འདི་ནི་བསྟན་པས(གཡས་ཀྱི་གཉིས་པ)ཆབ་མདོ་གྲོང་ཁྱེར་ཁ་རུབ་ཆུས་འགུ་རོ་གྲོང་རྡལ་དུ་བརྟག་ཞིབ་བྱེད་བཞིན་པ།

གྲོང་གསེབ་སྒྱུར་བཅོས་ཀྱི་ལས་དོན་གཏིང་ཟབ་སྤེལ་རིང་། ཆབ་མདོ་གྲོང་ཁྱེར་གྱི་རི་ཀླུང་ཀུན་ཏུ་མི་དམངས་ཀྱི་ལས་བྱེད་པ་བཟང་པོ་ཞིག་གིས་རྟག་ཏུ་ངལ་བ་རྒྱབ་ཏུ་བསྐྱུར་ནས་ལས་དོན་སྒྲུབ་བཞིན་ཡོད་པ་ཁོང་ནི་ཆབ་མདོ་གྲོང་ཁྱེར་ཞིང་ལས་གྲོང་གསེབ་ཅུས་ཀྱི་རིམ་པ་གསུམ་པའི་བརྟག་ཞིབ་པ་བསྟན་པ་རེད།

བསྟན་པ་ནི་བབ་ཆགས་ཤིང་བློ་རྩ་བརྟན་པའི་ཁམས་པའི་ཕོ་རྒོད་ཅིག་ཡིན་པ་དང་། ལོ་བཅུ་ཕྲག་ཁ་ཤས་ཉིན་གཅིག་ལྟར་ལས་གནས་བརྟན་སྲུང་བྱས་ཏེ། ནམ་ཡང་གྲོང་གསེབ་ཀྱི་ལམ་ཆུང་ལ་ཞུགས་ནས་རོགས་རམ་བྱེད་དགོས་པའི་ཞིང་འབྲོག་པ་རེ་རེར་འཇུངས་སེམས་མེད་པར་རོགས་རམ་བྱེད་ཀྱི་ཡོད་ལ། གཞི་རིམ་དུ་བསྐྱོད་དེ་དམངས་ཀྱི་བསམ་འདུན་ཉན་པ་ནི་ཁོང་གིས་ཞིང་ལས་དང་གྲོང་གསེབ་ཀྱི་ལས་དོན་སྤེལ་བའི་ཐབས་མཆོག་རེད། ཁོང་གིས་གྲོང་གསེབ་སྒྱུར་བཅོས་བྱེད་པར་ངེས་པར་དུ་ཞིང་འབྲོག་པའི་དངོས་ཡོད་དགོས་མཁོར་གཞི་ཚུགས་དགོས་པ་གསལ་པོར་ཤེས་པས། ཞིང་འབྲོག་པའི་བསམ་འདུན་ནི་རང་ཉིད་ཀྱི་གཞི་འཛིན་ས་གཙོ་བོར་བྱེད་ཀྱི་ཡོད།

བསྟན་པས་ལོ་ལྟར་ཟླ་བ་ཁ་ཤས་སྤྱད་དེ་གཞི་རིམ་གྱི་འཐབ་ཕྱོགས་དང་པོར་བསྐྱོད་དེ་ལས་དོན་སྒྲུབ་བཞིན་ཡོད། ཁོང་གིས་ཞིང་ནང་དུ་བསྐྱོད་དེ་ཞིང་འབྲོག་པའི་ཐོན་སྐྱེད་དང་འཚོ་བའི་དཀའ་ངལ་དང་རེ་སྒུག་ནན་ཏན་གྱིས་ཉན་པ་དང་ཆབས་ཅིག་ཟིན་བྲིས་འགོད་པ་དང་། དགོས་ངེས་ཀྱི་སྐབས་སུ་གནད་དོན་ཐག་གཅོད་བྱེད་ཐབས་ཀྱང་འདོན་གྱི་ཡོད།

ཐེངས་ཤིག་བརྔས་མ་ཐག་པའི་གྲོ་ཞིང་ཞིག་གི་ནང་དུ་བསྟན་པར་ངལ་རྩོལ་བྱེད་བཞིན་པའི་རྒན་རྒོན་ཞིག་འཕྲད་པ་དང་། བསྟན་པ་ཡོང་བ་མཐོང་སྐབས་རྒད་པོས་གནས་ཚུལ་ཞིག་ཞུ་འདོད་ཀྱང་རེ་ཞིག་ཐེ་ཚོམ་གྱི་དབང་དུ་གྱུར། དེ་རྗེས་ཅི་འཕྲོས་མོལ་འཕྲོས་ཅུང་ཙམ་བྱས་པ་ན་རྒད་པོ་དེས་ད་གཟོད་སེམས་རྣལ་ལ་ཕབ་ནས“མ་གཞི་ད་ཆ་ཞིང་ཁ་རྨོ་སྟངས་ཚན་རིག་དང་མཐུན་ལ་འཕྲུལ་ཆས་སྤྱོད་ཚད་ཀྱང་མང་དུ་འགྲོ་གི་ཡོད། འོན་ཀྱང་ང་དང་འདྲ་བའི་ལོ་ན་མཐོ་ལ་ཡིག་ངོ་མི་ཤེས་པའི་ངོས་ནས་བཤད་ན་ལག་ཆ་ཇི་ཙམ་ཡག་པོ་ཡོད་ནའང་བཀོལ་སྤྱོད་མ་ཐུབ་སྟབས་སྔོན་ཆད་ལྟར་ལག་གཉིས་ལ་མ་བརྟེན་ཀ་མེད་རེད”ཅེས་བསྟན་པར་བཤད།

རྒད་པོའི་སྐད་ཆ་ལས་བསྟན་པས་ལས་དོན་འགའ་རེའི་ཐད་ད་དུང་སྣང་མེད་ཤོར་བ་དང་ཞིང་འབྲོག་པར་དེང་རབས་ཅན་གྱི་སྒྲིག་ཆས་མཁོ་བ་མ་ཟད་ད་དུང་སྒྲིག་ཆས་དེ་དག་སྤྱོད་པའི་རྩལ་ནུས་ཀྱང་ཁོང་དུ་ཆུད་དགོས་པའི་ངོས་འཛིན་ཟབ་མོ་བྱུང་། ཁ་གྱེས་ཁར་རྒད་པོའི་ལག་ནས་བཟུང་སྟེ“ང་ཚོས་ཡིན་གཅིག་ཐབས་ཤེས་ཡོད་རྒུ་བཏོན་ནས་གནད་དོན་དེ་དང་དེ་འདྲ་བ་ཐག་གཅོད་བྱེད་ངེས་ཡིན། ཁྱེད་རང་བློ་བདེ་པོ་བྱོས”ཞེས་ཁས་བླངས།

ལས་ཁུངས་སུ་ལོག་རྗེས་བསྟན་པས་འཕྲལ་མར་བྱ་སྤྱོད་སྤེལ་ནས་གནད་དོན་ཐག་གཅོད་བྱེད་ཐབས་བཙལ། མཐར་མ་དངུལ་བརྩོན་ལེན་བྱས་ཏེ་འབྲེལ་ཡོད་ཁྱབ་ཁོངས་ཀྱི་རིགས་གཅིག་མཁས་ཅན་གདན་དྲངས་ནས་རྒད་པོ་ཁོང་ལྟར་གྱི་རྩལ་ནུས་མི་འདང་བའི་ཞིང་འབྲོག་པར་རྩལ་ནུས་གསོ་སྦྱོང་བྱས་ཤིང་། གསོ་སྦྱོང་གི་ནང་དོན་ཞིང་འབྲོག་པའི་དངོས་ཡོད་དགོས་མཁོ་དང་འཚམ་པོ་ཡོང་ཆེད་བསྟན་པས་བརྒྱུད་རིམ་ཧྲིལ་པོར་ཞུགས་ཏེ། གསོ་སྦྱོང་གི་ནད་དོན་ལ་རིགས་པའི་གཞུང་ལུགས་ཀྱི་ཤེས་བྱ་ཡོད་པ་མ་ཟད་སྤྱོད་ཤས་ཆེ་བའི་འགན་ལེན་བྱས་པ་རེད།

2024ལོའི་ཆབ་མདོ་གྲོང་ཁྱེར་གྱི་གཞི་རིམ་གྱི་ཞིང་ལས་ལག་རྩལ་ཁྱབ་གདལ་མ་ལག་སྒྱུར་བཅོས་དང་འཛུགས་སྐྲུན་རྣམ་གྲངས་ཀྱི་གསོ་སྦྱོང་འཛིན་གྲྭའི་འགོ་འཛུགས་མཛད་སྒོའི་ཐོག བསྟན་པས་གསོ་སྦྱོང་ནང་ཞུགས་མཁན་ལ“ཁྱེད་ཚོ་ནི་ཞིང་ལས་གྲོང་གསེབ་འཕེལ་རྒྱས་ལ་སྐུལ་འདེད་གཏོང་མཁན་གཙོ་བོ་ཡིན་པས། ཐེངས་འདིའི་སློབ་སྦྱོང་གི་གོ་སྐབས་གང་ལེགས་སྤྱད་དེ་སྦྱངས་པར་གྲུབ་འབྲས་ཐོན་པ་དང་སྦྱངས་པ་གོ་ཆོད་པར་བྱས་ཐོག ཕྱིར་ལོག་རྗེས་ཞིང་འབྲོག་པ་དེ་བས་མང་བར་དངོས་ཡོད་གནད་དོན་ཐག་གཅོད་རོགས་བྱས་ཏེ་ཐོན་འཕར་འབབ་འཕར་ཡོང་བར་བྱེད་དགོས”ཞེས་བཤད།

མིག་སྔའི་བར་བསྟན་པས་སྤྲད་པའི་མཉམ་སྡེབ་དཔལ་འབྱོར་རྩ་འཛུགས་ཀྱི་ཐོ་འགོད་ལག་ཁྱེར་ཁྱོན་དེབ་1107ཡོད་པར་མཉམ་སྡེབ་དཔལ་འབྱོར་གྱི་ཁོངས་མི་ཁྲི་65ཟིན་ཡོད། ཁ་རུབ་ཆུས་སུ་འཚོགས་པའི་མཉམ་སྡེབ་དཔལ་འབྱོར་རྩ་འཛུགས་ཀྱི་ཐོ་འགོད་ལག་ཁྱེར་སྤྲོད་པའི་མཛད་སྒོའི་ཐོག་བསྟན་པས་ལག་ཁྱེར་རེ་རེ་བཞིན་རང་ངོ་མས་ཡུལ་མིའི་ལག་ཏུ་སྤྲད་པ་དང་། ལག་ཁྱེར་རག་རྗེས་ཀྱི་ཡུལ་མི་ཚོའི་སྤྲོ་སྣང་མཐོང་བ་ན། ཁོང་ལ་དཀའ་ལས་དེ་དག་རྒྱག་རིན་ཡོད་པའི་མྱོང་ཚོར་ཟབ་མོ་བྱུང་།

ཡུན་རིང་བོར་འཐབ་ཕྱོགས་དང་པོར་བཅར་འདྲི་བྱེད་རིང་། བསྟན་པས་མིག་སྔར་གྲོང་ཚོའི་མཉམ་སྡེབ་མང་པོར་གསར་སྤེལ་བེད་སྤྱོད་བྱེད་རིན་ཡོད་པའི་ཐུན་མོང་མ་ཡིན་པའི་ཐོན་ཁུངས་མང་པོ་ཡོད་པ་ཤེས་རྟོགས་བྱུང་། ཁོང་གིས་ལས་དོན་པ་སྒྲིག་འཛུགས་བྱས་ཏེ་གྲོང་གསེབ་ཀྱི་མཉམ་སྡེབ་མ་དངུལ་དང་། རྒྱུ་ནོར། ཐོན་ཁུངས་བཅས་ལ་ཕྱོགས་ཡོངས་ནས་དཔྱད་དཔོག་བྱས་ཏེ་འཕེལ་རྒྱས་ཀྱི་མི་མངོན་པའི་སྟོབས་ཤུགས་ལྡན་པའི་རྣམ་གྲངས་མང་པོ་ཞིག་སྔོག་འདོན་ཐུབ་ཡོད། གྲོང་གསེབ་ཏུ་ལས་དོན་སྤེལ་བར་ཏན་ཏིག་དང་ཞིབ་ཚགས་ནས་དམ་འཛིན་བྱ་རྒྱུ་གལ་འགངས་ཤིན་ཏུ་ཆེ་བས། གྲོང་ཚོ་དང་དུད་ཚང་དུ་སྐྱོད་སྐབས་ཁོང་གིས་དམིགས་སུ་གྲོང་ཚོའི་ཚོང་འདུས་སུ་བསྐྱོད་དེ་ཚོང་པ་ཚོ་དང་གླེང་མོལ་བརྒྱུད་ཁྲོམ་རའི་དགོས་མཁོ་ཤེས་རྟོགས་བྱས་ཏེ། ཡུལ་མིར་འདེབས་འཛུགས་དང་གསོ་སྤེལ་གྱི་ཐབས་ཇུས་དེ་བས་གནད་སྨིན་འདོན་རྒྱུར་རམ་འདེགས་བྱེད་ཀྱི་ཡོད།

ལོ་འདི་དག་རིང་། བསྟན་པས་སྔ་ཕྱི་བར་གསུམ་དུ་བྱ་སྤྱོད་དངོས་ལ་བརྟེན་ནས་ལས་སྒྲུབ་དང་འགན་འཁྲི་ལེགས་པར་འཁུར་ཞིང་། མ་འོངས་པར་རེ་བས་ཁེངས་པའི་ཞིང་ས་གཤིན་པོ་འདིའི་ཐོག་བསྟན་པའི་མདུན་སྐྱོད་ཀྱི་གོམ་སྟབས་དེ་བས་བརྟན་དུ་འགྲོ་ངེས་ངེས་རེད།