འདི་ལོ་ནས་བཟུང་། ལྷ་ས་མཐོ་གསར་ཁུལ་གྱིས“དམངས་ཕན་བསྒྲུབ་རྒྱུ”ཕྱོགས་སྟོན་དུ་བྱས་ནས་མང་ཚོགས་ཀྱི་དགོས་མཁོ་ནས་འགོ་བརྩམས་ཏེ། ཞབས་ཞུའི་ཕན་ནུས་ཆེ་རུ་གཏོང་བ་དང་གཞི་རིམ་བཅོས་སྐྱོང་གཏིང་ཟབ་ཀྱི་འབྲེལ་མཐུད་བྱེད་སྟངས་གསར་པ་འཚོལ་ཞིབ་ཧུར་ཐག་བྱས་ནས། ཕྱོགས་ཡོངས་ནས་བར་ཐག་མེད་པར་དམངས་ཕན་ཞབས་འདེགས་ཞུས་པས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་སྔར་བས་ཆེ་རུ་ཕྱིན་ཡོད།

ལྷ་ས་མཐོ་གསར་ཁུལ་སྲིད་དོན་ཞབས་ཞུའ་ལྟེ་གནས་སུ་སྐྱོད་སྐབས། དེའི་ཁམས་གཙང་ཞིང་གྲལ་སྟར་འགྲིག་པའི་ཚོམས་ཆེན་དང་། དེང་རབས་ཅན་གྱི་ཞབས་ཞུའི་སྒྲིག་ཆས་ཀྱིས་སྐྱེ་བོ་རྣམས་ལ་མཐོང་སྣང་གསར་པ་ཞིག་སྟེར།

སྲིད་དོན་ཞབས་ཞུའི་ཆུ་ཚད་མཐོ་རུ་བཏང་ནས་ལས་སྒྲུབ་ཀྱི་ཁོར་ཡུག་ཡག་ཏུ་དང་ལས་ཕྱོད་ཆེ་རུ་གཏོང་ཆེད། འདི་ལོའི་ཟླ་བཅུ་པར་ལྷ་ས་མཐོ་གསར་ཁུལ་ཏང་གི་ལས་དོན་ཨུ་ལྷན་དང་། དོ་དམ་ཨུ་ལྷན་གྱི་གཅིག་གྱུར་བཀོད་སྒྲིག་འོག ལྷ་ས་མཐོ་གསར་ཁུལ་སྲིད་དོན་ཞབས་ཞུའི་ལྟེ་གནས་དངོས་སུ་སྤྱོད་འགོ་ཚུགས་ཤིང་། ལྟེ་གནས་ཀྱི་ཐོག་བརྩེགས་དང་པོར་ཁེ་ལས་ཀྱི་མགྲོན་བསུའི་ཚོམས་ཆེན་ཡོད་པ་དང་། དེར་ཇ་ཁང་དང་། ཁེ་ལས་གྲོས་མོལ་ཁང་། ཁོ་ཧྥེ་ཁང་སོགས་བཀོད་སྒྲིག་ཞིབ་ཚགས་བཟོས་བྱས་ཡོད་པས། སྤྲོ་སྣང་ལྡན་ཞིང་སྟབས་བདེའི་སྒོ་ནས་ཁེ་ལས་དབར་མཉམ་ལས་སྤེལ་རེས་དང་། རྣམ་གྲངས་གྲོས་མོལ་སོགས་ཀྱི་བྱེད་སྒོ་སྤེལ་བར་མཐུན་རྐྱེན་བསྐྲུན་ཡོད། ཐོག་བརྩེགས་གཉིས་པར་སྲིད་དོན་ཞབས་ཞུའི་ཚོམས་ཆེན་ཡིན་པས་ཅུས(གཞུང་ལས་ཁང)7གྱིས་བྱེད་ནུས་སྡེ་ཚན་མང་པོའི་སྲིད་དོན་ཞབས་ཞུའི་དོན་གནད་སྒྲུབ་ཐུབ་ཀྱི་ཡོད། ཐོག་བརྩེགས་གསུམ་པར་རྒྱལ་ཁབ་ཁྲལ་དོན་སྤྱི་ཁྱབ་ཅུས་ལྷ་ས་གྲོང་ཁྱེར་ཁྲལ་དོན་ཅུས་སྣེའུ་ཁུལ་གསར་ཁྲལ་དོན་ཡན་ལག་ཅུས་ཀྱི་ཀྱི་རིག་ནུས་ཁྲལ་དོན་ཞབས་ཞུའི་ཚོམས་ཆེན་ཡིན་པས། དེར་རིག་ནུས་ཀྱི་ཁྲལ་འཇལ་ཕྱོགས་སྟོན་དང་། 5Gམྱོང་རོལ། སྐར་ཁུང་ལས་སྒྲུབ། ཁྲལ་བསྡུའི་བཅའ་ཁྲིམས་དྲིལ་བསྒྲགས། ཁྲལ་འཇལ་བའི་སློབ་ཚན། ཐག་རིང་ལས་སྒྲུབ་བཅས་ལས་ཁུལ་ཆེན་པོ་དྲུག་བཏོད་པ་དེས་རྒྱ་ཆེའི་མང་ཚོགས་ལ་བྱེད་ནུས་ཆ་ཚང་ཞིང་ལས་ཕྱོད་ཆེ་ལ་སྟབས་བདེ་བའི་ཁྲལ་དོན་ཞབས་འདེགས་ཞུ་ཐུབ་ཀྱི་ཡོད།

ལྷ་ས་མཐོ་གསར་ཁུལ་ཁྲོམ་ར་ལྟ་འདོམས་ཅུས་ཀྱི་རིམ་པ་བཞི་པའི་ཀྲུའུ་རེན་ཁོ་ཡོན་ཚེ་རིང་ལྷ་མོས། “ལྷ་ས་མཐོ་གསར་ཁུལ་སྲིད་དོན་ཞབས་ཞུའི་ཚོམས་ཆེན་ནི་མཐོ་གསར་ཁུལ་གྱི་དོན་དངོས་ལ་གཞིགས་ནས་མཐོ་གསར་ཁུལ་གྱི་ཁེ་ལས་དང་གྲོང་མིར་ཞབས་འདེགས་ཞུ་རྒྱུ་ཕྱོགས་སྟོན་དུ་བྱས་པའི་ཕྱོགས་བསྡུས་ཞབས་ཞུའི་ལས་སྟེགས་ཤིག་རེད། མིག་སྔར་ཞབས་ཞུའི་ལྟེ་གནས་སུ་སྤྱི་ཚོགས་འགན་བཅོལ་དང་། སྨན་བཅོས་འགན་བཅོལ། ཁྲོམ་ར་ལྟ་འདོམས། གྲོང་ལས་སོགས་ཀྱི་སྡེ་ཚན་མང་པོས་སྲིད་དོན་ཞབས་ཞུའི་ཞིབ་མཆན་འགོད་པའི་དོན་གནད་དང་སྲིད་དོན་ཞབས་ཞུའི་དོན་གནད་ཁག་74བསྒྲུབས་ནས་ཁེ་ལས་དང་མི་སྒེར་ལ་སྟབས་བདེ་བའི་གཅིག་འཐུས་རྣམ་པའི་ཞབས་འདེགས་ཞུ་གི་ཡོད”ཅེས་བཤད།

“ཞབས་ཞུའི་ཚོམས་ཆེན་ཧྲིལ་པོའི་ཁོར་ཡུག་ལེགས་ཤིང་ལས་དོན་པ་སེམས་རྩ་འཁོལ་བས། འདི་གར་དོན་དག་གཅོད་པར་ཡོང་མ་ཐག་རང་རང་ལས་སྒོ་གཉེར་སའི་སྐར་ཁུར་མངོན་གསལ་དོད་པོ་མཐོང་གི་འདུག”ཅེས་ལས་སྒོ་སྒྲུབ་པར་ཡོང་བའི་གྲོང་མི་ཞེ་ལགས་ཀྱིས་དེ་ལྟར་བཤད།

ལྷ་ས་མཐོ་གསར་ཁུལ་གྱི་པའེ་དབྱི་ལྷོ་ངོགས་ཁུལ་ཆུང་གི་ལམ་ངོས་གཙང་ཞིང་སྒྲིག་བཀོད་གྲལ་འགྲིགས་པ་མ་ཟད། ལམ་གྱི་གཞོགས་གཉིས་སུ་རྩྭ་རྩི་ཤིང་བཏབ་ནས་སྡོད་མལ་གྱི་ཁོར་ཡུག་མཛེས་པོ་བཟོས་པས་མི་རྣམས་ལ་སྤྲོ་སྣང་དང་བག་ཕེབས་ཀྱི་སྣང་བ་ཞིག་ཡོང་གི་ཡོད། ཞབས་འདེགས་སྔར་བས་རྒྱ་ཆེ་རུ་དང་ཞབས་ཞུའི་ཆུ་ཚད་མཐོ་རུ་གཏོང་ཆེད། 2024ལོར། ལྷ་ས་མཐོ་གསར་ཁུལ་ར་མ་སྒང་ཁྲོམ་གཞུང་གིས་སྡེ་ལས་ལས་རིགས་ལ་སྡེ་ལས་ལས་རིགས་ཏང་རྩ་འཛུགས་འཛུགས་པར་མཛུབ་ཁྲིད་བྱས་ཏེ་གཞི་རིམ་ཏང་རྩ་འཛུགས་ཀྱི་ཆབ་སྲིད་ཀྱི་ལེགས་ཆ་དང་རྩ་འཛུགས་ཀྱི་ལེགས་ཆ་ཆེ་རུ་གཏོང་བར་བརྟེན་ནས་ཐོན་ཁུངས་བཅོས་སྒྲིག་བཟང་སྒྲིག་དང་བསྡུ་སྒྲིལ་ལ་སྐུལ་འདེད་བཏང་སྟེ། འཛུགས་སྐྲུན་བཅོས་སྒྲིག་ཐུབ་པ་དང་བཅོས་སྒྲིག་བྱེད་མཁས་པའི་སྡེ་ལས་ལས་སྒྲུབ་དཔུང་ཁག་ཅིག་གཏོད་རྒྱུར་ཤུགས་སྣོན་བརྒྱབ་ཡོད།

མིག་སྔར། པའེ་དབྱི་ལྷོ་ངོགས་གསར་བརྗེའི་སྡེ་ལས་དང་དོ་བདག་གི་འཐུས་མིས་ཏང་འཛུགས་སྐྱོང་མཉམ་འབྲེལ་དང་མཉམ་སྐྲུན་ལས་དོན་སྤེལ་ཏེ་དུས་བཀག་ནང་གསར་བརྗེའི་གྲོས་མོལ་ཚོགས་འདུ་དང་། སྡེ་ལས་མཉམ་འབྲེལ་ཚོགས་འདུ་སོགས་འཚོགས་ཏེ། གྲོང་མིས་དོ་ཁུར་བྱེད་པའི་སེམས་ནད་སེལ་བ་དང་། དམིགས་བསལ་ཤེས་ལྡན་པའི་དང་བླངས་ཞབས་ཞུའི་རུ་ཁག་གསར་གཏོད་ངང་འཛུགས་པ། བཅའ་ཁྲིམས་དང་། སྨན་བཅོས་བདེ་སྲུང་། དྲ་རྒྱའི་རྒྱབ་སྐྱོར། སྡོད་ཁང་ཉོ་ཚོང་སོགས་ཐད་ཀྱི་ཆེད་ལས་མི་སྣ་འཚོལ་སྡུད། རིགས་ཕྱེ་ནས་དོ་བདག་གི་འདུན་པ་ཐག་གཅོད་བྱེད་རོགས་བཅས་བྱས་པ་མ་ཟད། སྡེ་ཁུལ་སྔོ་ལྗང་དུ་འགྱུར་བའི་ཚད་གཞིར་དཔེ་བལྟས་ནས་སྔོ་སྒྱུར་དང་། ཡལ་ཕྲན་སྐམ་གཅོད། ཆུ་གཏོང་བ་སོགས་ཀྱི་ལས་དོན་བསྒྲུབས་ཏེ་སྡེ་ཁུལ་གྱི་གྲོང་མི་དང་སྡེ་ལས་དབར་གྱི་འབྲེལ་བ་སྔར་བས་མཐུན་འགྲིག་ཡོང་བར་བྱས་པས་སྐྱིད་སྣང་དེ་བས་ཆེ་རུ་སོང་ཡོད།