ཉེ་དུས། རང་སྐྱོང་ལྗོངས་ཚོང་དོན་ཐིང་དང་། རང་སྐྱོང་ལྗོངས་འཕེལ་སྒྱུར་ཨུ་ལྷན། རང་སྐྱོང་ལྗོངས་ནོར་སྲིད་ཐིང་བཅས་སྡེ་ཚན་3གྱིས《འཛད་རྫས་རྙིང་པ་གསར་བརྗེས་ཀྱི་འབྲེལ་ཡོད་ལས་དོན་ལེགས་གཏོང་དང་ལེགས་སྒྲིག་བྱ་རྒྱུའི་སྐོར་གྱི་བརྡ་ཐོ》བཏོན་པ་རེད། བརྡ་ཐོའི་ནང་ཁ་གསབ་རིགས་ཀྱི་ཐབ་ཚང་དང་གསང་སྤྱོད་ཡོ་ཆས་མང་དུ་གཏོང་རྒྱུ་དེ་རིགས་37བར་མང་དུ་བཏང་བ་དང་རླངས་འཁོར་གསར་པ་བརྗེ་པོ་རྒྱག་པའི་ཐད་དེ་སྔའི་རྨང་གཞིའི་ཐོག་སྒོར་2000མང་དུ་གཏོང་རྒྱུ་དང་གནས་སྐབས་ཀྱི་འཁོར་རྟགས་དང་འཁོར་རྟགས་མེད་པ་སོགས་ཀྱི་གློག་སྒུལ་རྐང་འཁོར་རྙིང་པ་གསར་བརྗེས་ལ་ཁ་གསབ་སྤྲོད་རྒྱུ་ཡིན་པ་རེད།

ཐབ་ཚང་དང་གསང་སྤྱོད་ཀྱི་ཡོ་ཆས་ཐོག་ཉལ་ཆས་དང་། ས་གདན། འགེལ་རུམ། ཤེལ་ཡོལ་བཅས་ཁྱིམ་སྤྱོད་འཁལ་འཐག་ཐོན་རྫས་རིགས་4དང་དེ་བཞིན་ཁྱིམ་སྤྱོད་གསོ་རླུང་བཟོ་ཆས་དང་གསོ་རླུང་བླུགས་སྣོད་སོགས་ཁྱིམ་སྤྱོད་གསོ་རླུང་བཟོ་བའི་སྒྲིག་ཆས་གསར་སྣོན་བྱས་ཡོད། ཁ་གསབ་ཚད་གཞི་དེ《བོད་རང་སྐྱོང་ལྗོངས་ཚོང་དོན་ཐིང་སོགས་སྡེ་ཚན་བདུན་གྱིས་འཛད་རྫས་རྙིང་པ་གསར་བརྗེས་ལ་རྒྱབ་སྐྱོར་ཤུགས་ཆེན་བྱ་རྒྱུའི་སྐོར་གྱི་ཁ་གསབ་བརྡ་ཐོ》(གཤམ་དུ་ཁ་གསབ་བརྡ་ཐོ་ཞེས་བསྡུ་རྒྱུ)ཡི་ནང་ཐབ་ཚང་དང་གསང་སྤྱོད་ཡོ་ཆས་རྙིང་པ་གསར་བརྗེས་ལ་རྒྱབ་སྐྱོར་བྱ་རྒྱུའི་ཁ་གསབ་ཚད་གཞི་ལྟར་ལག་བསྟར་བྱ་རྒྱུ་སྟེ། སྒོར་500ལོན་ཚེ་སྒོར་100གཅོག་རྒྱུ་དང་། སྒོར་1500ལོན་ཚེ་སྒོར་300གཅོག་རྒྱུ། སྒོར་2000ལོན་ཚེ་སྒོར་400གཅོག་རྒྱུ། སྒོར་3000ལོན་ཚེ་སྒོར་600གཅོག་རྒྱུ། སྒོར་5000ལོན་ཚེ་སྒོར་1000གཅོག་རྒྱུ་བཅས་གཞིར་བཟུང་ཁ་གསབ་སྤྲོད་རྒྱུ་རེད།

རླངས་འཁོར་བརྗེ་ལེན་གསར་སྒྱུར་གྱི་ཁ་གསབ་ཚད་གཞིའི་ཐད། ཁ་གསབ་བརྡ་ཐོ་ཁྱབ་བསྒྲགས་བྱས་ཉིན་ནས་ཟླ་12ཚེས་31ཉིན་བར(ཉིན་དེ་ཚུད་པ)མི་སྒེར་གྱི་འཛད་སྤྱོད་པས་རང་ཉིད་ཀྱི་མིང་ཐོག་ནས་ཉིས་བརྒྱུད་རླངས་འཁོར་བཙོངས་པ་དང་འབྲེལ་རླངས་འཁོར་གསར་པ་ཉོས་པར་དེ་སྔའི་ཁ་གསབ་ཚད་གཞིའི་རིམ་པ་ཁག་གི་རྨང་གཞིའི་ཐོག་སྒོར་2000མང་དུ་གཏོང་རྒྱུ་ཡིན་པ་སྟེ། རླངས་འཁོར་གཅིག་པུའི་རིན་གོང་དེ་ཚད་གཞིའི་རིན་གོང་དུ་བྱས་ནས་སྒོར་ཁྲི་5(ཚུད་མེད་པ)མན་ལ་ཁ་གསབ་སྒོར་4000དང་། སྒོར་ཁྲི་5(ཚུད་པ)ཡན་དང་སྒོར་ཁྲི་10(ཚུད་མེད་པ)མན་ལ་ཁ་གསབ་སྒོར་6000 སྒོར་ཁྲི་10(ཚུད་པ)ཡན་དང་སྒོར་ཁྲི་15(ཚུད་མེད་པ)མན་ལ་ཁ་གསབ་སྒོར་9000 སྒོར་ཁྲི་15(ཚུད་པ)ཡན་དང་སྒོར་ཁྲི་20(ཚུད་མེད་པ)མན་ལ་ཁ་གསབ་སྒོར་13000 སྒོར་ཁྲི་20(ཚུད་པ)ཡན་ལ་ཁ་གསབ་སྒོར་17000བཅས་སྤྲོད་རྒྱུ་ཡིན་པ་རེད། འཛད་སྤྱོད་བྱེད་མཁན་ཞིང་འབྲོག་མང་ཚོགས་ཡིན་རིགས་གོང་གསལ་གྱི་ཁ་གསབ་ཚད་གཞིའི་རྨང་གཞིའི་ཐོག་ཁ་གསབ་སྒོར་2000མང་དུ་གཏོང་རྒྱུ་དང་། ནུས་རྒྱུ་གསར་པའི་རླངས་འཁོར་གསར་པ་ཉོ་མཁན་ལ་གོང་གསལ་གྱི་ཁ་གསབ་ཚད་གཞི་ཁག་གི་རྨང་གཞིའི་ཐོག་ཁ་གསབ་སྒོར་1000མང་དུ་གཏོང་རྒྱུ་ཡིན་པ་རེད།

གློག་སྒུལ་རྐང་འཁོར་ཐད“ཁ་གསབ་ཀྱི་ཚད་གཞི་མཐོ་རུ་བཏང་བ་མ་ཟད། ཁྱབ་ཁྱོན་ཡང་ཆེ་རུ་བཏང་ནས་དམིགས་བསལ་འཁོར་རྟགས་དང་། གནས་སྐབས་འཁོར་རྟགས། འཁོར་རྟགས་མེད་པ་བཅས་ཀྱི་གློག་སྒུལ་འཁོར་རིགས་རྙིང་པ་ཁ་གསབ་ལོངས་སྤྱོད་བྱེད་ཁོངས་སུ་བཅུག་ཡོད”རང་སྐྱོང་ལྗོངས་ཚོང་དོན་ཐིང་འཛད་སྤྱོད་ཡར་སྐུལ་ཁྲུའི་ཁྲུའུ་ཀྲང་གཞོན་པ་དབྱང་ཀྲན་ཧུའེ་ཡིས་གློག་སྒུལ་རྐང་འཁོར་གྱི་ཁ་གསབ་ཚད་གཞི་དེ་གོང་གི་རླངས་འཁོར་ཉོ་སྒྲུབ་ཀྱི་རིན་གོང་གསར་པ་ལྟར་རིམ་པ་དབྱེ་ནས་ཁ་གསབ་སྤྲོད་པ་ནས་ཐད་ཀར་ཐེངས་གཅིག་ལ་ཁ་གསབ་སྒོར་500སྤྲོད་པའི་བར་ལེགས་སྒྲིག་བྱས་པ་དང་། ཁ་གསབ་ལོངས་སུ་སྤྱོད་སྐབས་རླངས་འཁོར་ཉོ་སྒྲུབ་ཀྱི་རིན་གོང་ལ་ཚོད་འཛིན་བྱ་རྒྱུ་མིན་པ་རེད། ལིའི་གྱེས་རྡུལ་གསོག་ནུས་གློག་རྫས་རྙིང་པའི་གློག་སྒུལ་རྐང་འཁོར་ཕྱིར་སློག་བྱེད་པ་དང་འབྲེལ་ཞ་སྐྱུར་གློག་རྫས་ཀྱི་གློག་སྒུལ་རྐང་འཁོར་བརྗེ་ཉོ་བྱས་རིགས་ལ་ད་དུང་དེ་སྔའི་ཁ་གསབ་བརྡ་ཐོའི་ནང་གཏན་འཁེལ་བྱས་པའི་ཁ་གསབ་ཚད་གཞི་གཞིར་བཟུང་ཐེངས་གཅིག་ལ་སྒོར་600ཁ་གསབ་སྤྲོད་རྒྱུ་རེད། འོན་ཀྱང་མི་རེའི་གློག་སྒུལ་རྐང་འཁོར་གསར་པ་རེར་ཁ་གསབ་ཐེངས་རེ་ལས་སྤྲོད་མི་ཆོག་པ་མ་ཟད། རླངས་འཁོར་རྙིང་པའི་ཐོ་འགོད་དུས་ཚོད་དེ་རང་ཉིད་ཀྱི་མིང་ཐོག་ནས་ངེས་པར་དུ་2024ལོའི་ཟླ་9ཚེས་1ཉིན(ཉིན་དེ་རང་ཚུད་མེད་པ)གོང་ཐོ་འགོད་བྱེད་རིགས་ཡིན་དགོས།