ཉིན་ཤས་གོང་། སྣེ་གདོང་ཆུས་ཡུམ་བུ་གླིང་དུ་2024ལོའི་ལྷོ་ཁའི“སེ་འབྲུ་བུམ་པའི”མི་བརྒྱད་རེའི་རྩྭ་ཐང་རྐང་རྩེད་སྤོ་ལོའི་གདན་ཞུས་འགྲན་བསྡུར་མཇུག་འགྲིལ་བ་རེད།

གསར་འགོད་པས་ཤེས་རྟོགས་བྱས་པ་ལྟར་ན། གཟའ་འཁོར་གཅིག་རིང་གི་འགྲན་བསྡུར་ནང་ཧུའུ་ནན་དང་། ཧུའུ་པེ། སི་ཁྲོན། བོད་ལྗོངས་སོགས་ཀྱི་འཐུས་མིའི་རུ་ཁག་9ཡི་རུ་མི་162ཀྱིས་རང་ཉིད་ཀྱི་སྤོ་ལོ་རྒྱག་རྩལ་ལ་ཚོད་བགམ་གང་ལེགས་བྱས་ཏེ་འགྲན་བསྡུར་གྱི་ཉམས་མྱོང་རྩ་ཆེན་བསགས་ཡོད། ལུས་རྩལ་པ་རྣམས་ཀྱིས་མཐུན་སྒྲིལ་གཞོགས་འདེགས་དང་། སྤྲོ་སེམས་ཆེན་པོ་དང་སྤོ་ལོ་རྒྱག་རྩལ་ཡག་པོར་བརྟེན་ནས་རྐང་རྩེད་སྤོ་ལོའི་དགའ་སྟོན་ཡིད་དབང་འཕྲོག་པ་ཞིག་བཤམས་པས། ལྟད་མོ་བའི་དགའ་བསུ་ཆེན་པོ་ཐོབ་ཡོད་པ་རེད།

མཐའ་བསྡུར་ནང་བོད་རང་སྐྱོང་ལྗོངས་ཀྱི་འཐུས་མིའི་རུ་ཁག་དང་ཧུའུ་པེ་ཞིང་ཆེན་འཐུས་མིའི་རུ་ཁག་གིས་འགྲན་བསྡུར་ཛ་དྲག་བྱས་ཤིང་། སྤོ་ལོ་འཕྲོག་རེས་དང་། སྤྲོད་རེས། སྒོ་ནང་འཕེན་པ་སོགས་ཀྱི་ངོ་མཚར་ཆེ་བའི་ལྟད་མོ་རེ་རེ་ལས་མཐུན་སྒྲིལ་གཞོགས་འདེགས་ཀྱི་མཉམ་སྡེབ་འདུ་ཤེས་དང་ཞུམ་མེད་ཡར་བརྩོན་གྱི་བློ་སྟོབས་མངོན་ཞིང་། མཐར་བོད་རང་སྐྱོང་ལྗོངས་ཀྱི་འཐུས་མིའི་རུ་ཁག་ལ་ཨང་དང་པོ་ཐོབ་པ་དང་། ཧུའུ་པེ་ཞིང་ཆེན་གྱི་འཐུས་མིའི་རུ་ཁག་ལ་ཨང་གཉིས་པ་ཐོབ་པ། ཧྲའན་ཤིས་ཧྲའན་ཨན་རྐང་རྩེད་སྤོ་ལོའི་སྐྱིད་སྡུག་ལ་ཨང་གསུམ་པ་ཐོབ་པ། བོད་རང་སྐྱོང་ལྗོངས་ཀྱི་འཐུས་མིའི་རུ་ཁག་གི་ཚེ་རིང་དབང་རྒྱལ་དང་བསྟན་འཛིན་རྡོ་རྗེ་ལ་སྒོ་སྲུང་བ་ཡག་ཤོས་དང་སྒོ་ནང་འཕེན་མཁན་ཡག་ཤོས་ཀྱི་མཚན་སྙན་སོ་སོར་ཐོབ་པ་རེད།