ཉེ་ཆར་བཟོ་ལས་དང་ཆ་འཕྲིན་ཅན་པུའུ་སོགས་སྡེ་ཚན་12ཀྱིས《གཞི་ཁྱོན་ཆེན་པོས་5Gསྤྱོད་པའི“གྲུ་དར་འཕྱར་བའི”བྱ་སྤྱོད་ཀྱི་རིམ་སྤོར་ཇུས་གཞི》མཉམ་དུ་བཀྲམ་པའི་ནང་2027ལོའི་ལོ་མཇུག་ཏུ་སླེབས་སྐབས“ནུས་པ་ཀུན་འཕྲོད་དང་། བཀོལ་སྤྱོད་ཁྱབ་གདལ། ནུས་མང་ཀུན་ཕན”བཅས་ཀྱི་འཕེལ་རྒྱས་རྣམ་པ་ཞིག་ཆགས་པར་བྱས་ཏེ་གཞི་ཁྱོན་ཆེན་པོས་5Gཕྱོགས་ཡོངས་ནས་སྤྱོད་ཐུབ་པ་བྱེད་དགོས་ཞེས་བཏོན་ཡོད་པ་རེད།

5Gའདི་ཉིད་གྲངས་འཛིན་དཔལ་འབྱོར་དུས་རབས་ཀྱི་བྱ་དངོས་ཡོད་ཚད་ཕན་ཚུན་སྦྲེལ་མཐུད་དང་གྲངས་གཞི་འཁོར་རྒྱུག་གི་འགག་རྩའི་ཆ་འཕྲིན་གྱི་རྨང་གཞིའི་སྒྲིག་བཀོད་ཅིག་ཡིན་པའི་ངོས་ནས། ཡོངས་ཁྱབ་སྦྲེལ་མཐུད་ལ་བརྟེན་ནས་མི་ཐབས་རིག་ནུས་དང་གྲངས་གཞི་ཆེ་མོ་སོགས་གྲངས་འཛིན་ལག་རྩལ་སྣ་ཚོགས་མཉམ་འདྲེས་གསར་གཏོད་ལ་སྐུལ་འདེད་གཏོང་བ་དེ་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བའི་ལྷུ་ཚིགས་གལ་ཆེན་ཞིག་ཏུ་གྱུར་ཡོད། ཇུས་གཞི་ལྟར་ན། 2027ལོའི་ལོ་མཇུག་ཏུ་སླེབས་སྐབས་མི་ཁྲི་རེར་5Gཡི་སྦྲེལ་ཚུགས་38ཡོད་པ་དང་། མི་སྒེར་ལ་5Gཁྱབ་ཚད་85%ལས་བརྒལ་བ། 5Gདྲ་རྒྱ་སྦྲེལ་མཐུད་བྱེད་ཚད་ཀྱི་བསྡུར་ཚད་75%ལས་བརྒལ་བ། 5Gཡི་ཟོག་འབྲེལ་དྲ་རྒྱའི་མཐའ་སྣེར་སྦྲེལ་མཐུད་བྱེད་ཚད་དུང་ཕྱུར་1ལས་བརྒལ་བ་བཅས་བྱ་རྒྱུ་ཡིན་པ་རེད།

ཇུས་གཞིའི་ནང་བཀོལ་སྤྱོད་དང་། ཐོན་ལས། དྲ་རྒྱ། སྐྱེ་ཁམས་བཅས་ཕྱོགས་བཞིའི་ཐད་ཀྱི་ལས་འགན་གཙོ་བོ་བཀོད་སྒྲིག་བྱས་ནས་གཞི་ཁྱོན་ཆེན་པོས་5Gསྤྱོད་པའི་ཐོན་ལས་འཁོར་འབྲེལ་ཧྲིལ་པོའི་འདེགས་སྐྱོར་ནུས་པ་དང་། དྲ་རྒྱ་ཡོངས་ཀྱི་ཞབས་ཞུའི་ནུས་པ། སྐྱེ་ཁམས་ཀྱི་རིམ་པ་མང་བའི་མཐུན་སྦྱོར་ནུས་པ་བཅས་མུ་མཐུད་ཆེ་རུ་བཏང་སྟེ། 5Gཡི་ཁྱབ་རྒྱ་དེ་བས་ཆེ་བ་དང་། རིམ་པ་དེ་བས་ཟབ་པ། ཆུ་ཚད་དེ་བས་མཐོ་བ་བཅས་ཀྱི་ཕྱོགས་མང་གི་ནུས་པ་ཐོན་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། གཞི་ཁྱོན་ཆེན་པོས་5Gསྤྱོད་པ་དེས་དུས་རབས་གསར་པའི་ཆ་འཕྲིན་ལག་རྩལ་ཕྱོགས་ཡོངས་དང་འཁོར་འབྲེལ་ཧྲིལ་པོར་ཁྱབ་གདལ་དང་བེད་སྤྱོད་པར་སྐུལ་ཁྲིད་ཐུབ་རྒྱུ་དང་། སྲོལ་རྒྱུན་གྱི་ཐོན་ལས་རྩེ་གྲ་ཅན་དང་། རིག་ནུས་ཅན། ལྗང་མདོག་ཅན་བཅས་ལ་ཕྱོགས་སྒྱུར་རིམ་སྤོར་ཐུབ་རྒྱུ། དངོས་ཚན་དཔལ་འབྱོར་དང་གྲངས་འཛིན་དཔལ་འབྱོར་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་རྒྱུ་རེད། གོམ་སྟབས་རྗེས་མར་བཟོ་ལས་དང་ཆ་འཕྲིན་ཅན་པུས་འབྲེལ་ཡོད་སྡེ་ཚན་དང་མཉམ་དུ་གཞི་ཁྱོན་ཆེན་པོས་5Gསྤྱོད་པའི་འབྲེལ་ཡོད་ལས་དོན་ལ་སྐུལ་འདེད་བཏང་ནས་5Gསྤྱོད་པའི་གཞི་ཁྱོན་ཆེ་རུ་དང་སྤུས་ཚད་ནུས་ལྡན་ངང་མཐོ་རུ་བཏང་སྟེ། བཟོ་ལས་ཅན་གསར་པ་དང་ཆ་འཕྲིན་འཕྲིན་གཏོང་ལས་རིགས་ཀྱི་དེང་རབས་ཅན་ལ་འདེགས་སྐྱོར་བྱ་རྒྱུ་ཡིན་པ་རེད།