སྙན་འཇེབས་ལྡན་པའི་རོལ་དབྱངས་གྲགས་མ་ཐག བོད་ཆས་སྤྲས་པའི་ཕྲུ་གུ་ཚོ་དང་གཡག་རྩེད་འཁྲབ་མཁན་ཕྲུ་གུ་ཚོ་ལུས་རྩལ་ཁང་དུ་འོང་ཞིང་། ལ་ལས་འཁྲུག་ཆ་དོད་པའི་ཞབས་བྲོ་འཁྲབ་པ་དང་ལ་ལས་གཡག་རྩེད་འཁྲབ་སྟོན་བྱས་ཏེ། སྤོབས་ཉམས་དང་སེམས་ཤུགས་ཀྱིས་ཕྱུག་པའི་གངས་ལྗོངས་ས་མཐོའི་དཔའ་ངར་དང་སྙིང་སྟོབས་མཚོན་པར་བྱས་པ་མ་ཟད། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་གསོན་ཉམས་དོད་པའི་རྣམ་པའང་མངོན་པར་བྱས་པ་ལས། ལུས་རྩལ་ཁང་དུ་ཡོད་པའི་ལྟད་མོ་བ་ཚང་མས་མི་རིགས་ཀྱི་སྲོལ་རྒྱུན་ལུས་རྩལ་རིག་གནས་ལ་བཅངས་པའི་ཁོང་ཚོའི་དགའ་ཞེན་དང་སྤོབས་སེམས་ཚོར་ཡོད།

གཞིས་རྩེ་གྲོང་ཁྱེར་དིང་རི་རྫོང་ནས་ཡིན་པའི་དོན་ལྡན་གྱི་ངོས་ནས་བརྗོད་ན་འཁྲབ་སྟོན་འདི་ལྟ་བུར་རྒྱུས་མངའ་ཆེན་པོ་ཡོད། འཁྲབ་སྟོན་བརྒྱུད་ཕ་ཡུལ་གྱི་འཚོ་བའི་རྣམ་པ་རྒྱལ་ཡོངས་སུ་སྟོན་ཐུབ་པ་ལས་ཁོ་པར་དགའ་ཚོར་ཆེན་པོ་བྱུང་། ཁོ་པ་དང་བསྟན་འཛིན་ཆོས་སྐྱིད་ནི་ཕྲུ་གུ་20ཡི་ནང་ནས་མཐོ་འབྲིང་ལོ་རིམ་གསུམ་པའི་སློབ་མའི་གྲས་ཤིག་ཡིན་ཞིང་། ཁོ་པ་ཚོས་ད་དུང་ཚོགས་འདུ་ཆུང་ཆུང་ཞིག་ཀྱང་འཚོགས་ནས་སྦྱོང་བརྡར་དང་སློབ་སྦྱོང་ཇི་ལྟར་བཀོད་སྒྲིག་བྱེད་པའི་ཐད་ལ་གྲོས་བསྡུར་བྱས། མི་རིགས་ཀྱི་འདུ་ཚོགས་གཟབ་རྒྱས་དེའི་ཐོག་ཕ་ཡུལ་གྱི་ཉམས་འགྱུར་དང་ཁྱད་ཆོས་མངོན་ཐུབ་པས། ཁོ་ཚོ་ཚང་མ་དེའི་ཐད་མཐའ་འཁྱོངས་བྱེད་རྒྱུའི་ངོས་འཛིན་གཅིག་མཐུན་བྱུང་།

ད་རེས་ཧའེ་ནན་དུ་ཡོང་བའི་བསམ་འདུན་སྐོར་གླེང་སྐབས། དོན་ལྡན་གྱིས“མི་རིགས་གཞན་གྱི་རིག་གནས་ཤེས་རྟོགས་མང་ཙམ་བྱེད་ལ། ང་ཚོ་བོད་མི་རིགས་ཀྱི་རིག་གནས་དེ་མི་རིགས་གཞན་དང་མཉམ་སྤྱོད་ཀྱང་བྱས་ཏེ། མི་རིགས་སོ་སོའི་གཅིག་མཚུངས་དང་གཅིག་མཚུངས་མིན་པའི་ཆ་ཤེས་རྟོགས་བྱས་ནས་རང་ཉིད་ཀྱི་མཐོང་རྒྱ་ཆེ་རུ་གཏོང་ཐུབ་པའི་རེ་བ་ཡོད”ཅེས་བཤད། ཁོ་པར་ད་དུང་རེ་བ་གཞན་ཞིག་ཡོད་པ་ནི“ཕ་ཡུལ་དུ་མཚོ་མང་པོ་ཡོད་ཀྱང་རྒྱ་མཚོ་མེད་པས་རྒྱ་མཚོར་ལྟ་འདོད་ཆེན་པོ་ཡོད་པ”དེ་རེད།

དཔེ་དེབ་ཁྲི་ཕྲག་བཀླགས། ལེ་དབར་ཁྲི་ཕྲག་འགྲིམས་ཟེར་བ་ལྟར། དཔེ་དེབ་ཀྱི་ནང་དོན་ཁོ་ནར་ཡིད་ཚིམས་ནས་མ་བསྡད་པར་ལམ་བུ་ལེ་དབར་མང་པོ་འགྲིམས་ནས་ཀྲུང་ཧྭ་མི་རིགས་ཀྱི་སྣ་མང་རིག་གནས་དང་མི་རིགས་ཁག་གི་བཀྲག་མདངས་འཚེར་ས་དངོས་སུ་ཉམས་ལེན་བྱེད་པ་དེ་ཧ་ཅང་གལ་ཆེན་པོ་ཞིག་རེད། དངོས་སུ་ཉམས་ལེན་གྱི་སློབ་གསོ་འདི་ལྟ་བུ་ཁོ་པ་ཚོའི་ངོས་ནས་བརྗོད་ན་དེ་བས་བག་ཆགས་ཟབ་པ་དང་དེ་བས་གསོན་ཉམས་ལྡན་པ་ཞིག་རེད་སྙམ་གྱི་འདུག་ཅེས་རུ་སྣེ་འཁྲིད་མཁན་པེ་ཅིང་བོད་ལྗོངས་སློབ་འབྲིང་གི་སློབ་སྤྱི་གཞོན་པ་ལིའུ་ཕུང་གིས་བཤད།

ཁོང་གིས་ཀྱང་ད་ཆའི་ཕྲུ་གུ་ཚོ་ནི་བསོད་བདེ་ཆེན་པོ་རེད། དུས་རབས་གོང་མར་སློབ་གྲྭ་བཙུགས་མ་ཐག་པའི་སྐབས་སུ་མཚོ་བོད་ལྕགས་ལམ་ཡང་སྐྲུན་བཞིན་ཡོད་པས་ཕྲུ་གུ་མང་པོ་ཞིག་ལོ་གཅིག་ལ་ཐེངས་གཅིག་ཀྱང་ལོག་ཐུབ་ཀྱི་མེད། འོན་ཀྱང་ད་ཆ་འཕེལ་རྒྱས་ཕྱིན་པ་དང་ཆབས་ཅིག་ལོ་ལྟར་གྱི་དབྱར་གསེང་དང་དགུན་གསེང་ལ་ཕྲུ་གུ་ཚོ་ལོག་གི་ཡོད། “ང་ཚོས་ཀྱང་ཕྲུ་གུ་ཚོར་ང་ཚོར་གོ་སྐབས་དེ་འདྲ་བྱུང་བ་ནི་རྒྱལ་ཁབ་འཕེལ་རྒྱས་བྱུང་བ་དང་ཁ་འབྲལ་ཐབས་མེད་ཅེས་བརྗོད་ཀྱི་ཡོད། ཁོང་ཚོས་སྤྱི་ཚོགས་འཕེལ་རྒྱས་ཀྱི་གྲུབ་འབྲས་ལོངས་སུ་སྤྱོད་ཐུབ་པ་བྱུང་བ་ནི་ཧ་ཅང་དགའ་འོས་པ་ཞིག་རེད”ཅེས་བཤད།