་སྒྲིག་ཁྲིམས་སྒྲིག་སྲོལ་རྒྱུན་མཐུད་ནན་གཏོང་དང་ཉེན་བརྡའི་ཟིལ་གནོན་ཆེ་རུ་གཏོང་ཆེད། ཟླ་11ཚེས་27ཉིན། མཚོ་སྔོན་ཞིང་ཆེན་སྒྲིག་ཨུད་ལྟ་ཞིབ་ཨུ་ལྷན་གྱིས་གྲོང་གསེབ་མཉམ་སྡེབ་ཀྱི“མ་རྩ་གསུམ”ཁྱབ་ཁོངས་ཀྱི་དཔེ་མཚོན་གྱོད་དཔེ་ཁག་8བརྡ་ཁྱབ་བཏང་བ་རེད།

མཚོ་ཤར་གྲོང་ཁྱེར་དགོན་ལུང་ཧོར་རིགས་རང་སྐྱོང་རྫོང་བ་བཟའ་ཤང་ཡོན་ཧྥུའུ་གྲོང་ཚོའི་ཏང་ཀྲི་པུའི་དེ་སྔའི་ཧྲུའུ་ཅི་མཱ་པད་མ་ཚེ་རིང་སོགས་ཀྱིས་སྒྲིག་འགལ་ངང་གྲོང་ཚོའི་མཉམ་སྡེབ་མ་དངུལ་ལྐོག་ཏུ་བགོས་པའི་གནད་དོན་ཏེ། 2020ལོའི་ཟླ་10པ་ནས་2021ལོའི་ཟླ་1པོའི་བར། ཡོན་ཧྥུའུ་གྲོང་ཚོའི་མཉམ་སྡེབ་ཀྱི་རྩྭ་རའི་ཁ་གསབ་དངུལ་སྒོར་ཁྲི་72.95ཡུལ་མི་ཚོས་བགོ་བཤའ་བརྒྱབ་ཅིང་། སྐབས་དེའི་གྲོང་ཚོའི་ཏང་ཀྲི་པུའི་ཧྲུའུ་ཅི་མཱ་པད་མ་ཚེ་རིང་དང་གྲོང་ཚོ་ཨུ་ལྷན་གྱི་ཀྲུའུ་རེན་མཱ་ཕྱུག་སྟག་ལྷས་ལྟ་འདོམས་ཡག་པོ་མ་བྱས་པའི་ཁར། ཁ་གསབ་དངུལ་བགོ་བའི་ནང་ཞུགས་པར་སོ་སོར་སྒོར་ཁྲི་0.9རག་ཡོད། 2024ལོའི་ཟླ་8པར། མཱ་པད་མ་ཚེ་རིང་དང་མཱ་ཕྱུག་སྟག་ལྷར་ཏང་ནང་ཁུལ་གྱི་ཐ་ཚིག་ནན་པོ་སྒྲོག་པའི་ཆད་པ་ཕོག་པ་དང་། འབྲེལ་ཡོད་འགན་འཁུར་བ་3ལ་དེ་མཚུངས་ཀྱི་ཏང་གི་སྒྲིག་ཁྲིམས་དང་སྲིད་དོན་གྱི་ཆད་པ་ཕོག་ཡོད།

མཚོ་ནུབ་སོག་རིགས་བོད་རིགས་རང་སྐྱོང་ཀྲོའུ་ཞིང་འབྲོག་ཅུས་ཀྱི་དེ་སྔའི་ཅུས་ཀྲང་གཞོན་པ་ལི་ཧྲེང་ཡེ་ཡིས་རྣམ་གྲངས་ལ་ཐེ་ཇུས་བྱས་ཏེ་ཁེ་བཟང་རག་ཐབས་བྱས་པ་སོགས་ཀྱི་གནད་དོན་ཏེ། 2015ལོའི་ཟླ་11པ་ནས་2016ལོའི་ཟླ་9པའི་བར། ལི་ཧྲེང་ཡེ་ཡིས་གོ་གནས་ཀྱི་སྟབས་བདེ་སྤྱད་དེ་མི་གཞན་ལ་དུར་ལམ་རྫོང་གི་མུའུ་ཁྲི་ཡི་དྲོད་ཁང་ཆེན་པོའི་རྣམ་གྲངས་འགན་གཙང་ལེན་རོགས་བྱས་ཏེ་ལྐོག་རྔན་སྒོར་ཁྲི་64བླངས་ཡོད། རྣམ་གྲངས་ལག་ལེན་བསྟར་རྗེས་ཁེ་ལས་ཀྱི་རང་གྲབས་མ་དངུལ་མ་འདང་བའི་དབང་གིས་ལས་མཇུག་མ་འཁྱོངས་སྟབས། ཞིང་པ་ལས་མིའི་གླ་ཆ་འགྱངས་ཆད་བྱས་ཤིང་། སྐབས་དེའི་རྫོང་དཔོན་མཱ་ཡུང་ཨན་གྱིས་སྒྲིག་འགལ་ངང་རྣམ་གྲངས་ཀྱི་མ་དངུལ་སྒོར་ཁྲི་3400སྤྱད་དེ་ཞིང་པ་ལས་མིར་གླ་ཆ་སྤྲད་པའི་ཁྲོད་སྒོར་ཁྲི་34.2རྣམ་གྲངས་འགན་གཙང་ལེན་མཁན་གྱིས་གཡོ་ལེན་བྱས་ཡོད། ལི་ཧྲེང་ཡེ་དང་མཱ་ཡུང་ཨན་ལ་ད་དུང་སྒྲིག་འགལ་ཁྲིམས་འགལ་གྱི་གནད་དོན་གཞན་དག་ཡོད་པ་རེད། 2024ལོའི་ཟླ་5པ་དང་ཟླ་9པར། ལི་ཧྲེང་ཡེ་དང་མཱ་ཡུང་ཨན་སོ་སོར་ཏང་གི་སྐྱིད་སྡུག་ནས་ཕུད་པའི་ཆད་པ་བཅད་པ་དང་རྒན་ཡོལ་ཞུས་རྗེས་ཀྱི་ཐོབ་ཆ་མེད་པར་བཟོས་ཤིང་། ཉེས་གསོག་དང་འབྲེལ་བའི་གནད་དོན་ཞིབ་དཔྱོད་ལས་ཁུངས་ལ་ཁྲིམས་ལྟར་ཞིབ་བཤེར་ཞུ་གཏུག་བྱ་རྒྱུར་རྩིས་སྤྲད་པ་མ་ཟད། འབྲེལ་ཡོད་ཀྱི་འགན་འཁུར་བ་གཉིས་གྱོད་ཁོངས་སུའང་བཅུག་ཡོད།

དཔེ་མཚོན་གྱོད་དཔེ་གཞན་པ་དྲུག་ནི། ཟི་ལིང་གྲོང་ཁྱེར་སྐུ་འབུམ་ཆུས་ཧྲང་ཤིན་ཀྲོང་གྲོང་རྡལ་ཧྲང་ཞ་མོན་གྲོང་ཚོའི་ཏང་ཀྲི་པུའི་དེ་སྔའི་ཧྲུའུ་ཅི་མཱ་ཧྥུའུ་ཚའེ་ཡིས་གྲོང་ཚོའི་མཉམ་སྡེབ་མ་དངུལ་ཧམ་བཟུང་བྱས་པ་སོགས་ཀྱི་གནད་དོན་དང་། མཚོ་བྱང་བོད་རིགས་རང་སྐྱོང་ཀྲོའུ་རྐང་ཚ་རྫོང་སྐྱིད་སྨོན་ཤང་རུ་མང་གྲོང་ཚོའི་ཏང་ཀྲི་པུའི་དེ་སྔའི་ཧྲུའུ་ཅི་རྟ་མགྲིན་རྒྱལ་དང་གྲོང་ཚོ་ཨུ་ལྷན་གྱི་དེ་སྔའི་ཀྲུའུ་རེན་ཆོས་དར་རྒྱལ་གྱིས་སྒྲིག་འགལ་ངང་གྲོང་ཚོའི་མཉམ་སྡེབ་མ་དངུལ་གཞན་ལ་གཡར་བའི་གནད་དོན། མཚོ་ལྷོ་བོད་རིགས་རང་སྐྱོང་ཀྲོའུ་བྲག་དཀར་རྫོང་ཆུ་སྔོན་གྲོང་རྡལ་འབྲས་ཐང་གྲོང་ཚོའི་དེ་སྔའི་རྩིས་པ་ཁུང་ཀྲན་ཧུའུ་ཡིས་གྲོང་ཚོའི་མཉམ་སྡེབ་མ་དངུལ་ཧམ་བཟུང་དང་གཞན་སྤྱོད་བྱས་པའི་གནད་དོན། ཡུལ་ཤུལ་བོད་རིགས་རང་སྐྱོང་ཀྲོའུ་རྫ་སྟོད་རྫོང་ཕྱི་རུག་ཤང་སྟོད་ཤོག་གྲོང་ཚོའི་གྲོང་ཚོ་ཨུ་ལྷན་གྱི་དེ་སྔའི་ཀྲུའུ་རེན་རྒྱ་ཕྱུག་བསྟན་ཆོས་ཀྱིས་རྩྭ་རའི་ཁ་གསབ་དངུལ་ཧམ་ཟ་བྱས་པའི་གནད་དོན། རྨ་ལྷོ་བོད་རིགས་རང་སྐྱོང་ཀྲོའུ་རེབ་གོང་གྲོང་ཁྱེར་ཞོ་འཕོང་དཔྱིས་ཤང་ཞོ་འཕོང་དཔྱིས་གྲོང་ཚོའི“ཨུ་ལྷན་གཉིས”ཀྱིས་གྲོང་ཚོའི་མཉམ་སྡེབ་མ་དངུལ་སྒྲིག་འགལ་ངང་སྤྱད་པའི་གནད་དོན། མགོ་ལོག་བོད་རིགས་རང་སྐྱོང་ཀྲོའུ་རྨ་སྟོད་རྫོང་མཛོ་རྒན་རྭ་བ་གྲོང་རྡལ་མཚོ་རུག་གྲོང་ཚོའི་ཏང་ཀྲི་པུའི་དེ་སྔའི་རྩ་འཛུགས་ཨུ་ཡོན་ཚེ་སྐྱབས་ཀྱིས་དབུལ་སྐྱོར་རོགས་རེས་མ་དངུལ་ཧམ་བཟུང་བྱས་པ་སོགས་ཀྱི་གནད་དོན་བཅས་རེད།