ཀྲུང་གོ་དང་ཨ་ཧྥེ་རི་ཁའི་མཉམ་ལས་ཀྱིས་སྨྱུག་མའི་ཐོན་ལས་ཨ་ཧྥེ་རི་ཁར་འཕེལ་རྒྱས་མྱུར་པོ་ཡོང་བར་རམ་འདེགས་བྱས་པ།
ཆ་ཏེའི་སྨྱུག་མའི་ཐོན་རྫས་གསར་སྤེལ་ལག་རྩལ་གྱི་གསོ་སྦྱོང་འཛིན་གྲྭའི་སློབ་ཁྲིད་དུས་མཚམས་མཇུག་འགྲིལ་བའི་མཛད་སྒོ་ཉིན་ཤས་གོང་སི་ཁྲོན་ཞིང་ཆེན་མེ་ཧྲན་གྲོང་ཁྱེར་ཆིང་ཧྲེན་རྫོང་དུ་འཚོགས་པ་རེད། ཆིང་ཧྲེན་རྫོང་དུ་གནས་པའི་ཀྲུང་གོའི་སྨྱུག་སླས་ལག་རྩལ་གྲོང་གི་གསོ་སྦྱོང་རྟེན་གཞིར་གཙོ་གཉེར་བྱེད་མཁན་ཕྱོགས་ཀྱིས་ཆ་ཏེ་སློབ་མའི་བརྩམས་ཆོས་འགྲེམས་སྟོན་བྱས་པ་དང་འབྲེལ་སློབ་མ་ཚང་མར་སློབ་མཇུག་འགྲིལ་བའི་ལག་ཁྱེར་སྤྲད་པ་རེད། ཀྲུང་གོ་དང་ཆ་ཏེའི་དགེ་སློབ་ཚོས་མཉམ་དུ་རིག་རྩལ་ལེ་ཚན་འཁྲབ་སྟོན་བྱས་པ་དང་གར་སྟེགས་ཐོག་རྒྱལ་ཁབ་གཉིས་པོའི་ཁྱད་ཆོས་ལྡན་པའི་མི་རིགས་ཀྱི་ཞབས་བྲོ་འཁྲབ་པ་རེད།
གསོ་སྦྱོང་འཛིན་གྲྭ་ནི་ཀྲུང་གོའི་ཚོང་དོན་པུས་གཙོ་གཉེར་བྱས་པ་དང་རྒྱལ་ཁབ་ནགས་ལས་དང་རྩྭ་ཐང་ཅུས་དོ་དམ་ལས་བྱེད་སློབ་གླིང་གིས་གཉེར་འགན་འཁུར་བ་ཞིག་ཡིན་ཞིང་། ཆ་ཏེ་ཁོར་ཡུག་པུའུ་དང་། ཞིང་ལས་པུའུ། ཕྱི་འབྲེལ་པུའུ་བཅས་ཀྱི་དཔོན་རིགས་30གསོ་སྦྱོང་འཛིན་གྲྭར་ཞུགས་ཡོད། གསོ་སྦྱོང་འཛིན་གྲྭས་སློབ་ཁང་དུ་སློབ་ཁྲིད་དང་། ལྟ་སྐོར་རྟོག་ཞིབ། བཞུགས་མོལ་སྤེལ་རེས། ས་གནས་ས་ཐོག་གི་སློབ་ཁྲིད། ཆེད་ལས་ལག་ལེན། ཆེད་ལས་དངོས་སྦྱོང་སོགས་སློབ་ཁྲིད་བྱེད་སྟངས་སྣ་ཚོགས་སྤྱད་དེ་གཙོ་གནད་ཐོག་སྨྱུག་མའི་ནགས་ཚལ་ཕན་ཆེའི་གཉེར་སྐྱོང་དང་དོ་དམ་དང་། སྨྱུག་མའི་སྤུས་རྟགས་འཕེལ་རྒྱས་དང་ཁྲོམ་ར་གསར་སྤེལ། ཀྲུང་གོའི་སྐྱེ་ཁམས་ལ་བརྟེན་ནས་དབུལ་པོ་ཉུང་གཏོང་གི་ལག་ལེན། ཀྲུང་གོའི་སྨྱུག་མའི་ཐོན་ལས་སྲིད་ཇུས། སྨྱུག་མའི་བཟོ་སྐྲུན་སོགས་བརྗོད་དོན་གཙོ་བོར་དམིགས་ཏེ་སློབ་ཁྲིད་སྤེལ་རེས་བྱས་པ་རེད། གསོ་སྦྱོང་བྱེད་རིང་སློབ་མ་ཚོས་པེ་ཅིང་དུ་ཡོད་པའི་རྒྱལ་སྤྱིའི་སྨྱུག་མའི་རྩ་འཛུགས་སྤྱི་ཁྱབ་པུའུ་དང་། པེ་ཅིང་ནགས་ལས་སློབ་ཆེན། ཀྲུང་གོའི་སྨྱུག་སླས་ལག་རྩལ་གྲོང་གི་གསོ་སྦྱོང་རྟེན་གཞི་བཅས་སུ་ལྟ་སྐོར་དང་བརྟག་ཞིབ་བྱས་ཏེ་སྨྱུག་མའི་ཐོན་ལས་འཕེལ་རྒྱས་ཀྱི་ཉམས་མྱོང་མཉམ་སྤྱོད་བྱས་ནས་སྨྱུག་སླས་ཁྱབ་ཁོངས་ཀྱི་རྒྱལ་སྤྱིའི་མཉམ་ལས་ལ་སྐུལ་འདེད་བཏང་བ་རེད།
ཀྲུང་གོའི་སྨྱུག་སླས་ལག་རྩལ་གྲོང་གི་གསོ་སྦྱོང་རྟེན་གཞིར་ཆ་ཏེའི་སློབ་མ་ཚོས་སྨྱུག་མ་འདེམས་པ་དང་། ཚོས་རྒྱག་པ། སྨྱུག་མ་སླ་བ་སོགས་ཀྱི་ལག་ཤེས་ལ་ཧ་ཅང་དགའ་པོ་བྱེད་ཀྱི་ཡོད། ཆ་ཏེ་ཞིང་ལས་པུའི་དཔོན་རིགས་ཏར་ཁཱ་ལཱ་ཡིས“འབྱུང་འགྱུར་རང་ཉིད་ཀྱིས་སྦྱངས་པའི་ཤེས་བྱ་རྣམས་ཆ་ཏེ་རུ་ཁྱབ་གདལ་བཏང་སྟེ་ཀྲུང་གོའི་སྨྱུག་མའི་ཐོན་ལས་འཕེལ་རྒྱས་ཀྱི་ཉམས་མྱོང་དེ་ཨ་ཧྥེ་རི་ཁར་གཞི་ཚུགས་ཐུབ་པ་བྱེད་ཀྱི་་ཡིན”ཞེས་བཤད་པ་དང་། ཁོང་གིས་ཆ་ཀྲུང་རྒྱལ་ཁབ་གཉིས་པོས་བཟོ་ལས་ཅན་དང་ཞིང་ལས་དེང་རབས་ཅན་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བརྒྱབ་ནས་གཉིས་ཁེ་གཉིས་ཕན་ཡོང་བའི་རེ་སྒུག་བྱེད་ཀྱི་ཡོད།
ཀྲུང་གོ་དང་ཨ་ཧྥེ་རི་ཁ་ཕྱོགས་གཉིས་པོས་སྐུལ་འདེད་ཤུགས་ཆེན་བཏང་བར་བརྟེན། ཀྲུང་གོའི་སྨྱུག་མའི་སྣ་ཁ་དང་ལག་རྩལ་ཨ་ཧྥེ་རི་ཁར་ཁྱབ་གདལ་བྱུང་བ་དང་། འདེབས་འཛུགས་བྱེད་མཁན་དང་། ལག་ཤེས་པ། ཞིབ་འཇུག་པ་སོགས་ལས་ཞུགས་ཚོགས་སྤྱིའི་གཞི་ཁྱོན་རྒྱུན་ཆད་མེད་པར་ཆེ་རུ་ཕྱིན་ནས་ཨ་ཧྥེ་རི་ཁའི་ས་གཞི་ཆེ་མོར་སྨྱུག་མའི་ཐོན་ལས་འཕེལ་རྒྱས་མྱུར་པོ་བྱུང་བ་དང་། སྨྱུག་མ་འདི་ཉིད་ཉིན་རེ་བཞིན་ཨ་ཧྥེ་རི་ཁའི་དམངས་ཚོགས་ཀྱི་མིག་ནང་དབུལ་སྒྲོལ་ཕྱུག་འགྱུར་དོན་གཉེར་དང་རྒྱུན་མཐུད་ཆོག་པའི་འཕེལ་རྒྱས་མངོན་འགྱུར་བྱེད་པའི“ལྗང་མདོག་གསེར”ལ་གྱུར་བཞིན་ཡོད།